དྲུག་པ་གང་གི་གཉེན་པོ་གང་ཡིན་བསྟན་པ།

དྲུག་པ་གང་གི་གཉེན་པོ་གང་ཡིན་བསྟན་པ་ནི།

ཉན་ཐོས་ཀྱི་ས་ལས་འདི་ལྟར་བཤད་དེ། ཟས་བཟང་པོ་ལ་ཆགས་པ་སྤང་བའི་ཕྱིར་བསོད་སྙོམས་པའོ། །ཟས་མང་པོ་ལ་ཆགས་པ་སྤང་བའི་ཕྱིར་སྟན་གཅིག་དང་ཕྱིས་མི་ལེན་པའོ། །གོས་མང་པོ་དང་འཇམ་པོ་དང་བཟང་པོ་ལ་ཆགས་པ་སྤང་བའི་ཕྱིར་གོས་ལ་བརྟེན་པ་གསུམ་གོ་རིམ་བཞིན་ནོ། །འདུ་འཛི་ལ་ཆགས་པ་སྤང་བའི་ཕྱིར་དགོན་པ་བའོ། །གནས་ཁང་ལ་ཆགས་པ་སྤང་བའི་ཕྱིར། ཤིང་དྲུང་དང་བླ་གབ་མེད་པའོ། །གནས་ཁང་ལ་ཆགས་པ་དང་སེམས་ཅན་ལ་ཆགས་པ་གཉིས་ཀ་སྤང་བའི་ཕྱིར་དུར་ཁྲོད་པའོ། །གློས་ཕབ་སྟེ་ཉལ་བ་ལ་ཆགས་པ་སྤང་བའི་ཕྱིར་ཙོག་པུ་བའོ། །འབོལ་སྟན་སོགས་ཀྱི་སྟན་གདིང་བ་དང་རས་མལ་སོགས་ཀྱིས་དགབ་པ་ལ་ཆགས་པ་སྤང་བའི་ཕྱིར་གཞི་ཇི་བཞིན་པའོ། །བདུན་པ་བསྙེན་པར་རྫོགས་པའི་མཇུག་གི་ཆོ་གར་སྦྱངས་པའི་ཡོན་ཏན། གསུམ་པོ་འདི་བརྗོད་ལ་གཞན་དགུ་པོ་མི་བརྗོད་པའི་འཐད་པ་ནི། ཚངས་པར་སྤྱོད་པ་ཉམས་པར་བྱེད་པའི་རྒྱུའི་གཙོ་བོ་ཡོ་བྱད་གསོག་པ་ཡིན་ལ། གོས་ཕྱག་དར་ཁྲོད་ལ་སོགས་པ་འདི་གསུམ་ཉམས་སུ་བླངས་པས་ཡོ་བྱད་གསོག་པ་ཁེགས་པའི་ཕྱིར་དང༌། འདི་བསྒྲུབ་པར་ནུས་པའི་ཕྱིར་རོ། །ཐམས་ཅད་དུར་ཁྲོད་དང་ལྡན་པས་ཀྱང་ཡོ་བྱད་གསོག་པ་ཁེགས་མོད་ཀྱི། དུས་སྙིགས་མའི་སེམས་ཅན་སྙིང་སྟོབས་ཆུང་བས་བསྒྲུབ་པར་མི་ནུས་པའི་ཕྱིར་རོ། །

བཞི་བ་དགེ་སློབ་མའི་སྡོམ་པའི་ཆོ་ག་ལ། དངོས་དང་རྒྱུད་སྣོད་དུ་རུང་བའི་ཁྱད་པར་དང་གཉིས་ལས། དང་པོ་ནི།

ད་ཆོག་གི་དབང་དུ་བྱས་ན་དགེ་སློང་མ་སྒྲུབ་པ་ལ་དགེ་སློབ་མའི་བསླབ་ཚིག་སྔོན་དུ་འགྲོ་དགོས་ལ། རྩ་བར། བུད་མེད་ལ་ནི་དགེ་སློབ་མ་ཞེས་བྱ་བའི་ཚིགས་གཞན་ཡོད་དོ། །ཞེས་སོ། །འདིའི་དོན་ལ་དྲུག་ལས། དང་པོ་དགོས་པའི་དོན་ནི། འབོགས་པ་པོ་ལ་ལྟོས་པའི་དགོས་པ་ཚིགས་ལས་འདས་པའི་ཉེས་པ་ཁེགས་པ་དང༌། ལེན་པ་པོ་ལ་ལྟོས་པའི་དགོས་པ་དགེ་སློབ་མའི་བསླབ་པ་འཐོབ་ཅིང༌། དེ་ལ་བསླབ་པས་དགེ་སློང་མའི་སྡོམ་པ་བརྟན་པར་འགྱུར་བ་སྟེ། དེ་ཡང་དགེ་སློང་མའི་རྣམ་འབྱེད་ལས། ཤཱཀྱའི་བུད་མེད་མང་པོ་མྱ་ངན་གྱིས་གདུང་ནས། དགེ་སློང་མ་བྱས་ཏེ། མྱ་ངན་སངས་པ་ན་བབས་པར་འདོད་པར་གྱུར་པ་ལ་བརྟེན་ནས། ལོ་གཉིས་སུ་དགེ་སློབ་མའི་བསླབ་པའི་སྡོམ་པ་བྱིན་ཅིག་ཅེས་པས་བཤད་དོ། །འོ་ན་མ་བྱིན་ལེན་ལ་སོགས་པ་གཞན་རྣམས་བུད་མེད་ཀྱིས་བསྲུང་བ་དཀའ་ཤོས་མ་ཡིན་ལ། མི་ཚངས་སྤྱོད་ནི་བུད་མེད་ཀྱིས་བསྲུང་དཀའ་བ་ཡིན་ཡང་དགེ་ཚུལ་མའི་དུས་ན་ཡང་སྤངས་ཟིན་པས། དགེ་སློབ་མ་ལ་བསླབས་པ་འདིས་དགེ་སློང་མའི་སྡོམ་པ་བརྟན་པར་འགྱུར་བ་ནི་རིགས་པས་མི་འཐད་དོ་ཞེ་ན། མ་ཡིན་ཏེ་ཆོས་དྲུག་ལ་སོགས་པ་མི་ཚངས་སྤྱོད་ཀྱི་རྒྱུའི་ཆ་ནས་དམ་དུ་བཀག་པའི་ཕྱིར་རོ། །དེ་དག་ཀྱང་དགེ་ཚུལ་མས་སྤངས་ཟིན་ཏོ་སྙམ་ན། དེ་དག་ལས་འདས་ན་དགེ་སློབ་མ་ལ་བཤགས་པར་འགྱུར་ཡང༌། དགེ་ཚུལ་མ་ལ་བསྡམ་བྱར་འགྱུར་བས། བཤགས་བྱ་ལ་འཛེམ་པའི་ཤེས་པ་སྐྱེ་བ་དེ་ཙམ་དུ་བསྡམ་བྱ་ལ་དེ་ལྟར་མ་ཡིན་པའི་ཕྱིར་རོ། །

གཉིས་པ་ཡུལ་གང་ལ་བླང་བ་ནི།

མཁན་མོ་དང་ལས་བྱེད་པ་མོ་དང་བཅས་པའི་དགེ་འདུན་མ་ལས་བླང་སྟེ། དགེ་འདུན་མ་དེ་ཡང་ཡུལ་དབུས་སུ་དགེ་སློང་མ་བཅུ་གཉིས་དང་མཐའ་འཁོབ་ཏུ་དགེ་སློང་མ་བཅུ་གཉིས་མེད་ན་དགེ་སློང་མ་དྲུག་གི་གྲངས་ཚང་བའོ། །གྲངས་དེ་དག་མ་ཚང་ཡང་དགེ་སློང་མ་བཞིའི་ཚོགས་ཀྱིས་བྱིན་ན་བསླབ་པ་འདི་སྐྱེ་ལ་ཉེས་བྱས་ཏེ་བཞིའི་ཚོགས་ཀྱིས་བསྙེན་རྫོགས་སྐྱེ་ལ་ཉེས་བྱས་སུ་གསུངས་པའི་གནད་ཀྱིས་ཤེས་སོ། །བཞིར་མ་ཚང་ན་ནི་འདིར་མི་སྐྱེ་སྟེ་ལས་མི་འཆགས་པའི་ཕྱིར་རོ། །དགེ་སློང་མ་དེ་དག་མ་རྙེད་ན་དགེ་སློང་ཕའི་དགེ་འདུན་གྱིས་ཀྱང་དགེ་སློབ་མའི་བསླབ་པ་སྦྱིན་དུ་རུང་སྟེ། ལུང་དབྱར་གྱི་གཞི་ལས། དགེ་ཚུལ་མའི་བྱ་བ་འདི་ལྟ་སྟེ། དགེ་ཚུལ་མ་དེས་དགེ་སློང་དག་ལ་ཕོ་ཉ་བཏང་སྟེ། འཕགས་པ་དག་ལོ་གཉིས་ཀྱི་བར་དུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་གི་བསླབ་པ་སྩལ་ཏུ་གསོལ་ཞེས་སྤྲིང་ན། ཞག་བདུན་བྱིན་གྱིས་བརླབས་ལ་དགེ་ཚུལ་མའི་བྱ་བའི་ཕྱིར་དགེ་སློང་འགྲོ་བར་བྱ། ཞེས་གསུངས་སོ། །

གསུམ་པ་རྟེན་གང་གིས་བླང་བ་ནི།

ལུས་ཕུན་སུམ་ཚོགས་པ་དང༌། བསམ་པ་ཕུན་སུམ་ཚོགས་པ་དང༌། ཆ་ལུགས་ཕུན་སུམ་ཚོགས་པ་དང༌། ཚིགས་སྔ་མ་སྔོན་དུ་སོང་བའོ། །དེ་ཡང་གཞན་རྣམས་དགེ་སློང་གི་སྐབས་སུ་སྔར་བཤད་པ་བཞིན་དུ་ཅི་རིགས་པར་སྦྱར་ཏེ། འདིར་ན་ཚོད་ཀྱི་ཁྱད་པར་བུད་མེད་ཁྱིམ་སོ་བཟུང་བ་ལོ་བཅུ་ལོན་པ་དང་གཞོན་ནུ་མ་ལོ་བཅོ་བརྒྱད་ལོན་པ་ལ་བསླབ་པ་འདི་སྐྱེ་ལ། ཆ་ལུགས་ཀྱི་ཁྱད་པར་བླ་གོས་མཐང་གོས་དང་ཤིང་ང་དཔུང་ཆད་དང་རྔུལ་གཟན་ཏེ་ཆོས་གོས་བཞི་དགོས་ཤིང་ལྷུང་བཟེད་ཀྱི་ཚད་དགེ་སློང་མའི་ལྷུང་བཟེད་ལྟར་རོ། །ཚིགས་སྔ་མ་སྔོན་དུ་སོང་བ་ནི། དགེ་བསྙེན་མ་དང༌། རབ་ཏུ་བྱུང་བ་དང་དགེ་ཚུལ་མ་དང་གསུམ་སྔོན་དུ་སོང་བའོ། །ཚིགས་སྔ་མ་གཞན་གཉིས་སྔོན་དུ་མ་སོང་བར་འདི་འབོགས་ན་ཉེས་བྱས་ཙམ་དུ་ཟད་དོ། །མཚོ་ཊཱིཀ་ལས། དགེ་ཚུལ་མ་མེད་ན་འདི་མི་སྐྱེ་སྟེ། འདི་ནི་དགེ་ཚུལ་མའི་སྟེང་དུ་བསླབ་བྱ་འགའ་ཞིག་སྣོན་པ་ཡིན་ལ། དེ་མེད་ན་གཞི་མ་གྲུབ་པའི་ཕྱིར། ཞེས་གསུངས་སོ། །

བཞི་པ་དངོས་པོ་གང་བླང་བ་ནི།

དགེ་སློབ་མའི་བསླབ་པ་སྟེ་སྐབས་ཀྱིས་གྲུབ་བོ། །ལྔ་པ་ཆོ་ག་གང་གིས་བླང་བ་ནི། སྦྱོར་དངོས་མཇུག་གསུམ་སྟེ། སྦྱོར་བའི་ཆོ་ག་ནི། ཀརྨ་ཤ་ཏཾ་ལས་མཁན་མོ་ཉིད་དུ་ཕྱོགས་པར་གྱུར་པས་ལས་བྱེད་པའི་དགེ་སློང་མ་ལ་གསོལ་བ་བཏབ་པར་བྱ་ལས་ཀྱི་གནས་སུ་འཇུག་པར་འགྱུར་བའི་དགེ་སློང་མ་རྣམས་ལ་ཡང་གསོལ་བ་གདབ་པར་བྱ། དགེ་སློང་མ་དེ་རྣམས་ཀྱིས་ཉེས་པ་བྱུང་ངམ་བརྟགས་ནས་ཉེས་པ་ཕྱིར་བཅོས་ཏེ་ལས་ཀྱི་གནས་དེར་འདུག་པར་བྱའོ། །དེའི་འོག་ཏུ་དང་པོར་སྟོན་པ་ལ་ཕྱག་འཚལ་ཞིང་གནས་དེར་འདུས་པའི་དགེ་སློང་མ་རེ་རེ་ལ་ཕྱག་གསུམ་གསུམ་འཚལ་བ་དང༌། མཁན་མོར་འོས་པ་ལ་ཕྱག་འཚལ་ཏེ་མཁན་མོར་གསོལ་བ་དང༌། གསོལ་བ་གདབ་པའི་ཕྱིར་སྟོན་པ་ལ་ཕྱག་འཚལ་ཞིང༌། དགེ་འདུན་མ་ལ་ཕྱག་འཚལ་བ་དང༌། ལས་བྱེད་པ་མོའི་རྗེས་ཟློས་བྱེད་ཅིང་བསླབ་པའི་སྡོམ་པ་སྦྱིན་པར་གསོལ་བ་ལན་གསུམ་གདབ་པའོ། །དངོས་གཞིའི་ཆོ་ག་ནི། གསོལ་བ་དང་གཉིས་ཀྱི་ལས་ཀྱིས་སོ། །མཇུག་གི་ཆོ་ག་ནི་གསུམ་སྟེ། ལས་ཀྱི་མཇུག་སྡུད་བརྗོད་པ་དང༌། ཐོབ་དུས་གོ་བར་བྱ་བ་དང༌། བསླབ་པ་བཅུ་གཉིས་བརྗོད་པའོ། །དེ་ཡང་ཀརྨ་ཤ་ཏཾ་ལས། གཅིག་པུ་ལམ་དུ་འགྲོ་མི་བྱ། །ཆུ་བོའི་ཕ་རོལ་རྐྱལ་མི་བྱ། །སྐྱེས་པ་ལ་ནི་རེག་མི་བྱ། །སྐྱེས་པ་དང་ནི་འདུག་མི་བྱ། །སྨྱན་དུ་འགྱུར་བར་མི་བྱ་ཞིང༌། །ཁ་ན་མ་ཐོ་བཅབ་མི་བྱ། །བདེ་གཤེགས་གསུངས་པའི་ཆོས་དྲུག་པོ། །དེ་དག་གསུང་རབ་ལས་གསུངས་ཡིན། །ཞེས་པ་དང༌། གསེར་ལ་བཟུང་བར་མི་བྱ་ཞིང༌། །འདོམས་ཀྱི་སྤུ་ནི་བྲེག་མི་བྱ། །ས་ནི་བརྐོ་བར་མི་བྱ་སྟེ། །རྩྭ་སྔོན་དག་ཀྱང་བཅད་མི་བྱ། །བྱིན་ལེན་མ་བྱས་བཟའ་མི་བྱ། །གསོག་འཇོག་བྱས་པ་བཟའ་མི་བྱ། །རྗེས་མཐུན་ཆོས་དྲུག་འདི་དག་ནི། །བདེ་བར་གཤེགས་པས་རྟག་ཏུ་བཀག །ཅེས་བརྗོད་ཅིང༌། དེ་དག་ཚིག་ལྷུག་པའི་སྒོ་ནས་ཀྱང་རེ་རེ་ནས་བརྗོད་པར་བྱའོ། །བཅུ་གཉིས་པོ་དེ་དག་ལ་ཅིའི་ཕྱིར་ཆོས་དྲུག་དང་རྗེས་སུ་མཐུན་པའི་ཆོས་དྲུག་ཅེས་བྱ་ཞེ་ན། ཕྲན་ཚེགས་འགྲེལ་པ་ལས། ༼མི་ཚངས་སྤྱོད་སྤོང་བའི་བསླབ་བྱའི་༽གཙོ་བོར་གྱུར་པ་ཉིད་ཀྱི་ཕྱིར་ཆོས་ཀྱི་སྒྲ་དྲུག་པོ་དང༌། གཙོ་བོ་ཉིད་མ་ཡིན་པའི་ཕྱིར་རྗེས་སུ་མཐུན་པའི་ཆོས་ཀྱི་སྒྲར་བསྟན་པ་ཡིན་ཏེ། ཞེས་གསུངས་སོ། །