བཞི་པ་དུས་གང་གི་ཚེ་བརྗོད་པ།

བཞི་པ་དུས་གང་གི་ཚེ་བརྗོད་པ་ནི།

ལས་བརྗོད་པ་གསུམ་པ་མཇུག་སྡུད་དང་བཅས་པ་བྱས་མ་ཐག་ཏུ་བརྗོད་དེ། རྩ་བར། དེ་མ་ཐག་ཏུ། ཞེས་པས་སོ། །ལྔ་པ་དངོས་པོ་གང་བརྗོད་པ་ནི།གྲིབ་ཚོད་དང༌། ཉིན་མཚན་གྱི་ཆ་དང༌། ཚེས་གྲངས་དང༌། ཟླ་བའི་ངོ་དང༌། ཟླ་བ་དང༌། དུས་ཚོད། ལོ་འགྲོས་དང་བདུན་བརྗོད་པ་སྟེ། ལོ་འགྲོས་བརྗོད་པ་ནི་འདུལ་བ་ནས་མ་གསུངས་ཀྱང༌། འདིར་ཡུལ་ཆོས་དང་བསྟུན་པའི་ཕྱག་ལེན་ཡིན་ནོ། །དྲུག་པ་ཚུལ་ཇི་ལྟར་བརྗོད་པ་ནི། བརྗོད་པའི་ཚེ་ན་གྲིབ་ཚོད་འདི་ལ་ཁྱོད་བསྙེན་པར་རྫོགས་སོ་ཞེས་པ་ནས་འགོ་བརྩམས་ཏེ་ཕྲ་རིམ་ནས་བརྗོད་དེ། ལུང་ནས་བཤད་པའི་གོ་རིམ་མོ། །བརྩི་བའི་ཚེ་ན་ཁྱོད་བསྙེན་པར་རྫོགས་ནས་ལོ་དུ་ལོན་ཞེས་པ་ནས་འགོ་བརྩམས་ཏེ། རགས་རིམ་ནས་བརྩི་སྟེ། བསྡུས་པ་ལས་དང་པོ་ལོ་གྲངས་དྲི་བར་བྱའོ། །དུས་ཚོད་ཀྱང་ངོ་ཞེས་བཤད་ཅིང༌། རགས་རིམ་ལོ་དང་ཟླ་བ་ལ་སོགས་པ་སྔ་ཕྱི་བྱུང་ན་གྲིབ་ཚོད་ལ་སོགས་པ་ཕྲ་རིམ་བརྩི་མི་དགོས་པས་ཚེགས་ཆུང་བའི་དགོས་པ་ཡོད་པའི་ཕྱིར་རོ། །སྐྱེས་བུ་ཉིད་ནི། ཊཱི་ཀ་ལས། ཐུར་མ་དེའི་ཐ་སྙད་ནི་སྐྱེས་བུ་ཉིད་ཅེས་བརྗོད་པར་བྱ་སྟེ། ཞེས་དང༌། གཞི་འགྲེལ་ལས། ཐུར་མ་དེའི་ཐ་སྙད་ནི་སྐྱེས་བུ་ཞེས་བྱ་སྟེ། ཐུར་མས་གཞལ་བའི་གྲིབ་མ་ཐུར་མའི་ཚད་ཙམ་རེ་རེ་ལ་གྲིབ་ཚོད་སྐྱེས་བུ་རེ་རེ་ཞེས་བྱ། ཞེས་གསུངས་སོ། །སོར་བཞི་ཅན་གྱི་ཐུར་མ་ལ་སྐྱེས་བུ་དང་སོར་གཅིག་ལ་རྐང་བ་ཞེས་བརྗོད་དོ། །རྩ་བར། ཉིན་མཚན་གྱི་ཆ་སྔ་དྲོ་ལ་སོགས་པ་ཞེས་པ་སྔ་དྲོ་དངོས་སུ་གསུངས་ནས། ལ་སོགས་ཀྱིས་ཉེར་གཅིག་བསྡུས་ཏེ། ལུང་གཞི་ལས་ཉིན་མཚན་གྱི་ཆ་སྔ་དྲོ་དང་གུང་དང་ཕྱི་དྲོ་དང་མཚན་མོའི་ཐུན་དང་པོ་དང༌། ཐུན་དང་པོའི་ཕྱེད་དང༌། གུང་ཐུན་དང༌། གུང་ཐུན་གྱི་ཕྱེད་དང༌། ཐུན་ཐ་མ་དང༌། ཐ་མའི་ཕྱེད་དང༌། སྐྱ་རེངས་མ་ཤར་བ་དང༌། སྐྱ་རེངས་ཤར་བ་དང༌། ཉི་མ་མ་ཤར་བ་དང༌། ཉི་མ་ཤར་བ་དང༌། ཉི་མ་བརྒྱད་ཆ་ཤར་བ་དང༌། ཉི་མ་བཞི་ཆ་ཤར་བ་དང༌། གུང་ཚིགས་མ་ཡོལ་བ་དང༌། ཉི་མ་བཞི་ཆ་ལུས་པ་དང༌། ཉི་མ་བརྒྱད་ཆ་ལུས་པ་དང༌། ཉི་མ་མ་ནུབ་པ་དང༌།ཉི་མ་ནུབ་པ་དང༌། རྒྱུ་སྐར་རྣམས་མ་ཤར་བ་དང༌། རྒྱུ་སྐར་རྣམས་ཤར་བ་སྟེ། ཉི་ཤུ་རྩ་གཉིས་གསུངས་པ་དེ་རྣམས་སོ། །སྐབས་འདིར་ལུང་ལས་ཉི་མ་བརྒྱད་ཆ་ཤར་བ་དང་བཞི་ཆ་ཤར་བ་དང༌། ཉི་མ་བཞི་ཆ་ལུས་པ་དང་བརྒྱད་ཆ་ལུས་པ་ཞེས་གསུངས་པ་ཉི་མའི་དཀྱིལ་འཁོར་ལ་བརྩིའམ་ནམ་མཁའི་གོ་ལ་བརྩི་ཞེ་ན། གཞི་འགྲེལ་ལས། ཉི་མ་བརྒྱད་ཆ་ཤར་བ་དང་བཞི་ཆ་ཤར་བ་ཞེས་བྱ་བ་ནི་ཉི་མའི་དཀྱིལ་འཁོར་གྱི་བརྒྱད་ཆ་ཤར་བ་དང་བཞི་ཆ་ཤར་བའོ་ཞེས་བཤད་ཀྱང་མི་འཐད་དེ། ལུང་གཞི་ལས། ཉི་མ་ཤར་བ་དང༌། ཉི་མ་བརྒྱད་ཆ་ཤར་བ་དང༌། ཉི་མ་བཞི་ཆ་ཤར་བ་དང༌། གུང་ཚིགས་མ་ཡོལ་བ་དང་ཞེས་གོ་རིམ་དེ་ལྟར་གསུངས་པས་ནམ་མཁའི་གོ་ལ་བརྩི་བར་གྲུབ་ཅེས་མཚོ་ཊཱིཀ་ལས་གསུངས་སོ། །ལུང་ཕྲན་ཚེགས་ལས། ཕྱི་དྲོའི་བཞི་ཆ་དང་ཕྱི་དྲོའི་བརྒྱད་ཆ་ཞེས་གསུངས་ཤིང༌། ཉི་ཤར་དང་བརྒྱད་ཆ་བཞི་ཆ་གསུམ་ལ། ལུང་དགེ་སློང་མའི་རྣམ་འབྱེད་ལས། ཉི་མ་རྩེ་དང༌། དྲོས་བུ་ཆུང་དང༌། དྲོས་ཆེན། ཞེས་གསུངས་སོ། །ཉི་མ་བརྒྱད་ཆ་ཤར་བ་དང་བཞི་ཆ་ཤར་བ་ཞེས་པ་འདི་ལ་འགྱུར་རྙིང་གི་ཀརྨ་ཤ་ཏཾ་ལས་ཉི་མ་དྲོས་བུ་ཆུང་དང་ཉི་མ་དྲོས་པོ་ཆེ་ཞེས་བཤད་ཅིང༌། རྣམ་འབྱེད་འགྲེལ་བ་ལས། ཉི་མའི་བརྒྱད་ཆ་ཤར་བ་ཞེས་བྱ་བ་ནི་ནམ་མཁའི་ཕྱོགས་ལ་འགྲོ་བའི་ལམ་གྱི་བརྒྱད་ཆ་ཆོད་པའོ། །ཞེས་གསུངས་སོ། །ནམ་མཁའི་གོ་ལའི་བརྒྱད་ཆ་དང་བཞི་ཆ་ཡིན་པ་ལ་གཞུང་ལྔ་ཡོད། དུས་ཚོད་དེ་དག་ནི་ལྔའོ། །ཞེས་པའི་འགྲེལ་ཆུང་ལས་དུས་ལ་རྣམ་པ་ལྔ་ཡོད་དེ་སྟོན་ཟླ་ཐ་ཆུང་ཉ་བ་ནས་འགོ་བཟུང་སྟེ་བརྩིའོ་ཞེས་སོ། །དགུན་གྱི་དུས་ནི། གཞི་འགྲེལ་ལས། སྟོན་ཟླ་ཐ་ཆུང་ཉ་ནས་དཔྱིད་ཟླ་ར་བའི་ཉའི་བར་གྱི་ཟླ་བ་བཞི་ནི་དགུན་གྱི་དུས་སོ། །ཞེས་བཤད་དོ། །དེ་ནས་དུས་ཚིགས་རྣམས་མཐར་ཆགས་ཀྱིས་བརྩིའོ། །སྨིན་དྲུག་མགོ་རྒྱལ་མཆུ་དབོ་དང༌། །ནག་པ་ས་ག་ཆུ་སྟོད་སྣྲོན། །གྲོ་བཞིན་ཁྲུམས་སྟོད་ཐ་སྐར་ཏེ། །ཟླ་བ་ངོས་འཛིན་སྐར་མ་ཡིན། །ཞེས་བྱུང་བའོ། །འོ་ན་འདུལ་བ་ནས་དུས་ཚིགས་འབྱེད་ལུགས་མི་འདྲ་བ་གསུམ་གསུངས་པའི་རྒྱུ་མཚན་ཅི་ཞེ་ན། འདིར་ལོ་གཅིག་ལ་དུས་ཚིགས་ལྔར་གསུངས་པ་ནི། གདུལ་བྱ་ལྔ་ཚན་ལ་མོས་པ་དང་མཐུན་པར་བྱ་བའི་ཕྱིར་ཏེ། དགུན་ཟླ་བ་བཞི་དང༌། དཔྱིད་ཟླ་བ་བཞི་དང༌། དབྱར་ཟླ་བ་བཞི་ཡིན་ཡང༌། དབྱར་ལ་དུས་ཚིགས་གསུམ་དུ་བཅད་དེ་ལྔ་རུ་མཛད་ལ། སྐབས་འདིར་དུས་ཚིགས་ལྔར་བཤད་པ་ནི་དབྱར་ཐུང་ངུ་ཤི་བ་དང་འདྲ་བ་བདེ་བླག་ཏུ་རྟོགས་པའི་དགོས་པ་ཡོད་ཅེས་བཤད་དོ། །ཟླ་འཇོག་གི་སྐབས་སུ་ལོ་གཅིག་ལ་དུས་ཚིགས་གསུམ་དུ་གསུངས་པ་ནི་དུས་ཚིགས་སུ་བཅད་པའི་ཕྱག་དར་ཁྲོད་ཀྱི་ཚད་བདེ་བླག་ཏུ་རྟོགས་པར་བྱ་བའི་ཕྱིར་རོ། ། གསོ་སྦྱོང་གི་གཞིར་ལོ་གཅིག་ལ་དུས་ཚིགས་དྲུག་ཏུ་གསུངས་པ་ནི། གསོ་སྦྱོང་བཅུ་བཞི་པ་བདེ་བླག་ཏུ་རྟོགས་པའི་ཕྱིར་རོ། །