གསུམ་པ་བསྟེན་ཚུལ་གྱི་དོན་བསྡུ་བ།
གསུམ་པ་བསྟེན་ཚུལ་གྱི་དོན་བསྡུ་བ་ནི།
འདིར་མང་སྨྲ་བ་ཅི་ཞིག་དགོས། །བླ་མ་དགྱེས་བྱེད་གང་ཡིན་བྱ། །མི་མཉེས་བྱེད་ཀུན་སྤང་བར་ནི། །དེ་དང་དེ་ལ་འབད་དེ་སྤྱད། །དངོས་གྲུབ་སློབ་དཔོན་རྗེས་འབྲང་ཞེས། །རྡོ་རྗེ་འཛིན་པ་ཉིད་གསུང་བར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། །ཞེས་བསྟན་བཅོས་འདི༷ར་དངོས་སུ་ཚིག་མ༷ང་དུ་སྨྲ༷་བ༷་ལ་དགོས་པ་ཆུང་བ་ཡིན་པས་ཅི༷་ཞི༷ག་དགོས་ཏེ་མི་དགོས་སོ། །དོན་དུ་བླ༷་མ༷་དེ་ཉིད་དགྱེ༷ས་པར་བྱེ༷༷ད་པའི་ཐབས་ཚུལ་དང་མཐུན་པ་ག༷ང་ཡི༷ན་པ་རྣམས་བྱ༷་ཞིང༌། མི༷་མཉེ༷ས་པར་བྱེ༷ད་པའི་བྱ་བ་ཀུ༷ན་སྤོ༷ང་བ༵༷་ནི༷། བློས་ཞིབ་ཏུ་བརྟགས་ལ་མཉེས་པ་སྒྲུབ་པའི་ཐབས་ཀྱི་རིགས་དེ༷་ད༷ང༌། མི་མཉེས་པ་སྤོང་བ་དེ༷་ལ༷་འབ༷ད་དེ༷་བླང་དོར་ཚུལ་བཞིན་དུ་སྤྱ༷ད་པར་བྱ། ཞེས་སོ། །འཇིག་རྟེན་དང་འཇིག་རྟེན་ལས་འདས་པའི་དངོ༷ས་གྲུ༷བ་ཐམས་ཅད་འགྲུབ་པ་ནི་རྡོ་རྗེ་སློབ་དཔོན་མཉེས་པའི་རྗེ༷ས་སུ་འབྲ༷ང་ཞེ༷ས་པའི་དོན་དུ་བཅོམ་ལྡན་འདས་རྡོ༷་རྗེ༷་འཛི༷ན་པ༷་ཉི༷ད་གསུ༷ངས་པ༷ར་རྗེས་འཇུག་རྣམས་ཀྱིས་ཤེ༷ས་ན༷ས་ལུས་ལོངས་སྤྱོད་དུས་གསུམ་དགེ་བའི་དངོ༷ས་པོ༷་ཐ༷མས་ཅ༷ད་ཀྱི༷ས་བླ༷་མ༷་དམ་པ་ཡོ༷ངས་སུ༵༷་མཉེ༷ས་པ༷ར་བྱ་དགོས་སོ། །མདོར་ན་ང་རྒྱལ་དང་མ་དད་པ་སྤངས་ནས་མོས་གུས་གལ་ཆེ་བ་ཡིན་ཏེ། ལྷན་ཐབས་ལས། བླ་མའི་མོས་གུས་མེད་ན་དངོས་གྲུབ་ལྟ་ཅི་སྨོས། ཡོན་ཏན་ཀུན་གྱི་རེ་ཐག་ཆད་དམ་ཚིག་ཉམས་པར་མི་འགྱུར་ཙམ་གྱི་མོས་གུས་ཙམ་ཡོད་དུ་ཆུག་ཀྱང༌། མོས་གུས་ཁྱད་པར་ཅན་གྱིས་ལམ་འཁྲིད་པ་མེད་ན། མཆོག་སྒྲུབ་པར་བྱེད་པའི་ཐབས་གཞན་ཞིག་བཙལ་ནས། དེ་ལ་གེགས་སེལ་གཞན་དང་བོགས་འདོན་ཡང་གཞན་དང་གཞན་མང་པོ་དགོས་ཤིང༌། འདོད་དོན་གཞན་རྣམས་ལ་ཁ་ཐག་ཉེ་བའི་ཐབས་ཀྱང་མི་གཅིག་པ་མང་པོ་འཚོལ་དགོས་ཏེ། ཚེ་སྒྲུབ་ནོར་སྒྲུབ་དབང་བསྡུད་ལ་སོགས་པ་ཇི་སྙེད་ཅིག་བྱས་ན་ཡང་འགའ་ཞིག་ཡེ་མི་འགྲུབ། འགའ་ཞིག་འགྲུབ་ཀྱང་དཀའ་ཚེགས་ཆེན་པོ་དགོས་པས་ལམ་མི་ཟབ་པ་ཡིན། མོས་གུས་ཁྱད་པར་ཅན་གྱིས་ལམ་འཁྲིད་པ་འདི་ལ་ནི། མོས་གུས་ཁོ་ནས་མཆོག་ཀྱང་འགྲུབ། ལམ་གྱི་གེགས་སེལ་དང༌། བོགས་འདོན་དང༌། ཚེ་དང་ལོངས་སྤྱོད་དབང་ཐང་སོགས་འདོད་དོན་ཐམས་ཅད་མོས་གུས་གཅིག་པུས་དཀའ་ཚེགས་མེད་པར་འགྲུབ་པའི་ཕྱིར། གཅིག་ཆོག་ཡིན་པས་ན་ལམ་ཟབ་མོ་ཞེས་བྱའོ། །ཞེས་པ་ནས། གསོལ་འདེབས་ཀྱི་སྒོ་ནས་མོས་གུས་ལ་རིམ་གྱིས་སློབ་པ་ཡིན། རིམ་པས་བསྒོམས་པས། མཐར་མོས་གུས་བཅོས་མ་མ་ཡིན་པ་སྐྱེས་པ་ན། ལམ་གྱི་ཡོན་ཏན་རྣམས་ཀྱང་རིམ་པས་འབྱུང་བར་འགྱུར་རོ། །དེས་ན་མོས་གུས་རབ་ལ་དགེ་སྦྱོར་རབ། འབྲིང་ལ་འབྲིང་དང་ཐ་མ་ལ་ཐ་མ་འབྱུང༌། མོས་གུས་མེད་ན་དགེ་སྦྱོར་མེད། མ་གུས་པ་ནི་ངན་སོང་གི་རྒྱུ་ཞེས་བྱའོ། །ཞེས་གསུངས་པའི་ཕྱིར་རོ། །