དྲུག་པ་སེམས་སེམས་བྱུང་བཤད་པ།
དྲུག་པ་སེམས་སེམས་བྱུང་བཤད་པ་ལ།
དེ་གཉིས་ཀའི་མཚན་ཉིད་བཤད་པ། མཚུངས་ལྡན་རྣམ་པ་ལྔ་མཚུངས་བཤད་པ། དེ་གཉིས་རྫས་ཐ་དད་བཤད་པ། དེ་གཉིས་ཀྱི་དབྱེ་བ་བཤད་པ་དང་བཞི། དབུས་མཐའ་རྣམ་འབྱེད་ལས། དེ་ལ་དོན་མཐོང་རྣམ་པར་ཤེས། །དེ་ཡི་ཁྱད་པར་སེམས་ལས་བྱུང༌། །ཞེས་གསུང་པ་ལྟར། དོན་གྱི་ངོ་བོ་རིག་པར་བྱེད་པའི་ཤེས་པ། སེམས་ཀྱི་མཚན་ཉིད། མཚན་གཞི་ནི། མིག་གི་རྣམ་པར་ཤེས་པ་ལྟ་བུའོ། །རྣམ་པར་ཤེས་པའི་མཚན་ཉིད་དམ་རང་བཞིན་ནི། ཡུལ་གྱི་ངོ་བོ་རྣམ་པར་རིག་ཅིང་ཤེས་པར་བྱེད་པའི་མཚན་ཉིད་ཅན་ཏེ། རང་རང་གི་དམིགས་པའི་ངོ་བོ་སོ་སོར་རྟོགས་པའི་རང་བཞིན་ཅན་ནི་སེམས་སམ་རྣམ་པར་ཤེས་པ་ཞེས་བྱའོ། །དོན་གྱི་ཁྱད་པར་རིག་པར་བྱེད་པའི་ཤེས་པ། སེམས་བྱུང་གི་མཚན་ཉིད། མཚན་གཞི་ནི། དད་པ་དང༌། བརྩོན་འགྲུས་ལྟ་བུའོ། །དེའང་གཟུགས་སྒྲ་ལ་སོགས་པའི་ཆོས་ཅན་རྟེན་ལྟ་བུར་སྣང་བ་ནི་དོན་གྱི་ངོ་བོ་ཡིན་ལ། དེ་རྣམས་དམིགས་པར་བྱེད་པ་རྣམ་པར་ཤེས་པའི་ཚོགས་བརྒྱད་ནི་སེམས་ཡིན་ཞིང༌། བདེ་སྡུག་གི་གནས་ཡིད་དུ་འོང་མི་འོང་ལ་སོགས་པ་དངོས་པོ་དེའི་ཆོས་བརྟེན་པ་ལྟ་བུར་སྣང་བ་ནི་དོན་གྱི་ཁྱད་པར་ཡིན་ལ། དེ་རྣམས་དམིགས་པར་བྱེད་པ་ཚོར་བ་ལ་སོགས་པ་ལྔ་བཅུ་རྩ་གཅིག་ནི་སེམས་ལས་བྱུང་བ་ཡིན་ནོ། །