གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཡང་ཉ་ཊཱིཀ་ལས། བྱང་སེའི་སྦྱོར་ལམ་ཁྱད་པར་ལྔ་ལྡན་དུ། ཉན་རང་གི་སྦྱོར་ལམ་ལྔ་བྲལ་དུ། ཞེས་བྱང་སེམས་ཀྱི་སྦྱོར་ལམ་དེ་ཐེག་དམན་གྱི་སྦྱོར་ལམ་ལས་ཁྱད་པར་ལྔས་ཁྱད་འཕགས་པར་གསུངས་པ་མི་འཐད་དཻ། མདོ་ལུགས་མ་ལས། དམིགས་པ་དང་ནི་རྣམ་པ་དང༌། །རྒྱུ་དང་ཡོངས་སུ་འཛིན་པ་ཡིས། །བྱང་ཆུབ་སེམས་དཔའ་སྐྱོབ་པ་ཡིས། །དྲོད་སོགས་བདག་ཉིད་ཇི་བཞིན་དུ། །རྣམ་རྟོག་བཞི་པོ་ལྡན་རྟེན་པ། །ཆུང་དང་འབྲིང་དང་ཆེན་པོ་རྣམས། །ཉན་ཐོས་བསེ་རུ་ལྟ་བུ་དང༌། །བཅས་པ་དག་ལས་ཁྱད་པར་འཕགས། །ཞེས་པ་འདིས་བྱང་ཆུབ་སེམས་དཔའི་ངེས་པར་འབྱེད་པའི་ཆ་མཐུན་པ་རྣམས་ཉན་རང་གི་ངེས་པར་འབྱེད་པའི་ཆ་དང་མཐུན་པ་དག་ལས་ཆོས་སྤྱོད་བཞིས་ཁྱད་པར་དུ་འཕགས་པར་བསྟན་ཏོ། །ཞེས་གསུངས་པའི་ཕྱིར་ཟེར་ན་ཅུང་ཟད་བརྟག་པའི་གནས་སོ། །ཡང་ཉ་ཊཱིཀ་ལས། གང་གིས་ན། ལྔ་ཡིས་ཏེ་འཆད་པར་འགྱུར་བའི་དམིགས་པའི་ཁྱད་པར་གྱི་ངོ་བོ་ཉིད་བདེན་མེད་སྒྱུ་མ་ལྟར་རྟོགས་པའི་བདེན་པ་བཞིའི་དངོས་པོ་ལ་དམིགས་པ་དང༌། མི་རྟག་སོགས་ཆོས་སུ་ལྟ་བའི་མངོན་ཞེན་གྱི་གཉེན་པོ་ཉིད་ཀྱིས་མངོན་པར་ཞེན་པ་ལ་སོགས་པ་མེད་པའི་རྣམ་པར་ཞུགས་པའི་ཤེས་རྣམ་དང༌། ཞེན་བྱར་མེད་པའི་ཆོས་ཉིད་དོན་རྣམ། ཐེག་པ་གསུམ་ཅར་གྱི་སྤངས་རྟོགས་ཐོབ་པའི་ཐེག་ཆེན་མཐོང་ལམ་གྱི་རྒྱུའི་ངོ་བོའམ་གཙོ་བོ་དང༌། ཡང་ན་ཐེག་པ་གསུམ་ཅར་གྱི་མྱང་འདས་ཐོབ་པའི་རྒྱུ་ཞེས་གསེར་རོ། །ཐེག་ཆེན་དགེ་བའི་བཤེས་གཉེན་སེམས་མི་འགོང་བ་སོགས་འཚང་རྒྱ་བའི་ཐབས་ལ་མཁས་པའི་མཚན་ཉིད་ཅན་གྱིས་སངས་རྒྱས་ཀྱི་བར་དུ་ཡོངས་སུ་འཛིན་པ་སྟེ་བདག་གིར་བྱས་པ་དང་ལྡན་པ་དང༌། ཞེས་གསུངས་པའི་ཁྱད་ཆོས་དེ་དག་གིས་ཁྱད་པར་འཕགས་ཚུལ་ལ་དཔྱད་པར་བྱའོ། །གཞན་ཡང་གཞི་གྲུབ་ན་ཐེག་ཆེན་སྦྱོར་ལམ་དང་ཐེག་དམན་སྦྱོར་ལམ་གཉིས་ཀྱི་དམིགས་པ་ཡིན་པས་ཁྱབ་པ་ཡོད་དམ་ཅི། ཁྱབ་པ་ཡོད་ན་དམིགས་པའི་སྒོ་ནས་ཐེག་ཆེན་སྦྱོར་ལམ་དེ་ཐེག་དམན་སྦྱོར་ལམ་ལས་ཁྱད་པར་འཕགས་ཚུལ་གང་ཡིན། ཁྱབ་པ་མེད་ན་དེ་ལ་ཆོས་ཉིད་དང་བདེན་སྟོང་སྒྱུ་མ་ལྟ་བུའི་མི་རྟག་པ་སོགས་འཇོག་དགོས་ལ། དེ་མི་རིགས་ཏེ། དམན་ལམ་དུ་ལྟུང་བའི་ཉན་ཐོས་ལ་དེ་རྟོགས་པ་ཡོད་པའི་ཕྱིར་ཟེར་ན་དཔྱད། ཡང་མདོ་ལུགས་མ་ལས། དམིགས་པ་མི་རྟག་ལ་སོགས་པ། །བདེན་པའི་རྟེན་ཅན། ཞེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཀྱི་དམིགས་པ་བསྟན་ཏོ། །ཞེས་དང༌། དེས་ནི་རྣམ་པ་མངོན་ཞེན་ལ་སོགས་འགོག་ཅེས་པ་འདིས་ངེས་འབྱེད་ཡན་ལག་རྣམ་བཞི་པོ་ཐམས་ཅད་ཀྱི་རྣམ་པ་བསྟན་ཏོ། །ཞེས་དང༌། གཟུགས་སོགས་འདུ་འགོད་གནས་བྲལ་དང༌། །ཞེས་པས་དྲོད་ཆུང་ངུ་དང༌། ཞེས་གསུངས་པ་རྣམས་ཉ་ཊཱིཀ་ལས་སྦྱར་ཚུལ་དང་མཚམས་འཛིན་ཚུལ་དང་མི་མཐུན་པས་ཉ་ཊཱིཀ་ལས་བཤད་པ་དེའི་དགོངས་པ་འཚོལ་དགོས་སོ། །སྐབས་འདིའི་རྟོག་པ་བཞི་རིམ་བཞིན་ཐེག་ཆེན་སྦྱོར་ལམ་དྲོད་སོགས་དང་མཚུངས་ལྡན་ནམ་དྲོད་སོགས་ཡིན་ཏེ། ཉ་ཊཱིཀ་ལས། སྟོང་ཉིད་རྟོགས་པའི་གཟུང་འཛིན་གྱི་རྣམ་རྟོག་བཞི་བོ་མཚུངས་ལྡན་དུ་བསྟེན་པ་སྟེ་ཞེས་དང༌། སྤྱིར་བཤད་པ་ཙམ་ཡིན་གྱི་འདི་བཞི་ཆ་མཐུན་བཞི་རེ་རེར་མཚུངས་ལྡན་དུ་བཤད་པས་གཞི་མཐུན་མེད་དོ། །ཞེས་དང༌། དེ་ཡང་རྫས་ཐ་དད་པའི་མཚུངས་ལྡན་མིན་གྱི་ཆ་མཐུན་བཞི་བོ་དེ་དེ་ཡིན་པའི་ཚུལ་གྱིས་ལྡན་པའོ། །ཞེས་དང༌། མཚན་ཉིད་ནི། འདིར་བཤད་ཉོན་མོངས་གཟུང་རྟོག་གི་ནི་བྱང་སེའི་དྲོད་ལ་ལྡན་པའི་གཟུང་རྟོག་གང་ཞིག་གཟུང་བ་ཀུན་ཉོན་ཙམ་བདེན་པའི་རང་བཞིན་མེད་པར་འཛིན་པ། བྱང་སེའི་སྦྱོར་རྩེ་ལ་མཚུངས་པར་ལྡན་པ་གང་ཞིག་གཉེན་པོ་རྣམ་བྱང་རང་བཞིན་མེད་འཛིན་གྱི་གཟུང་རྟོག་གོ །ཞེས་དང༌། མཚན་ཉིད་ནི། བྱང་སེའི་སྦྱོར་ལམ་བཟོད་པ་ལ་མཚུངས་ལྡན་གྱི་འཛིན་རྟོག་གང་ཞིག རྫས་འཛིན་རང་བཞིན་མེད་པར་རྟོགས་པ། ཆོས་མཆོག་ལ་ཞེས་སོགས་འདོན་པ་བསྒྱུར་རོ། །ཞེས་དང༌། བྱང་སེའི་སྦྱོར་ལམ་དྲོད་མཉམ་བཞག་ལ་མཚུངས་པར་ལྡན་པའི་ཉོན་མོངས་གཟུང་རྟོག་ཆོས་ཅན། ཡུལ་ལས་འབྲས་དང་དེ་ཁོ་ནའི་དོན་ལ་རྨོངས་པའི་མ་རིག་པ་ལ། དགག་རྟོག་ཡིན་ཏེ། དེ་བདེན་པའི་རང་བཞིན་མེད་པར་རྟོགས་པའི་དྲོད་ཀྱི་རྟོག་པ་ཡིན་པས་སོ། །ཞེས་སོགས་སྦྱར་ཏེ་ཤོད་ཅིག ཅེས་གསུངས་པའི་ཕྱིར་ཟེར་ན། དེའི་དགོངས་པ་གཞན་དུ་འཚོལ་བ་ལས་རང་ལུགས་འཐད་ལྡན་དུ་མི་རུང་བར་སྣང་སྟེ། མདོ་ལུགས་མ་ལས། དེས་ན་དྲན་པ་ཉེར་བཞག་ནས་ངེས་འབྱེད་ཆ་མཐུན་གྱི་བར་གྱི་འཇིག་རྟེན་ལས་འདས་པའི་ཡེ་ཤེས་ཀྱང་མ་ཡིན་ལ་ཡང་དག་པ་མ་ཡིན་པའི་ཀུན་རྟོག་ཁམས་གསུམ་གྱིས་བསྡུས་པའི་སེམས་བྱུང་ཡང་མ་ཡིན་ཞིང༌། འཇིག་རྟེན་ལས་འདས་པའི་ཡེ་ཤེས་རྗེས་མཐུན་པ་ཡིན་པར་གསུངས་པ་འདིས་ནི།སྐབས་འདིའི་ངེས་འབྱེད་ཆ་མཐུན་རྣམས་ཕྱིན་ཅི་ལོག་འབའ་ཞིག་ཡིན་པ་དང༌། གཟུང་རྟོག་དང་འཛིན་རྟོག་ཡིན་པ་བསལ་བ་ཡིན་ནོ། །དེས་ན་འདི་རྣམས་ནི་དོན་ཇི་ལྟ་བ་བཞིན་དུ་ཡིད་ལ་བྱེད་པས་བསྡུས་པ་ངེས་པར་རྟོག་པ་ཞེས་བྱ་བ་ཡིན་ཏེ། ཞེས་གསུངས་པའི་ཕྱིར་རོ། །ཡང་ཐེག་མཆོག་ཟིན་བྲིས་ལས། འཛིན་གཉིས་ཞེས་པ་ནི་བཟུང་བར་འཛིན་པ་དང༌།འཛིན་པར་འཛིན་པ་གཉིས་ཡིན་ལ། དེ་ཡང་དབང་ཤེས་འཁོར་དང་བཅས་པས་བཞག་པ་ནི་བཟུང་བར་འཛིན་པ་དང༌། ཡིད་ཤེས་འཁོར་དང་བཅས་པས་བཞག་པ་ནི་འཛིན་པར་འཛིན་པའི་བག་ཆགས་སོ། །ཞེས་གསུངས་པ་ལ། མདོ་ལུགས་མ་ལས། སུམ་ཅུ་པའི་རབ་ཏུ་བྱེད་པར་གཟུང་རྟོག་དང་འཛིན་རྟོག་གཉིས་ལ་འཛིན་པ་གཉིས་ཞེས་གསུངས་པ་ནི་གཟུང་པར་འཛིན་པ་དང་འཛིན་པར་འཛིན་པ་ཞེས་པའི་དོན་ཏོ། །ཞེས་པས་དཔྱད་པར་བྱའོ། །འཕགས་པའི་ལུགས་ལ། ཉ་ཊཱིཀ་ལས། དེས་ན་གཟུང་རྟོག་དང་པོ་འདི་གཟུང་རྟོག་གཉིས་པའང་ཡིན་ལ། གཉིས་པ་ནི་དང་པོ་མིན་ཏེ། ཨཱརྱས། དང་པོ་དེ་ནི་གཉིས་པའང་ཡིན་པ་དེ་ནི། དཔེར་ན། གཟུང་བའི་རྣམ་པར་རྟོག་པ་དང་པོར་གྱུར་པ་དངོས་པོ་ཐམས་ཅད་པ་བཞིན་ནོ། །ཞེས་གསུངས་པ་སོགས་ཀྱི་དོན་གང་ཡིན་དཔྱད་པར་བྱའོ། །ཡང་ཐེག་ཆེན་སྦྱོར་ལམ་དེ་ཐེག་དམན་སྦྱོར་ལམ་ལས་ཡོངས་འཛིན་གྱི་སྒོ་ནས་ཁྱད་པར་འཕགས་ཚུལ་ལ། ཉ་ཊཱིཀ་ལས། ཡོངས་འཛིན་གྱིས་འཕགས་པར་མི་རིགས་ཏེ་སངས་རྒྱས་ཡོངས་འཛིན་ཡིན་པས་དེ་རིགས་ཅན་གསུམ་གའི་སྟོན་པར་འདྲ་བས་སོ་ཞེ་ན། དེར་འདྲ་ཡང་སྔར་བཤད་ལྟར་གྱི་ཐབས་ཤེས་རབ་སོགས་དེ་དང་ལྡན་པ་དངོས་སུ་རྗེས་སུ་འཛིན་མི་འཛིན་གྱི་ཁྱད་ཡོད་དེ། ནོར་བུའམ་ཉི་མ་བཞིན་ནོ། །ཞེས་དང༌། ཐེག་དམན་ལ། དེ་ལས། ཕྱི་ནང་གི་ཡོངས་སུ་འཛིན་པ་དང་བྲལ་བ་དང༌། འདིར་བསྟན་གཟུང་འཛིན་གྱི་རྣམ་པར་རྟོག་པ་རྣམ་པ་བཞི་དང་མཚུངས་པར་མི་ལྡན་ཞིང༌། ཞེས་ཕྱི་ནང་གི་ཡོངས་འཛིན་གཉིས་ཀྱི་ཁྱད་པར་འཕགས་པར་བཤད་པར་མི་འཐད་པར་ཐལ། མདོ་ལུགས་མ་ལས། འདིར་ཉན་རང་གི་ཡོངས་འཛིན་ལས་ཁྱད་པར་དུ་འཕགས་པ་ནི་བྱང་ཆུབ་སེམས་དཔའི་ཐབས་ལ་མཁས་པ་ཉིད་ཡིན་ནོ། །དེ་ལྟ་མ་ཡིན་ན་སངས་རྒྱས་གཅིག་ཉིད་ཀྱང་ཉན་རང་དང་བྱང་ཆུབ་སེམས་དཔའ་ཐམས་ཅད་ཀྱི་དགེ་བའི་བཤེས་གཉེན་དུ་འགྱུར་ཏེ། སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་ཞིང༌། །འཆད་དང་རིགས་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། །ཞེས་དང༌། དགེ་བའི་བཤེས་གཉེན་གཅིག་ཉིད་བཟང་ངན་གཉིས་ཇི་ལྟར་དབྱེ། ཞེས་དང༌། དེས་ན་དགེ་བའི་བཤེས་གཉེན་གྱི་ངོ་བོ་ཡོངས་སུ་འཛིན་པ་པོ་ཐུན་མོང་པ་ཡིན་ཡང༌། ཉན་རང་ལས་ཁྱད་པར་དུ་འཕགས་པའི་ཡོངས་འཛིན་གྱི་ངོ་བོ་ནི་བྱང་ཆུབ་སེམས་དཔའི་ཐབས་ལ་མཁས་པ་གང་ཡིན་པ་དེ་ཡིན་ནོ། །ཞེས་གསུངས་པའི་ཕྱིར་རོ། །དེས་ན་ཐེག་ཆེན་སྦྱོར་ལམ་པ་ལ་ཡོངས་སུ་འཛིན་པ་པོ་ཕྱིའི་ཡོངས་འཛིན་ཡོད་ཀྱང་དེའི་སྒོ་ནས་ཉན་རང་ལས་ཁྱད་པར་འཕགས་པ་མིན་ལ། དེས་འཛིན་ཚུལ་དང༌། ཐབས་མཁས་ཀྱི་ལམ་གྱིས་ཁྱད་པར་འཕགས་པ་ཡིན་པར་སྣང་ངོ༌། །

སྨྲས་པ། གདམས་ངག་ཆོས་ཀྱི་བདུད་རྩི་འཐུང་བ་ལས། །གདམས་དོན་རྟོགས་པའི་དྲོད་རྩེ་བཟོད་མཆོག་བཞི། །ཡོན་ཏན་པདྨའི་དགའ་ཚལ་བཞད་པའི་དཔྱིད། །སྐལ་ལྡན་རྐང་དྲུག་ཚོགས་རྣམས་མགྲོན་དུ་འབོད། །ཅེས་བར་སྐབས་ཀྱི་ཚིགས་སུ་བཅད་པའོ། །དེ་ཡན་གྱིས་ངེས་འབྱེད་ཆ་མཐུན་བཤད་ཟིན་ཏོ། །