གསུམ་པ་དགེ་བ་བཅུ་གཅིག་བཤད་པ་ལ་བཅུ་གཅིག།
གསུམ་པ་དགེ་བ་བཅུ་གཅིག་བཤད་པ་ལ་བཅུ་གཅིག་ལས།
དང་པོ་དད་པ་ནི། དམིགས་ཡུལ་ཡོད་པ་ཉིད་དང༌། ཡོན་ཏན་ཅན་དང༌། ནུས་པ་རྣམས་ལ་རྣམ་པ་གོ་རིམ་བཞིན། མངོན་པར་ཡིད་ཆེས་པ་དང༌། དྭངས་པ་དང༌། འདོད་པ་གང་རུང་གི་རྣམ་པ་ཅན་གྱི་སེམས་བྱུང་དེ། དད་པའི་ངོ་བོ་ཡིན་ལ། ། དེའང་དགེ་སྡིག་ལས་བདེ་སྡུག་འབྱུང་བ་ལ་སོགས་པ་ལས་དང་འབྲས་བུ་མི་བསླུ་བར་ཡོད་པ་ལ་ཐེ་ཚོམ་དང་ལོག་ཤེས་མེད་པར་བདེན་ངེས་སྙམ་པས་བླང་དོར་ལ་འཇུག་པར་འདོད་པ་མངོན་པར་ཡིད་ཆེས་པའི་དད་པ་དང༌། སངས་རྒྱས་དོན་གཉིས་མཐར་ཕྱིན་པ་དང་ཆོས་བདེན་པ་གཉིས་ཟུང་དུ་འཇུག་པ་དང་དགེ་འདུན་ཡེ་ཤེས་གཉིས་དང་ལྡན་པ་ལ་སོགས་པའི་ཡོན་ཏན་ཅན་ལ་རབ་ཏུ་དགའ་ཞིང་ཡོན་ཏན་དང་ལྡན་པར་ཤེས་པས། ནོར་བུ་ཆུ་འདངས་དང་ཕྲད་ན་ཆུ་རྙོག་མ་མེད་པར་འགྱུར་བ་ལྟར་སེམས་ཀྱི་རྙོག་མ་ཉོན་མོངས་པ་མེད་པར་འགྱུར་བ་དང༌། རང་གི་རྒྱུད་ལ་སྤངས་པ་དང་རྟོགས་པའི་ཡོན་ཏན་ཁྱད་པར་ཅན་བསྒྲུབ་པ་ལ་ནུས་པ་ཐོབ་པ་དང་སྒྲུབ་པར་འདོད་པའོ། །འདུན་པ་དང་སྲེད་པའང་དད་པར་འགྱུར་རོ་ཞེ་ན། མི་འགྱུར་ཏེ་འདུན་པ་ནི་དད་པའི་འབྲས་བུ་ཡིན་ཞིང༌། སྲེད་པ་ནི་དགེ་བའི་ཡུལ་ཅན་མ་ཡིན་པའི་ཕྱིར་རོ། །གང་ལ་དད་པ་ཡོད་པ་དེ་ལ་འདུན་པ་འབྱུང་བས་དེའི་རྟེན་བྱེད་པའི་ལས་ཅན་ནོ། །གཉིས་པ་ངོ་ཚ་ཤེས་པ་ནི། ཁོ་བོ་ནི་རིགས་དང་སྡོམ་པ་དང་ཤེས་རྒྱ་ལ་སོགས་པ་ཡོན་ཏན་འདི་ལྟ་བུ་དང་ལྡན་པའི་ཕྱིར་སྡིག་པ་བྱར་མི་རུང་ངོ་ཞེས་བདག་ཉིད་རྒྱུ་མཚན་དུ་བྱས་ནས། དམ་པ་རྣམས་ཀྱིས་སྨད་ཅིང་རྣམ་སྨིན་མི་འདོད་པ་འབྱིན་པ་ཁ་ན་མ་ཐོ་བ་རྣམས་ལ་དམིགས་ནས་རྣམ་པ་འཛེམ་ཞིང་འཇིགས་པར་ལྟ་བས་སེམས་བག་འཁུམས་པའི་སེམས་བྱུང་དེ། ངོ་ཚ་ཤེས་པའི་ངོ་བོ་ཡིན་ལ། དེ་ལྡན་ན་སྒོ་གསུམ་གྱི་ཉེས་པར་སྤྱོད་པ་མི་དགེ་བ་བཅུ་ལ་ཕྱིས་མི་འཇུག་ཅིང་སྔར་བྱས་པའང་སྤོང་བས་ལེགས་པར་སྡོམ་པའི་རྟེན་བྱེད་པའི་ལས་ཅན་ནོ། །གསུམ་པ་ཁྲེལ་ཡོད་པ་ནི། སྡིག་པ་བྱས་ན་གང་ཟག་དམ་པ་རྣམས་ཀྱིས་ཁྲེལ་ཞིང་འཇིག་རྟེན་དུ་གྲགས་པ་ངན་པ་འབྱུང་བ་ནི་མི་རུང་ངོ་ཞེས་གཞན་རྒྱུ་མཚན་དུ་བྱས་ནས་ཁ་ན་མ་ཐོ་བ་ལ་དམིགས་ནས་རྣམ་པ་འཛེམ་ཞིང་བག་འཁུམས་པའི་སེམས་བྱུང་དེ། ཁྲེལ་ཡོད་པའི་ངོ་བོ་ཡིན་ལ། སྔ་མ་བཞིན་དུ་ཉེས་པར་སྤྱོད་པ་ཡང་དག་པར་སྡོམ་པ་དེའི་ལས་ཅན་ནོ། །བཞི་བ་མ་ཆགས་པའི་དགེ་རྩ་ནི། དགག་སྒྲ་ནི་མེད་པ་དང་གཞན་པ་དང་གཉེན་པོ་གསུམ་ལ་འཇུག་པ་ལས། འདིར་ཆགས་པའི་གཉེན་པོ་སྟེ། ཞེ་སྡང་མེད་པ་དང་གཏི་མུག་མེད་པ་དེ་ལའང་དེ་བཞིན་ནོ། །དེས་ན་སྲིད་པ་ནང་ཉེར་ལེན་གྱི་ཕུང་པོ་དང༌། སྲིད་པའི་ཡོ་བྱད་ཟས་གོས་དང་ནོར་ལ་སོགས་པ་ཉེ་བར་མཁོ་བ་རྣམས་ལ་དམིགས་ནས། རྣམ་པ་ཆགས་པ་མེད་ཅིང་ཡིད་འབྱུང་ལ། ཉེས་དམིགས་ཤེས་པས་ཆགས་པ་དང་དངོས་ཀྱི་གཉེན་པོ་བྱེད་པའི་སེམས་བྱུང་དེ། མ་ཆགས་པའི་དགེ་རྩའི་ངོ་བོ་ཡིན་ལ། དེ་ཡོད་ན་ཆགས་པའི་དབང་དུ་གྱུར་བའི་ཉེས་པར་སྤྱོད་པ་ལ་མི་འཇུག་པའི་རྟེན་བྱེད་པའི་ལས་ཅན་ནོ། །ལྔ་བ་ཞེ་སྡང་མེད་པའི་དགེ་རྩ་ནི། དགྲ་བོ་ལ་སོགས་པ་ཡིད་དུ་མི་འོང་བའི་སེམས་ཅན་རྣམས་དང༌། ན་ཚ་ལ་སོགས་པ་རང་རྒྱུད་ཀྱི་ཚོར་བ་སྡུག་བསྔལ་དང༌། དུག་དང་མཚོན་དང་ཚེར་མ་ལ་སོགས་པ་སྡུག་བསྔལ་གྱི་གནས་ཀྱི་ཆོས་སམ། རྒྱུ་རྣམས་ལ་དམིགས་ནས། རྣམ་པ་ཀུན་ནས་མནར་སེམས་པའམ་གནོད་པ་བྱ་བར་སེམས་པ་མེད་པ་བྱམས་པའི་བདག་ཉིད་ཅན་གྱི་སེམས་བྱུང་དེ། ཞེ་སྡང་མེད་པའི་དགེ་རྩའི་ངོ་བོ་ཡིན་ལ། འདིས་ཀྱང་ཞེ་སྡང་གིས་ཀུན་ནས་བསླངས་པའི་ཉེས་པར་སྤྱོད་པ་ལ་མི་འཇུག་པའི་རྟེན་བྱེད་པའི་ལས་ཅན་ནོ། །དྲུག་པ་གཏི་མུག་མེད་པའི་དགེ་རྩ་ནི། གདགས་གཞི་ཤེས་རབ་ལ་བཏགས་པའི་རང་སྤྱིའི་མཚན་ཉིད་ལ་སོགས་ལ་དམིགས་ནས་འཛིན་སྟངས་མི་རྨོངས་ཞིང་སོ་སོར་རྟོགས་ནས་གཏི་མུག་དང་འཛིན་སྟངས་འགལ་བའི་གཉེན་པོ་བྱེད་པའི་སེམས་བྱུང་དེ། གཏི་མུག་མེད་པའི་དགེ་རྩའི་ངོ་བོ་ཡིན་ལ། ཉེས་སྤྱོད་ཀྱི་རྒྱུ་ལ་གཏི་མུག་ཡོད་པས་ཁྱབ་པ་ལ། འདིས་གཏི་མུག་སེལ་བས་ཉེས་པར་སྤྱོད་པ་ལ་མི་འཇུག་པའི་རྟེན་བྱེད་པའི་ལས་ཅན་ནོ། །བདུན་པ་བརྩོན་འགྲུས་ནི། རྒྱན་ལས། དགེ་ལ་ཡང་དག་སྤྲོ་བ་དང༌། །ཞེས་པ་ལྟར་དགེ་བའི་ཆོས་ལ་དམིགས་ནས། རྣམ་པ་སེམས་མངོན་པར་སྤྲོ་བའི་སེམས་བྱུང་དེ། བརྩོན་འགྲུས་ཀྱི་ངོ་བོ་ཡིན་ལ། ཉོན་མོངས་པ་ཅན་ལ་སྤྲོ་བ་ནི་སྨད་པའི་ཕྱིར་ལེ་ལོ་ཉིད་དུ་གསུངས་སོ། །དེ་དང་ལྡན་ན་དགེ་བའི་ཕྱོགས་བསམ་གཏན་གྱི་དངོས་གཞི་ལ་འཇུག་པ་ལྟ་བུ་མ་ཐོབ་པ་ཐོབ་ཅིང་ཡོངས་སུ་རྫོགས་པར་བྱེད་པ་དང༌། དེ་ཉིད་ཡོངས་སུ་སྦྱངས་བར་བྱས་ཏེ་ཐོབ་ཟིན་གོང་ནས་གོང་དུ་གྱ་ནོམ་པར་སྒྲུབ་བའི་ལས་ཅན་ནོ། །བརྒྱད་པ་ཤིན་ཏུ་སྦྱངས་པ་ནི། ལུས་སེམས་གནས་ངན་ལེན་གྱི་གཉེན་པོ་ཡིན་ཞིང༌། ལུས་སེམས་ལས་སུ་རུང་བར་བྱེད་པའི་སེམས་བྱུང་དེ། ཤིན་སྦྱངས་ཀྱི་ངོ་བོ་ཡིན་ལ། དེས་ནི་གནས་ངན་ལེན་གནས་གྱུར་པར་བྱེད་པས་ཉོན་མོངས་པ་ལ་སོགས་པའི་སྒྲིབ་པ་ཐམས་ཅད་སེལ་བའི་ལས་ཅན་ནོ། །དགུ་བ་བག་ཡོད་ནི། གདགས་གཞི་དགེ་རྩ་གསུམ་དང་བརྩོན་འགྲུས་གང་རུང་ལ་བཏགས་ཞིང་རང་ཡུལ་དགེ་བ་དང་ཉོན་མོངས་དང་དེ་དག་སྐྱེ་བའི་ཡུལ་ཅི་རིགས་ལ་དམིགས་ནས་རྣམ་པ་དགེ་བ་གཅེས་སྤྲས་བྱེད་ཅིང་ཉོན་མོངས་ལ་སེམས་བསྲུང་ཞིང་བག་ཡངས་སུ་མི་གཏོང་བར་བྱེད་པའི་སེམས་བྱུང་དེ། བག་ཡོད་ཀྱི་ངོ་བོ་ཡིན་ལ། དགེ་བའི་ཆོས་གོང་འཕེལ་དུ་བྱེད་པའི་ལས་ཅན་ནོ། །བཅུ་བ་བཏང་སྙོམས་ནི། གདགས་གཞི་དགེ་རྩ་གསུམ་དང་བརྩོན་འགྲུས་གང་རུང་ཞིག་ལ་གནས་ཤིང་རྟེན་བཅས་ནས་བྱིང་རྒོད་ལ་སོགས་པ་ཀུན་ནས་ཉོན་མོངས་པ་ཅན་དུ་གནས་པ་སོགས་ལ་དམིགས་ནས་རྣམ་པ་དེ་དང་མི་མཐུན་ཞིང་སེམས་རྣལ་དུ་གནས་པས་དེ་དག་སྤོང་བར་བྱེད་པའི་སེམས་བྱུང་དེ། བཏང་སྙོམས་ཀྱི་ངོ་བོ་ཡིན་ལ། དེ་ནི་ཀུན་ནས་ཉོན་མོངས་པ་དང་མི་མཐུན་པའི་ཕྱིར་དེ་རྒྱུད་ལ་སྐྱེ་བའི་གོ་སྐབས་མི་འབྱེད་པའི་རྟེན་བྱེད་པའི་ལས་ཅན་ནོ། །བཅུ་གཅིག་པ་རྣམ་པར་མི་འཚེ་བ་ནི། གདགས་གཞི་ཞེ་སྡང་མེད་པའི་ཆར་གཏོགས་ཤིང་རང་ཡུལ་སྡུག་བསྔལ་ཅན་གྱི་སེམས་ཅན་ལ་དམིགས་ནས་སྡུག་བསྔལ་དེ་མི་བཟོད་པར་འབྲལ་བར་འདོད་པའི་སྙིང་རྗེ་བའི་རྣམ་པ་ཅན་གྱི་སེམས་བྱུང་དེ། རྣམ་པར་མི་འཚེ་བའི་ངོ་བོ་ཡིན་ལ། ངེས་ཚིག་ནི། ཀ་རུ་ཎའི་ཀཾ་བདེ་བ་དང༌། རུ་ཎད་དྷི་འགོག་པ་ཞེས་པས། གཞན་གྱི་སྡུག་བསྔལ་གྱི་ཁྱད་པར་མཐོང་ན་མི་བཟོད་ཅིང་རང་གི་བདེ་བ་འགོག་ནུས་པ་སྙིང་རྗེ་བའི་སེམས་ཉིད་དེ། རྣམ་པར་འཚེ་བའི་གཉེན་པོ་ཡིན་པས་གཞན་གྱི་ལུས་དང་ལོངས་སྤྱོད་ལ་ཐོ་མི་འཚམ་པའི་ལས་ཅན་ནོ། །