༡ ཆོས་གོས་རྣམ་གསུམ་གྱི་བྱུང་བ་དང་ཁྲུ་ཚད།
སྟོན་པ་ཐུགས་རྗེ་ཅན་ཞལ་བཞུགས་དུས། རྒྱལ་བོ་གཟུགས་ཅན་སྙིང་བོས་འཚོ་བ་བ་གོས་ངུར་སྨྲིག་གྱོན་པ་ཞིག་མཐོང་བས། གླང་ཆེན་ལས་བབས་ཏེ་ཞབས་ལ་མགོ་བོས་གཏུགས་པས། འཁོར་གྱིས་དེ་ནི་སྟོན་པའི་ཉན་ཐོས་མ་ལགས་སྨྲས་པས། རྐྱེན་དེ་ལ་བྱས་ཏེ་རྒྱལ་བོས། སྟོན་པ་བཅོམ་ལྡན་འདས་ལ། རབ་བྱུང་གི་ཆོས་གོས་གཞན་དང་མི་འཁྲུལ་བའི་རྟགས་དགོས་ཚུལ་ཞུས་པས། སྟོན་པས་ལུས་འཕགས་ཀྱི་ཞིང་ལྟ་བུའི་དྲས་དྲུབ་བྱེད་དགོས་པར་བཀའ་བསྩལ་བ་ཡིན། དེ་ཡང་ཆོས་གོས་རྣམ་གསུམ་གྱི་སྒྲ་བཤད་ནི། ཆོས་དོན་དམ་པའི་དགེ་སྦྱོང་དང་། མྱ་ངན་ལས་འདས་པ་དང་མཐུན་པའི་གོས་ཡིན་པས་ཆོས་གོས་དང་། རྣམ་ཕྲན་དང་ལྒིགས་བུ་དུ་མ་སོ་སོར་རམ་ཀུན་ཏུ་སྦྱར་བས་ན་རྣམ་སྦྱར་དང་། བླ་སྟེ་སྐུ་སྟོད་དུ་གྱོན་པས་གོས་ཡིན་པས་བླ་གོས། མཐང་སྟེ་སྐུ་སྨད་དུ་གྱོན་པས་གོས་ཡིན་པས་མཐང་གོས་ཟེར་རོ། །
ཆོས་གོས་དེ་རྣམས་འཇལ་བྱེད་ཀྱི་ཁྲུ་ནི། ལུས་ཁྲུ། ལག་ཁྲུ། རྡུལ་ཁྲུ། ཞེས་གསུམ་དུ་འདུལ་གཞུང་ལས་གསུངས་ཤིང་། ལུས་ཁྲུ་ནི། རང་གི་ལུས་ཀྱི་སྲིད་དུ་ཆ་བདུན་དུ་བགོས་པའི་ཆ་གཉིས་དང་། ལག་ཁྲུ་ནི། ཊིཀྐ་ལས། ཁྲུ་ནི་གྲུ་མོ་ནས་གུང་མོའི་བར་རོ། །ཞེས་དང་། མཛོད་རྩར་སོར་མོ་ཉི་ཤུ་བཞི་ལ་ཁྲུ། ཞེས་སོ། །རྡུལ་ཁྲུ་ནི། རྣམ་འབྱེད་འགྲེལ་བ་ན་འདུལ་བ་ལས་དྲུག་འགྱུར་དུ་བསྒྲེ་བ་ནི། མར་འབྲི་བའི་དུས་ཀྱི་མི་ཉམ་ཆུང་བའི་སོར་རྣམ་པར་བཞག་པའི་ཕྱིར་རོ། །ཆོས་མངོན་པ་ལས་བདུན་འགྱུར་དུ་བསྒྲེ་བ་ནི། བསྐལ་བ་དང་བོའི་མི་ཉམ་ཆེ་བའི་སོར་རྣམ་པར་བཞག་པའི་ཕྱིར་རོ་ཞེས་གསུངས་པ་ལྟར། འདུལ་བ་མདོ་རྩར། རྡུལ་ཕྲ་རབ་དང་། རྡུལ་ཕྲ་མོ་དང་། ཆུ་དང་། ལྕགས་དང་། རི་བོང་དང་། ལུག་དང་། གླང་དང་། ཉི་ཟེར་གྱི་རྡུལ་དང་། སྲོ་མ་དང་། ཤིག་དང་། ནས་དང་སོར་རྣམས་སྔ་མ་སྔ་མ་དྲུག་འགྱུར་དང་། སོར་མོ་ཉི་ཤུ་རྩ་བཞི་ལ་ཁྲུ་གང་སོགས་གསུངས་སོ། །མཛོད་རྩ་ལས། སྐད་ཅིག་ཕྲ་རབ་རྡུལ་དང་ནི། །རྡུལ་ཕྲན་དང་ནི་དེ་བཞིན་དུ། །ལྕགས་ཆུ་རི་བོང་ལུག་དང་གླང་། །ཉི་ཟེར་རྡུལ་དང་སྲོ་མ་དང་། །དེ་ལས་བྱུང་དང་དེ་བཞིན་དུ། །སོར་ཚིགས་ཞེས་བྱ་གོང་བདུན་འགྱུར། །སོར་མོ་ཉི་ཤུ་བཞི་ལ་ཁྲུ། །ཁྲུ་བཞི་ལ་ནི་གཞུ་གང་ངོ་། །དེ་དག་ལྔ་བརྒྱ་རྣམས་ལ་ནི། །རྒྱང་གྲགས་དེ་ལ་དགོན་པར་འདོད། །དེ་བརྒྱད་དཔག་ཚད་ཅེས་བྱའོ། །ཞེས་སོ། །
གཞལ་ཚུལ་ཡང་། ཀུན་མཁྱེན་མཚོ་སྣ་བའི་གདུལ་ཊིཀ་ཉི་མའི་འོད་ཟེར་ལས། རྡུལ་ཁྲུ་ལུས་ཁྲུ་ལག་ཁྲུ་སྟེ། །ཁྲུ་གསུམ་རྣམ་དབྱེ་ཤེས་པར་བྱ། །རྡུལ་ཁྲུས་གཞལ་བར་བྱ་བ་ནི། །ཁང་བའི་ཚད་དང་ཁྲི་རྐང་ཚད། །གདིང་བ་གཡན་འགབ་རས་ཆེན་ནོ། །དེ་དག་ལས་གཞན་ཆོས་གོས་རྣམས། །ལུས་ཁྲུ་འམ་ལག་ཁྲུས་གཞལ་བ་སྟེ། །ལུས་རིང་ཧ་ཅང་ལག་ཐུང་དང་། །དེ་ལས་ལྡོག་པའི་ཆོས་གོས་རྣམས། །རང་གི་ལུས་ཁྲུ་ཁོ་ནས་གཞལ། །ལུས་ཚད་ལག་ཚད་འཚམ་པ་ཡིས། །ལག་ཁྲུས་ཀྱང་ནི་གཞལ་དུ་རུང་། །ཞེས་སོ། །
གོས་གང་ལས་སྒྲུབ་པའི་བསམ་སྤྱོད་མི་རུང་བའི་རྒྱུ་ཚུལ་འཆོས་དང་། ཁ་བསགས། གཞོགས་སློང་། ཐོབ་ཀྱིས་འཇལ་བ། རྙེད་པས་རྙེད་པ་འཚོ་བ་སྟེ་ལོག་འཚོ་ལྔའི་བསམ་སྤྱོད་ཀྱིས་གོས་སྒྲུབ་པ་སྤངས་ཏེ། ཀུན་སྤྱོད་དང་སྤྱོད་ལམ་དག་པས་གོས་འཚོལ་སྒྲུབ་བྱེད་དགོས་པར་མ་ཟད། དཔག་བསམ་གྱི་ཤིང་ལས་བྱུང་བ་དང་། རས་བལ་དང་རྔ་མོང་གི་བལ་སོགས་རིན་པོ་ཆེ་ལས་གྲུབ་པ་དང་། དབྱིབས་མི་རུང་བ་ཁ་ཚར་དང་ཕུན་ཚར་ཅན་དང་། མུ་སྟེགས་ཀྱི་རྒྱལ་མཚན་ལྟ་བུ་དང་། ཁ་དོག་མི་རུང་བ་ཁྲ་བོ་དང་། དཀར་བོ། ནག་པོ། མཚལ། རྒྱ་སྐྱེགས། བཙོད། གུར་གུམ། མཐིང་ཤིང་། ལི་ཁྲི། སྨར་ཤིང་། ལེ་བརྒན་སོགས་ཀྱི་ཚོན་ཀྱིས་ཁ་བསྒྱུར་བའི་གོས་ཀྱི་རྒྱུ་མི་རུང་བ་སྤངས་ཏེ། བལ་དང་། རྩྭ་ཤ་ན། ཉི་འོག་པའི་གོས་དང་། རས་གོས་དང་། རྩྭ་ཟར་མ། རྩྭ་གོ་ཏམ་པ་བཅས་ལས་གྲུབ་པའི་གོས་རྣམས་དང་། སྔོན་པོ་དང་། སེར་བོ། དམར་བོ་སྟེ་སངས་རྒྱས་ཀྱིས་གནང་བའི་གོས་ཀྱི་རྒྱུ་སྒྲུབ་དགོས་སོ། །