གཉིས་པ་སྡོམ་པ་མཚན་ཉིད་པར་འདོད་པའི་ལུགས་བརྗོད་པ།
གཉིས་པ་སྡོམ་པ་མཚན་ཉིད་པར་འདོད་པའི་ལུགས་བརྗོད་པ་ནི།
མཚོ་ཊཱིཀ་ལས།སྔ་རབས་པ་ཁ་ཅིག་ན་རེ་དགེ་སློབ་མའི་སྡོམ་པ་འདི་སྡོམ་པ་མཚན་ཉིད་པ་ཡིན་ཏེ། མངོན་པ་ལས། དགེ་སློབ་མའི་སྡོམ་པ་དང༌། ཞེས་དང༌། འདི་ཉིད་ལས། སྦྱིན་པ་ནི་བསླབ་པའི་སྡོམ་པ་ཞེས་བྱ་བས་སོ། །ཞེས་པ་དང༌། འདི་སྡོམ་པ་མ་ཡིན་ན། སོ་སོ་ཐར་པའི་སྡོམ་པ་རིགས་བརྒྱད་མི་ཚང་བའི་ཕྱིར་རོ་ཞེས་ཟེར་བ་དང༌། མཚོ་ཊཱིཀ་ལས། རང་ཡང་སྡོམ་པ་མཚན་ཉིད་པ་འདོད་པ་རྣམས་ཀྱི་རྗེས་སུ་འབྲང་ངོ༌། །ཞེས་གསུངས་སོ། །དེ་ཡང་སྡོམ་པ་ཡིན་ལུགས་ནི། བྱས་ཆོས་སྡོམ་པ་དང༌། བྱེད་ཆོས་བསླབ་བྱ་བཅུ་གཉིས་སུ་དབྱེ་བ་ནི། དང་པོ་བྱས་ཆོས་དགེ་སློབ་མའི་སྡོམ་པ་ནི་དགེ་ཚུལ་མས་སྤང་བྱ་བཅུ་སྤོང་བ་དེའི་སྟེང་དུ་བསླབ་བྱ་བཅུ་གཉིས་བསྣན་པའི་ཚེ་ན། སྔར་དགེ་ཚུལ་མས་ཐོབ་ཟིན་པ་དེའི་སྡོམ་པའི་རྒྱུན་རྩ་བ་བཞིའི་སྡོམ་པ་དེ་ཉིད་ལ་དགེ་སློབ་མའི་སྡོམ་པ་ཞེས་བྱ་སྟེ། མཛོད་འགྲེལ་ལས། དགེ་སློབ་མ་དང་དགེ་ཚུལ་མའི་སྡོམ་པ་རྫས་གཞན་མ་ཡིན་ནོ་ཞེས་བཤད་པས་གྲུབ་ཅིང༌། འོད་ལྡན་ལས། དགེ་ཚུལ་ལ་སོགས་པ་དག་གི་ནི་སྤོང་བ་བཞིའི་མཚན་ཉིད་ཅན། ཞེས་དང༌། མཛོད་འགྲེལ་ལས་ཀྱང༌། དགེ་སློབ་མ་མཚན་གྱུར་ན་དགེ་ཚུལ་ཞེས་བྱའོ། །ཞེས་གསུངས་པས། དགེ་ཚུལ་དང་དགེ་ཚུལ་མ་དང་དགེ་སློབ་མའི་སྡོམ་པ་ནི་སྤོང་བ་བཞིའི་མཚན་ཉིད་ཡིན་ཞེས་དགོངས་སོ། །