འཇུག་ལྡོག

འཇུག་ལྡོག་ནི།

གནས་སྐབས་གསུམ་མ་གཏོགས་པར་ཀུན་གཞི་ལ་དམིགས་ནས་རྒྱུན་ལྡན་དུ་འབྱུང་ཞིང༌། ས་བརྒྱད་པ་ལ་གནས་གྱུར་པས་ལྡོག་སྟེ། རྒྱན་ལས། ཡིད་དང་འཛིན་དང་རྣམ་པར་རྟོག །གྱུར་ཕྱིར་རྣམ་པར་མི་རྟོག་དང༌། །ཞེས་པ་ལྟར་རོ། །སངས་རྒྱས་ས་གནས་གྱུར་མཐར་ཐུག་པ་མཉམ་ཉིད་ཀྱི་ཡེ་ཤེས་སུ་འགྱུར་ཏེ། ཉོན་མོངས་ཅན་ཡིད་གནས་གྱུར་བ། །མཉམ་ཉིད་ཡེ་ཤེས་བརྗོད་པར་བྱ། །ཞེས་པ་ལྟར་རོ། ། བྱེད་ལས་ནི། ཡིད་ཤེས་ཀྱིས་བདག་རྐྱེན་བྱེད་ཅིང༌། ཚོགས་དྲུག་མཚན་མ་ལ་འཆིང་བའི་གནས་བྱས་ནས་ཟག་བཅས་སུ་འཆིང་བ་དང༌། ཀུན་གཞི་ལ་ས་བོན་འདེབས་པར་བྱེད་དེ། ལང་ཀར་གཤེགས་པ་ལས། སེམས་ནི་རང་བཞིན་དྭངས་བ་སྟེ། །རྙོག་པ་མེད་པ་ཡིད་ཡིན་ནོ། །རྣམ་པར་ཤེས་དང་བཅས་པའི་ཡིད། །རྟག་ཏུ་བག་ཆགས་འདེབས་པར་བྱེད། །ཅེས་གསུངས་པ་ལྟར་རོ། །གསུམ་པ་འཇུག་ཤེས་དྲུག་བཤད་པ་ལ། ཡིད་ཀྱི་སར། ངོ་བོ་ཉིད་དང་གནས་དང་ནི། །དམིགས་པ་དག་དང་གྲོགས་རྣམས་དང༌། །ལས་ཏེ་སྒོ་ནི་ལྔ་པོ་ཡིས། །སེམས་ནི་ཡུལ་ལ་འཇུག་པར་བྱེད། །ཅེས་པ་ལྟར་ལྔ་ལས། དང་པོ་ངོ་བོ་ཉིད་དམ་མཚན་ཉིད་ནི། རང་ཡུལ་གཟུགས་སོགས་ལ་སོ་སོར་འཇུག་པའི་རྒྱུན་མི་བརྟན་པར་གྱུར་པའི་གཙོ་སེམས་དེ། འཇུག་ཤེས་ཀྱི་མཚན་ཉིད། འཇུག་ཤེས་དྲུག་སོ་སོའི་མཚན་ཉིད་ནི། རང་གི་ཐུན་མོང་མ་ཡིན་པའི་བདག་རྐྱེན་མིག་དབང་ལ་དངོས་སུ་བརྟེན་ནས་རང་ཡུལ་ཀྱི་གཟུགས་ཀྱི་སྐྱེ་མཆེད་ཀྱི་ངོ་བོ་འཛིན་པའི་རྣམ་ཤེས་དེ། མིག་གི་རྣམ་པར་ཤེས་པའི་མཚན་ཉིད། བདག་རྐྱེན་མིག་གི་དབང་པོ་ལ་དངོས་སུ་བརྟེན་ཅིང་ཞེས་པས་རྣམ་ཤེས་གཞན་སེལ་ལ། དམིགས་རྐྱེན་གཟུགས་ཀྱི་ངོ་བོ་ལ་དམིགས་ནས་ཞེས་པས་མཚུངས་ལྡན་གྱི་སེམས་བྱུང་སེལ་ཞིང༌། ངོ་བོ་ཉིད་ནི་རང་གི་ཡུལ་གཞན་དང་མ་འདྲེས་པར་སོ་སོར་རྣམ་པར་རིག་པའོ། །ཞེས་པ་སྟེ་རྣམ་པར་རིག་པ་ནི་འཛིན་པ་དང་རྟོགས་པ་དང་ཁོང་དུ་ཆུད་པའི་དོན་ཏོ། །རང་གི་ཐུན་མོང་མ་ཡིན་པའི་བདག་རྐྱེན་རྣ་བའི་དབང་པོ་ལ་དངོས་སུ་བརྟེན་ཅིང་རང་ཡུལ་གྱི་སྒྲ་འཛིན་པའི་རྣམ་ཤེས་དེ། རྣ་བའི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་སྣ་དབང་ལ་དངོས་སུ་བརྟེན་ཅིང་རང་ཡུལ་གྱི་དྲི་འཛིན་པའི་རྣམ་ཤེས་དེ། སྣའི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ལྕེའི་དབང་པོ་ལ་དངོས་སུ་བརྟེན་ཅིང་རང་ཡུལ་གྱི་རོ་འཛིན་པའི་རྣམ་ཤེས་དེ། ལྕེའི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ལུས་དབང་ལ་དངོས་སུ་བརྟེན་ཅིང་རང་ཡུལ་གྱི་རེག་བྱ་འཛིན་པའི་རྣམ་ཤེས་དེ། ལུས་ཀྱི་རྣམ་ཤེས་ཀྱི་མཚན་ཉིད། རང་གི་ཐུན་མོང་མ་ཡིན་པའི་བདག་རྐྱེན་ཡིད་དབང་ལ་དངོས་སུ་བརྟེན་ཅིང་རང་ཡུལ་དེ་འཛིན་པའི་རྣམ་ཤེས་དེ། ཡིད་ཀྱི་རྣམ་ཤེས་ཀྱི་མཚན་ཉིད་དོ། །དེ་དྲུག་གི་ངོ་བོ་ལུང་མ་བསྟན་ཡིན་ཡང་གྲོགས་ཀྱི་དབང་གིས་དགེ་མི་དགེ་ལུང་མ་བསྟན་གསུམ་ཀ་སྐྱེ་རུང་ངོ༌། །གཉིས་པ་གནས་ནི། ཐམས་ཅད་ཀྱིའང་ས་བོན་གྱི་གནས་ཀུན་གཞིའི་རྣམ་པར་ཤེས་པ་དང༌། དེ་མ་ཐག་པའི་གནས་འགགས་མ་ཐག་པའི་ཡིད་དང༌། སྒོ་ལྔའི་ལྷན་ཅིག་འབྱུང་བའི་གནས་རང་རང་གི་དབང་པོ་དང༌། ཡིད་ཤེས་ཀྱི་ལྷན་ཅིག་འབྱུང་བའི་གནས་ཉོན་ཡིད་དང༌། དགེ་མི་དགེར་བྱེད་པའི་གནས་འཁོར་སེམས་ལས་བྱུང་བ་རྣམས་དང༌། མཚན་མ་ལ་འཆིང་བའི་གནས་ནི་ཉོན་ཡིད་དོ། །གསུམ་པ་དམིགས་པ་ནི། གཟུགས་ལ་སོགས་པ་ཡུལ་དྲུག་གོ ། བཞི་པ་གྲོགས་ནི། ཀུན་འགྲོ་ལྔ་ལ་སོགས་པའི་སེམས་བྱུང་རྣམས་ཏེ། གང་གི་གྲོགས་སུ་གང་འབྱུང་བ་ནི་མངོན་པ་གོང་འོག་ལས་ཤེས་པར་བྱའོ། །ལྔ་བ་བྱེད་ལས་ནི། ཐམས་ཅད་ཀྱིས་རང་རང་གི་ཡུལ་འཛིན་པར་བྱེད་ལ། སྒོ་ལྔས་དགེ་བ་དང་ཉོན་མོངས་པ་ཅན་གྱི་རྗེས་སུ་འཇུག་པ་དང༌། ལས་ཀུན་ནས་སློང་བའི་རྗེས་སུ་འཇུག་ཅིང༌། སྡུག་མི་སྡུག་གི་རྗེས་སུ་འཇུག་པར་བྱེད་དོ། །