གསུམ་པ་བཤད་ནས་སྣོད་རུང་དུ་ཇི་ལྟར་བྱ་བ།

གསུམ་པ་བཤད་ནས་སྣོད་རུང་དུ་ཇི་ལྟར་བྱ་བ་ནི།

དེ་ནས་སྔགས་སོགས་སྦྱིན་པ་ཡིས། །དམ་ཆོས་སྣོད་དུ་བྱས་ནས་སུ། །རྩ་བའི་ལྟུང་བ་བཅུ་བཞི་ནི། །ཀླག་དང་འཛིན་པ་ཉིད་དུ་བྱ། །ཞེས་དེ༷་ན༷ས་ཡིད་མཚན་རྟོག་ལས་སྐྱོབ་པའི་ཐབས་ཀྱི་རྩ་བ་དབང་བསྐུར་ཏེ་སྔ༷གས་སྡོམ་དང་སོ༷གས་ཁོངས་ནས།དེའི་ཡན་ལག་རྣམས་བྱིན་ནས་སྦྱི༷ན་པ༷་ཡི༷ས།སྔགས་ཀྱི་དངོས་གྲུབ་རབ་འབྲིང་དམན་གསུམ་སྒྲུབ་པ་དང༌། རྒྱུད་དང་མན་ངག་གི་ད༷མ་ཆོ༷ས་སྦྱིན་དུ་རུང་བའི་སྣོ༷ད་དུ༷་བྱ༷ས་ན༷ས་སུ༷།དེའི་བསླབ་བྱ་རྩ༷་བ༷འི་ལྟུ༷ང་བ༷་བཅུ༷་བཞི༷་སྟོན་པར་བྱེད་པའི་གཞུང་འདི་ཡང་ནི༷། ཀློ༷ག་པ་ད༷ང༌། ལྟུང་བའི་ས་མཚམས། ཉམས་ན་ཕྱིར་བཅོས་ཀྱི་རྣམ་བཞག་ཉན་ཅིང་མི་བརྗེད་པར་འཛི༷ན་པ༷་ཉི༷ད་དུ༷་བྱ༷་ཞེས་སོ། །འདི་ལ་ཁ་ཅིག་བླ་མ་དེ་ཉིད་མཉེས་ན་ལེགས་ཉེས་ཅི་ཡིན་ཀྱང་བྱ་དགོས་ཟེར།ཁ་ཅིག་འཕྲལ་དུ་མཉེས་ཀྱང་ཕུགས་བླ་མ་རང་ལ་གནོད་པའི་རིགས་མ་བྱས་པ་ལེགས་ཟེར།ཡང་བླ་མ་སྐུ་ཚེ་ཡུན་རིང་པོར་བཞུགས་ན་དེ་ལྟར་ལེགས་ཀྱང་ཡུན་རིང་པོ་མི་བཞུགས་ན་གནས་སྐབས་དེ་ཉིད་དུ་གང་མཉེས་པར་བྱ་དགོས་གསུངས་སོ། །དགོས་པ་གང་གི་ཆེད་དུ་བཤད་པ་ནི། འབྲོག་མི་རྗེས་འབྲང་དང་བཅས་པ་རྣམས་བླ་མ་དང་སློབ་མའི་འབྲེལ་པ་བརྟག་པའི་ཆེད་ཁོ་ནར་བཞེད། འགོས་ཁུག་པ་དཔོན་སློབ་རྣམས་བླ་མ་ལ་བརྙས་པ་སྤོང་བའི་ཆེད་དུ་འཆད། མར་པ་རྗེས་འབྲང་དང་བཅས་པ་རྣམས་བླ་མ་ལ་གུས་པའི་ཆེད་དུ་ཡིན་པར་བཞེད་རུང༌། དོན་ལ་གསུམ་ཀ་ཚང་དགོས་ཤིང། བླ་མ་བསྟེན་ཚུལ་མ་ལེགས་ན་ངན་སོང་གི་རྒྱུ་སོགས་ཉེས་དམིགས་ཤིན་ཏུ་ཆེ་ཞིང༌། ལེགས་ན་ཕན་ཡོན་ཆེས་ཆེ་བས་བསྟེན་ཚུལ་ཕྱིན་ཅི་མ་ལོག་པ་ཤེས་པའི་ཆེད་དུ་ཡིན་ནོ། །བླ་མ་བསྟེན་ཚུལ་ཤེས་ནས་བླ་མའི་རྣལ་འབྱོར་སྒོམ་པ་གལ་ཆེ་སྟེ། ལྷན་ཐབས་ལས། བླ་མའི་རྣལ་འབྱོར་ངོས་གཟུང་བ་ནི། གསང་སྔགས་རྡོ་རྗེ་ཐེག་པའི་ལུགས་ལ་ལམ་ཟབ་མོ་བླ་མའི་རྣལ་འབྱོར་བྱ་བ་ཡོད་ཅིང༌། སྐལ་ལྡན་རྣམས་ཚེ་གཅིག་ལ་སངས་རྒྱས་ཐོབ་པའི་ཐབས་གལ་ཆེ་ཤོས་ཤིག་འདི་ཡིན་ནོ། །ཞེས་ཀུན་ལ་གྲགས་པ་ནི་དོན་ལ་གནས་ངེས་པ་ཞིག་ཡིན་པར་འདུག དེ་ཡང་བླ་མ་དམ་པ་ལ་གུས་པ་བྱེད་ཚུལ་དང༌། དྲིན་དྲན་པ་དང༌། རྙེད་བཀུར་རིམ་གྲོའི་བྱ་བ་སོགས་འཕྲལ་སྤྱོད་ཀྱི་སྒོ་ནས་བླ་མ་བསྟེན་ཚུལ་ལ་མདོ་སྔགས་ཐེག་པ་ཆེ་ཆུང་ལ་ཁྱད་ཙམ་མེད། ཆོས་འདུལ་བ་དང༌། ཐེག་ཆེན་གྱི་མདོ་སྡེ་རྣམས་ལས་གཟིགས་པས་གསལ། དགེ་བའི་བཤེས་གཉེན་བསྟེན་པ་ལས་ཡོན་ཏན་ཐམས་ཅད་འབྱུང་ཚུལ་ཡང་འདྲ། ཐ་ན་མུ་སྟེགས་དྲ་མ་ཚུན་ཆད་ཀྱང་ཕྱོགས་མཚུངས་ཏེ། ཁོང་རང་རྣམས་ཀྱི་ལས་ཚོགས་དངོས་གྲུབ་འགྲུབ་པ་ཡང་བླ་མ་གུས་པར་བསྟེན་པས་བྱིན་རླབས་ཞུགས་པ་ལས་འབྱུང་བ་ཡིན་པ་འདུག འོན་ཀྱང་ཁྱད་པར་འདི་ཡོད་དེ། བླ་མའི་རྣལ་འབྱོར་ཞེས་བྱ་བ་བླ་མ་སྒོམ་པའི་མིང་ཡིན། དེ་ཡང་བླ་མའི་སྐུ་གསུང་ཐུགས་ཀྱི་རྣམ་པ་ཡིད་ལ་བྱེད་ཅིང༌། དེ་ལ་དམིགས་ནས་མོས་གུས་རྒྱུན་མི་འཆད་པར་རྣལ་འབྱོར་དུ་བྱེད་པ་འདི་ལམ་དངོས་གཞིའི་ཉམས་ལེན་གྱི་རྩ་བ་ཅིག་ཏུ་འཇོག་པ་ནི་སྤྱིར་གསང་སྔགས་དང༌། སྒོས་སུ་རྣལ་འབྱོར་བླ་མེད་ལས་རྩལ་དུ་བཏོན་པ་ཡིན། ཞེས་གསུངས་པའི་ཕྱིར་རོ། །སྤྱིར་བླ་མ་བསྟེན་ཚུལ་ཤེས་དགོས་པའི་དགོས་པ་སློབ་མ་སོ་སོར་དམ་ཚིག་ལས་མི་ཉམས་པ་དང་རང་ལ་མཆོག་ཐུན་མོང་གི་དངོས་གྲུབ་ཐོབ་པ་སོགས་ཀྱི་ཆེད་ལ། མདོར་ན་གནས་སྐབས་མཐར་ཐུག་གང་གི་དབང་དུ་བྱས་ཀྱང་བླ་མ་ལ་མ་བསྟེན་ན་ཡོན་ཏན་གང་ཡང་ཐོབ་མི་ཐུབ་པས་སོ། །དེས་ན་བླ་མ་བསྟེན་ཚུལ་ཤེས་པ་ནི་གཙོ་བོ་སློབ་མའི་ཆེད་ཡིན་པ་ཤེས་ནས་བླ་མ་རྣམས་ཀྱིས་སློབ་མ་རྣམས་ཀྱིས་བཤེས་གཉེན་བསྟེན་ཚུལ་གྱི་རྟེན་འབྲེལ་མགོ་ནས་མ་འཆུག་པར་འོང་བའི་ཆེད་དུ་བླ་མ་བསྟེན་ཚུལ་ཐོག་མར་ངེས་པར་འཆད་དགོས་སོ། །