རྩ་གསུམ་ནོར་ལྷའི་གསོལ་བསྡུས་འདོད་དགུའི་ཆར་འབེབས།

༄༅། །རྩ་གསུམ་ནོར་ལྷའི་གསོལ་བསྡུས་འདོད་དགུའི་ཆར་འབེབས་བཞུགས། ཛཾ། ཚོགས་གཉིས་ནོར་བུ་རྒྱས་པའི་སྤྲིན་ཆེན་ལས། །དགེ་ལེགས་འདོད་དགུའི་ཆར་རྒྱུན་འབེབས་མཛད་པའི། །རབ་འབྱམས་རྩ་གསུམ་ནོར་ལྷའི་ཚོགས་རྣམས་དང་། །ཁྱད་པར་རྨུག་འཛིན་གཏེར་བདག་འཁོར་བཅས་གཤེགས། །ཉེར་སྤྱོད་འདོད་ཡོན་ཤིས་པའི་རྫས་རྟགས་བརྒྱད། །རིན་ཆེན་སྣ་བདུན་ལྷ་མིའི་འབྱོར་པའི་ཚོགས། །ཟག་མེད་ཀུན་བཟང་མཆོད་པའི་སྤྲིན་ཆེན་པོས། །རྩ་གསུམ་ནོར་ལྷའི་ཚོགས་རྣམས་མཉེས་པར་བགྱི། །སྦྱིན་པའི་ཕར་ཕྱིན་ཡོངས་སུ་རྫོགས་པའི་སྐུ། །དྲན་པ་ཙམ་གྱིས་ཕུན་ཚོགས་སྡེ་བཞིའི་དཔལ། །ཅིག་ཅར་སྦྱིན་མཛད་བུམ་བཟང་དཔག་བསམ་ཤིང་། །རྩ་གསུམ་ནོར་ལྷའི་ཚོགས་ལ་ཕྱག་འཚལ་བསྟོད། །འཕགས་པ་ནམ་མཁའ་མཛོད་ལ་མངའ་བརྙེས་ཤིང་། །ས་གསུམ་དབུལ་བའི་གདུང་བ་འཕྲོག་ལགས་ན། །དེང་འདིར་ཆོས་འབྱོར་འདོད་དགུའི་ཆར་བཟང་པོས། །ཡིད་ལ་བསམ་པ་མཐའ་དག་རྫོགས་པར་མཛོད། །སྲིད་ཞིའི་ཕན་བདེ་མ་ལུས་འབྱུང་བའི་གནས། །ཀུན་མཁྱེན་བསྟན་པའི་སྙིང་པོ་ལུང་རྟོགས་ཆོས། །ཚུལ་བཞིན་འཛིན་མཛད་བཤད་དང་སྒྲུབ་པའི་སྡེའི། །འཚོ་སྐྱོང་ཡོན་གྱི་བདག་པོ་ཁྱེད་ཀྱིས་མཛོད། །འགུག་བྱེད་ཟེར་གྱིས་སྲིད་གསུམ་དབང་དུ་སྡུས། །དཔལ་འབྱོར་འཛད་མེད་དབྱར་ཀྱི་མཚོ་ལྟར་བསྐྱིལ། །ཕྱོགས་ལས་རྣམ་རྒྱལ་སྙན་གྲགས་དབྱར་གྱི་རྔས། །ཕྱོགས་དུས་འཇིག་རྟེན་ཀུན་ཏུ་ཁྱབ་པར་མཛོད། །བསླབ་པ་གསུམ་ལྡན་དགེ་འདུན་འདུ་བ་འཕེལ། །རྟོན་པ་བཞི་ལྡན་བཤད་སྒྲུབ་ཕྲིན་ལས་རྒྱས། །འབྲེལ་ཚད་དོན་ལྡན་ཐུབ་བསྟན་ཡུན་དུ་གནས། །ལེགས་པར་ཀུན་ལྡན་བཀྲ་ཤིས་རྟག་ཁྱབ་ཤོག །ཅེས་ཚིགས་སུ་བཅད་པ་འཕགས་ནོར་གྱི་གྲངས་ལྡན་འདིའང་བསླབ་གྲྭ་གསར་འཛུགས་ཀྱི་སྐབས་སུ་རྒྱལ་སྲས་གཞན་ཕན་ཆོས་ཀྱི་བློ་གྲོས་ཀྱིས་བྲིས་ཤིང་ཕྲིན་ལས་སུ་གསོལ་བ་དགེ །༈ ཧྲཱིཿམཆོག་སྦྱིན་རྫོགས་ལྡན་ནོར་བུའི་སྤྲིན་ཆེན་ལས། །དགེ་ལེགས་འདོད་དགུའི་ཆར་འབེབས་པདྨ་འབྱུང་། །རབ་འབྱམས་རྩ་གསུམ་དཀྱིལ་འཁོར་འཁོར་ལོའི་ལྷར། །གསོལ་ལོ་མཆོད་དོ་བདག་རྒྱུད་བྱིན་གྱིས་རློབས། །རྡོ་རྗེའི་རྟ་སྐད་རྔམ་པའི་བཞད་སྒྲ་ཡིས། །སྲིད་གསུམ་དབང་སྒྱུར་ཆེ་བཙན་དྲེགས་པའི་རྗེ། །འཆོལ་བའི་ཁྲོ་རྒྱལ་གཏུམ་ཆེན་ལྕགས་རལ་ཅན། །གསོལ་ལོ་མཆོད་དོ་མཆོག་ཐུན་དངོས་གྲུབ་སྩོལ། །ཡེ་ཤེས་ཀློང་དགུའི་རྩལ་ལས་རང་ཤར་བའི། །འདས་དང་མ་འདས་ཆ་མཉམ་ཚོམ་བུ་དགུ། །བཀའ་གཏེར་བསྟན་སྐྱོང་དམ་ཚིག་རྗེས་གཅོད་རྣམས། །གསོལ་ལོ་མཆོད་དོ་ལས་བཞིའི་དངོས་གྲུབ་སྩོལ། །ཁྱད་པར་ཡེ་ཤེས་མགོན་པོ་ཚོགས་ཀྱི་བདག །དགྲ་ལྷ་བཅུ་གསུམ་དམ་ཅན་ཞིང་སྐྱོང་སོགས། །རྟག་ཏུ་བརྟེན་ཅིང་མཆོད་པའི་ལྷ་སྲུང་རྣམས། །གསོལ་ལོ་མཆོད་དོ་སྒྲུབ་མཆོག་བུ་བཞིན་སྐྱོངས། །དེ་ལྟར་གུས་པས་གསོལ་མཆོད་ཕུལ་བའི་མཐུས། །རྒྱལ་བའི་བསྟན་དར་བསྟན་འཛིན་ཞབས་པད་བརྟན། །བོད་ཁམས་བདེ་སྐྱིད་སྡེ་བཞིའི་དཔལ་འབྱོར་རྒྱས། །ཕུན་ཚོགས་བསམ་ཀུན་འགྲུབ་པའི་བཀྲ་ཤིས་ཤོག །ཅེས་པའང་དད་དམ་ཐུགས་སྨོན་དཀར་བ་ཝ་ཤུལ་རྡོ་ལིའི་བཞེད་ངོར་དུ་པདྨ་བི་ཛས་བྲིས་པ་དགེ་ལེགས་འཕེལ། ༈ ཧཱུྃ། ཀུན་བཟང་པདྨའི་བཀའ་བརྒྱུད་འཛིན་མཛད་པ། །རིག་འཛིན་བརྒྱུད་པའི་ཐ་ཚིག་ལ་གནས་པའི། །བཀའ་དང་གཏེར་བདག་དམ་ཅན་རྒྱ་མཚོའི་ཚོགས། །གསོལ་ལོ་མཆོད་དོ་འདོད་དོན་ཀུན་འགྲུབ་མཛོད། །པདྨ་བི་ཛས་བྲིས་པ་དགེ །༈ ཨ། དབྱིངས་ལས་ཡེ་ཤེས་རང་ཤར་ཨེ་ཀ་ཛ། །འོད་གསལ་རིག་པ་ཟང་ཐལ་རཱ་ཧུ་ལ། །ཟུང་འཇུག་དྭངས་མའི་ཐིག་ལེ་རྡོ་རྗེ་ལེགས། །ཐུགས་རྗེའི་ཆོ་འཕྲུལ་བསམ་ཡས་རིགས་པའི་ཚོགས། །དགོངས་བརྡའ་སྙན་བརྒྱུད་བླ་མའི་ཐ་ཚིག་བཞིན། །དམ་ཚིག་གསང་བའི་གནས་འདིར་གཤེགས་སུ་གསོལ། །སྒོ་ལྔ་རྒྱ་ཡན་ཚོགས་དྲུག་འཛིན་བྲལ་གཤིས། །ཅིར་སྣང་འདོད་ཡོན་ཡེ་ཤེས་རོལ་པའི་རྒྱན། །དུག་ལྔ་གནས་སུ་དག་པའི་ཨ་མྲྀ་ཏ། །སྲིད་རྩ་དབྱིངས་སུ་བསྒྲལ་བའི་དམར་ཆེན་པོ། །ཕུང་ཁམས་སྐྱེ་མཆེད་རྣམ་དག་བ་ལིངྟ། །ཡེ་གྲོལ་གདོད་མའི་དབྱིངས་སུ་བཞེས་ནས་ཀྱང་། །རིག་སྟོང་ཆོས་ཟད་རྗེན་པའི་རང་མདངས་མཆོག །ཤེས་ཉམས་ཡིད་དཔྱོད་འཛིན་པ་ལས་གྲོལ་ཞིང་། །འོད་གསལ་ལྷུན་གྲུབ་སྣང་བཞིའི་གསེང་ལམ་ནས། །འཕོ་ཆེན་འཇའ་ལུས་འགྲུབ་པའི་གྲོགས་མཛོད་ཅིག །གནས་སྐབས་སུ་ཡང་བྱང་ཆུབ་ལམ་གྱི་གེགས། །མི་མཐུན་ཉེས་བརྒྱའི་འཇིགས་པ་ཀུན་ཞི་ཞིང་། །ལས་བཞི་གྲུབ་པ་བརྒྱད་སོགས་ཐུན་མོང་དང་། །མཆོག་དངོས་འདོད་པ་ཡིད་བཞིན་འཇོ་བར་མཛོད། །གངས་ལྗོངས་བཤད་སྒྲུབ་བསྟན་པའི་དར་ཤམ་རྩེར། །འོད་གསལ་རྡོ་རྗེ་རྩེ་མོའི་ཏོག་འབར་བས། །དམན་ལམ་ཡིད་དཔྱོད་གྲུབ་མཐས་བརྫི་མིན་པར། །གྲོལ་བ་དྲུག་གི་ཕྲིན་ལས་ཀུན་ཁྱབ་མཛོད། །ཅེས་པའང་ལུང་རྟོགས་བསྟན་པའི་མངའ་བདག་མཆོག་གི་བཞེད་སྐོང་དུ། སྔགས་བཙུན་རྡོ་རྗེ་དབང་མཆོག་དགྱེས་རབ་རྩལ་གྱིས་བྲིས་ཤིང་ཕྲིན་ལས་སུ་གསོལ་བ་ཛ་ཡནྟུ།  ༈ བྷྱོཿསྐྱེ་བ་མེད་པའི་མཁའ་ཀློང་ནས ། །འགགས་པ་མེད་པའི་གདངས་ཤར་བའི། །དབྱིངས་ཕྱུག་ཨེ་ཀ་ཛ་ཊི་མ། །འཁོར་བཅས་འདིར་བྱོན་གདན་ལ་བཞུགས། །ཕྱི་ནང་གསང་བའི་མཆོད་པ་བཞེས། །ཐུགས་དམ་བསྐང་ཞིང་ཉམས་ཆག་བཤགས། །ངེས་གསང་བསྟན་པ་བསྲུང་བ་དང་། །སྒྲུབ་མཆོག་བུ་བཞིན་སྐྱོང་བར་མཛོད། །ཅེས་པའང་མཆོག་སྤྲུལ་རིན་པོ་ཆེའི་བཀའ་ཕེབས་བཞིན་རྒན་པོ་བི་ཛས་སོ། ། ༈ བྷྱོཿསྐྱེ་བ་མེད་པའི་མཁའ་ཀློང་ནས ། །འགགས་པ་མེད་པའི་སྐུར་ཤར་བའི། །དབྱིངས་ཕྱུག་ཨེ་ཀ་ཛཱ་ཊི་མ། །གདུང་བས་འབོད་ཀྱིས་བརྩེ་བས་དགོངས། །ཁྱོད་ནི་དབྱིངས་ཀྱི་མཁའ་འགྲོ་སྟེ། །ཀུན་ཏུ་བཟང་མོའི་སྤྲུལ་པའི་གར། །བཅུ་བདུན་རྒྱུད་ཀྱི་བཀའ་སྲུང་མཆོག །བདག་ནི་རིག་འཛིན་སྒྲུབ་པ་པོ། །རྩོལ་མེད་ཨ་ཏིའི་ལམ་ལ་མོས། །མ་ཅིག་ཁྱོད་ལ་རྟག་ཏུ་བརྟེན། །དེ་ཕྱིར་ལུས་དང་གྲིབ་མ་བཞིན། །འབྲལ་མེད་རྗེས་སུ་སྐྱོང་བར་མཛོད། །སྣང་སྲིད་མ་མོ་མཁའ་འགྲོ་རྣམས། །ཁྱོད་ཀྱི་འཁོར་དང་གཡོག་ལགས་པས། །དམ་རྫས་ཕུད་གཏོར་འདི་བཞེས་ལ། །འཁོར་ལ་བཀའ་ནན་མ་ཆུང་ཅིག །བདག་ཅག་མི་ཤེས་བག་མེད་པས། །རྡོ་རྗེའི་དཔོན་ལ་བརྙས་པ་དང་། །མཆེད་ལ་འཁུ་ཞིང་འཁོར་ལ་ཁྲོ། །གསང་བ་གཡེལ་ཞིང་དམ་ལས་འགལ། །ཐུགས་འགལ་ནོངས་ཀུན་མཐོལ་བཤགས་ན། །མི་མཐུན་དལ་ཡམས་མཚོན་འཁྲུགས་སོགས། །མ་མོ་འཁྲུགས་པའི་ཉེས་ཀུན་ཞི། །མཐུན་རྐྱེན་ཚེ་བསོད་འབྱོར་དྲུག་རྒྱས། །སྲིད་ཞིའི་དཔལ་ཀུན་དབང་དུ་བསྡུས། །མི་དང་མི་མིན་འཚེ་བ་དང་། །ཁྱད་པར་ཀླ་ཀློའི་གཡོ་འཕྲུལ་བཟློག །ཐེག་མཆོག་བསྟན་པ་དར་བ་དང་། །བསྟན་འཛིན་ཞབས་བརྟན་བཤད་སྒྲུབ་འཕེལ། །བོད་ཁམས་བདེ་སྐྱིད་དགེ་ལ་སྤྱོད། །དོན་གཉིས་མཐར་ཕྱིན་དངོས་གྲུབ་སྩོལ། །ཅེས་པའང་སྔགས་བཙུན་རྡོ་རྗེ་དབང་མཆོག་དགྱེས་རབ་རྩལ་གྱིས་བྲིས་པ་དགེ །༈ བྷྱོཿཟག་མེད་བདེ་ཆེན་སྒྱུ་འཕྲུལ་རྡོ་རྗེའི་སྤྲིན། །ཕྱི་ནང་གསང་བ་མཆོད་སྐོང་སྒྲུབ་པའི་རྫས། །མ་ཚང་མེད་པའི་འདོད་ཡོན་རྒྱ་ཆེན་པོས། །དབྱིངས་ཀྱི་ཡུམ་ཆེན་ཨེ་ཀ་ཛ་ཊི་དང་། །དྲང་སྲོང་གཟའ་ཡི་དགེ་བསྙེན་རཱ་ཧུ་ལ། །སྐྱེས་མཆོག་བཛྲ་ས་དྷཱུ་སྤྲུལ་འཁོར་སོགས། །ཨ་ཏིའི་བསྟན་སྲུང་ཡོངས་ཀྱི་ཐུགས་དམ་བསྐངས། །ཉམས་ཆག་འགལ་འཁྲུལ་ཞིག་རལ་དབྱིངས་སུ་བཤགས། །སྒྲུབ་མཆོག་རྣལ་འབྱོར་བདག་ཅག་འཁོར་བཅས་ལ། །ཞི་སོགས་ཕྲིན་ལས་རྣམ་བཞིའི་སྒོ་འཕར་ཕྱེས། །སྲུང་སྐྱོབ་སྡོང་གྲོགས་གཡེལ་བ་མེད་པ་ཡིས། །འདོད་དོན་བསམ་པའི་དོན་ཀུན་འགྲུབ་པར་མཛོད། །ཁྱད་པར་ཕྱི་རུ་ཡུལ་སྣང་བདེན་ཞེན་ཤིག །ནང་དུ་རྩ་རླུང་འཁྲུགས་པའི་སུན་མ་བཟློག །གསང་བ་སེམས་བྱུང་རྙོག་པའི་དྲི་མ་སོལ། །སྣང་བཞིའི་ལམ་མཐར་ཕྱིན་པའི་ཕྲིན་ལས་མཛོད། །ཅེས་པའང་ངེས་གསང་ཨ་ཏིའི་བསྟན་འཛིན་མཚུངས་བྲལ་མཆོག་གི་བཞེད་སྐོང་དུ། རིག་འཛིན་གྱི་བཙུན་པ་རྡོ་རྗེ་དབང་མཆོག་དགྱེས་རབ་རྩལ་གྱིས་བྲིས་པ་དགེ །