བཞི་བ་སེམས་དང་སེམས་བྱུང་གི་དབྱེ་བ་བཤད་པ།

བཞི་བ་སེམས་དང་སེམས་བྱུང་གི་དབྱེ་བ་བཤད་པ་ལ།

སེམས་ཀྱི་དབྱེ་བ་དང༌། སེམས་བྱུང་གི་དབྱེ་བ་བཤད་པ་དང་གཉིས། དང་པོ་ལ་རྒྱན་སྟུག་པོ་བཀོད་པའི་མདོ་ལས་ཀྱང༌། སེམས་ནི་ཀུན་གཞིའི་རྣམ་ཤེས་དེ། །དེ་ལ་ངར་འཛིན་ཡིད་ཡིན་ནོ། །ཡུལ་ལ་རྣམ་པར་རིག་པ་གང༌། །དེ་ནི་འཇུག་པའི་རྣམ་ཤེས་འདོད། །ཅེས་གསུངས་པ་ལྟར་ཀུན་གཞིའི་རྣམ་ཤེས་བཤད་པ། ཉོན་ཡིད་བཤད་པ། འཇུག་ཤེས་དྲུག་བཤད་པ་དང་གསུམ། དང་པོ་ཀུན་གཞི་རྣམ་པར་ཤེས་པ་ཉིད་འཆད་པ་ལ། མཚན་ཉིད་དང༌། དེའི་དོན་དང༌། ཀུན་གཞིའི་བག་ཆགས་དང༌། སྒོ་བྱེད་བཤད་པ་དང་བཞི། དང་པོ་མཚན་ཉིད་ནི། ཐེག་བསྡུས་སུ། མདོར་བསྡུ་ན་ཀུན་གཞིའི་རྣམ་པར་ཤེས་བའི་ངོ་བོ་ཉིད་ནི་སྨིན་པའི་རྣམ་པར་ཤེས་པའི་ས་བོན་ཐམས་ཅད་པ་སྟེ་དེས་ཁམས་གསུམ་པའི་ལུས་ཐམས་ཅད་དང་འགྲོ་བ་ཐམས་ཅད་བསྡུས་སོ་ཞེས་པ་ལྟར། རྣམ་སྨིན་དང་ས་བོན་ཐམས་ཅད་ཇི་ལྟར་རིགས་པར་བརྟེན་ཞིང་དོན་གྱི་ངོ་བོ་རིག་པ། ཀུན་གཞིའི་རྣམ་ཤེས་ཀྱི་མཚན་ཉིད་ཡིན་ཏེ། སུམ་བཅུ་བར་ཡང༌། དེ་ལ་ཀུན་གཞིའི་རྣམ་ཤེས་ནི། །རྣམ་སྨིན་ས་བོན་ཐམས་ཅད་པར། །ཞེས་པ་ལྟར་རོ། །གཉིས་པ་དེའི་དོན་བཤད་པ་ལ། ས་བོན་ཐམས་ཅད་པའི་དོན་ཡང་ཆོས་ཐམས་ཅད་ཀྱི་ས་བོན་གྱི་གནས་ཡིན་པས་སྤྱི་རིགས་ནས་ཚང་བ་ལ་བྱའོ། །དེའི་དོན་གཏན་ལ་དབབ་པ་ནི། བསྡུ་བར་གསུངས་པ་ལྟར། ནང་ཉེ་བར་ལེན་པ་དང༌། ཕྱི་རོལ་གནས་སྣོད་ཀྱི་འཇིག་རྟེན་ལ་དམིགས་ནས། རྣམ་པ་མི་གསལ་ཞིང་ཆ་ཕྲ་བས་ཡུལ་སྣང་བར་ནུས་ཙམ་པ། གྲོགས་ཀུན་འགྲོ་ལྔ་ཁོ་ན་དང་མཚུངས་པར་ལྡན་ཞིང་ཁྱད་པར་ཚོར་བ་བཏང་སྙོམས་ཁོ་ན་ཅན། ངོ་བོ་ཐར་བ་ཐོབ་པ་ལ་མ་བསྒྲིབས་ཤིང༌། དགེ་མི་དགེར་ལུང་དུ་མ་བསྟན་པ། དུས་འཁོར་བ་ཇི་སྲིད་དུ་རྒྱུན་མི་ཆད་པར་འབྱུང་བ་སྟེ། སུམ་བཅུ་པར་ཡང༌། དེ་ནི་ལེན་པ་དག་དང་གནས། །རྣམ་པར་རིག་པ་མི་རིག་པ། །རྟག་ཏུ་རེག་དང་ཡིད་བྱེད་དང༌། །རིག་དང་འདུ་ཤེས་སེམས་པར་ལྡན། །དེ་ལ་ཚོར་བ་བཏང་སྙོམས་ཏེ། །དེ་ནི་མ་བསྒྲིབས་ལུང་མ་བསྟན། །རེག་ལ་སོགས་པའང་དེ་བཞིན་ནོ། །དེ་ནི་རྒྱུན་འབབ་ཆུ་བོ་བཞིན། །ཞེས་པ་ལྟར་རོ། །གསུམ་པ་ཀུན་གཞི་བག་ཆགས་ནི། ཐེག་བསྡུས་སུ། བརྟན་ལུང་མ་བསྟན་ལྷན་ཅིག་འབྱུང༌། །སྒོ་བར་བྱེད་དང་འབྲེལ་བ་ལ། །སྒོ་བྱེད་དེ་ལས་གཞན་དུ་མིན། །འདི་ནི་བག་ཆགས་མཚན་ཉིད་དོ། །ཞེས་པ་ལྟར་རོ། །བཞི་བ་བག་ཆགས་སྒོ་བྱེད་ནི།བསྒོ་བྱ་ལ་ནུས་པ་རྗེས་སུ་འཇུག་ཏུ་རུང་བ་ཚོགས་བདུན་མཚུངས་ལྡན་དང་བཅས་པས་བསྒོ་སྟེ། ཚོགས་དྲུག་ཟག་བཅས་དགེ་མི་དགེས་རྣམ་སྨིན་དང་རྒྱུ་མཐུན་གཉིས་ཀའི་བག་ཆགས་འཇོག་ཅིང༌། ལུང་མ་བསྟན་དང་ཉོན་ཡིད་ཀྱིས་རྒྱུ་མཐུན་གྱི་བག་ཆགས་འཇོག་པར་བྱེད་དོ། །གཉིས་པ་ཉོན་ཡིད་ཀྱི་མཚན་ཉིད་སོགས་བཤད་པ་ནི། ཀུན་གཞི་རྣམ་ཤེས་ལ་དམིགས་ནས་ངར་སེམས་པའི་རྣམ་པ་ཅན་འཁོར་ཉོན་མོངས་བ་བཞི་དང་འགྲོགས་པའི་གཙོ་སེམས་དེ། ཉོན་ཡིད་ཀྱི་མཚན་ཉིད། མཚན་གཞི་ནི། ཀུན་གཞི་ལ་དམིགས་ནས་ངར་སེམས་པའི་སོ་སྐྱེས་ཀྱི་རྒྱུད་ལ་རྟག་ཏུ་འབྱུང་བའི་གཙོ་སེམས་དེའོ། །