དགེ་བསྔོའི་སྨོན་ཚིག་དང་མཇུག་བྱང་།
དགེ་བསྔོའི་སྨོན་ཚིག་དང་མཇུག་བྱང་།སྨྲས་པ། རྣམ་ཀུན་མཆོག་ལྡན་འགྱུར་མེད་བདེ་ཆེན་དཔྱིད་ཀྱི་དཔལ་མོའི་མངལ་ཁུར་ལས། །མཚན་དཔེའི་མྱུ་གུ་གཡུར་དུ་ཟ་བའི་འཁྲི་ཤིང་གཞོན་ནུ་ལེགས་ལྡན་པར། །གཅིག་ལས་དུ་མར་སྣང་བའི་སྒྱུ་འཕྲུལ་ཕང་ཕུང་འདབ་མ་རྒྱས་པའི་རྩེར། །དངོས་གྲུབ་བྱེ་བའི་འབྲས་བཟང་རབ་དུད་ཡོངས་འདུ་ས་བརྟོལ་དང་པོའི་མགོན། །ཐུབ་གསུང་སྙིང་པོ་སྣ་ཚོགས་རིན་ཆེན་ཁམས། །ཟླ་བཟང་མཁྱེན་མངས་སོར་མོའི་འདུ་བྱེད་ལས། །ལེགས་བྱས་པདྨ་སྤུངས་པའི་ཕྲ་ཚོམས་ཅན། །གཏན་བདེའི་འོད་དུ་འབར་བ་རྣ་བའི་རྒྱན། །དམར་སྣུམ་རལ་པའི་རྩེ་ན་ཟླ་ཚེས་པའི། །སྲིད་ཞིའི་བྱེད་པོའི་དཔལ་གྱི་མགྲིན་པ་ལས། །ལྐོག་གྱུར་གཟུགས་ཀུན་རི་མོའི་ཨཱ་དཪྴ། །འཆར་བའི་གཡུལ་ལས་རྣམ་རྒྱལ་དབྱངས་དེ་འཇེབས། །མ་རིག་ས་ཀུ་ཙི་ཏྲའི་ཁ་ཆུ་ལ། །(༥༤ན)
ལས་ཉོན་ཐགས་སུ་གྲུབ་པའི་ཁམས་ལྔའི་དར། །བླང་དོར་ཚོན་རིགས་བསྡེབས་པའི་ཟ་འོག་གོས། །འདི་སྣང་ལུས་ལ་རེག་བྱ་འཇམ་པས་བདེ། །སྒྲ་ཚད་བཟོ་གསོའི་རི་མོ་རྣམ་བཀྲ་བའི། །སྨྲ་བའི་སྤོབས་པ་གཟེངས་སུ་མཐོ་བའི་གླུ། །མགྲིན་པའི་འཁོར་ལོའི་དབུས་ནས་བླངས་པའི་དབྱངས། །འགྱུར་ཁུགས་སྙན་པའི་དཔལ་དེ་སྒྲ་འཛིན་དཔྱིད། །ཉེས་བརྒྱའི་ཁུང་བུར་འཁྱིལ་བའི་ཚུལ་འཆོས་ཅན། །དམ་པའི་སྤྲུལ་པར་ཁས་འཆེའི་ལྕེ་གཉིས་སྐྱོང་། །སྨྲ་བཅད་སྟོབས་འབྱོར་བཟང་བརྫུའི་ལྟོ་འགྲོའི་སྲོག །ལེགས་བཤད་མཁའ་ལྡིང་འགྱིང་བའི་སྡེར་མོས་བཅད། །གཙུག་ལག་རྒྱ་མཚོར་མཁྱེན་ཅན་དཀྱུས་རིང་པོར། །འཇུག་པའི་རིག་སྔགས་འཆང་བའི་འཁོར་ལོས་སྒྱུར། །གང་དེས་ལེགས་བཤད་དྲི་ཚིག་ཏམྦུ་ར། །ཉུང་ངུ་རྣམ་གསལ་སོར་མོས་བསྐུལ་འདི་སྙན། །ཐོས་ཉུང་མཚན་མོའི་བློ་ཡིས་པདྨའི་སྦུབས། །རྨོངས་རྟུལ་འདབ་མའི་རྒྱ་ནང་འཐུམས་པའི་དབུས། །སྨྲ་བའི་རྐང་དྲུག་འཕུར་འདོད་གླུ་ལེན་ན། །བསླབ་སྦྱང་གསར་པའི་སྐྱ་རེངས་འཆར་དེ་སྒུགས། །དེ་ལྟའི་མ་རིག་མུན་པ་སྟུག་པོའི་ནང་། །ཅི་བརྟོལ་བསྐྱེད་པའི་ཚིག་འཕྲེང་འདོམ་འཇལ་མཁན། །དྲི་བྱེད་ཡུལ་བཅས་བཅུད་བྲལ་བུམ་པ་ཟུང་། །ཕན་ཚུན་འཇོ་བའི་སྒྱུ་མའི་འཁྲུལ་འཁོར་བཞིན། །འོན་ཀྱང་ཐོས་བསམ་གཤོག་རྩལ་རྫོགས་པའི་རྒོད། །བཅུ་ཕྲག་རིག་གནས་མཁའ་དབྱིངས་མཐའ་འཇལ་ཡང་། །རེས་འགའ་ཅོང་རོང་ཁྲོད་དུ་མཚུན་ཟས་ལ། །(༥༤བ)
སྤྱོད་ལྟར་དོགས་པའི་གནས་ཀུན་བསལ་བར་བྱས། །ཆུ་འཛིན་གསར་པའི་ལང་ལོང་གཡོ་བའི་དབུས། །འབྲུག་སྒྲ་དལ་གྱིས་རྒོད་ཚེ་གཙུག་ཕུད་ཅན། །སྒྲོ་གཤོག་ཟླུམ་པོར་བྱས་ནས་དགའ་བའི་བར། །སྒྱུར་བ་དབྱར་གྱི་རྒྱལ་མོའི་ངང་ཚུལ་ཡིན། །ལོ་པཎ་བརྒྱུད་པའི་ཡང་སྲིད་མཚན་སྙན་ཡང་། །བློ་ལྡན་མདུན་སར་མིག་ཕབ་ངག་བཅད་ནས། །རྔུལ་ཆུའི་མུ་ཏིག་འཕྲེང་བ་འགྲམ་འཆང་བའི། །རྣམ་པར་ཐར་དེ་བདག་འདྲས་ཟིན་མ་གྱུར། །དགུ་མཐའ་ཙམ་གྱི་རི་མོ་མི་ཤེས་པར། །དང་པོའི་སངས་རྒྱས་རྒྱུད་ཀྱི་དགོངས་འགྲེལ་དག །རྩོམ་པར་རློམ་རྣམས་རིགས་ལྡན་རིགས་ཡིན་ན། །མ་ཁའི་ཡུལ་གྱི་སྦྲང་རྩིའི་བློ་གྲོས་སུ། །ཀྱེ་མ་ལུང་རིགས་མ་འབྲེལ་མདོ་སྔགས་འཆད། །ལེགས་སྦྱར་སྡེབ་སྦྱོར་མི་ཤེས་རྡོག་བཅག་སྒྲིག །ཚད་བྲལ་བཟོ་དང་གྲོང་ཚིག་སྙན་ངག་ཏུ། །རློམ་རྣམས་གཞན་འཕྲུལ་གནས་ཀྱི་བྱེད་པོའི་བུ། ཁུངས་བྲལ་རང་བཟོའི་དབང་ཁྲིད་མན་ངག་ལུང་། །ཧ་ལའི་རྐྱལ་པ་ཐོགས་པའི་གསོ་རིག་པ། །གཟའ་སྐར་ལོག་པར་སྟོན་པའི་རྩིས་མཁན་རྣམས། །འདི་ཕྱིའི་བདེ་འཕྲོག་འཕྲོག་པའི་གཤིན་རྗེ་དངོས། །ཡང་ཡང་ཚུལ་དེ་བསམས་ཚེ་འཁྲུལ་མེད་དུ། །མང་མང་བཅུ་ཕྲག་རིག་པའི་དཀའ་གནས་ཀུན། །གསལ་གསལ་རྗེན་པར་སྟོན་པའི་ཡོངས་འཛིན་རྣམས། །དད་དད་སེམས་ཀྱིས་ལག་པད་སྙིང་གར་ཟུམ། ཁོ་བོ་སྔོན་བསགས་ལེགས་བྱས་མི་དམན་པས། །མང་ཐོས་མཁས་མཆོག་དུ་མའི་ཚོགས་དང་མཇལ། །རྒྱ་ཆེན་ཤེས་བྱའི་(༥༥ན)
གནས་ལུགས་མཐའ་ཀླས་པར། །དག་དང་མ་དག་འབྱེད་པའི་སྤོབས་པ་ཐོབ། །དེ་ལྟ་ན་ཡང་མཁས་ལས་བླུན་བྲིན་པའི། །མཐའ་འཁོབ་ཁ་བས་བསྐོར་བའི་བོད་དུ་སྐྱེས། །གཟིག་ལྤགས་གྱོན་པའི་མགྲིན་བཟང་གྲལ་རིང་དེར། །ཉམ་ཆུང་སྔོན་མེད་ཀ་ལ་པིང་ཀ་ཚུད། །འོན་ཏང་ཤར་རིའི་རྩེ་ནས་ཉིན་བྱེད་དབང་། །བགྲང་མེད་ཤར་ཡང་འཛད་མི་ཤེས་པ་ལྟར། །མགྲིན་པའི་ལམ་ནས་ལེགས་བཤད་མི་ཟད་ཀྱང་། །དང་པོའི་ལས་ཅན་དོན་དུ་ཉུང་ངུར་བཀོད། །དགེ་བའི་ལེགས་བྱས་འཕྲུལ་གྱི་ལྡེ་མིག་གིས། །སྡེ་བཞིའི་སྒོ་འཕར་ཕྱེ་བའི་གན་མཛོད་ལས། །ཆོས་སྲིད་འབྱོར་བར་སྤྱོད་པའི་གདུགས་དཀར་པོའི། །བསིལ་བའི་གྲིབ་མར་འགྲོ་ཀུན་ངལ་གསོར་ཤོག །ཅེས་རྩིས་དཀར་ནག་ལས་བརྩམས་པའི་དྲིས་ལན་ཉིན་བྱེད་དབང་པོའི་སྣང་བ་ཞེས་བྱ་བ་འདི་ནི། སློབ་དཔོན་གཞིས་ཀ་ཤར་པ་ཨ་འགུར་དང་། དཔལ་ནོར་བུ་སྤུན་གྱིས་སྔ་ཕྱིར་ནན་གྱིས་བསྐུལ་ཅིང་། གཞན་ཡང་དོན་གཉེར་ཅན་དུ་མས་བསྐུལ་བ་ལ་བརྟེན་ནས། རྡོ་རྗེ་ཐེག་པ་དང་ཐ་སྙད་ཀྱི་ཚུལ་ལ་མཁྱེན་སྤྱན་རྣམ་པར་ཡངས་པ་ཟུར་འུག་བྱ་ལུང་པའི་རིགས་ལས་རྡོ་རྗེ་འཛིན་པ་ཆེན་པོ་དཔལ་འབྱོར་འཕྲིན་ལས་རབ་རྒྱས་ཀྱི་དྲུང་དུ་དཀར་ནག་གི་རྩིས་ཕྲ་རགས་ཐོས་བསམ་གྱིས་གཏན་ལ་ཕབ། གཉགས་ཀྱི་བནྡེ་བླ་མཁྱེན་ངག་དབང་འཇམ་དཔལ་བློ་གྲོས་ལས་རྩིས་དཀར་ནག་དང་དབྱངས་འཆར་གྱི་ལེགས་བཤད་མང་དུ་ཐོས་ལ། སྨོན་མདར་སོགས་མཁས་པ་མང་དུ་བསྟེན་པས་རིག་གནས་དུ་མའི་འཕྲེང་བ་མགྲིན་པར་འཆང་བ་(༥༥བ)
ཟུག་པོ་ནས་གཞོན་ནུ་སྐལ་བཟང་པདྨ་དཀར་པོའི་ཞལ་ལུང་གི་སྟེང་ནས་རྒྱུ་མཚན་རྩིས་སོགས་ཀྱི་རིག་པ་དུ་མ་མཐའ་ཆོད་པར་མནོས་ཤིང་། རྒྱ་གར་གྱི་ཆུ་བོ་གངྒ་ཚུན་ཆད་དུ་གནས་ལྔ་རིག་པ་སྨྲ་བ་ལ་ཟླ་མེད་པའི་མཁས་པ་ཆེན་པོ་སྨོན་འགྲོ་ནས་རིག་གནས་རྒྱ་མཚོའི་འཕྲེང་བ་འཛིན་པ་ཚེ་དབང་དོན་གྲུབ་པའི་རིགས་ཆོས་ཀྱི་སྲས་ཤེས་བྱ་ཀུན་རིག་འཇམ་དབྱངས་དབང་རྒྱལ་རྡོ་རྗེའི་དྲུང་དུ་དཔལ་གཡུལ་ལས་རྣམ་པར་རྒྱལ་བའི་སྐོར་ཡོངས་སུ་རྫོགས་པ་དང་། རེའུ་མིག་རྒྱ་མཚོ་སོགས་སྐར་རྩིས་ཀྱི་གནད་དུ་མ། ནག་རྩིས་ཀྱི་གཏོ་དཀར་ནག་སོགས་ཐོས་པས། རྩིས་ཀྱི་གཙུག་ལག་ལ་སྤོབས་པ་དགེ་བ། བཅུ་ཕྲག་རིག་པའི་གནས་སྨྲ་བ་ལ་དབྱངས་ཅན་མགྲིན་པར་ཆགས་པའི་བློ་གྲོས་ཀྱི་ལང་ཚོ་དར་ལ་བབ་ཅིང་། གངས་ཅན་གྱི་ལྗོངས་འདིར་བླ་དཔོན་ཟུང་དུ་འཇུག་པ་སྡེ་སྲིད་རིན་པོ་ཆེ་ཕག་མོ་གྲུ་པའི་མདུན་ན་འདོན། ཟ་ཧོར་གྱི་རིགས་ལས་ངག་དབང་བློ་བཟང་རྒྱ་མཚོ་འཇིགས་མེད་གོ་ཆ་ཐུབ་བསྟན་ལང་ཚོའི་སྡེ། མིང་གཞན་འཇམ་དབྱངས་གོང་མའི་ལུང་གིས། ཟི་ཐེན། ཏྭ་ཞན། ཅི་ཙེའི་ཕཱེ། ཤཱ་ཝུའི་ཐེན་ཞཱ། ཤི་ཀྱོའུ། ཡི་ཐུང་། བཱི་ཞི། ཏའི་ཆི་ཀྱིང་གང་། དེའི་ཁེའི། ཤང་ཟི། ཙི་ཡིན། ཞེས་སྲིད་ཞིའི་གཙུག་གི་རྒྱན་དུ་དབང་བསྐུར་བ་གང་གིས། འདྲེན་མཆོག་ཟས་གཙང་སྲས་པོ་དྲག་པོ་ཞེས་པ་ལྕགས་སྤྲེལ་སྐུ་བལྟམས་ནས་ལོ་ཉིས་སྟོང་དྲུག་བརྒྱ་བཅོ་ལྔར་སླེབ་པ། འཕགས་པའི་ཡུལ་དུ་མ་ད་ན་ཞེས་པ་ཕྱོགས་འདིར་མྱོས་བྱེད་དུ་འབོད་ཅིང་། རྒྱ་ནག་གི་ཡུལ་གྲུར་ལོ་གསར་ཟིན་པས་བིང་ཤིང་ཞེས་པ་བོད་ཡུལ་དུ་མེ་ཕོ་སྤྲེའུར་གྲགས་པ། རྟ་ལྗང་ཅན་ཆུ་སྲིན་གྱི་ཁྱིམ་དུ་སྤྱོད་པ་རྒྱ་གར་བ་པཽ་ཥྱ། རྒྱ་(༥༦ན)
ནག་པ་ཤི་དབྲི་ཡོལ་དུ་རྗོད་པའོ། །ཧོར་གྱི་ཟླ་བ་བཅུ་གཉིས་པའི་དུས་འཁོར་བ་ལུགས་ཀྱི་དམར་ཕྱོགས་ཀྱི་གང་བ་དང་པོ། ཡུ་ཎའི་དབྱངས་ཧཱ། གསལ་བྱེད། ྈྐཾྈྐཱཿ ཁམས་སྙིང་སྟོབས་ཀྱི་མུན་པ་འཇུག་པ་ཆུང་ངུའི་སྨིན་པ། དབྱངས་འཆར་བའི་དཀར་ཕྱོགས་ཀྱི་གང་བ་དང་པོ། དབྱངས་ཨཽ། གསལ་བྱེད་ཙ། ཁམས་ནམ་མཁའ། འདོད་ཡོན་སྒྲ་འཆར་བ། རྟ་བདུན་གྱི་དབང་པོ་མེ་བཞིའི་དགའ་མ་དང་རྩེ་བའི་ཏཏྐཱ་ལ་བུམ་པའི་དུས་སྦྱོར་ལ། ལུགས་གཉིས་ཀྱི་མདུན་ས་ཆེན་པོ། དགའ་ལྡན་ཕྱོགས་ཐམས་ཅད་ལས་རྣམ་པར་རྒྱལ་བའི་ཕོ་བྲང་གི་གཟིམས་ཆུང་དགའ་ལྡན་སྣང་གསལ་དུ་སྦྱར་བའི་ཡི་གེ་པ་ནི་འཇམ་དབྱངས་དཔལ་བཟང་གིས་བགྱིས་པ་སིདྡྷི་རསྟུ།། །།ཡེ་དྷརྨཱ་ཧེ་ཏུ་པྲབྷ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་ཝཾ་ཝཱ་དཱི་མཧཱ་ཤྲམ་ཎཿ ཤུ་བྷམ་སྟུ་སརྦྦ་ཛ་ག་ཏཾ།། །