བཞི་པ་གོ་རིམ་ངེས་པ།

བཞི་པ་གོ་རིམ་ངེས་པ་ནི།

ལུང་ལས་གསུངས་པའི་གོ་རིམ་མོ། །ལྔ་པ་དགེ་སློང་གི་སྡོམ་པ་སྦྱིན་པའི་མཇུག་གི་ཆོ་གར་གདམས་ངག་བཅུ་གཅིག་པོ་འདི་རྣམས་གདམས་པའི་འཐད་པ་ནི། འདི་རྣམས་གདམས་པས་འདུལ་བ་མཐའ་དག་གི་དོན་གདམས་པར་འགྱུར་ཞིང་བསྒྲུབ་པར་ནུས་པའི་ཕྱིར་རོ། །ཞེས་གསུངས་སོ། །ཚངས་པར་སྤྱོད་པའི་གནས་རྣམ་པ་བཞི་པོ་གོས་ཕྱག་དར་ཁྲོད་དང༌། ཟས་བསོད་སྙོམས་དང༌། གནས་མལ་ཤིང་དྲུང་དང༌། སྨན་བཀུས་ཏེ་བོར་བ་སྟེ། དེ་རྣམས་ལ་བརྟེན་པར་བརྗོད་པར་བྱའོ། ། ངན་སོང་དུ་ལྟུང་བར་འགྱུར་བ་ཕམ་པ་བཞི་པོ་ནི། རྣམ་པར་དཀར་བའི་ཆོས་མ་ཡིན་ཡང་མཚན་ཉིད་འཛིན་པའི་ཆོས་ཏེ་དེ་རྣམས་ཀྱང་བརྗོད་པར་བྱའོ། །དགེ་སྦྱོང་དུ་བྱེད་པའི་ཆོས་བཞི་པོ་ནི། ཁྱིམ་པའི་ཕྱོགས་ཀྱི་སྐྱོན་བརྗོད་ཅིང་གཤེས་ཀྱང་སླར་མི་གཤེ་བ་དང༌། ཁྲོས་ཀྱང་སླར་མི་ཁྲོ་བ་དང༌། བརྡེག་ཀྱང་སླར་མི་བརྡེག་པ་དང༌། རབ་ཏུ་བྱུང་བའི་ཕྱོགས་ཀྱི་སྐྱོན་བརྗོད་ཅིང་མཚང་བྲུས་ཀྱང་སླར་མཚང་མི་འབྲུ་བ་སྟེ། རྣམ་པར་དཀར་བའི་ཆོས་དེ་རྣམས་ཀྱང་བརྗོད་པར་བྱའོ། །མཆོག་ཏུའམ་རབ་ཏུ་འདོད་འདུན་བསྐྱེད་པར་བྱ་བ་ནི་དགེ་སློང་གི་སྡོམ་པའོ། །དེའང་མཁན་སློབ་དང་དགེ་འདུན་དང་ལས་ཀྱི་ཆོ་ག་ཡང་དག་པ་ཕུན་སུམ་ཚོགས་པ་ཉིད་ཀྱིས་དགེ་སློང་གི་ཚུལ་ཁྲིམས་རྫོགས་པར་ཐོབ་པ་ཉིད་བརྗོད་ནའོ། །བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་རྣམས་དང་གསར་དུ་བསྙེན་པར་རྫོགས་པའི་དགེ་སློང་གཉིས་ཚུལ་ཁྲིམས་ཀྱི་རྒྱུ་མཚན་གྱིས་མཉམ་པར་གྱུར་པ་ཉིད་སྒྲུབ་པ་ནན་ཏན་དུ་བྱ་བ་ལ་ངེས་པར་སྦྱར་བར་བྱའོ། །འཇིག་རྟེན་པའི་ཚུལ་དང་འབྲེལ་པ་ཕ་དང་བུའི་འབྲེལ་པའི་གཟུགས་བརྙན་ནི་མཁན་པོ་དང་མཁན་བུའི་འབྲེལ་བ་སྟེ།དེ་གཉིས་ཕ་བུ་དངོས་མ་ཡིན་ཡང་ཕ་བུ་ལྟར་ཤིན་ཏུ་ཉེ་བའི་སྒོ་ནས་འདྲ་བས་ན་གཟུགས་བརྙན་ཞེས་བྱ་སྟེ། མཁན་པོ་ལ་ཕའི་འདུ་ཤེས་ཉེ་བར་བཞག་སྟེ་གུས་པར་བྱ་བ་ལ་ཡང་ངེས་པར་སྦྱར་བར་བྱའོ། །གྲོགས་ཚངས་པ་མཚུངས་པར་སྤྱོད་པ་རྒན་གཞོན་འབྲིང་གསུམ་ལ། རང་གི་ལུས་ངག་ཡིད་གསུམ་དུལ་བར་གནས་པ་སྟེ། གུས་པར་གནས་པ་ཉིད་ལ་ཡང་ངེས་པར་སྦྱར་བར་བྱའོ། །དགེ་སློང་རྣམས་ཀྱིས་བྱ་དགོས་པ་ཀློག་པ་དང་ཁ་ཏོན་དང་ཚུལ་བཞིན་ཡིད་ལ་བྱ་བ་ལ་སོགས་པ་དེ་རྣམས་སྦྱོར་བས་རྗེས་སུ་སྒྲུབ་པ་ལ་ཡང་ངེས་པར་སྦྱར་བར་བྱའོ། །མ་བརྗོད་པ་ནི་བསྙེན་པར་རྫོགས་པའི་མཇུག་གི་ཆོ་གར་བྱེ་བྲག་རེ་རེ་ནས་མ་བརྗོད་པ་སྟེ་དགེ་འདུན་ལྷག་མ་མན་ཆད་ལྟུང་བ་སྡེ་བཞི་པོ་རྣམས་སོ། །དེ་རྣམས་ཀྱིས་སྡོམ་པ་ཡང་དག་པར་བླངས་པའི་བསླབ་པའི་གཞི་རྣམས་ཡོངས་སུ་ཤེས་པའི་ཐབས་བསྒྲུབ་པར་འགྱུར་བ་ཉིད་བརྗོད་པ་སྟེ། ད་གཟོད་འདུལ་བ་རྒྱ་ཆེར་སྟོན་པ་ལས་ཤེས་པར་འགྱུར་ཞེས་ཀྱང་བརྗོད་པར་བྱའོ། །བསླབ་པ་ལ་གུས་པ་སྟེ་ཚུལ་ཁྲིམས་ལ་གཅེས་སྤྲས་བྱ་བ་ལ་ཡང་ངེས་པར་སྦྱར་བར་བྱའོ། །བསྒྲུབ་པར་བྱ་བ་ནི་དགེ་སྦྱོང་གི་འབྲས་བུ་བཞིའོ། །དེ་ཐོབ་བྱེད་ཀྱི་ཐབས་ནི་བག་ཡོད་པ་སྟེ། བག་ཡོད་པར་སྒྲུབས་ཤིག་ཅེས་བརྗོད་པ་དང་བཅས་པ་ལ་ཡང་ངེས་པར་སྦྱར་བར་བྱའོ། །འགྲེལ་ཆུང་ལས། བག་ཡོད་པར་མྱ་ངན་ལས་འདས་པ་སྒྲུབས་ཤིག་ཅེས་བསྒོ་ཞེས་གསུངས་སོ། །དེ་ལྟར་སྡོམ་པ་མནོས་ནས་མ་ཉམས་པར་བསྲུངས་ན་གནས་སྐབས་དང་མཐར་ཐུག་གི་ཕན་ཡོན་འཐོབ་པས། མ་ཉམས་པར་བསྲུང་དགོས་སོ། ། གཉིས་པ་འཕྲོས་དོན་སྦྱངས་པའི་ཡི་དམ་བསྟན་པ་ནི། སྨན་བཀུས་ཏེ་བོར་བ་མ་གཏོགས། གནས་རྣམ་པ་བཞིའི་དང་པོ་གསུམ་ནི་སྦྱངས་པའི་ཡི་དམ་ཡིན་པས། དེ་ལ་འཕྲོས་ཏེ་སྦྱངས་པའི་ཡི་དམ་བཅུ་གཉིས་བསྟན་པ་འདི་ལ་བདུན་ལས། དང་པོ་དབྱེ་བ་ལ། དབྱེ་བའི་གཞི་ནི་སྦྱངས་པའི་ཡི་དམ་ཙམ་མོ། །དབྱེ་བའི་སྒོ་ཆེ་ལོང་དུ་དབྱེ་བ་དང༌། ཞིབ་མོ་རྣམ་གཞག་ཏུ་དབྱེ་བའོ། །ཆེ་ལོང་དུ་ཕྱེ་ན་བཅུ་གཉིས་ཏེ། བསོད་སྙོམས་པ་དང་སྟན་གཅིག་ཕྱིས་མི་ལེན། །ཆོས་གོས་གསུམ་དང་ཕྱིང་བ་ཕྱག་དར་ཁྲོད། །དགོན་པ་པ་དང་ཤིང་དྲུང་བླ་གབ་མེད། །དུར་ཁྲོད་པ་དང་ཙོག་པུ་གཞི་ཇི་བཞིན། །ཞེས་གཟུང་ངོ༌། །ཞིབ་ཏུ་ཕྱེ་ན་ཉི་ཤུ་སྟེ་སོ་སོའི་རང་བཞིན་བཤད་པས་ཤེས་པར་འགྱུར་རོ། །གཉིས་པ་སོ་སོའི་རང་བཞིན་ནི། ཉན་ཐོས་ཀྱི་ས་ལས། ༡ བསོད་སྙོམས་པ་རྣམ་པ་གཉིས་ཏེ་རྙེད་པས་ཆོག་པའི་བསོད་སྙོམས་པ་དང༌། མཐར་གྱིས་སློང་བའི་བསོད་སྙོམས་པའོ། །དང་པོ་ནི་འདྲིས་པའི་ཁྱིམ་གཅིག་གམ་གཉིས་དག་ནས་ཅི་རྙེད་པ་ཙམ་ཟ་བར་བྱེད་ཅིང་དེས་ཆོག་པར་བྱེད་ཀྱི་གསུམ་ཡན་ཆད་ཀྱི་ཁྱིམ་རྣམས་ནས་མི་སློང་བའོ། །གཉིས་པ་ནི་མཐར་ཆགས་ཀྱིས་སློང་སྟེ་བསོད་སྙོམས་ཅི་ཐོབ་པ་ཟ་བར་བྱེད་པའོ། ། ༢ སྟན་གཅིག་པ་ལ་གསུམ་སྟེ། སྟན་གྱི་མཐའི་སྟན་གཅིག་པ་དང༌། ཆུའི་མཐའ་དང༌། ཟས་ཀྱི་མཐའི་སྟན་གཅིག་པའོ། །དེ་གསུམ་ནི་ཟས་ཟ་བའི་སྟན་དེ་ལས་ལངས་ནས་ཉིན་ཞག་དེ་ལ་དུས་རུང་བའི་ཟས་མི་ཟ་བ་དང༌། ཟས་ཟོས་ཏེ་ཁ་བཤལ་བའི་ལག་ཆུ་བླངས་ནས་ཟས་མི་ཟ་བ་དང༌། ཁམ་གྱི་ཐ་མ་མིད་དེ་ཟ་འཕྲོ་བཅད་ནས་ཟས་མི་ཟ་བའོ། །དེ་གསུམ་ནི་སྦྱངས་པའི་ཡོན་ཏན་བསྟན་པ་ལས་བཤད་དོ། ། ༣ ཟས་ཕྱིས་མི་ལེན་པ་ནི་ཇི་ཙམ་གྱིས་བདག་འཚོ་བར་བྱེད་པའི་ཟས་ཐམས་ཅད་མ་མནོས་པ་དེ་སྲིད་དུ་ཟ་བར་མི་བྱེད་ཅིང་ཟས་ཐམས་ཅད་བླངས་ནས་ཟ་བར་རྩོམ་པ་ནས་ཟས་ཕྱིས་མི་ལེན་པ་སྟེ་དེ་ལྟར་ཉན་ཐོས་ཀྱི་ས་ལས་བཤད་དོ། ། ༤ ཆོས་གོས་གསུམ་པ་ནི་ཆོས་གོས་གསུམ་ལས་ལྷག་པའི་གོས་གཞན་མི་འཆང་བ་ཡིན་ཏེ་ཞེས་ཉན་ཐོས་ཀྱི་ས་ལས་བཤད་དོ། །འོན་ཀྱང་གཞུང་འདི་ལས་ཆོས་གོས་གསུམ་པས་ཀྱང་ངོ་ཞེས་ཁྲུས་རས་འཆང་པ་དང་སྦྱངས་པའི་ཡོན་ཏན་བསྟན་པ་ལས་གདིང་བ་དང་གཡན་པ་དགབ་པ་དང༌། གདོང་ཕྱིས་ཀྱི་གོས་དང་དབྱར་གྱི་རས་ཆེན་བླང་བར་བྱ་སྟེ། ཆོས་གོས་གསུམ་པ་ཉིད་ཉམས་པར་མི་འགྱུར་རོ་ཞེས་བཤད་པས། ཆོས་གོས་གསུམ་ཁོ་ནར་མ་ངེས་སོ། །འོན་ཀྱང་འཚོ་བའི་ཡོ་བྱད་ཀྱི་གོས་ཀྱི་གཙོ་བོ་ཆོས་གོས་གསུམ་ཡིན་པས་ཆོས་གོས་གསུམ་པ་ཞེས་བྱ་སྟེ། འདི་ནི་འཚོ་བའི་ཡོ་བྱད་འཆང་གི་དེ་ལས་གཞན་ལྷག་པའི་ཡོ་བྱད་ཀྱི་གོས་དང་མཁོ་བའི་ཡོ་བྱད་ཀྱི་གོས་མི་འཆང་བའི་དམ་བཅའ་བྱས་པའོ། ། ༥ ཕྱིང་པ་བ་ནི་གོས་ཐམས་ཅད་ལུག་གི་བལ་ལས་བྱས་པ་འཆང་གི་གཞན་མ་ཡིན་པ་སྟེ་ཞེས་སོ། ། ༦ ཕྱག་དར་ཁྲོད་པ་ལ་གཉིས་ཏེ། བོར་བའི་ཕྱག་དར་ཁྲོད་པ་དང༌། དུས་ཚིགས་སུ་བཅད་པའི་ཕྱག་དར་ཁྲོད་པའོ། །དང་པོ་ནི། གཞན་གྱིས་ལམ་སྲང་ལ་སོགས་པར་བོར་བའི་གོས་ཀྱི་དུམ་བུ་ལ་སོགས་པ་བཀྲུས་ལ་དྲུབས་ཏེ་ཁ་དོག་བསྒྱུར་ཅིང་འཆང་བའོ། །

གཉིས་པ་ནི།

གཞན་གྱིས་ཟླ་བ་བཞི་ཡན་ཆད་གྱོན་ཅིང་དམན་པར་བྱས་པ་མ་གཏོགས་པའི་གོས་གསར་པ་ལོངས་མི་སྤྱོད་པའོ། ། ༧ དགོན་པ་བ་ནི་གྲོང་ལས་རྒྱང་གྲགས་ཡན་ཆད་ཀྱིས་བར་དུ་བཅད་པའི་དབེན་པར་གནས་འཆའ་བའོ། ། ༨ ཤིང་དྲུང་པ་ནི་ཤིང་དྲུང་དུ་གནས་འཆའ་བའོ། ། ༩ བླ་གབ་མེད་པ་ནི་སྟེང་མ་གཡོགས་པའི་ཕྱོགས་སུ་གནས་འཆའ་བའོ། ། ༡༠ དུར་ཁྲོད་པ་ལ་གཉིས་ཏེ། ཐམས་ཅད་དུར་ཁྲོད་ལྡན་པ་དང༌། ཕྱོགས་འགའ་དུར་ཁྲོད་ལྡན་པའོ། །དེ་ཡང་དང་པོ་ནི་ཟས་གོས་སྣོད་སྤྱད་གནས་མལ་ཐམས་ཅད་དུར་ཁྲོད་ཀྱི་རྫས་ལ་བརྟེན་པ་དང༌། གཉིས་པ་ནི་དེ་དག་ལས་སྣ་འགའ་ཙམ་དུར་ཁྲོད་ཀྱི་རྫས་ལ་བརྟེན་པའོ། ། ༡༡ཙོག་པུ་པ་ནི་ཉིན་མཚན་ཐམས་ཅད་ནམ་དུ་ཡང་གློས་ཕབ་སྟེ་མི་ཉལ་བར་ཙོག་པུར་འདུག་པའོ། །དེ་ལ་ཡང་ཆེ་འབྲིང་ཆུང་གསུམ་ཡོད་དོ། །༡༢ གཞི་ཇི་བཞིན་པ་ནི། རྩྭའམ་ལོ་མ་བཏིང་བའི་སྟེང་དུ་མལ་འཆའ་བར་བྱེད་ཅིང༌། རྩའམ་ལོ་མ་བཏིང་བ་དེ་ཡང་ལན་ཅིག་ཇི་ལྟར་བཏིང་བ་དེ་ཁོ་ནའི་སྟེང་དུ་མལ་འཆའ་བར་བྱེད་ཀྱི་ཡང་དང་ཡང་མི་བརྗེ་མི་འཆོས་པ་ཡིན་ཞེས་ཉན་ཐོས་ཀྱི་ས་ལས་བཤད་དོ། །

གསུམ་པ་བསྡུ་བ་ནི།

ཟས་ལ་བརྟེན་པ་དང༌། གོས་ལ་བརྟེན་པ་དང༌། སྤྱོད་ལམ་ལ་བརྟེན་པ་དང༌། གནས་མལ་ལ་བརྟེན་པ་བཞིར་འདུས་ཏེ། དང་པོ་གསུམ་དང༌། དེ་འོག་གསུམ་དང༌། ཙོག་པུ་བ་དང༌། གཞན་ལྔའོ། ། བཞི་པ་སྒྲ་བཤད་ནི་ཉན་ཐོས་ཀྱི་ས་ལས་ཅིའི་ཕྱིར་སྦྱངས་པའི་ཡོན་ཏན་ཞེས་བྱ་ཞེ་ན། དཔེར་ན་བལ་ལེགས་པར་རྨེལ་བ་ལ་སྦྱངས་པ་ཞེས་བྱ་སྟེ། བལ་མ་རྨེལ་ན་འཛིངས་ཤིང་བལ་བཀལ་བར་བྱ་བའི་ལས་སུ་མི་རུང་ངོ༌། །དེ་བཞིན་དུ་ཟས་གོས་ལ་སོགས་པ་ལ་ཆགས་པས་སེམས་ཀུན་ཏུ་ཞེན་པ་སྟེ། སྦྱངས་པའི་ཡོན་ཏན་འདི་དག་གིས་ཚངས་པར་སྤྱོད་པ་ལ་གནས་པར་བྱེད་སེམས་མཉེན་པར་བྱེད་སེམས་ལས་སུ་རུང་བར་བྱེད་པས་ན་སྦྱངས་པའི་ཡོན་ཏན་ཞེས་བྱའོ། །ཞེས་གསུངས་སོ། །དམ་བཅའ་བླངས་བ་དང་ལྡན་པས་སྦྱངས་པའི་ཡི་དམ་ཞེས་ཀྱང་བྱའོ། །ལྔ་པ་གང་ཟག་གང་ལ་བསྔགས་པ་ནི། ཆགས་པ་ཀུན་ཏུ་སྤྱོད་པ་ཤས་ཆེ་བ་དང༌། སྡང་བ་ཀུན་ཏུ་སྤྱོད་པ་ཤས་ཆེ་བ་གཉིས་ལས། སྔ་མ་ལ་བསྔགས་ཏེ། འདི་རྣམས་ཕྱི་ནང་གི་འདོད་པ་ལ་ཆགས་པ་སྤོང་བའི་ཡན་ལག་ཏུ་འགྱུར་བའི་ཕྱིར་རོ། །ཕྱི་མ་ལ་ནི་དེ་ཙམ་དུ་བསྔགས་པ་མ་ཡིན་ཏེ། འདི་རྣམས་ལ་བརྟེན་ནས་ཚོར་བ་སྡུག་བསྔལ་དང་མཚུངས་པར་ལྡན་པའི་ཁྲོ་བ་འཕེལ་བར་འགྱུར་བའི་ཕྱིར་རོ། །