གཉིས་པ་ཡུལ་གང་ལ་བརྗོད་པ།

གཉིས་པ་ཡུལ་གང་ལ་བརྗོད་པ་ནི།

གསར་དུ་བསྙེན་པར་རྫོགས་པ་ལ་སྟེ། བསྙེན་པར་རྫོགས་མ་ཐག་པ་ལ། ཞེས་པས་སོ། །གསུམ་པ་རྟེན་གང་གིས་བརྗོད་པ་ནི་ལས་ཀྱི་སློབ་དཔོན་གྱིས་ཏེ། ཀརྨ་ཤ་ཏཾ་ལས། དགེ་སློང་ལས་བྱེད་པས་གནས་རྣམས་བརྗོད་པར་བྱའོ། །ཞེས་གསུངས་སོ། །བཞི་པ་དུས་གང་གི་ཚེ་བརྗོད་པ་ནི། སྡོམ་པའི་ཐོབ་དུས་བརྗོད་མ་ཐག་ཏུ་བརྗོད་དེ། ལུང་གཞི་དང་ཀརྨ་ཤ་ཏཾ་ལས། དུས་ཚོད་བརྗོད་པ་དེའི་འོག་ཏུ་གནས་རྣམས་བརྗོད་པར་བྱ། ཞེས་གསུངས་སོ། །ལྔ་པ་ཚུལ་ཇི་ལྟར་བརྗོད་པ་ནི་ལྟུང་བར་འགྱུར་བ་ལ་སོགས་པ་སྤང་བའི་ཚུལ་དུ་བརྗོད་པ་དང༌། དགེ་སྦྱོང་དུ་བྱེད་པ་ལ་སོགས་པ་ཉམས་སུ་བླང་བའི་ཚུལ་དུ་བརྗོད་པའོ། །དྲུག་པ་དངོས་པོ་གང་བརྗོད་པ་ནི་གདམས་ངག་བརྗོད་པའོ། །འདི་ལ་ལྔ་ལས། དང་པོ་གདམས་ངག་གི་དབྱེ་བ་ནི། དགེ་སློང་ཕའི་སྐབས་སུ་མདོའི་སྒོ་ནས་ཕྱེ་ན་གདམས་ངག་བཅུ་གཅིག་སྟེ།དོན་གྱི་སྒོ་ནས་ཕྱེ་ན་ཉི་ཤུའོ། །དེའང་མདོ་དང་པོ་གསུམ་པོ་རེ་རེ་ལ་བཞི་བཞི་སྟེ་བཞི་གསུམ་བཅུ་གཉིས་དང༌། མཆོག་ཏུ་འདོད་པ་ལ་སོགས་པ་འོག་མ་བརྒྱད་དོ། །གདམས་ངག་བཅུ་གཅིག་གི་སྟེང་དུ་ལྕི་བའི་ཆོས་རྣམས་བརྗོད་པ་བསྣན་པས་དགེ་སློང་མ་རྣམས་ཀྱི་གདམས་ངག་ནི་བཅུ་གཉིས་སོ། །ཞིབ་ཏུ་ཕྱེ་ན་སུམ་ཅུ་རྩ་གཅིག་སྟེ་དེའང་གནས་རྣམ་པ་གསུམ་དང་ཕམ་པ་བརྒྱད་དང་ལྕི་བའི་ཆོས་བརྒྱད་དང་གཞན་རྣམས་དགེ་སློང་གི་སྐབས་དང་འདྲའོ། །གཉིས་པ་བསྡུ་བ་ནི་གཉིས་སུ་འདུས་ཏེ། བསླབ་བྱ་ཡུལ་ལ་གདམས་པ་དང༌། །སློབ་བྱེད་གཉེན་པོ་ལ་གདམས་པའོ། །དེའང་མདོ་དང་པོ་རྣམས་དང་འོག་མ་གཉིས་ཏེ་གོ་རིམ་བཞིན་ནོ། །གསུམ་པ་གྲངས་ངེས་པ་ནི། དགེ་སློང་གི་སྡོམ་པ་ཐོབ་མ་ཐག་པའི་སྐབས་འདིར་ལུང་ལས་གདམས་ངག་བཅུ་གཅིག་པོ་འདི་ཙམ་ཞིག་བསྟན་ན་དོན་དུ་འགྱུར། དེ་བས་མང་བ་དང་ཉུང་བར་བསྟན་ན་དོན་དུ་མི་འགྱུར་པར་དགོངས་ནས་བཅུ་གཅིག་བསྟན་ཏེ་སྒྲུབ་བྱེད་ལུང་ལ་བརྟེན་ཅིང་དགོས་པ་ལ་ལྟོས་པའི་གྲངས་ངེས་ཡིན་ནོ། །