ལྔ་བ་ཉེ་བའི་ཉོན་མོངས་པ་བཤད་པ་ལ་ཉི་ཤུ།
ལྔ་བ་ཉེ་བའི་ཉོན་མོངས་པ་བཤད་པ་ལ་ཉི་ཤུ་ལས།
དང་པོ་ཁྲོ་བ་ནི། གནོད་པར་བྱེད་པའི་རྒྱུ་སོགས་ལ་དམིགས་ནས་གདགས་གཞི་ཁོང་ཁྲོ་ལ་བཏགས་པ་རྣམ་པ་སེམས་ཀྱིས་ཀུན་ནས་མནར་སེམས་ཞིང་གནོད་པ་བྱ་བར་འདོད་པའི་སེམས་བྱུང་དེ། ཁྲོ་བའི་ངོ་བོ་ཡིན་ལ། བྱེད་ལས་གཞན་ལ་གནོད་པ་སྣ་ཚོགས་ཤོམ་པའི་རྟེན་བྱེད་པའི་ལས་ཅན་ནོ། །གཉིས་པ་འཁོན་འཛིན་ནི། ཁོང་ཁྲོའི་ཆར་གཏོགས་པ་ཁྲོས་པའི་འོག་ཏུ་གནོད་བྱེད་ལ་དམིགས་ནས། རྣམ་པ་ཁོང་ཁྲོའི་རྒྱུན་མི་གཏོང་བར་དམ་དུ་གནོད་པར་བྱེད་འདོད་པའི་སེམས་བྱུང་དེ། འཁོན་འཛིན་གྱི་ངོ་བོ་ཡིན་ལ། མི་བཟོད་པའི་རྟེན་བྱེད་པའི་ལས་ཅན་ནོ། །གསུམ་པ་འཆབ་པ་ནི། གཏི་མུག་གི་ཆར་གཏོགས་པས་མི་དགེ་བ་ལ་དམིགས་ནས་ཁ་ན་མ་ཐོ་བ་ཉེས་ལྟུང་མཁྱུད་ཅིང་སྦེད་པའི་རྣམ་པ་ཅན་གྱི་སེམས་བྱུང་དེ། འཆབ་པའི་ངོ་བོ་ཡིན་ལ། བྱེད་ལས་བདེ་བ་ལ་རེག་པར་མི་གནས་པའི་རྟེན་བྱེད་པའི་ལས་ཅན་ནོ། །བཞི་བ་འཚིག་པ་ནི། གདགས་གཞི་ཁོང་ཁྲོ་འཕེལ་བའི་ཆར་གཏོགས་པ། རྒྱུ་ཁྲོ་བ་དང་ཁོན་དུ་འཛིན་པ་ལས་བྱུང་བས་དེ་དག་སྔོན་དུ་འགྲོ་བའི་ངོ་བོ་སེམས་ཀྱི་ཀུན་ནས་མནར་སེམས་པ་དྲག་པོ་ཚིག་རྩུབ་ཀུན་ནས་སློང་བར་བྱེད་པའི་སེམས་བྱུང་དེ། འཚིག་པའི་ངོ་བོ་ཡིན་ལ། བསོད་ནམས་མ་ཡིན་པ་ངག་གི་ཉེས་སྤྱོད་འཕེལ་བའི་ལས་ཅན་དང༌། འགྲོགས་པར་དཀའ་བས་གྲོགས་བཟང་པོ་དང་ལྷན་ཅིག་དགའ་བ་ལ་རེག་པར་མི་གནས་པའི་ལས་ཅན་ནོ། །ལྔ་བ་ཕྲག་དོག་ནི། གདགས་གཞི་ཞེ་སྡང་གི་ཆར་གཏོགས་པ་རྒྱུ་རྙེད་བཀུར་ལ་ལྷག་པར་ཆགས་ནས། དམིགས་ཡུལ་གཞན་གྱི་རིགས་དང་ལོངས་སྤྱོད་དང་ཚུལ་ཁྲིམས་དང་ཐོས་པ་ལ་སོགས་པ་ཡོན་ཏན་ཕུན་སུམ་ཚོགས་པའི་ཁྱད་པར་ལ། རྣམ་པ་མི་བཟོད་པར་གྱུར་པ་སེམས་ཁོང་ནས་ཁྱབ་པར་འཁྲུགས་པའི་སེམས་བྱུང་དེ། ཕྲག་དོག་གི་ངོ་བོ་ཡིན་ལ། གཞན་གྱི་ལེགས་པའི་ཡོན་ཏན་ལ་ཡིད་མི་བདེ་བ་དང༌། དེའི་དབང་གིས་རང་ཉིད་བདེ་བ་ལ་རེག་པར་མི་གནས་པའི་ལས་ཅན་ནོ། །དྲུག་པ་སེར་སྣ་ནི། གདགས་གཞི་འདོད་ཆགས་ཀྱི་ཆར་གཏོགས་པ་རྒྱུ་རྙེད་པ་དང་བཀུར་སྟི་ལ་ལྷག་པར་ཆགས་ནས། དམིགས་ཡུལ་རང་གི་ཟས་དང་ནོར་ལ་སོགས་པའི་ཡོ་བྱད་རྣམས་ལ།རྣམ་པ་སེམས་ཀྱིས་ཀུན་ཏུ་འཛིན་ཞིང་གཏོང་མི་ཕོད་པར་གྱུར་པའི་སེམས་བྱུང་དེ། སེར་སྣའི་ངོ་བོ་ཡིན་ལ། དེས་ཡོ་བྱད་མཁོ་བ་མ་ཟད་མི་མཁོ་བ་རྣམས་ཀྱང་བསགས་པས་མ་བསྙུངས་ཤིང་འཕེལ་བའི་རྟེན་བྱེད་པའི་ལས་ཅན་ནི་སྐྱེས་བུ་བྱེད་པའི་འབྲས་བུ་ཡིན་ནོ། །རྣམ་སྨིན་གྱི་འབྲས་བུ་ནི། སེར་སྣ་ཅན་ནི་ཡི་དྭགས་གནས་སུ་སྐྱེ་བར་འགྱུར། ཅི་སྟེ་མིར་སྐྱེས་ན་ཡང་དེ་ཚེ་དབུལ་པོར་འགྱུར། །ཞེས་པ་ལྟར་རོ། །བདུན་པ་སྒྱུ་ནི། རྒྱུ་རྙེད་བཀུར་ལ་ལྷག་པར་ཆགས་ནས་རྩ་བ་ཡོ་བྱད་ལ་འདོད་ཆགས་དང་ལོག་འཚོའི་ཉེས་པ་མ་རིག་པའི་གཏི་མུག་གི་ཆར་གཏོགས་པ་ངོ་བོ་གཞན་བསླུ་བའི་སྦྱིན་པ་དང་ཚུལ་ཁྲིམས་ལ་སོགས་པ་ཡོན་ཏན་ཡང་དག་པ་མ་ཡིན་ཡང་ཡིན་པ་ལྟར་ཀུན་ཏུ་སྟོན་པའི་སེམས་ཀྱི་རྣམ་འགྱུར་དེ། སྒྱུའི་ངོ་བོ་ཡིན་ལ། ཚུལ་འཆོས་ཀྱིས་བསྒྲུབས་པའི་ཡོ་བྱད་ལ་ལོངས་སྤྱོད་པས་ཚེ་འདིར་ལོག་པས་འཚོ་བའི་རྟེན་བྱེད་ཅིང་ཕྱི་མ་ལ་ངན་འགྲོར་ལྟུང་བའི་ལས་ཅན་ནོ། །བརྒྱད་པ་གཡོ་ནི། རྒྱུ་རྙེད་པ་དང་བཀུར་སྟི་ལ་ལྷག་པར་ཆགས་ནས།རྩ་བ་འདོད་ཆགས་དང་གཏི་མུག་གི་ཆར་གཏོགས་པ། ངོ་བོ་རང་གི་རྒྱུད་ལ་ཉེས་པ་ཡང་དག་པར་ཡོད་ངེས་པ་གཞན་དུ་བསྒྱུར་ཞིང་གཏམ་རླུང་ལ་བསྐུར་བ་ལ་སོགས་པའི་ཐབས་སྣ་ཚོགས་ཀྱིས་སྐྱོང་ཞིང་སྦེད་པའི་སེམས་ཀྱི་རྣམ་འགྱུར་དེ། གཡོའི་ངོ་བོ་ཡིན་ལ། འདི་ནི་ཟུར་གྱིས་གསང་ཞིང་འཆབ་པ་ནི་གསལ་པོར་གསང་བས་ཐ་དད་དོ། །བདག་ཉིད་ཀྱི་ཚུལ་མི་སྟོན་པ་ནི་གདམས་ངག་གི་སྣོད་མ་ཡིན་པའི་ཕྱིར་ཡང་དག་པའི་གདམས་ངག་རྙེད་པའི་བར་དུ་གཅོད་པའི་ལས་ཅན་ནོ། །དགུ་བ་རྒྱགས་པ་ནི། ཟག་པ་དང་བཅས་པའི་ཕུན་སུམ་ཚོགས་པ་གང་ཡང་རུང་བ་རང་ལ་མཐོང་བ་ལ་དམིགས་ནས། རྩ་བ་འདོད་ཆགས་ཀྱི་ཆར་གཏོགས་པའི་རྣམ་པ་འགའ་ཞིག་སྲེད་པ་དང་ཡིད་བདེ་བ་ཉོན་མོངས་པ་ཅན་གྱི་སེམས་ཡོངས་སུ་གཏུགས་ཤིང་གང་བའི་སེམས་བྱུང་དེ། རྒྱགས་པའི་ངོ་བོ་ཡིན་ལ། ཆགས་སོགས་རྩ་བའི་ཉོན་མོངས་པ་དང༌། ཁྲོ་སོགས་ཉེ་བའི་ཉོན་མོངས་པ་ཐམས་ཅད་ཀྱི་རྟེན་བྱེད་པའི་ལས་ཅན་ནོ། །ང་རྒྱལ་ནི།གཞན་གྱི་ཡོན་ཏན་ལ་ལྟོས་ནས་ཁེངས་པ་ཡིན་ལ། འདི་རང་གི་ཆོས་ལ་ཆགས་པས་གང་བ་ཡིན་པའི་ཕྱིར། ཁྱད་པར་ཡོད་དེ། མཛོད་ལས། ང་རྒྱལ་ཁེངས་ཉིད་རྒྱགས་པ་སྟེ། །རང་གི་ཆོས་ལ་ཆགས་པ་ཡིས། །སེམས་ནི་ཡོངས་སུ་གཏུགས་པའོ། །ཞེས་པ་ལྟར་རོ། །བཅུ་པ་རྣམ་འཚེ་ནི།ཁོང་ཁྲོ་བའི་ཆར་གཏོགས་པ་གསོད་པ་ལ་སོགས་པའི་འཚེ་བར་བྱེད་པའི་སྙིང་བརྩེ་བ་མེད་པའི་སེམས་བྱུང་དེ། རྣམ་འཚེ་ཡིན་ལ། གཞན་གྱི་རྒྱུད་ལ་སྡུག་བསྔལ་དང་ཡིད་མི་བདེ་བ་སྣ་ཚོགས་བསྐྱེད་པས་རྣམ་པར་མཐོ་འཚམ་པའི་ལས་ཅན་ནོ། །བཅུ་གཅིག་པ་ངོ་ཚ་མེད་པ་ནི། གདགས་གཞི་དུག་གསུམ་གང་རུང་གི་ཆར་གཏོགས་པ་ལས། དེ་བྱ་བའི་ཆོས་མ་ཡིན་པར་ཤེས་བཞིན་དུ་སྡིག་པ་ཁ་ན་མ་ཐོ་བས་བདག་གི་ཆོས་རྒྱུ་མཚན་དུ་བྱས་བ་ལས་མི་འཛེམ་པའི་སེམས་བྱུང་དེ། ངོ་ཚ་མེད་པའི་ངོ་བོ་ཡིན་ལ། རྩ་བའི་ཉོན་མོངས་པ་དང༌། ཉེ་བའི་ཉོན་མོངས་པ་ཐམས་ཅད་ཀྱི་འཕེལ་བའི་གྲོགས་བྱེད་པའི་ལས་ཅན་ནོ། །བཅུ་གཉིས་པ་ཁྲེལ་མེད་པ་ནི། དུག་གསུམ་གང་རུང་གི་ཆར་གཏོགས། ཆོས་དང་འཇིག་རྟེན་གཉིས་ཀ་དང་མི་མཐུན་པར་ཤེས་བཞིན་དུ། སྡིག་པ་ཁ་ན་མ་ཐོ་བས་གཞན་དགེ་བའི་བཤེས་གཉེན་ལ་སོགས་པ་རྒྱུ་མཚན་དུ་བྱས་པ་ལས་ཀྱང་མི་མཛེམ་པའི་སེམས་བྱུང་དེ། ཁྲེལ་མེད་པའི་ངོ་བོ་ཡིན་ལ། ཉོན་མོངས་པ་དང་ཉེ་བའི་ཉོན་མོངས་བ་ཐམས་ཅད་ཀྱི་གྲོགས་བྱེད་པའི་ལས་ཅན་ནོ། །བཅུ་གསུམ་པ་རྨུགས་པ་ནི། གདགས་གཞི་གཏི་མུག་གི་ཆར་གཏོགས་པ་སེམས་བླུན་པར་གྱུར་ནས་མི་གཡོ་ཞིང༌། དམིགས་པ་ལ་གཏོད་མི་ནུས་པས་ལས་སུ་མི་རུང་ཞིང་བྱིང་བར་གྱུར་པ་ཉིད་ཀྱི་སེམས་བྱུང་དེ། རྨུགས་པའི་ངོ་བོ་ཡིན་ལ། དགེ་བ་ལ་བཀོལ་དུ་མི་རུང་ཞིང་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ལ་གཏི་མུག་གིས་ཁྱབ་པས་མཚུངས་ལྡན་གྱི་གྲོགས་བྱེད་པའི་ལས་ཅན་ནོ། །བཅུ་བཞི་པ་རྒོད་པ་ནི། ཡུལ་སྡུག་ཅིང་དགའ་བར་འོས་པའི་ཁ་དོག་དང་དབྱིབས་ལ་སོགས་པའི་མཚན་མའི་རྗེས་སུ་འཇུག་པའི་འདོད་ཆགས་ཀྱི་ཆར་གཏོགས་པའི་སྔོན་རྒོད་རྒོད་པ་དང་རྩེ་རྩེ་བ་དྲན་ནས་སེམས་རྣམ་པར་མ་ཞི་ཞིང་འཕྲོ་བར་གྱུར་བའི་སེམས་བྱུང་དེ། རྒོད་པའི་ངོ་བོ་ཡིན་ལ། ཏིང་ངེ་འཛིན་ཞི་བའི་བདག་ཉིད་ཅན་གྱི་གནས་པ་དང་མི་མཐུན་པས་དེ་ཉིད་ཀྱི་བར་དུ་གཅོད་པའི་ལས་ཅན་ནོ། །བཅོ་ལྔ་པ་མ་དད་པ་ནི། གཏི་མུག་གི་ཆར་གཏོགས་པ། དམིགས་ཡུལ་དགེ་པའི་ཆོས་ལས་འབྲས་སོགས་ཡིད་མི་ཆེས་པ་སོགས་དད་པའི་མི་མཐུན་ཕྱོགས་སུ་གྱུར་བའི་སེམས་བྱུང་དེ། མ་དད་པའི་ངོ་བོ་ཡིན་ལ། མ་དད་ན་སྦྱོར་བ་ལ་འདུན་པ་མེད་པའི་ཕྱིར་ལེ་ལོའི་རྟེན་བྱེད་པའི་ལས་ཅན་ནོ། །བཅུ་དྲུག་པ་ལེ་ལོ་ནི། གཏི་མུག་གི་ཆར་གཏོགས་པ་དགེ་བ་ལ་སེམས་མངོན་པར་མི་སྤྲོ་བའི་སེམས་བྱུང་དེ། ལེ་ལོའི་ངོ་བོ་ཡིན་ལ། བྱ་བ་ངན་པ་ལ་སྦྱོར་ཞིང་བརྩོན་འགྲུས་ཀྱི་མི་མཐུན་ཕྱོགས་ཡིན་པས་དགེ་བའི་ཕྱོགས་ལ་སྦྱོར་བའི་བར་དུ་གཅོད་པའི་ལས་ཅན་ནོ། །བཅུ་བདུན་པ་བག་མེད་ནི། གདགས་གཞི་དུག་གསུམ་གང་རུང་གི་ཆར་གཏོགས་པ་དགེ་བའི་ཆོས་རྣམས་མི་སྒོམ་ཞིང་ཡིད་ལ་མི་བྱེད་པ་དང༌། ཟག་པ་དང་བཅས་པའི་ཆོས་ཆགས་སོགས་ཉོན་མོངས་པ་རྣམས་ལ་སེམས་མི་སྲུང་ཞིང་མི་ཟློག་པས་བག་ཡངས་སུ་གཏོང་བའི་སེམས་བྱུང་དེ། བག་མེད་ཀྱི་ངོ་བོ་ཡིན་ལ། སྤང་བྱ་མི་དགེ་བ་འཕེལ་བ་དང༌། གཉེན་པོ་དགེ་བ་འགྲིབ་པའི་རྟེན་བྱེད་པའི་ལས་ཅན་ནོ། །བཅོ་བརྒྱད་པ་བརྗེད་ངས་ནི། ཆགས་སོགས་ཉོན་མོངས་པ་དང་མཚུངས་པར་ལྡན་པས་དེའི་དམིགས་པ་དྲན་ཞིང༌། དགེ་བའི་དམིགས་པ་མི་གསལ་བས་བརྗེད་པར་གྱུར་པའི་སེམས་བྱུང་དེ། བརྗེད་ངས་ཀྱི་ངོ་བོ་ཡིན་ལ། ཉོན་མོངས་པའི་ཡུལ་ལ་སེམས་གཡེང་བའི་རྟེན་བྱེད་པའི་ལས་ཅན་ནོ། །བཅུ་དགུ་བ་ཤེས་བཞིན་མ་ཡིན་པ་ནི། ཆགས་སོགས་ཉོན་མོངས་པ་དང་མཚུངས་པར་ལྡན་པའི་སྒོ་ནས་ཤེས་རབ་ཕྱིན་ཅི་ལོག་ཏུ་གྱུར་བའི་སེམས་བྱུང་དེ། ཤེས་བཞིན་མ་ཡིན་པའི་ངོ་བོ་ཡིན་ལ། ། དེས་ལུས་ཀྱི་འགྲོ་འོང་དང༌། ངག་གི་སྨྲ་བརྗོད་དང༌། སེམས་ཀྱི་རྟོག་དཔྱོད་ལ་སོགས་པའི་སྤྱོད་པ་ལ་ལེགས་པར་མ་བརྟགས་པར་མི་ཤེས་བཞིན་དུ་འཇུག་པ་སྟེ། ཐོས་ལྡན་དད་པ་ཅན་དང་ནི། །བརྩོན་པ་ལྷུར་ལེན་དུ་མ་ཡང༌། །ཤེས་བཞིན་མི་ལྡན་སྐྱོན་ཆགས་པས། །ལྟུང་བའི་རྙོག་དང་བཅས་པར་གྱུར། །ཞེས་པ་ལྟར་གནང་བཀག་གི་ཆ་མི་ཤེས་པས་ལྟུང་བ་འབྱུང་བའི་རྟེན་བྱེད་པའི་ལས་ཅན་ནོ། །འདུལ་བའི་མ་མོ་བསྡུ་བར་ཡང༌། ལྟུང་དེའི་རྒྱུ་ཡང་རྣམ་བཞི་སྟེ། །མི་ཤེས་པ་དང་བག་མེད་དང༌། །ཉོན་མོངས་མང་དང་མ་གུས་པའོ། །ཞེས་གསུངས་པ་ལས་འདི་ནི་དང་པོའོ། །ཉི་ཤུ་བ་རྣམ་གཡེང་ནི། དུག་གསུམ་གང་རུང་གི་ཆར་གཏོགས་པའི་སེམས་ཏིང་ངེ་འཛིན་ལ་སོགས་པ་དགེ་བའི་དམིགས་པ་ལས་ཡུལ་སྣ་ཚོགས་ལ་རྣམ་པར་འཕྲོ་བར་འགྱུར་བའི་སེམས་བྱུང་དེ། རྣམ་པར་གཡེང་བའི་ངོ་བོ་ཡིན་ལ། དེས་ཏིང་ངེ་འཛིན་ལ་གེགས་བྱེད་པའི་ཕྱིར་འཇིག་རྟེན་པའམ་འཇིག་རྟེན་ལས་འདས་པའི་ལམ་གྱི་ས་ལ་འདོད་ཆགས་དང་བྲལ་བའི་བར་དུ་གཅོད་པའི་ལས་ཅན་ནོ། །