གཉིས་པ་སེམས་བྱུང་གི་དབྱེ་བ་བཤད་པ།

གཉིས་པ་སེམས་བྱུང་གི་དབྱེ་བ་བཤད་པ་ལ།

ཀུན་འགྲོ་ལྔ་དང༌།

ཡུལ་ངེས་ལྔ་དང༌། དགེ་བ་བཅུ་གཅིག་དང༌། རྩ་ཉོན་དྲུག་དང༌། ཉེ་ཉོན་ཉི་ཤུ་དང༌། གཞན་འགྱུར་བཞི་བཤད་པ་དང་དྲུག དང་པོ་ཀུན་འགྲོ་ལྔ་བཤད་པ་ལ་ལྔ་ལས། དང་པོ་ཚོར་བ་ནི། རང་ཡུལ་གྱི་སིམ་གདུང་བར་མ་ཅི་རིགས་འཛིན་པའི་སེམས་བྱུང་དེ། ཚོར་བའི་མཚན་ཉིད། དེའི་དམིགས་པ་ནི། ཚོར་བ་ཀུན་འགྲོ་ཡིན་པའི་ཕྱིར་སྤྱི་རིགས་ནས་ཆོས་ཐམས་ཅད་དེ། རྣམ་པ་ནི། བརྒྱད་སྟོང་འགྲེལ་བར། དམིགས་པ་ལ་འཛིན་པའི་བྱེ་བྲག་ཉིད་ནི་རྣམ་པའོ། །ཞེས་གསུངས་པ་ལྟར་ཤེས་པའི་འཛིན་སྟངས་ཏེ་སིམ་པ་དང་གདུང་བ་དང་བཏང་སྙོམས་སུ་སྣང་བའོ། ། དབྱེ་ན། བསམ་གཏན་གསུམ་པ་མ་ཡིན་པའི་ཡིད་ཤེས་དང་མཚུངས་ལྡན་གྱི་སེམས་པ་ཡིད་བདེ་བ་དང༌། དབང་ཤེས་ལྔ་དང་བསམ་གཏན་གསུམ་པའི་ཡིད་ཤེས་དང་མཚུངས་ལྡན་གྱི་སིམ་པ་བདེ་བ་དང༌།རྣམ་ཤེས་ལྔ་དང་མཚུངས་ལྡན་གྱི་གདུང་བ་སྡུག་བསྔལ་དང༌། ཡིད་ཤེས་དང་མཚུངས་ལྡན་གྱི་གདུང་བ་ཡིད་མི་བདེ་བ་དང༌། སིམ་གདུང་གཉིས་ཀ་མེད་པ་བཏང་སྙོམས་དང་ལྔ་སྟེ། མཛོད་ལས། ལུས་ཚོར་སིམ་བ་མ་ཡིན་གང༌། །སྡུག་བསྔལ་དབང་པོའི་སིམ་པ་ནི། །བདེ་བའོ་བསམ་གཏན་གསུམ་པ་ན། །སེམས་ཀྱི་དེ་ནི་བདེ་དབང་པོ། །གཞན་ན་དེ་ཡིད་བདེ་བའོ། །སེམས་ཀྱི་སིམ་པ་མ་ཡིན་གང༌། །ཡིད་མི་བདེ་བའོ་བཏང་སྙོམས་ནི། །བར་མའོ་གཉིས་ཀར་མི་རྟོག་ཕྱིར། །ཞེས་པ་ལྟར་རོ། ། གཉིས་པ་འདུ་ཤེས་ནི། རང་ཡུལ་གྱི་མཚན་མ་འཛིན་པའི་སེམས་བྱུང་དེ། འདུ་ཤེས་ཀྱི་མཚན་ཉིད། དེའི་དམིགས་པ་ནི། སྤྱི་རིགས་ནས་ཆོས་ཐམས་ཅད་དེ་འདིའང་ཀུན་ཏུ་འགྲོ་བ་ཡིན་པའི་ཕྱིར་རོ། །རྣམ་པ་ནི།ཡུལ་གྱི་སྤུ་རིས་མི་འདྲ་བ་སྣ་ཚོགས་རིག་ཅིང་སྣང་བའོ། ། དབྱེ་བ་ནི་གཉིས་ཏེ།འཁོར་བ་རྟག་པ་དང་བདེ་བ་དང་བདག་དང་གཙང་བ་ལ་སོགས་པར་འདུ་ཤེས་པ་ཕྱིན་ཅི་ལོག་དང༌། དེ་ལས་ལྡོག་པ་ལ་སོགས་པར་འདུ་ཤེས་པ་ཕྱིན་ཅི་མ་ལོག་པའོ།། གསུམ་པ་སེམས་བྱུང་སེམས་པ་ནི། རང་ཡུལ་ལ་གཡོ་ཞིང་ཡུལ་དེ་ཡིད་ལ་འཇགས་པར་བྱེད་པའི་རྣམ་པ་ཅན་གྱི་སེམས་བྱུང་དེ། སེམས་བྱུང་སེམས་པའི་མཚན་ཉིད། ཁབ་ལེན་དབང་གིས་ལྕགས་གཡོ་བ་ལྟར་གང་གིས་སེམས་དམིགས་པ་ལ་མངོན་པར་འདུ་བྱེད་ཅིང་སྐུལ་བར་བྱེད་པའི་སེམས་ཀྱི་རྣམ་འགྱུར་ཡིན་ལ། བྱེད་ལས་ནི། ཇི་ལྟར་མངོན་པར་འདུས་བྱས་པ་ལྟར་དད་པ་སོགས་དགེ་བ་དང༌། ཞེ་སྡང་སོགས་མི་དགེ་བ་དང༌། སྤྱོད་ལམ་ཕལ་བ་ལ་སོགས་པ་ལུང་དུ་མ་བསྟན་པའི་ཆོས་རྣམས་ལ་སེམས་གཡོ་ཞིང་འཇུག་པར་བྱེད་པའི་ལས་ཅན་ནོ། །

བཞི་བ་རེག་པ་ནི། ཡུལ་དབང་སེམས་གསུམ་འདུས་ནས་ཡུལ་ལ་འཕྲད་ཅིང་དཔྱོད་པའི་རྣམ་པ་ཅན་གྱི་སེམས་བྱུང་དེ། རེག་པའི་མཚན་ཉིད། དེ་ཡང་ཡུལ་དབང་རྣམ་ཤེས་གསུམ་རྒྱུ་འབྲས་ཀྱི་དངོས་པོར་འདུས་ཤིང་གནས་ནས། བདེ་སོགས་འབྱུང་བ་མཐུན་པའི་དབང་པོའི་འགྱུར་བ་དང་འདྲ་བར་ཡུལ་གྱི་རྣམ་པ་ཡོངས་སུ་གཅོད་ཅིང་རྟོག་པར་བྱེད་པ་སྟེ། མདུང་ཁྱིམ་ལྟར་དེ་དང་ལྷན་ཅིག་དེ་ལས་བྱུང་བའི་ཚོར་བའི་གནས་སམ། རྟེན་བྱེད་པའི་ལས་ཅན་ནོ། །ལྔ་བ་ཡིད་བྱེད་ནི། སེམས་ཀྱི་འཇུག་པ་དམིགས་པ་ལ་སེམས་མངོན་དུ་ཕྱོགས་པར་བྱེད་ཅིང་དམིགས་པ་དེ་ཉིད་ལ་སེམས་ཡང་དང་ཡང་དུ་འཛིན་ཅིང་གཏོད་པར་བྱེད་པའི་སེམས་བྱུང་དེ། ཡིད་བྱེད་ཀྱི་མཚན་ཉིད་ཡིན་ནོ། །ཡིད་ལ་བྱེད་པ་ནི་སྐད་ཅིག་རེ་རེ་འཛིན་ལ། ཏིང་ངེ་འཛིན་ནི་ཡུན་རིང་དུ་འཛིན་པ་ཁྱད་པར་ཡིན་ལ། ཡང་སེམས་པ་ནི་ཡུལ་ལ་གཡོ་བར་བྱེད་པ་རྒྱལ་པོ་བཞེངས་སུ་འཇུག་པ་ལྟ་བུ་སྟེ། ཡིད་ལ་བྱེད་པ་ནི་དམིགས་པ་ལ་ཁྱད་པར་དུ་གཏོད་པ་རྒྱལ་པོ་སྐྱེད་མོས་ཚལ་དུ་ཁྲིད་པ་ལྟ་བུའོ། །

སྤྱིར་སེམས་ལས་བྱུང་བ་རྣམས་ཀྱི་མི་འདྲ་བའི་ཁྱད་པར་ནི་ཤིན་ཏུ་ཕྲ་བས་བརྗོད་པར་དཀའ་སྟེ། མེ་ལོང་དུ། བུར་ཤིང་འོ་མ་བུར་སོགས་ཀྱི། །མངར་བ་ཉིད་ནི་ཁྱད་པར་ཆེ། །དེ་ལྟ་མོད་ཀྱིས་དེ་བརྗོད་པར། །དབྱངས་ཅན་མས་ཀྱང་ནུས་མ་ཡིན། །ཞེས་པ་ལྟར་རོ། །