ལྔ་བ་དགེ་སློང་མའི་སྡོམ་པའི་ཆོ་གའི་ཁྱད་པ།
ལྔ་བ་དགེ་སློང་མའི་སྡོམ་པའི་ཆོ་གའི་ཁྱད་པར་འཆད་དེ།
རྩ་བར། དགེ་སློང་གི་གནས་སུ་དགེ་སློང་མའོ། །ཞེས་པ་ལ་སོགས་པས་བསྟན་ཏོ། །འདིའི་དོན་ལ་བཞི་ལས། དང་པོ་དགེ་སློང་མའི་ཆོ་ག་འདི་དགེ་སློང་ཕའི་ཆོ་ག་ལས་ཐ་དད་དུ་བཤད་པའི་འཐད་པ་ནི། གལ་ཏེ་དགེ་སློང་ཕ་མའི་སྡོམ་པ་འཐོབ་བྱེད་ཀྱི་ཆོ་ག་ཆོས་ཅན། ཐོབ་བྱེད་དགེ་སློང་ཕའི་ཆོ་ག་ལས་དགེ་སློང་མའི་ཆོ་ག་ཐ་དད་དུ་བཤད་པ་མི་འཐད་པར་ཐལ། ཐོབ་བྱ་དགེ་སློང་ཕའི་སྡོམ་པ་ལས་དགེ་སློང་མའི་སྡོམ་པ་རྫས་གཞན་མ་ཡིན་པའི་ཕྱིར་ཏེ། མཛོད་འགྲེལ་ལས། དགེ་སློང་གི་སྡོམ་པ་ལས་ནི་དགེ་སློང་མའི་སྡོམ་པ་རྫས་གཞན་མ་ཡིན་ནོ་ཞེས་བཤད་པས་གྲུབ་བོ་ཞེ་ན། ཁྱབ་པ་མ་གྲུབ་སྟེ་དགེ་སློང་ཕ་མ་མཚན་མི་འདྲ་བའི་སྟོབས་ཀྱིས་ལུས་དང་བསམ་པ་མི་འདྲ་ཞིང་བསམ་པ་དེ་ལ་བརྟེན་པའི་ཉོན་མོངས་པ་རགས་མི་རགས་ཡོད་པས། དེ་ལ་ལྟོས་ཏེ་བཅས་པ་ལ་ཡང་མང་ཉུང་དང་ཆེ་ཆུང་ཡོད་པའི་ཕྱིར་ན་ཐུན་མོང་བ་ཐོབ་བྱེད་ཀྱི་ཆོ་ག་ཐ་དད་དུ་བཤད་པ་འདི་མི་འཐད་པ་མེད་དོ། །མཛོད་རྩ་འགྲེལ་ལས། དགེ་སློང་ཕ་མའི་སྡོམ་པ་རྫས་གཞན་མ་ཡིན་པར་བཤད་པ་དེ་ནི་སྤོང་བ་བདུན་ཙམ་དུ་སྡོམ་པ་རིགས་གཅིག་པ་ལ་དེ་སྐད་བཏགས་པ་སྟེ། མཛོད་ལས།སུམ་ཅུ་རྩ་བདུན་དེའི་ཕྱོགས་མཐུན། །མིང་གི་སྒོ་ནས་རྫས་སུ་བཅུ། །ཞེས་བྱང་ཆུབ་ཀྱི་ཆོས་སུམ་ཅུ་རྩ་བདུན་ལ་རྫས་བཅུར་བཤད་པ་བཞིན་ནོ། །