དྲུག་པ་རིགས་ཀྱི་ཉེས་དམིགས་བསྟན་པ།
དྲུག་པ་རིགས་ཀྱི་ཉེས་དམིགས་བསྟན་པ་ནི།
རྒྱན་ལས། ཉོན་མོངས་གོམས་དང་གྲོགས་ངན་དང༌། །ཕོངས་དང་གཞན་གྱི་དབང་ཉིད་དེ། །མདོར་ན་རིགས་ཀྱི་ཉེས་དམིགས་ནི། །རྣམ་པ་བཞིར་ནི་ཤེས་པར་བྱ། །ཞེས་བྱང་ཆུབ་སེམས་དཔའི་རིགས་ལ་གནས་པ་ཡིན་ཀྱང་ཉོ༷ན་མོ༷ངས་པ་དུག་གསུམ་ལ་གོ༷མས་ཤིང་འདྲིས་ཏེ་ཉེས་དམིགས་སུ་མི་བལྟ་བས་དགེ་བའི་གེགས་བྱེད་པ་ད༷ང༌། གྲོ༷གས་ང༷ན་པ་སྡིག་པའི་གྲོགས་པོའི་དབང་དུ་གྱུར་པས་དགེ་བ་ལས་ཟློག་ཅིང་མི་དགེ་བ་ལ་སྦྱོར་བ་ད༷ང༌། རང་གི་འཚོ་བ་དང་གཞན་ལ་སྦྱིན་པ་ལ་སོགས་པའི་ཡོ་བྱད་ཀྱིས་ཕོ༷ངས་ཤིང་བྲེལ་བས་ལམ་སྒྲུབ་པའི་སྐབས་མེད་པ་ད༷ང༌། གཞ༷ན་རྒྱལ་པོ་དང་རྗེ་བོ་ལ་སོགས་པ་རྣམས་ཀྱི༷་དབ༷ང་དུ་གྱུར་པས་དམ་པའི་ཆོས་སྒྲུབ་པ་ལ་རང་དབང་མེད་པ་ཉི༷ད་དེ༷། མདོ༷ར་ན༷་ཐེག་ཆེན་གྱི་རི༷གས་སད་པ་ལས་ཡོན་ཏན་ཁྱད་པར་ཅན་གོང་ནས་གོང་དུ་འཕེལ་བ་ཉིད་ཀྱི༷་བར་ཆད་དམ་ཉེ༷ས་དམི༷གས་ནི༷་རྣ༷མ་པ༷་བཞི༷ར་ནི༷་ཤེ༷ས་པ༷ར་བྱ༷་སྟེ། དེ་དག་སྤོང་བ་ལ་འབད་པར་བྱའོ། །