གསུམ་པ་གདམས་ངག་བཅུ་གཅིག་བརྗོད་པ།
གསུམ་པ་གདམས་ངག་བཅུ་གཅིག་བརྗོད་པ་ནི།
རྩ་བར། ༡གནས་རྣམས་བརྗོད་པར་བྱའོ། །༢ ལྟུང་བར་གྱུར་བའི་ཆོས་རྣམས་དང༌། ༣ དགེ་སྦྱོང་བྱེད་པའི་ཆོས་རྣམས་ཀྱང་ངོ༌། །༤ མཆོག་ཏུ་འདོད་པར་བྱ་བ་ཡང་དག་པ་ཉིད་ཀྱིས་རྫོགས་པ་ཉིད་བརྗོད་ནས། ༥ ཚུལ་ཁྲིམས་ཀྱིས་མཉམ་པར་གྱུར་པ་ཉིད་བསྒྲུབ་པ་ངེས་པར་སྦྱར་བར་བྱའོ། །༦ཚུལ་དང་འབྲེལ་བའི་གཟུགས་བརྙན་དང༌། ༧ དུལ་བར་གནས་པ་ཉིད་དང༌། ༨ དགོས་པ་རྗེས་སུ་སྒྲུབ་པ་ལ་ཡང་ངོ། །༩ མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་བསྒྲུབ་པར་འགྱུར་བ་ཉིད་ཀྱང་བརྗོད་པར་བྱའོ། །༡༠གུས་པ་ལ་ཡང་ངེས་པར་སྦྱར་བར་བྱའོ། །༡༡བསྒྲུབ་པར་བྱ་བ་བརྗོད་པ་དང་བཅས་པ་ཡང་ངོ། །ཞེས་པས་བསྟན་ཏོ། །འདིའི་དོན་འཆད་པ་ལ་གཉིས་ཏེ། སྐབས་འདིའི་གདམས་ངག་གི་དོན་དངོས་དང༌། འཕྲོས་དོན་སྦྱངས་པའི་ཡི་དམ་བསྟན་པའོ། །དང་པོ་ལ་དྲུག་ལས་དང་པོ་དགོས་པའི་དོན་ནི་བསླབ་བྱ་རགས་རིམ་གོ་བ་ལ་བརྟེན་ནས་བསླབ་པ་མི་ཉམས་པར་འགྱུར་བ་དང༌། གདམས་ངག་མ་བརྗོད་པའི་ཉེས་པ་ཁེགས་པའོ། །