རྩ་བའི་ས་བཅད་གཉིས་པ་ཡུལ་གྱི་རྣམ་བཞག་བཤད་པ།
རྩ་བའི་ས་བཅད་གཉིས་པ་ཡུལ་གྱི་རྣམ་བཞག་བཤད་པ་ལ།
མཚན་ཉིད། དབྱེ་བ་གཉིས། དང་པོ་ནི། བློའི་རིག་པར་བྱ་བ། ཡུལ་གྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། རིག་པར་བྱ་བ། ཞེས་གསུངས་པའི་ཕྱིར། གཉིས་པ་དབྱེ་བ་ནི། གཏན་ཚིགས་རིགས་པའི་དོན་བསྡུས་ལས། །ཡུལ་ལ་དབྱེ་ན། ཡུལ་དུ་བྱས་ཚུལ་མི་འདྲ་བའི་སྒོ་ནས་དང༌། རྟོགས་དཀའ་སླའི་སྒོ་ནས་དབྱེ་ཚུལ་དང་གཉིས། དང་པོ་ལ་དབྱེ་ན། སྣང་ཡུལ། བཟུང་ཡུལ། ཞེན་ཡུལ། འཇུག་ཡུལ་དང་བཞིའོ། །མཚན་ཉིད་ནི་རིམ་པ་ལྟར། སྣང་ནས་རིག་པར་བྱ་བ་དང༌། རང་འཛིན་ཤེས་པ་མ་འཁྲུལ་བ་ལ་རང་འདྲ་བའི་རྣམ་པ་དངོས་སུ་སྐྱེད་བྱེད་ཀྱི་བེམ་པོ་དང༌། ཞེན་ནས་རིག་པར་བྱ་བ་དང༌། ཚད་མའི་གཞལ་བ་ལས་བླང་དོར་བྱར་རུང་བའོ། །སྣང་ཡུལ་ཤེས་པ་ཀུན་ལ་ཡོད། །བཟུང་ཡུལ་དོན་རིག་གཉིས་ཀྱིས་འཛིན། །ཞེན་ཡུལ་རྟོག་པ་ཁོ་ནས་ཞེན། །འཇུག་ཡུལ་ལ་ནི་ཚད་མ་དང༌། །དཔྱད་ཤེས་སྐྱེས་བུ་གསུམ་གྱིས་འཇུག །ཅེས་གསུངས་པའི་ཕྱིར། གཉིས་པ་རྟོགས་དཀའ་སླའི་སྒོ་ནས་དབྱེ་ན། མངོན་གྱུར། ཅུང་ཟད་ལྐོག་གྱུར། ཤིན་ཏུ་ལྐོག་གྱུར་དང་གསུམ། མངོན་སུམ་ཚད་མའི་དངོས་སུ་རྟོགས་པར་བྱ་བ། མངོན་གྱུར་གྱི་མཚན་ཉིད། དངོས་སྟོབས་རྗེས་དཔག་ཚད་མའི་དངོས་སུ་རྟོགས་པར་བྱ་བ། ཅུང་ཟད་ལྐོག་གྱུར་གྱི་མཚན་ཉིད། ཡིད་ཆེས་རྗེས་དཔག་གི་རྟོགས་པར་བྱ་བ་དེ། ཤིན་ཏུ་ལྐོག་གྱུར་གྱི་མཚན་ཉིད་ཡིན་ཏེ། གཏན་ཚིགས་རིགས་པའི་དོན་བསྡུས་ལས། གཞལ་བྱ་མངོན་གྱུར་ལྐོག་གྱུར་ཤིན་ཏུ་ལྐོག་གྱུར་གསུམ་མོ། །མཚན་ཉིད་རིམ་པ་ལྟར་རྟོགས་པ་པོའི་མངོན་སུམ་དང༌། རྗེས་དཔག་མཚན་ཉིད་པས་དང༌། ལུང་ཙམ་གྱིས་གྲུབ་པའི་དོན་ཞེས་པའོ། །ཞེས་གསུངས་པའི་ཕྱིར་རོ། །དེ་ལྟར་མངོན་ཚད་ལས་བཤད་པའི་བློ་རིག་གི་རྣམ་བཞག་རྣམས་ལེགས་པར་ཤེས་ན་སྤང་བླང་དང༌། དོན་དང་དོན་མ་ཡིན་པ་དང༌། ས་ལམ་གྱི་མངོན་རྟོགས་རྣམས་ལེགས་པར་ཤེས་ནས་མཐར་ཐུག་མི་གནས་པའི་མྱ་ངན་ལས་འདས་པའི་གྲོང་ཁྱེར་དུ་སྒྲོད་པར་འགྱུར་བའོ། །
སྨྲས་པ། མངོན་ཚད་ལས་བྱུང་བློ་རིག་རྣམ་བཞག་ཀུན། །མ་འདྲེས་གསལ་བའི་ངག་གི་བཀོད་པ་ཡི། །ལེགས་བཤད་དྲི་མ་མེད་པའི་དཔལ་འདི་ཉིད། །ཐུབ་བསྟན་པད་མའི་དཔལ་ལ་མཛེས་གྱུར་ཅིག །དགེ་འདིས་ཚེ་རབས་ཀུན་ཏུ་བློ་རིག་གི །ཆོས་ཚུལ་གསལ་བའི་བློ་གྲོས་དཔལ་ཐོབ་ཅིང༌། །བླང་དོར་ཚུལ་བཞིན་སྒྲུབ་ལ་རབ་བརྩོན་ནས། །འགྲོ་ཀུན་ཕན་བདེའི་ཉེར་འཚོ་བདག་གྱུར་ཅིག །སྐྱེ་བ་ཀུན་ཏུ་ཚེ་རབས་ཀུན་ཏུ་ཡང༌། །མཚན་ལྡན་བླ་མའི་བརྩེ་བས་རྗེས་བཟུང་ནས། །ཞི་བསིལ་ཆོས་ཀྱིས་རང་རྒྱུད་ལེགས་སྨིན་ནས། །ཐུབ་བསྟན་གསལ་བའི་སྒྲོན་མེ་བདག་གྱུར་ཅིག །ཅེས་བློ་རིག་གི་རྣམ་བཞག་ཉུང་གསལ་ལེགས་བཤད་གསེར་གྱི་ཉི་མ་ཞེས་བྱ་བ་འདི་ནི་བློ་ལྡན་དུ་མས་བསྐུལ་བ་དང༌། ཇོ་ནང་བཤད་གྲྭ་མདོ་སྔགས་སློབ་གླིང་ངེས་དོན་རིག་པའི་དགའ་ཚལ་གྱི་སློབ་མ་རྣམས་ལ་མཁོ་ཕྱིར་དུ་རྒྱ་བོད་ཀུན་ལ་ཉུལ་བའི་སྤྲང་འཁྱམས་པ་ངག་དབང་དངོས་གྲུབ་དཔལ་གྱིས་མདོ་སྔགས་སློབ་གླིང་དབུ་འཛུགས་སྐབས་ཆོས་ཁྲིད་དུ་མའི་ཞར་ལ་ཤར་འཛམ་ཐང་བསམ་འགྲུབ་ནོར་བུའི་གླིང་དུ་རབ་གནས་ཀུན་འཛིན་ཞེས་པ་ས་བྱིའི་གྲོ་བཞིན་ཟླ་བའི་ཚེས་དགུ་ལ་རྫོགས་པར་བྲིས་པའོ། །འདིས་ཀྱང་སྤྱིར་རྒྱལ་བའི་བསྟན་པ་རིན་པོ་ཆེ་དང་ཁྱད་པར་དུ་མཐའ་བྲལ་གཞན་སྟོང་གི་ལྟ་གྲུབ་ཕྱོགས་ཐམས་ཅད་དུ་དར་ཞིང་རྒྱས་ལ་ཡུན་རིང་དུ་གནས་པར་གྱུར་ཅིག ། །།སརྦ་མངྒ་ལམ།