ལྕམ་སྤྲུལ་ལ་སྤྲིང་པའི་ཀ་ཕྲེང་རྗེས་མ།
༈ ལྕམ་སྤྲུལ་ལ་སྤྲིང་པའི་ཀ་ཕྲེང་རྗེས་མ་བཞུགས། ཀ་དག་རྫོགས་ཆེན་བླ་མས་རྗེས་བཟུང་ཡང་། །ཁ་ལྟ་སྟོང་སྐད་ལྟ་བ་དྲེད་པོར་ཤོར། །ག་དར་དམ་སྡོམ་འཆལ་བའི་བཙུན་གཟུགས་བྱས། །ང་ནི་མདོ་མེད་སྤྲང་པོ་སྨྱོན་པ་ལགས། །ཅ་ཅོའི་སྒྲ་ཙམ་ཆོ་གས་གཞན་མགོ་བསྐོར། །ཆ་ལུགས་གཞན་སྣང་བསྒྱུར་བྱེད་བཟང་བརྫུ་མཁན། །ཇ་དངུལ་ནོར་ལ་བརྐམ་ཤིང་འཛིན་ཆགས་ཆེ། །ཉ་བཞིན་ཟས་ལ་སྲེད་པའི་ཕུང་རྒན་ལགས། །ཏ་ཐཱ་ག་ཏའི་བསྟན་ཞུགས་དགེ་སློང་བྱས། །ཐ་མལ་པ་བཞིན་དུག་ལྔ་ནང་ནས་འཕེལ། །ད་ལྟ་མཁས་གྲུབ་གྲལ་སྙོགས་མཐོན་པོར་རློམས། །ན་སོང་རྒན་པོ་ཁྲམ་པ་གཡོ་ཅན་ལགས། །པ་པཾ་སྡིག་བསོགས་དཀོར་རྫས་ཁྱིམ་ལ་སྦྱིན། །ཕ་རོལ་ཉེས་ལྟུང་རྣམ་སྨིན་རང་གིས་ཁུར། །བ་གམ་བྲག་ལ་སྒྲུབ་ཚུགས་མ་ཟིན་པའི། །མ་རུང་ཁྱིམ་པའི་མཆོད་གནས་གཏོ་བ་ལགས། །ཙ་མ་ར་སོགས་དཀོར་ནོར་བཀོལ་སྤྱོད་བྱས། །ཚ་སྐྱུར་ཟས་ཀྱི་གཡོ་སྐོལ་བྱེད་ལ་མཁས། །ཛ་ལང་དམུ་རྒོད་རང་རྒྱུད་མ་ཐུལ་བའི། །ཝ་ངན་ཚོས་ཀྱི་བསྒྱུར་བའི་བླ་གཟུགས་ལགས། །ཞྭ་ལྷམ་གོས་སོགས་ཕྱི་ཚུལ་བག་མ་བྱས། །ཟ་ཐབས་ལག་ལེན་མི་ཤེས་གཞན་ལ་རེ། །འ་རེ་འུ་རེའི་ངང་དུ་མི་ཚེ་ཟད། །ཡ་ངའི་གཡང་སར་མཆོང་བའི་བྱིས་པ་ལགས། །ར་རྒན་རྩྭ་བཞིན་གང་རྙེད་དཀོར་ཟས་ཟོས། །ལྭ་བའི་འདབས་ཟད་རྐང་པའི་ལྷམ་ཡང་རྡོལ། །ཤ་ཟད་པགས་པའི་གཉེར་མས་རྒས་གཟུགས་སྟོན། །ས་ཁྱིམ་རྡིབ་ལ་ཁད་པའི་རྒད་པོ་ལགས། །ཧ་ཅང་རང་སྐྱོན་ངན་པའི་མཚང་རིག་ནས། །ཨ་དོན་སྟོན་པའི་དྲིན་ཆེན་བླ་མ་ལ། །ཨ་ཧོ་རྒྱུན་དུ་གསོལ་བ་འདེབས་བཞིན་དུ། །ཨ་ལགས་སྤྲུལ་སྐུའི་མདུན་དུ་ཡིག་ཚར་སྤྲིང་།།