བཞི་བ་རྩ་ཉོན་བཤད་པ་ལ་དྲུག།

བཞི་བ་རྩ་ཉོན་བཤད་པ་ལ་དྲུག་ལས།

དང་པོ་འདོད་ཆགས་ནི། ཁམས་གསུམ་ན་ཡོད་པའི་ལུས་དང་ལོངས་སྤྱོད་གང་རུང་ལ་དམིགས་ནས། རྣམ་པ་དེ་སྣང་ཞིང་རིག་པས་རྗེས་སུ་ཆགས་ཤིང་ཞེན་པ་མཆེད་ནས་འབྲལ་དཀའ་བར་གྱུར་པའི་སེམས་བྱུང་དེ། འདོད་ཆགས་ཀྱི་ངོ་བོ་ཡིན་ལ། དེ་ནི་ཆགས་ཤིང་སྲེད་པའི་དབང་གིས་སྡུག་བསྔལ་གསུམ་དང་ལྡན་པའི་ཉེར་ལེན་གྱི་ཕུང་པོ་འགྲུབ་པས་དེ་སྐྱེད་པའི་ལས་ཅན་ནོ། །རྣམ་འགྲེལ་ལས་ཀྱང༌། བདག་ལ་ཆགས་པ་དང་ལྡན་པའི། །བདེ་སྡུག་དོར་ཐབས་འདོད་པ་ཡིས། །སེམས་ཅན་གཞན་གྱིས་བཀྲི་མིན་པ། །དམན་པའི་གནས་ནི་ཡོངས་སུ་ལེན། །ཞེས་པ་ལྟར་རོ། །གཉིས་པ་ཁོང་ཁྲོ་བ་ནི། མི་མཐུན་པའི་སེམས་ཅན་རྣམས་དང༌། རང་རྒྱུད་ཀྱི་སྡུག་བསྔལ་དང༌། མཚོན་ཆ་ལ་སོགས་པ་སྡུག་བསྔལ་གྱི་གནས་ཀྱི་ཆོས་རྣམས་ལ་དམིགས་ནས། རྣམ་པ་ཀུན་ནས་མནར་ཞིང་གནོད་པ་བྱ་བར་སེམས་པའི་སེམས་བྱུང་དེ། ཞེ་སྡང་གི་ངོ་བོ་ཡིན་ལ། ཞེ་སྡང་ཟུག་རྔུའི་སེམས་འཆད་ན། །ཡིད་ནི་ཞི་བ་ཉམས་མི་མྱོང༌། །དགའ་དང་བདེ་བ་མི་འཐོབ་ལ། །གཉིད་མི་འོང་ཞིང་བརྟན་མེད་འགྱུར། །ཞེས་པ་ལྟར་རང་ཉིད་རེག་པ་བདེ་བ་དང་ལྷན་ཅིག་མི་གནས་པའི་ལས་ཅན་དང༌། གཞན་དག་གསོད་ཅིང་འཆིང་བ་ལ་སོགས་པ་ཉེས་པར་སྤྱོད་པ་འཕེལ་བའི་རྟེན་བྱེད་པའི་ལས་ཅན་ནོ། །གསུམ་པ་ང་རྒྱལ་ནི། བདག་རྐྱེན་འཇིག་ཚོགས་ལ་ལྟ་བ་ལ་བརྟེན་ནས་འདི་ནི་བདག་གོ །འདི་རྣམས་བདག་གིའོ་ཞེས་རིགས་དང་ལོངས་སྤྱོད་ལ་སོགས་པའི་འབྱོར་བ་ལ་དམིགས་ནས། རྣམ་པ་སེམས་ཁེངས་ཤིང་མཐོ་བས་གཞན་ལས་ལྷག་པར་རློམ་པའི་སེམས་བྱུང་དེ། ང་རྒྱལ་གྱི་ངོ་བོ་ཡིན་ལ། བླ་མ་དང་ཡོན་ཏན་ཅན་རྣམས་ལ་འགྱིང་ཞིང་སྲི་ཞུ་མི་བྱེད་པས་མི་གུས་པ་དང༌། ཁོང་ཁྲོ་ལྟར་དངོས་སུ་སྡུག་བསྔལ་མི་སྐྱེད་ཀྱང༌། ངན་འགྲོར་ང་རྒྱལ་གྱིས་འཁྲིད་ཅིང༌། །མི་ཡི་དགའ་སྟོན་བཅོམ་པ་དང༌། ། གཞན་གྱི་ཟན་ཟའི་བྲན་དང་ནི། །གླེན་དང་མི་སྡུག་ཅན་དུ་འགྱུར། །ཞེས་པ་ལྟར་ཡང་སྲིད་ཕྱི་མ་ལ་སྡུག་བསྔལ་སྣ་ཚོགས་འབྱུང་བའི་རྟེན་བྱེད་པའི་ལས་ཅན་ནོ། །བཞི་པ་མ་རིག་པ་ནི། རིག་པའི་འགལ་ཟླ་གྱུར་བའི་རྨོངས་ཙམ་གྱི་སེམས་བྱུང་དེ། མ་རིག་པའི་ངོ་བོ།རྩ་ཉོན་གྱི་མ་རིག་པ་ནི། རིག་པ་ཤེས་རབ་ཀྱི་མི་མཐུན་པའི་ཕྱོགས་སུ་གྱུར་བའི་ཉོན་མོངས་པ་ཅན་ཀུན་ཏུ་རྨོངས་ཙམ་གྱི་སེམས་བྱུང་དེ། རྩ་ཉོན་གྱི་མ་རིག་པའི་ངོ་བོ་ཡིན་ལ། རྟེན་ཁམས་གསུམ་པ་ལ་ཡོད་ལ། ཀུན་ནས་ཉོན་མོངས་པ་ཐམས་ཅད་འབྱུང་ཞིང་འཕེལ་བའི་རྟེན་བྱེད་པའི་ལས་ཅན་ནོ། །རྣམ་འགྲེལ་ལས་ཀྱང༌། དེ་ཉིད་ཕྱིར་ནི་ཉེས་རྣམས་ཀྱི། །རྒྱུ་ནི་གཏི་མུག་ཡིན་པར་གསུངས། །ཞེས་པ་ལྟར་རོ། །ལྔ་བ་ཐེ་ཚོམ་ནི། དེ་ནི་ཉོན་མོངས་ཅན་མ་ཡིན་པ་ཕྱོགས་འདི་ན་ལྷ་ཡོད་དམ་མེད་སྙམ་པ་ལྟ་བུ་ཤེས་བྱའི་སྒྲིབ་པས་བསྡུས་པའང་ཡོད་པར་ས་བཟང་གི་ཀུན་བཏུས་འགྲེལ་བར་གསུངས་ལ། རྩ་ཉོན་གྱི་ཐེ་ཚོམ་ནི། རང་ཡུལ་ཡིད་གཉིས་སུ་འཇུག་པའི་རྩ་ཉོན་དེ། རྩ་ཉོན་གྱི་ཐེ་ཚོམ་ངོ་བོ་ཡིན་ལ། ཡང་དག་པའི་ཕྱོགས་རྣམས་ལ་སྤྲོ་བས་མི་འཇུག་པའི་རྟེན་བྱེད་པའི་ལས་ཅན་ནོ། །དྲུག་པ་ལྟ་བ་ནི། རྟོག་པའི་བདག་ཉིད་ཀྱི་ཤེས་རབ་ཉོན་མོངས་པ་ཅན་ཏེ། དེ་ཉིད་དམིགས་པ་དང་རྣམ་པ་ཐ་དད་པའི་དབྱེ་བས་ལྔ་ཡོད་པ་ལས། དང་པོ་འཇིག་ཚོགས་ལ་ལྟ་བ་ནི། སཏྐ་ཡ་ཞེས་པའི་སད་ཅེས་པ། ཤཌི་འཇིག་པ་ལའོ་ཞེས་པ་དང༌། ཀཱ་ཡ་ཞེས་པ་ཙི་སོགས་པ་ལའོ། །ཞེས་པའི་བྱིངས་ལས་བསྒྲུབས་པས། འཇིག་ཅིང་མི་རྟག་པ་དུ་མ་འདུས་ཤིང་ཚོགས་པའི་ཉེ་བར་ལེན་པ་དང་བཅས་པའི་ཕུང་པོ་ལྔ་བོ་དག་ལ་དམིགས་ནས་རྣམ་པ་ངོ་བོ་ཉིད་ཀྱི་བདག་གམ་ཕན་འདོགས་བྱེད་ཀྱི་བདག་གིར་རྗེས་སུ་ལྟ་ཞིང་རྣམ་པར་འབྱེད་པའི་སེམས་བྱུང་དེ། འཇིག་ལྟའི་ངོ་བོ་ཡིན་ལ། དེའང་རང་རྒྱུད་དུ་གྱུར་པ་ལ་བདག་དང༌། གཞན་རྒྱུད་དུ་གྱུར་བ་དང་མ་ཟིན་པ་ལ་བདག་གིར་ལྟ་བ་དང༌། གང་གི་ཚེ་རྣམ་ཤེས་ལ་བདག་ཏུ་ལྟ་བ་དེའི་ཚེ་ཕུང་བོ་གཞན་བཞི་ལ་བདག་གིར་ལྟ་བ་དང༌། གྲངས་ཅན་དང་གཅེར་བུ་དང་སྤྱོད་པ་བ་ལ་སོགས་པ། བདག་ཤེས་རིག་ཏུ་འདོད་པ་ན་མིང་བཞི་ལ་བདག་དང་གཟུགས་ལ་བདག་གིར་ལྟ་བ་དང༌། བྱེ་བྲག་པ་ལ་སོགས་པ་བདག་བེམ་པོར་འདོད་པ་ན་མིག་སོགས་བདག་ཏུ་རློམ་པས་གཟུགས་ལ་བདག་དང་མིང་བཞི་ལ་བདག་གིར་ལྟ་བ་ལ་སོགས་པ་དེ་ཡིན་པར་ས་བཟང་གིས་ཀུན་བཏུས་འགྲེལ་བར་གསུངས་སོ། །ལྟ་བ་ངན་པའི་བྱེ་བྲག་སྣ་ཚོགས་པ་ཐམས་ཅད་འདི་ལ་བརྟེན་ནས་འབྱུང་བས་ལྟ་བ་ཐམས་ཅད་ཀྱི་རྟེན་བྱེད་པའི་ལས་ཅན་ནོ། །ཟག་བཅས་ལ་དམིགས་པའི་ལྟ་བ་ཐམས་ཅད་ཀྱང་འཇིག་ཚོགས་ལ་ལྟ་མོད་ཀྱི། བདག་ལ་འཇིག་ཚོགས་ལས་གཞན་པའི་ཡུལ་མེད་པས་དེ་སྐད་ཅེས་བཤད་དེ། མདོ་ལས། དགེ་སྤྱོང་ངམ་བྲམ་ཟེ་གང་ལ་ལ་དག་བདག་དང་བདག་གིར་ཡང་དག་པར་རྗེས་སུ་ལྟ་བ་དེ་དག་ཐམས་ཅད་ནི་ཉེ་བར་ལེན་པའི་ཕུང་པོ་ལྔ་པོ་འདི་དག་ལ་ལྟ་བ་ཁོ་ནར་ཟད་དོ་ཞེས་པ་ལྟར་རོ། །གཉིས་པ་མཐར་ལྟ་ནི། ཉེར་ཕུང་དང་འཇིག་ལྟས་བཟུང་བའི་བདག་སོགས་ལ་དམིགས་ནས། རྣམ་པ་རྟག་ཆད་གང་རུང་དུ་རྗེས་སུ་ལྟ་བའི་ཤེས་རབ་ཉོན་མོངས་ཅན་གྱི་སེམས་བྱུང་དེ། མཐར་ལྟའི་ངོ་བོ་ཡིན་ལ། མཐའ་གཉིས་དང་བྲལ་བའི་རྟེན་འབྲེལ་ཤེས་པ་དབུ་མའི་ལམ་གྱིས་འཁོར་བ་ལས་ངེས་པར་འབྱུང་བའི་བར་དུ་གཅོད་པའི་ལས་ཅན་ནོ། །གསུམ་པ་ལྟ་བ་མཆོག་འཛིན་ནི། འཇིག་ཚོགས་དང་མཐར་འཛིན་དང་ལོག་ལྟ་ལ་སོགས་པ་ལྟ་བ་ངན་པ་རྣམས་དང༌། ལྟ་བ་དེ་དག་གང་ལས་བྱུང་བའི་གནས་ལྟ་བ་པོའི་ལུས་ཉེ་བར་ལེན་པའི་ཕུང་པོ་ལྔ་པོ་དག་ལ་དམིགས་ནས། རྣམ་པ་མཆོག་ཏུ་འཛིན་པའི་ཤེས་རབ་ཉོན་མོངས་ཅན་དེ། ལྟ་བ་མཆོག་འཛིན་གྱི་ངོ་བོ་ཡིན་ལ། ལྟ་བ་ངན་པ་ལ་ཡོན་ཏན་དུ་འཛིན་པས་མངོན་པར་ཞེན་ཅིང་ཡོངས་སུ་མི་གཏོང་བའི་རྟེན་བྱེད་པའི་ལས་ཅན་ནོ། །བཞི་བ་ཚུལ་ཁྲིམས་བརྟུལ་ཞུགས་མཆོག་འཛིན་གྱི་ལྟ་བ་ནི། ཚུལ་ཁྲིམས་བརྟུལ་ཞུགས་ངན་པ་དང༌། དེ་དག་གང་ལས་འབྱུང་བ་ཉིད་ཀྱི་གནས་ཉེ་བར་ལེན་པའི་ཕུང་པོ་ལྔ་བོ་དག་ལ་དམིགས་ནས། འདག་གྲོལ་འབྱིན་གསུམ་དུ་ལྟ་བའི་ཤེས་རབ་ཉོན་མོངས་ཅན་གྱི་སེམས་བྱུང་དེ། ཚུལ་ཁྲིམས་བརྟུལ་ཞུགས་མཆོག་འཛིན་གྱི་ངོ་བོ་ཡིན་ལ། དེས་ཐར་བའི་ཆེད་དུ་འབད་ཀྱང་ངེས་པར་མི་འབྱུང་བའི་ཕྱིར་ངལ་བ་འབྲས་བུ་མེད་པའི་རྟེན་བྱེད་པའི་ལས་ཅན་ནོ། །ལྔ་བ་ལོག་ལྟ་ནི། ཚེ་སྔ་ཕྱི་དང་ལས་འབྲས་སོགས་ཡོད་པའི་ཆོས་ལ་དམིགས་ནས་རྣམ་པ་དེ་དག་མཐའ་གཅིག་ཏུ་མེད་པར་ལྟ་བའི་ཤེས་རབ་ཉོན་མོངས་ཅན་གྱི་སེམས་བྱུང་དེ། ལོག་ལྟའི་ངོ་བོ་ཡིན་ལ། རྒྱུ་འབྲས་ལ་སྐུར་འདེབས་ཀྱི་ལོག་ལྟ་ནི་དགེ་བའི་རྩ་བ་གཅོད་པའི་ལས་ཅན་དང༌། ཐམས་ཅད་ཀྱང་མི་དགེ་བའི་རྩ་བ་དུག་གསུམ་གྱི་ས་བོན་གསོ་བས་དེ་ཉིད་དམ་དུ་འཛིན་པའི་རྟེན་བྱེད་པའི་ལས་ཅན་དང༌། མི་དགེ་བ་བྱས་ཀྱང་སྐྱོན་མེད་སྙམ་པས་དེ་ལ་འཇུག་པའི་ལས་ཅན་དང༌། དགེ་བ་བྱས་ཀྱང་འབྲས་བུ་མེད་སྙམ་པས་དེ་ལ་མི་འཇུག་པའི་ལས་ཅན་ནོ། །ལྟ་བ་ལྔ་པོ་འདི་དག་ལས་ལྟ་བ་དང་པོ་བཞི་ནི། སྒྲོ་འདོགས་པའི་ལྟ་བ་ཞེས་བྱ་སྟེ་ཤེས་བྱ་ཕུང་པོ་ལྔ་ལ་འཇིག་ཚོགས་ལྟ་བས་བདག་དང་བདག་གི་བའི་ངོ་བོ་ཉིད་དུ་སྒྲོ་འདོགས་པ་དང༌། མཐར་འཛིན་ལྟ་བས་ཁྱད་པར་རྟག་པ་དང་ཆད་པ་ཉིད་དུ་སྒྲོ་འདོགས་པ་དང༌། ལྟ་བ་མཆོག་འཛིན་གྱིས་ལྟ་བ་ངན་པ་ལ་མཆོག་དང་གཙོ་བོ་ལ་སོགས་པར་སྒྲོ་འདོགས་པ་དང༌།ཚུལ་ཁྲིམས་བརྟུལ་ཞུགས་མཆོག་འཛིན་གྱིས་དེ་དག་ལ་འདག་པ་དང་གྲོལ་བའི་རྒྱུར་སྒྲོ་འདོགས་པའི་ཕྱིར། །ལོག་ལྟ་ནི་རྒྱུ་འབྲས་ལ་སོགས་པ་ཡོད་པའི་དངོས་པོ་བསལ་ནས་སྐུར་བ་འདེབས་པའི་ལྟ་བའོ། །འཇིག་ཚོགས་ལ་ལྟ་བ་ཉི་ཤུ་ནི། མདོ་ལས། གཟུགས་བདག་དང་དབྱེར་མེད་ཡིན་པར་ལྟ་བ་དང༌། གཟུགས་བདག་དང་ཐ་དད་དུ་ལྡན་པ་དང༌། གཟུགས་བདག་གིས་དབང་བསྒྱུར་བྱ་ཡིན་པ་དང༌། གཟུགས་ལ་བདག་ཚོགས་པ་གཅིག་ཏུ་གནས་པ་དང༌། དེ་བཞིན་དུ།ཚོར་བ་དང༌། འདུ་ཤེས་དང༌། འདུ་བྱེད་རྣམས་ལའང་སྦྱར་བ་དང༌། མཐར་རྣམ་པར་ཤེས་པ་བདག་ཡིན་པར་ལྟ་བ་དང༌།རྣམ་པར་ཤེས་པ་བདག་དང་ལྡན་པ་དང༌། རྣམ་པར་ཤེས་པ་བདག་གི་ཡིན་པ་དང༌། རྣམ་པར་ཤེས་པ་ལ་བདག་གནས་སོ་ཞེས་བྱ་བ་དང༌། འགའ་ཞིག་ཏུ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་ཞེས་ཀྱང་འབྱུང་བ་དེ་བསྡུ་ན་གཉིས་སུའང་འདུ་བས། བདག་ཏུ་ལྟ་བ་ནི་དུ་ཡིན། བདག་གིར་ལྟ་བ་ནི་དུ་ཡིན་ཞེ་ན། གཟུགས་བདག་ཡིན་པར་ལྟ་བ་ནས་རྣམ་པར་ཤེས་པ་བདག་ཡིན་པར་ལྟ་བའི་བར་ལྔ་ནི་བདག་ཏུ་ལྟ་བའོ། །དེའང་གཟུགས་སོགས་ཕུང་པོ་ལྔ་དང་བདག་གཞི་མཐུན་དུ་འཛིན་པའི་ཕྱིར་རོ། ། ལྷག་མ་བཅོ་ལྔ་པོ་ཐམས་ཅད་ནི་བདག་གིར་ལྟ་བ་ཞེས་པ་གཅིག་ཏུ་འདུའོ། །