གསུམ་པ་མཇུག་བསྡུ་བ།
གསུམ་པ་མཇུག་བསྡུ་བ་ནི།
བླ་མ་ལྔ་བཅུ་པ་སློབ་དཔོན་ཆེན་པོ་རྟ་དབྱངས་ཀྱིས་མཛད་པ་རྫོགས་སོ།།ཞེས་དེ་ལྟར་བླ༷་མ༷་ལྔ༷་བཅུ༷་པར་གྲགས་པ་བླ་མ་བསྟེན་ཚུལ་གྱི་བླང་དོར་དངོས་སུ་སྟོན་པ་ཤྭ་ལོ་ཀ་ལྔ་བཅུ་དང༌། བསྟན་བཅོས་བརྩམས་པའི་དགེ་བ་བསྔོ་བ་ཤྭ་ལོ་ཀ་གཅིག་སྟེ་ལྔ་བཅུ་རྩ་གཅིག་གིས་བསྡུས་པའོ། །སློབ་དཔོན་གང་གིས་མཛད་པ་ནི། སློབ་དཔོན་ཆེན་པོ་བྷ་ཝི་ལ་དདྟ་ཞེས་བྱ་བ་སྐུ་ཆེ་བའི་ཡོན་ཏན་བསམ་གྱིས་མི་ཁྱབ་ཅིང༌། ཁྱད་པར་རྗེ་བཙུན་སྒྲོལ་མས་ལུང་བསྟན་ཐོབ་ཅིང་མཆོག་གི་དངོས་གྲུབ་བརྙེས་པ་དེས་མཛད་པ་ཡིན་ལ་སློབ་དཔོན་འདི་དང་སློབ་དཔོན་རྟ་དབྱངས་གཅིག་ཟེར་བ་འདུག་རུང་དེ་མིན་པར་གསལ་ཞེས་བྱ་བྲལ་བ་བློ་གྲོས་རྒྱལ་མཚན་གྱིས་བླ་མ་ལྔ་བཅུ་པའི་འགྲེལ་བར་གསུངས་སོ། །འོན་ཀྱང་ཇོ་ནང་ཕྱོགས་རྒྱལ་གྱིས་བསྟན་འགྱུར་དཀར་ཆག་ལས་བླ་མ་ལྔ་བཅུ་པ་སློ༷བ་དཔོ༷ན་རྟ༷་དབྱ༷ངས་མཛ༷ད་པ༷། ཞེས་གསུངས་ལ། དེ་ལྟར་མཇུག་བྱང་དུ་མར་གསུངས་སོ། །དེ་ཡན་གྱིས་རྫོ༷གས་སོ༷། །གང་གིས་བསྒྱུར་བ་ནི། རྒྱ་གར་གྱི་མཁན་པོ་པདྨ་ཀར་ཝརྨ་དང༌། །ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ། །ཞེས་པ་ལྟར་རོ། །དེང་དུས་སུ་བླ་མ་བསྟེན་ཚུལ་ཞན་པའི་དབང་གིས་ཆོས་ལ་བརྟེན་ནས་ངན་སོང་དུ་འགྲོ་བའི་སྡིག་པ་ཆེར་བསགས་པ་མང་པོ་མཐོང་ཐོས་སུ་གྱུར་པས་ངན་འགྲོ་ལོག་པར་ལྟུང་བ་འགོག་ཕྱིར་འདི་སྨྲས་པ་ཡིན་ལ། འདིར་གོ་སླ་བ་ཙམ་ལས་སྤྱིར་བླ་མ་ལྔ་བཅུ་བའི་གཞུང་ཚིག་དེ་དག་རྒྱུད་གང་དང་གང་ལས་བསྡུས་པ་ཡིན་པ་སོགས་འབྲི་དགོས་མང་ཀྱང་ཅུང་གོ་དཀའ་བར་འགྱུར་བར་དོགས་ནས་མ་སྤྲོས་སོ། །རྗེ་བླ་མས། ཡོན་ཏན་ཀུན་གྱི་གཞི་གྱུར་དྲིན་ཅན་རྗེ། །ཚུལ་བཞིན་བསྟེན་པ་ལམ་གྱི་རྩ་བ་རུ། །ལེགས་པར་མཐོང་ནས་འབད་པ་དུ་མ་ཡིས། །གུས་པས་ཚུལ་བཞིན་བསྟེན་པར་བྱིན་གྱིས་རློབས། །ཞེས་འདི་ཕྱིའི་ཡོན་ཏན་ཀུན་གྱི་གཞི་རྟེན་དཔལ་ལྡན་བླ་མ་དམ་པ་ཡིན་པས་དེ་བསམ་སྦྱོར་གཉིས་ཀའི་སྒོ་ནས་ལེགས་པར་བསྟེན་དགོས་པར་གྲུབ་པའོ།། །།
སྨྲས་པ། མདོ་རྒྱུད་ཀུན་ལས་ལམ་གྱི་རྩ་བ་རུ། །བཤེས་གཉེན་ཚུལ་བཞིན་བསྟེན་པར་རག་ལས་ཞེས། །ཡང་ཡང་གསུངས་པ་རྡོ་རྗེའི་ཚིག་ཡིན་པས། །དེ་ཕྱིར་དེ་ཚུལ་ཅུང་ཟད་གསལ་བར་སྤྲོས། །ཚུལ་འདི་འབད་པའི་རྣམ་དཀར་ལ་བརྟེན་ནས། །འགྲོ་ཀུན་མཚན་ལྡན་བླ་མས་རྗེས་བཟུང་སྟེ། །རིང་མིན་དོན་དམ་བླ་མའི་གོ་འཕང་མཆོག །ཐོབ་ནས་གཟུང་འཛིན་འཁྲུལ་སྣང་སྟོང་བར་ཤོག །བདག་ལ་ཆོས་ཀྱི་འབྲེལ་བའི་ལུས་ཅན་ཀུན། །དཔལ་ལྡན་བླ་མས་སྐྱེ་ཀུན་རྗེས་བཟུང་སྟེ། །དཔལ་ལྡན་བླ་མའི་དམ་ཚིག་ལེགས་པར་གནས། །དཔལ་ལྡན་བླ་མའི་གོ་འཕང་མྱུར་མངོན་ཤོག །
ཅེས་བླ་མ་ལྔ་བཅུ་པའི་རྣམ་བཤད་རྡོ་རྗེ་འཆང་གི་ཞལ་ལུང་ཞེས་བྱ་བ་འདི་ནི་སྔར་ནས་བཤེས་གཉེན་བསྟེན་ཚུལ་ཞིག་འབྲི་འདུན་ཡོད་ལ། ད་ལན་མདོ་ལིའི་རྡོ་ཁ་དགོན་གྱི་རྡོ་རྗེ་སློབ་དཔོན་རིག་པའི་རྡོ་རྗེས་ཚེ་དཔག་མེད་ཀྱི་སྐུ་བརྙན་དང་ས་གདན་དར་བཅས་བླ་མ་ལྔ་བཅུ་བའི་འགྲེལ་བ་ཞིག་དགོས་ཞེས་བསྐུལ་བ་ལ་བརྟེན་ཏེ་རྗེ་བཙུན་སྤྲུལ་པའི་སྐུ་འཇམ་མགོན་གྲུབ་པའི་དཔའ་བོ་ཀུན་དགའ་སྙིང་པོའི་སློབ་མ་བྱ་བྲལ་བ་བློ་གྲོས་རྒྱལ་མཚན་གྱི་བླ་མ་ལྔ་བཅུ་པའི་འགྲེལ་བ་ཁ་མི་ཚང་བ་ཞིག་འདུག་པ་དང༌། བླ་མ་གོང་མ་རྣམས་ཀྱི་གསུང་སྒྲོས་སོགས་ལ་བརྟེན་ནས་དཔལ་ལྡན་བླ་མ་ལ་དད་པ་ཅུང་ཟད་ཐོབ་པ་ངག་དབང་དངོས་གྲུབ་དཔལ་གྱིས་ས་ག་ཟླ་བའི་ཚེས་ཉེར་གསུམ་ལ་མཇུག་རྫོགས་པར་སྦྱར་བའོ། །འདིས་ཀྱང་ལུས་ཅན་ཀུན་གྱིས་དམ་ཚིག་མི་ཉམས་པར་དཔལ་ལྡན་བླ་མ་དམ་པ་རྣམས་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་པའི་རྒྱུར་གྱུར་ཅིག། །། སརྦ་མངྒ་ལཾ།