དྲུག་པ་སྡོམ་པ་མཚན་ཉིད་པ་ཡིན་མིན་གཏན་ལ་དབབ་པ།

དྲུག་པ་སྡོམ་པ་མཚན་ཉིད་པ་ཡིན་མིན་གཏན་ལ་དབབ་པ་ལ་གཉིས་ལས།

དང་པོ་སྡོམ་པ་བཏགས་པ་བར་འདོད་པའི་ལུགས་དགག་པ་ལ་གཉིས་ལས། དང་པོ་ཕྱོགས་སྔ་མ་དགོད་པ་ནི་ཁ་ཅིག་ན་རེ། དགེ་སློབ་མའི་སྡོམ་པ་ཞེས་མིང་བཏགས་ཀྱང་བར་མའི་དགེ་བ་ཡིན་གྱི། སྡོམ་པ་མཚན་ཉིད་པ་མ་ཡིན་ནོ། །གལ་ཏེ་སྡོམ་པ་མཚན་ཉིད་པར་འདོད་ན། ཆོས་བཅུ་གཉིས་སྤོང་བ་སྡོམ་པའི་ངོ་བོར་འདོད་དམ། ཉི་ཤུ་རྩ་གཉིས་སྤོང་བ་དེ་སྡོམ་པའི་ངོ་བོར་འདོད། དང་པོ་ལྟར་ན་ཆོས་བཅུ་གཉིས་སྤོང་བ་དེ་ཆོས་ཅན། སྡོམ་པའི་མཚན་ཉིད་ཅན་མ་ཡིན་པར་ཐལ། སྤོང་བ་བདུན་གྱི་མཚན་ཉིད་མེད་ལ། སྤོང་བ་བཞིའི་མཚན་ཉིད་ཀྱང་མེད་པའི་ཕྱིར་རོ། །རྟགས་མ་གྲུབ་ན། གཅིག་པུ་ལམ་དུ་འགྲོ་མི་བྱ་ལ་སོགས་པ་བཅུ་གཉིས་པོ་དེ་སྲོག་གཅོད་པ་སྤོང་བ་ལ་སོགས་པ་སྤོང་བ་བདུན་དང་སྤོང་བ་བཞི་པོ་གང་ཡང་མ་ཡིན་པ་དང་འགལ་ལོ། །ཁྱབ་པ་མ་གྲུབ་ན། འོད་ལྡན་ལས། དགེ་སློང་དང་དགེ་སློང་མའི་སྡོམ་པ་ནི་སྤོང་བ་བདུན་གྱི་མཚན་ཉིད་ཡིན་ལ། དགེ་ཚུལ་ལ་སོགས་པ་དག་གི་ནི་སྤོང་བ་བཞིའི་མཚན་ཉིད་ཀྱང་ཞེས་སོ་སོར་ཐར་པའི་སྡོམ་པ་མཚན་ཉིད་པ་གཞིར་བྱས་ལ་སྤོང་བ་བདུན་ནམ་སྤོང་བ་བཞི་པོ་གང་རུང་དུ་ངེས་པ་གསུངས་པ་དང་འགལ་ལོ། །འདོད་ན། སྡོམ་པ་མཚན་ཉིད་པ་ཡིན་པའི་དམ་བཅའ་ཉམས་སོ། །གཉིས་པ་ལྟར་ན། དགེ་སློབ་མའི་བསླབ་པ་བླངས་པའི་སྐབས་འདིར་ཉི་ཤུ་རྩ་གཉིས་སྤོང་བ་དེ་སྔར་མེད་གསར་དུ་སྐྱེས་པར་འདོད་དམ། སྔར་དགེ་ཚུལ་མས་སྤོང་བ་བཅུ་ཐོབ་ཟིན་པ་དེའི་སྟེང་དུ་བཅུ་གཉིས་བསྣན་ཏེ་ཉི་ཤུ་རྩ་གཉིས་སྤོང་བ་དགེ་སློབ་མའི་སྡོམ་པར་འདོད། དང་པོ་ལྟར་ན། དགེ་སློབ་མའི་བསླབ་པ་མནོས་པའི་སྐབས་འདིར་ཆོས་ཅན། ཉི་ཤུ་རྩ་གཉིས་སྤོང་བ་དེ་སྐབས་འདིའི་ཆོ་ག་ལ་བརྟེན་ནས་སྐྱེས་པ་མ་ཡིན་པར་ཐལ། ཉི་ཤུ་རྩ་གཉིས་སྤོང་བ་དེ་སྐབས་འདིར་ཆོ་ག་སྦྱོར་དངོས་མཇུག་གསུམ་གང་གིས་ཀྱང་མ་བླངས་པའི་ཕྱིར་རོ། །དེའང་སྦྱོར་བའི་དུས་སུ་ཆོས་བཅུ་གཉིས་སྤང་བར་གསོལ་བ་བཏབ་ཅིང་ཉི་ཤུ་རྩ་གཉིས་སྤང་བར་གསོལ་བ་མ་བཏབ་པའི་ཕྱིར་དང༌། དངོས་གཞིའི་དུས་སུའང་ཆོས་བཅུ་གཉིས་ཀྱི་ཆོ་ག་གསུངས་ཀྱི་ཉི་ཤུ་རྩ་གཉིས་ཀྱི་ཆོ་ག་མ་གསུངས་པའི་ཕྱིར་དང༌། མཇུག་གི་ཆོ་གར་ཡང་བསླབ་པ་བཅུ་གཉིས་བརྗོད་ཀྱི་ཉི་ཤུ་རྩ་གཉིས་མ་བརྗོད་པའི་ཕྱིར་ཏེ་དེ་ལྟར་ཀརྨ་ཤ་ཏཾ་ལས་སོ། །གཉིས་པ་ལྟར་ན། ཆོས་བཅུ་སྤོང་བ་དང་བཅུ་གཉིས་སྤོང་བ་དེ་ཆོས་ཅན། གང་ཟག་གཅིག་གི་རྒྱུད་ལ་དགེ་སློབ་མའི་སྡོམ་པ་ཙམ་དུ་གཅིག་མ་ཡིན་པར་ཐལ། རྒྱུ་ཚོགས་ཐ་དད་ལས་སྐྱེས་པའི་ཕྱིར་དང༌། དང་པོ་གྲུབ་པའི་དུས་ཐ་དད་པའི་ཕྱིར་ཞེས་རེ་རེ་ནས་བརྗོད་དོ། །དེ་ཡང་ཆོས་བཅུ་སྤོང་བ་ནི་སློབ་དཔོན་མ་དང་སྔགས་ལན་གསུམ་བརྗོད་པ་ལས་སྐྱེས་ཤིང་ཆོས་བཅུ་གཉིས་སྤོང་བ་ནི་དགེ་འདུན་མ་དང་ལས་ཀྱི་ཆོ་ག་ལ་བརྟེན་ནས་སྐྱེས་པའི་ཕྱིར་དང༌། ཆོས་བཅུ་སྤོང་བ་ནི་སྔར་བརྗོད་པ་གསུམ་པའི་ཆ་ཐ་མ་ལས་སྐྱེས་ཤིང༌། ཆོས་བཅུ་གཉིས་སྤོང་བ་ནི་གསོལ་བ་གཉིས་ཀྱི་ལས་བརྗོད་པ་ཕལ་ཆེར་བྱས་པ་ན་སྐྱེས་པའི་ཕྱིར་རོ། །ཁྱབ་པ་མ་གྲུབ་པའམ། འདོད་ན་ཆོས་བཅུ་སྤོང་བ་དང་ཆོས་ཉི་ཤུ་རྩ་གཉིས་སྤོང་བ་དེ་དག་གང་ཟག་གཅིག་གི་དགེ་སློབ་མའི་སྡོམ་པ་ཡིན་པར་འདོད་པའི་དམ་བཅའ་ཉམས་སོ། །གཞན་ཡང་མཛོད་ལས། སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བར་མནོས་པ་ལས། །དགེ་བསྙེན་དང་ནི་བསྙེན་གནས་དང༌། །དགེ་ཚུལ་ཆེད་དང་དགེ་སློང་ཉིད། །ཅེས་སྡོམ་པ་མཚན་ཉིད་པའི་སྤང་བྱའི་གྲངས་གསུངས་པའི་སྐབས་སུ། དགེ་སློབ་མའི་སྤང་བྱའི་གྲངས་མ་གསུངས་པས་ཀྱང༌། སྡོམ་པ་མཚན་ཉིད་པ་མ་ཡིན་པར་གྲུབ་ཅེས་ཟེར། དེ་ལྟར་དགེ་སློབ་མའི་སྡོམ་པ་མཚན་ཉིད་པ་ལ་དགག་པ་མཛད་ནས། འདུལ་བ་དང་མངོན་པ་ལས་དགེ་སློབ་མའི་སྡོམ་པ་ཞེས་གསུངས་ཀྱང༌། སྡོམ་པ་བཏགས་པ་བ་སྟེ་བར་མའི་དགེ་བ་ཡིན་པར་འདོད་པ་ཡོད་དོ། ། གཉིས་པ་དེ་དག་དགག་པ་ནི། དགེ་སློབ་མའི་བསླབ་པ་དེ་ཆོས་ཅན། སྡོམ་པ་མཚན་ཉིད་པ་ལས་རྫས་ཐ་དད་པར་ཐལ། བར་མའི་དགེ་བ་ཡིན་པའི་ཕྱིར་རོ། །རྟགས་ཁས་བླངས་སོ། །འདོད་ན། མཛོད་འགྲེལ་ལས། དགེ་ཚུལ་གྱི་སྡོམ་པ་ལས་ཀྱང་དགེ་སློབ་མ་དང་དགེ་ཚུལ་མའི་སྡོམ་པ་རྫས་གཞན་མ་ཡིན་ནོ། །ཞེས་གསུངས་པ་དང་འགལ་ལོ། །