ཀུན་འདུས་རིན་པོ་ཆེའི་ངོ་སྤྲོད།
དང་པོ། ཡེ་ཐོག་གཞི་ལས་བབས་ཚུལ།
༄༅༔ ཀུན་འདུས་རིན་པོ་ཆེའི་ངོ་སྤྲོད་བཞུགས་སོཿ ཤོག་སེརཿ
༄༅༔ མཆ།མྲ།ཅྲ།ཿ ཀུན་འདུས་རིན་པོ་ཆེའི་ངོ་སྤྲོད་ཅེས་བྱ་བཿ དུས་གསུམ་རྒྱལ་བ་ཀུན་གྱི་ཡང་མེས་པོཿ ཀུན་ཏུ་བཟང་པོ་གདོད་མའི་མགོན་པོ་ལཿ གུས་པས་བཏུད་དེ་ཚེ་གཅིག་གྲོལ་བའི་ལུངཿ ངེས་པའི་སྙིང་པོ་གང་ཡིན་གསལ་བར་བཤདཿ
དེ་ཡང་རྫོགས་པ་ཆེན་པོ་མཁའ་འགྲོ་སྙིང་ཏིག་གི་ཟབ་མོའི་གནད་ཇི་སྙེད་པ་ཐམས་ཅད་བསྡུས་ན་གསུམ་དུ་ངེས་ཏེཿ ཡེ་ཐོག་གཞི་ལས་བབས་ཚུལཿ འཁྲུལ་དུས་ཉམས་སུ་བླང་ཚུལཿ བར་དོར་གཞི་ཐོག་ཕྱིན་ཚུལ་ལོཿ དང་པོ་ལ་གསུམ་ལསཿ ཡེ་ཐོག་དང་པོའི་སྤྱི་གཞི་ནི་མན་ཤེལ་བསྟན་ཏེཿ ངོ་སྤྲོད་སྤྲས་པའི་རྒྱུད་ལསཿ ཀུན་ཏུ་བཟང་པོའི་སྣང་གསལ་མེ་ལོང་འདིཿ ཕྱོགས་མཐུན་དཔེ་ཡིས་རང་བཞིན་རྟོགས་པར་བྱེདཿ རྟོགས་པའི་དོན་དེ་སྣང་གསལ་ངོ་སྤྲོད་ཡིནཿ རིག་པ་ཟང་ཐལ་གནས་པས་མན་ཤེལ་འདྲཿ རིག་པ་རྟོག་མེད་(༨༥)གསལ་བས་མན་ཤེལ་འདྲཿ རིག་པ་ལྷུན་གྲུབ་གནས་པས་མན་ཤེལ་འདྲཿ རིག་པ་མ་འགགས་འཆར་བས་མན་ཤེལ་འདྲཿ ཞེས་གསུངས་པསཿ གདོད་མའི་སེམས་ཉིད་རང་བྱུང་གི་ཡེ་ཤེས་དེ་ཉིདཿ ངོ་བོ་རང་བཞིན་ཐུགས་རྗེ་གསུམ་དུ་གནས་ཏེཿ ཤེལ་དྭངས་ལ་དྲི་མ་མེད་ཅིང་ཟང་ཐལ་བ་བཞིན་དུཿ རིག་པ་ལ་སྤྲོས་པ་དང་བྲལ་ཞིང་ངོ་བོ་སྟོང་པར་མཚོནཿ འོད་ལྔ་ཕྱིར་མི་གསལ་ཡངཿ ནང་དུ་ལྷུན་གྲུབ་ཏུ་ཡོད་པ་བཞིན་དུཿ རིག་པའི་ངང་ན་རང་བཞིན་ལྷུན་གྲུབ་ཏུ་འོད་མ་འགགས་པས་རང་བཞིན་གསལ་བར་མཚོན་ནོཿ ཤེལ་ཁོ་རང་དྭངས་ལ་དཀར་པོ་དབྱེར་མེད་པས་ཐུགས་རྗེ་འགགས་མེད་དུ་འཆར་བ་མཚོན་ནོཿ དེ་གསུམ་ཡང་ཚིག་གིས་སོ་སོར་ཕྱེ་ནའང་དོན་ངོ་བོ་ཐ་དད་མེད་པ་བཞིན་དུཿ རིག་པ་སྟོང་གསལ་འགགས་མེད་ངོ་བོ་རང་བཞིན་ཐུགས་རྗེ་གསུམ་དབྱེར་མེད་དུ་མཚོན་པའོཿ དེ་ལྟ་བུའི་གནས་ལུགས་ཡེ་ནས་ད་ལྟའི་བར་དུ་འཕོ་འགྱུར་མེད་པར་ཁྱབ་པ་ནི་སེམས་ཉིད་རང་བྱུང་གི་ཡེ་ཤེསཿ རྒྱ་ཆད་ཕྱོགས་ལྷུང་མེད་པཿ དུས་གསུམ་འཕོ་འགྱུར་མེད་པའི་དགོངས་པ་ཞེས་བྱའོཿ དེ་ལས་གཞིར་སྣང་དུ་ཤར་བཿ འཁོར་འདས་ཀྱི་འཁྲུལ་གྲོལ་དུ་གྱུར་པའི་གཞི་ནིཿ ཤེལ་ཉི་མ་ལ་ཕྱར་ནསཿ ནང་འོད་ཚན་པ་གཉིས་སུ་བསྟན་ལཿ འོད་ལྔ་ཤར་དུས་རང་སྣང་དུ་རང་ངོ་ཤེས་པའི་སྐད་ཅིག་ལཿ ཕྱི་འོད་ནང་དུ་བསྡུས་པས་ཤེལ་ཉིད་དུ་ཐིམ་པ་གདོད་མའི་གཞི་ཐོག་ཏུ་གྲོལ་བསཿ ཀུན་ཏུ་བཟང་པོས་དགེ་བ་སྤུ་ཙམ་ཡང་མ་བྱས་པརཿ སྐད་ཅིག་ལ་གྲོལ་བ་ཡིན་ཏེཿ སྐད་ཅིག་གཅིག་གིས་བྱེ་བྲག་ཕྱེདཿ སྐད་ཅིག་གཅིག་གིས་རྫོགས་སངས་རྒྱསཿ ཞེས་སོཿ སྐད་ཅིག་གཅིག་གིས་གྲོལ་བ་ནི་སྤང་བྱའི་དྲི་མ་མེད་པསཿ འཇོམས་བྱེད་གཉེན་པོ་མེད་པའོཿ ཡང་ཕྱར་ལཿ གདོད་མའི་གཞི་ཤེལ་ལྟ་བུའི་ངང་ལཿ རང་བྱུང་དུ་རང་བཞིན་གསལ་བ་འོད་ལྔ་ལྟ་བུའི་སྣང་བ་དངཿ ཐུགས་རྗེ་མ་འགགས་པའི་རིག་པ་དཀར་ཕྲ་ཕྲོ་བ་ལྟ་བུ་གཉིས་དུས་གཅིག་ངོ་བོ་སྟོང་པའི་ངང་ལས་རང་གདངས་ཤར་བ་ངོ་མ་ཤེས་པའི་ཆ་ནས་ལྷན་ཅིག་སྐྱེས་པའི་མ་རིག་པ་སྟེཿ འཁོར་བ་སོ་སོའི་རྒྱུ་བྱསཿ (༨༦)ཁ་དོག་ལྔ་ལྡན་གྱིས་ཡུལ་བྱསཿ དཀར་པོ་དེ་ཀུན་ཏུ་འཚོལ་བ་ཡིད་ཀྱི་དཔེ་སྟེཿ རང་བཞིན་གྱི་གདངས་ལ་ཐུགས་རྗེས་རང་ངོ་མ་ཤེས་པར་གཞན་དུ་ཞེན་ནས་འཁྲུལ་པས་ཀུན་ཏུ་བརྟགས་པའི་མ་རིག་པ་ཞེས་བྱ་སྟེཿ འཁོར་བར་འཁྲུལ་པའི་རྐྱེན་བྱས་ནསཿ རང་བཞིན་གྱི་གདངས་འོད་ལྔ་ཡུལ་དང་ལུས་སུ་འཁྲུལཿ ཐུགས་རྗེའི་གདངས་རྣམ་པར་ཤེས་པའི་ཚོགས་དྲུགཿ ཀུན་གཞིའི་རྣམ་ཤེས་དང་བཅས་ཏེ་བདུན་དུ་འཁྲུལཿ ངོ་བོ་ལུང་མ་བསྟན་ཀུན་གཞིར་འཁྲུལ་ཏེ་རྟེན་བྱེད་དོཿ དེའང་ཤེས་པ་ཕྱིར་འཆར་དུས་སྒོ་ལྔ་དེ་ལ་དཔྱོད་བྱེད་ཀྱི་ཡིད་ནང་དུ་གནས་དུས་ཀུན་གཞིའི་རྣམ་ཤེས་གསལ་ལ་དྭངས་པ་བསམ་གཏན་བཞི་དངཿ མི་གསལ་བ་གཟུགས་མེད་དུ་འཁྲུལ་ཞིང་ལས་གསོག་གོཿ དེའང་གཟུགས་སོགས་ཡུལ་ལྔ་ནིཿ མིག་སོགས་དབང་པོ་ལྔ་ལ་གསལ་གྱིསཿ ཤེས་པ་ལ་གསལ་བ་མ་ཡིན་ནོཿ ལུས་སོ་སོར་སྤྱོད་པ་ནི་དབང་པོ་མ་ཡིན་གྱིས་དབང་ཤེས་སོཿ དེས་ན་ཤེས་པ་ལ་ཡུལ་ལྔ་ཤར་བ་མེད་དེཿ མིག་ལོང་བས་ན་གཟུགས་མི་མཐོང་ཡང་ཤེས་པ་ཡོད་པ་བཞིན་ནོཿ དེས་ན་དབང་པོ་རྟོག་མེད་ལ་གཟུགས་སོགས་མཐོང་བའི་ཆ་རྣམསཿ རྟོག་མེད་ཡིན་པར་འཐད་པ་དང་བཅས་པའོཿ ཡིད་འཇུག་པས་རྟོག་པར་སོང་བ་ཡང་ཆས་དབྱེ་ལ་ཤེས་པར་བྱའོཿ དེ་ལྟར་རིག་པ་མདངས་ཉལ་གྱིས་བག་ཆགས་ཀྱི་འཁྲུལ་པ་སྣ་ཚོགས་སུ་ཤར་ཏེཿ ཤེལ་གྱི་འོད་གཉིས་བསྲེས་ལཿ དཀར་དམར་སྣ་ཚོགས་ཀྱི་སྟེང་དུ་འོད་དཀར་པོ་བཞག་སྟེཿ རང་བཞིན་གྱི་སྣང་བ་ལཿ ཐུགས་རྗེ་རྟོག་པར་འཁྲུལ་པའི་ཡིད་ཀྱིས་ཉིན་མཚན་དུ་འདྲེས་པསཿ སྣང་བ་ལ་དེར་འཛིན་དུ་ཤར་བསཿ སེམས་ཀྱི་ངང་ནས་བྱུང་བར་ངོ་སྤྲད་དོཿ དེ་ནས་དེ་གཉིས་མི་གཡོ་བའི་དཔེས་གཏང་གཞག་མེད་པའི་ཆོས་ཉིད་གཅིག་ཏུ་ངོ་སྤྲོད་དོཿ འཁྲུལ་པ་རྐྱེན་ལས་བྱུང་བ་མན་ཤེལ་འོད་དང་འདྲཿ དངོས་པོ་སྣ་ཚོགས་སྣང་བ་མན་ཤེལ་འོད་དང་འདྲཿ སྣང་ཡང་ངོ་བོ་འགྱུར་མེད་མན་ཤེལ་འོད་དང་འདྲཿ ཟད་མེད་འཕེལ་བ་མེད་པས་མན་ཤེལ་འོད་དང་འདྲཿ ཞེས་ངོ་སྤྲད་དོཿ
གཉིས་པ། འཁྲུལ་དུས་ཉམས་སུ་བླང་ཚུལ།
གཉིས་(༨༧)པ་འཁྲུལ་དུས་ཉམས་སུ་ལེན་ཐབས་ལ་གསུམ་ལསཿ དང་པོ་འཁྲུལ་དུས་སེམས་ཅན་སོ་སོའི་སྐྱེ་བ་སྔ་ཕྱིར་བརྒྱུད་པའི་ཚེཿ བར་དོའི་ཡེ་ཤེས་ལུས་ལ་བཞུགས་པ་ནིཿ མར་མེ་མི་མོའི་ཁོག་པར་བཅུག་ལ་ངོ་སྤྲད་དོཿ སྣུམ་དང་སྡོང་བུ་གཉིས་ཐིག་ལེ་དཀར་དམརཿ མ་རིག་པའི་ཡེ་ཤེས་ཀྱི་དཔེའོཿ དེ་ནས་ལུས་གྲུབ་སྟེ་གནས་དུས་དཔེ་ཤེལཿ དོན་སྙིང་གའི་ཡེ་ཤེསཿ རྟགས་སྒྲོན་མས་ངོ་སྤྲད་དེཿ ཡེ་ཤེས་སྙིང་ག་ནཿ ཡེ་ཤེས་སུམ་རྩེགས་གློ་བའི་རླུང་དངཿ ཡེ་ཤེས་ཀྱི་གདངས་གཉིས་འཕྲད་པས་རྩལ་སེམས་སུ་བྱུང་བའི་དཔེཿ འོད་ལྔའི་ཕྱོགས་གཅིག་ནས་ཤར་བའི་འོད་དཀར་པོ་ལ་ངོ་སྤྲད་དོཿ སེམས་དྲན་བསམ་གཞིའི་ངང་དུ་ཐིམ་ནས་མི་གཡོ་བར་གནས་པའི་དཔེཿ དཀར་པོ་འོད་ལྔར་ཐིམ་པ་མི་འགུལ་བ་ལ་སེམས་ཡེ་ཤེས་སུ་གྲོལ་བར་མཚོནཿ ཡང་དཀར་པོ་སེམས་ཀྱང་དཔེ་དྲུག་པ་ཡིད་ཅེས་བྱཿ འོད་ལྔ་ཡེ་ཤེས་ཀྱི་དཔེ་རང་གསལ་འགགས་པ་མེད་པའི་གདངས་ནམ་མཁར་སྣང་བ་ཡིན་ནོཿ གཞི་འཛིན་པའི་རིག་པ་སྙིང་གའི་ཐུགས་རྗེ་ནང་གནསཿ མཚན་ཉིད་འཛིན་པའི་རིག་པ་དེའི་རྩལ་གློ་བར་སོང་བསཿ རྣམ་རྟོག་ཡུལ་ལ་འཕྲོ་བ་རྣམས་སོཿ ཡུལ་སྣང་གི་རིག་པ་རྡོ་རྗེ་ལུ་གུ་རྒྱུད་དེ་རིག་གདངས་ལ་རིག་པར་བཏགས་པའོཿ དེའང་སྙིང་ག་ན་དེ་ལྟར་རིག་པ་གནས་པའི་ངོ་བོ་ནི་དོནཿ རྟགས་སུ་མིག་མནན་ན་ཐིག་ལེ་སྟོང་པའི་སྒྲོན་མ་འཆར་བས་ཡིད་ཆེས་སོཿ
དེ་དུས་ཉམས་སུ་བླང་ཐབས་ལ་གཉིས་ལསཿ དང་པོ་སྔོན་འགྲོ་ནིཿ སྒྱུ་མའི་དཔེ་བརྒྱད་ཀྱིས་རྡོས་བཅས་རྨི་ལམ་སྒྱུ་མར་བསྒོམ་པ་ནིཿ ད་ལྟར་གྱི་སྣང་བ་འདི་དོན་མེད་པར་སྣང་བ་མདང་གི་རྨི་ལམ་དང་འདྲ་སྟེཿ ངོ་བོར་མ་གྲུབ་བོ་སྙམ་པ་དངཿ རྨི་ལམ་ཡིན་ནོཿ སྒྱུ་མ་ཡིན་ནོ་སྙམ་དུ་སྐད་ཅིག་ཀྱང་མ་ཡེངས་པར་བྱ་སྟེཿ ཉལ་དུས་སྙིང་ནང་དུ་ཧཱུྃ་མཐིང་ག་ལ་སེམས་བཟུང་ལ་ཉལ་བས་རྨི་ལམ་དུའང་རྨི་ལམ་སྒྱུ་མར་འཆར་ཞིངཿ རྨི་ལམ་ཟིན་པ་དངཿ ཆགས་སྡང་དངཿ དགག་སྒྲུབཿ བྱ་བྱེདཿ ཆོས་སྤྱོདཿ འགྲོ་འདུག་ཐམས་ཅད་རྨི་ལམ་སྒྱུ་མར་ཤེས་པསཿ བདེན་ཞེན་དང་དགག་སྒྲུབ་མི་བྱའོཿ དེ་ལ་(༨༨)བརྟེན་ནས་སྒྱུ་མ་དངཿ མིག་ཡོར་དངཿ སྒྲ་བརྙན་དངཿ དྲི་ཟའི་གྲོང་ཁྱེར་དངཿ སྤྲུལ་པ་དངཿ ཆུ་ཟླ་དངཿ སྨིག་རྒྱུ་ལྟ་བུར་སྐད་ཅིག་ཀྱང་མ་ཡེངས་པར་བསྒོམས་ནསཿ ཉལ་དུས་འོད་ཀྱི་གོང་བུ་སྙིང་ནང་དུ་གསལ་བ་ལ་སེམས་བཟུང་བསཿ དེ་ལྟར་འབྱོངས་ནས་ཕྱི་ནང་གི་ཞེན་པ་དངཿ བླང་དོར་དང་རེ་དོགས་གང་ཡང་མི་འབྱུང་ངོཿ དངོས་གཞི་ནི་མངོན་སུམ་ངོ་སྤྲོད་ལཿ ཉིན་མཚན་དུ་ཤེས་རབ་རང་བྱུང་གི་སྒྲོན་མེ་བསྒོམས་པསཿ རབ་ཀྱིས་ལྷག་མེདཿ འབྲིང་གིས་བར་དོཿ ཐ་མ་རང་བཞིན་སྤྲུལ་པར་གྲོལ་ལོཿ
གསུམ་པ། བར་དོར་གཞི་ཐོག་ཕྱིན་ཚུལ།
གསུམ་པ་བར་དོར་གཞི་ཐོག་ཕྱིན་ཚུལ་ལ་གསུམ་ལསཿ དང་པོ་འབྱུང་བ་བསྡུས་ཏེཿ དར་ཅིག་བརྒྱལ་བ་ནི་དབའ་རླབས་གནན་པས་ངོ་སྤྲད་དོཿ དེ་ནས་སྒྲ་འོད་ཟེར་གསུམ་ནི་དེའི་དུས་སུ་རོལ་མོ་དང་འོད་འཆར་བས་ངོ་སྤྲད་དོཿ དེ་ནས་སེམས་དང་ཡེ་ཤེས་རྒྱབ་གྱེས་ཏེཿ ཡེ་ཤེས་གདངས་འཕོ་བ་ནིཿ ཤེལ་འོད་གཉིས་སོ་སོར་ཕྱེཿ དཀར་པོ་མེད་འོད་ལྔ་སྣང་བ་ལ་ངོ་སྤྲད་དོཿ དེ་ནས་གདངས་འཕོས་ཏེཿ ཡེ་ཤེས་ཕྱིར་དོན་པ་ནིཿ མར་མེ་མི་མོ་ནས་དོན་པ་ལ་ངོ་སྤྲད་དོཿ དེ་ནས་འོད་ལྔས་སྣང་སྲིད་ཁྱབ་པ་ནིཿ མིག་ལ་ཐེར་མ་བཀབས་ནས་འོད་སྣང་ལ་ངོ་སྤྲད་དོཿ དེ་ནས་ཞི་ཁྲོ་འཆར་བ་ནིཿ འདྲ་འབག་དང་ཐང་ཀ་ལ་ངོ་སྤྲད་དེཿ དེ་ནས་ཡེ་ཤེས་བཞི་སྦྱོར་ནིཿ ཚོས་ཀྱི་སྣམ་བུ་རྩེགས་མ་ལ་ངོ་སྤྲད་དོཿ དེ་ནས་ལྷུན་གྲུབ་རིན་པོ་ཆེ་ནིཿ ནམ་མཁའ་ལ་ཉི་ཟླ་གཟའ་སྐར་དངཿ ས་སྟེང་ན་སེམས་ཅན་ལ་ངོ་སྤྲད་དོཿ ནམ་མཁའ་ཀ་དགཿ གཟའ་སྐར་གཞི་སྣངཿ སེམས་ཅན་རྣམས་འགྲོ་དྲུག་ཏུ་ཤར་བའི་དཔེའོཿ གྲོལ་བ་ནི་ཡེ་ཐོག་བཞིན་ངོ་སྤྲད་དོཿ ཤིན་ཏུ་གསང་བའི་ངོ་སྤྲོད་སྙིང་ཏིག་མཿ དྲི་མེད་འོད་ཟེར་ཤར་བས་བཀོད་པ་རྫོགས་སོཿ ས་མ་ཡཿ རྒྱ་རྒྱ་རྒྱཿ