གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཞང་སྟོན་རྒྱུད་བླའི་འགྲེལ་བ་ལས། ཉན་ཐོས་རྣམས་མ་ཆགས་པའི་དགེ་བ་ལ་ཐར་པའི་རིགས་སུ་འདོད་དེ། མཛོད་དུ། མ་ཆགས་འཕགས་རིགས། ཞེས་སོ། །ཞེས་ཐར་བའི་རིགས་དང་འཕགས་རིགས་དབང་པོའི་ཁྱད་པར་རིགས་སུ་གསུངས་པ་རྣམས་ཀྱི་ཁྱད་པར་དང༌། དེའི་ལུགས་ལ་རིགས་ཡིན་ན་མ་ཆགས་པ་ཡིན་པས་ཁྱབ་པ་ཡོད་མེད་དང༌། ཉན་ཐོས་རྣམས། ཞེས་གསུངས་པ་སོགས་ལ་བརྟག་དགོས་སོ། །ཉ་ཊཱིཀ་ལས། མདོ་སྡེ་བ། སྐྱེ་མཆེད་དྲུག་གི་ཁྱད་པར་སྒྲིབ་པ་སྤང་རུང་ལ་འདོད་དེ། བསྡུ་བར། སྒྲིབ་པ་གཉིས་ཀ་སྤང་དུ་མི་རུང་ན་རིགས་ཆད། ཉོན་སྒྲིབ་ཙམ་སྤང་དུ་རུང་ན་ཉན་རང་གི་རིགས། གཉིས་ཀ་སྤང་དུ་རུང་ན་སངས་རྒྱས་ཀྱི་རིགས། ཞེས་གསུངས་བ་ནི་དཔྱད་དགོས་སོ། །ཞེས་གསུངས་པ་རང་ལུགས་འཐད་པ་མིན་ནམ་དཔྱད། ཉ་ཊཱིཀ་ལས། འདིས་ནི་སྐྱེ་མཆེད་དྲུག་གི་ཆོས་ཉིད་གདོད་ནས་གནས་པའི་རང་བཞིན་འོད་གསལ་དེ་ཉིད་རང་བཞིན་དུ་གནས་པའི་རིགས་ཡིན་པར་བསྟན་པའོ། །ཞེས་པའི་སྐྱེ་མཆེད་ཕྱི་ནང་གི་སྐྱེ་མཆེད་གང་ཡིན་དཔྱད་དགོས་ཏེ། རྒྱུད་བླའི་འགྲེལ་བ་བཀའ་ཐ་མའི་གསལ་བྱེད་ལས། སྐྱེ་མཆེད་དྲུག་གི་ཁྱད་པར་ཞེས་པ་ཡིད་ཀྱི་སྐྱེ་མཆེད་དུ་འདོད་པ་ཡང་དཔྱད་དགོས་ཏེ། ཆོས་ཉིད་ཀྱིས་ཐོབ་པ་ཞེས་གསུངས་པས་སོ། །དེས་ན་ཕྱིའི་སྐྱེ་མཆེད་ཆོས་ཀྱི་ཁྱད་པར་དུ་ཤེས་པར་བྱའོ། །ཞེས་གསུངས་པས་སོ། །ཡང་ཞང་སྟོན་རྒྱུད་བླའི་འགྲེལ་བ་ལས། ཡོན་ཏན་སྒྲོལ་ཞིང་འབྱུང་བའི་གཞིའམ་ས་བོན་ནི་རིགས་ཀྱི་དོན་ཡིན་ལ། དབྱེ་ན་རྟེན་རང་བཞིན་གྱི་རིགས་ཆོས་དབྱིངས་དྲི་བཅས་དང༌། བརྟེན་པ་རྒྱས་པའི་རིགས་དགེ་བའི་རྐྱེན་ཡང་དག་པར་བླངས་པའོ། །ཞེས་པ་ལྟར་ན་རྒྱས་འགྱུར་གྱི་རིགས་ལ་བག་ཆགས་ཞིག་ཡོད་དམ་ཅི་ཡོད་ན་དེ་དགེ་བ་ཡིན་དགོས་ཏེ། ཉ་ཊཱིཀ་ལས། མཚན་ཉིད་ནི། བྱང་ཆུབ་ཀྱི་རྒྱུར་གྱུར་བའི་དགེ་བ་འདུས་བྱས་སོ། །ཞེས་གསུངས་སོ། །འདོད་མི་ནུས་ཏེ། བག་ཆགས་ལུང་མ་བསྟན་དགོས་པའི་ཕྱིར་ཏེ། ཐེག་བསྡུས་ཀྱི་འགྲེལ་པར། དགེ་མི་དགེ་གཉིས་ཀར་མི་གསལ་བ་སྟེ་ལུང་མ་བསྟན་པའོ། །ཞེས་དང༌། ཀུན་བཏུས་ས་འགྲེལ་ལས། རང་ལུགས་ནི། འཇོག་བྱེད་དགེ་མི་དགེ་ལུང་མ་བསྟན་གང་གིས་བཞག་ཀྱང་བག་ཆགས་ནི་ལུང་མ་བསྟན་ཉིད་ཡིན་ཏེ། ཀུན་གཞི་ལུང་མ་བསྟན་དང་རྫས་གཅིག་པའི་ཕྱིར་རོ། །ཞེས་གསུངས་པའི་ཕྱིར་ཟེར་ན་དེ་ལ་ཡང་དཔྱད་པར་བྱ་བ་འདི་ཡོད་དེ། ལམ་རིམ་བདུད་རྩིའི་ཉིང་ཁུ་ལས། དེའི་ཕྱིར་མི་དགེ་བ་བཅུ་སྤོང་བའི་སེམས་པ་ས་བོན་དང་བཅས་པ་ནི་དགེ་བ་བཅུའོ། །ཞེས་གསུངས་པས་སོ། །ཡང་རིགས་གཉིས་ཀ་ཉ་ཊཱིཀ་ལས། དང་པོ་རྒྱུར་ཡོད་བསྐྱེད་པའི་འབྲས་བུར་མེད། ཕྱི་མ་གཉིས་ཀའོ། །ཞེས་གསུངས་པ་ལ། ཞང་སྟོན་རྒྱུད་བླའི་འགྲེལ་བ་ལས། གཉིས་ཀ་ཡང་རྒྱུའི་དངོས་པོར་ཡོད་ལ་འབྲས་བུའི་དངོས་པོར་མེད་པའོ། །ཞེས་གསུངས་པས་དཔྱད། ཡང་དབང་པོ་རྣོ་རྟུལ་གྱི་སྒོ་ནས་ཕྱིར་མི་ལྡོག་གི་རྟགས་ཐོབ་ཚུལ་ལ་ཀུན་བཏུས་ས་འགྲེལ་ལས། དབང་པོ་རྣོན་པོས་རྫོགས་པའི་བྱང་ཆུབ་ལས་ཕྱིར་མི་ལྡོག་པའི་རྟགས་ཐོབ་པ་ལ་སོགས་པའོ། །ཞེས་དང༌། ཉ་ཊཱིཀ་ལས། བྱང་སེའི་ལ་དབང་བོ་རྣོ་འབྲིང་རྟུལ་གསུམ་ལས། རྣོ་ན་སྦྱོར་ལམ་ནས་ངེས་ཏེ། འགྲེལ་ཆེན་ལས། ལ་ལ་རིགས་མ་ངེས་པ་ཡིན་ཀྱང་དབང་བོ་རྣོ་བས་ངེས་པར་འབྱེད་པའི་ཆ་དང་མཐུན་པའི་གནས་སྐབས་སུ་ཐབས་ཀྱི་ཁྱད་པར་བསམ་གྱིས་མི་ཁྱབ་པས་ཕྱིར་མི་ལྡོག་པ་ཉིད་དུ་ངེས་པ་ཡིན་ནོ། །ཞེས་སོ། །ཚོགས་ལམ་མན་ཕལ་ཆེར་མ་ངེས་ཤིང་ངེས་པའང་མང་པོ་ཡོད་དོ། །དབང་འབྲིང་མཐོང་ལམ་ནས་ངེས་དེ་མན་མ་ངེས་ཏེ།ཐུབ་དགོངས་སུ། དབང་བོ་འབྲིང་ནི་རབ་ཏུ་དགའ་བར་ཕྱིར་མི་ལྡོག་སྟེ། ཇི་སྲིད་ས་རབ་ཏུ་དགའ་བ་མ་ཐོབ་ཀྱི་བར་དུ་ངེས་པ་དང་ལྡན་པ་མ་ཡིན་ཏེ། ཞེས་སོ། །དབང་རྟུལ་ནི་ས་བརྒྱད་པ་ནས་ངེས་ཏེ། དེ་ཉིད་དུ། དབང་བོ་རྟུལ་བོ་ནི་ས་མི་གཡོ་བ་ལ་ཕྱིར་མི་ལྡོག་སྟེ། ས་བརྒྱད་པ་ལ་ཐམས་ཅད་ངེས་པ་ཉིད་ཀྱིས་ཕྱིར་མི་ལྡོག་པ་ཉིད་དུ་རྣམ་པར་བཞག་གོ །ཞེས་སོ། །བདུན་པ་མན་མ་ངེས་ཏེ། རྡོ་རྗེ་རྩེ་མོ་ལས། ཇི་སྲིད་ས་བརྒྱད་མ་ཐོབ་པ། །དེ་སྲིད་ཐེག་པ་དམན་པས་འཇིགས། །ཞེས་དང༌། དཔའ་བོས་ཕར་ཕྱིན་བསྡུས་པར། ཡིད་ནི་མཆོག་ཏུ་གཡོ་བས་ལྡོག །དེ་ཕྱིར་དེ་ལ་དབུགས་མ་བྱུང༌། །ས་བཞིན་གཡོ་མེད་མ་ཐོབ་པར། །བརྟན་མེད་མི་གཡོའི་ས་རྟོགས་དཀའ། །ཞེས་སོ། །ཞེས་གསུངས་པ་ལ་དབང་པོ་རྣོ་འབྲིང་རྟུལ་གསུམ་ལ་རིམ་བཞིན་སྦྱོར་ལམ་དང་མཐོང་ལམ་དང་ས་བརྒྱད་པར་ཕྱིར་མི་ལྡོག་ཏུ་ངེས་པར་གསུངས་པ་ལ་དཔྱད་པར་བྱ་བ་འདི་ཡོད་དེ། ཉ་ཊཱིཀ་ལས། ཡང་ཐེག་ཆེན་ཆོས་མཆོག་འབྲིང་གི་རྣལ་འབྱོར་པ་ཆོས་ཅན། ཁྱོད་ལ་འདས་ད་ལྟར་གྱི་སངས་རྒྱས་རྣམས་ཀྱིས་སངས་རྒྱས་འཐོབ་པར་ལུང་སྟོན་པར་མཛད་དེ། གཟུང་བར་མ་ཟད་འཛིན་པའི་རྣམ་གཡེང་ཞི་བའི་ཆོས་ཉིད་ལ་ཡང་དག་པར་ཞུགས་པའི་ཆོས་མཆོག་གི་ཏིང་ངེ་འཛིན་དང་ལྡན་པ་སྟེ་རྒྱུད་ལ་ཡོད་བཞིན་པའི་སྐྱེས་བུ་ཡིན་པས་སོ། །ཁྱབ་པ་ཡོད་དེ། དེ་ཡིན་ན། དེ་ལྟར་མཛད་པ་འདི་ནི་རྟེན་འབྲེལ་གྱི་ཆོས་ཉིད་ཡིན་ནོ། །ཞེས་དེ་འདྲའི་ཆོས་མཆོག་འབྲིང་གི་རྣལ་འབྱོར་ལ་སངས་རྒྱས་འཐོབ་པར་ལུང་སྟོན་པར་གསུངས་པ་དང༌། ལམ་རིམ་བདུད་རྩིའི་ཉིང་ཁུ་ལས།དེ་ནས་ཆོས་ཉིད་མངོན་སུམ་དུ་རྟོགས་པའི་ཡེ་ཤེས་སྐྱེ་བར་འགྱུར་ཏེ། དེ་ནས་བདེ་བ་ནས་བདེ་བ་སྤྱོད་པ་འབའ་ཞིག་གོ །ཞེས་མཐོང་ལམ་ནས་བདེ་བ་ནས་བདེ་བར་འགྲོ་བ་ཁོ་ན་ཡིན་པར་གསུངས་པ་དང༌། མདོ་ལུགས་མར་ཕྱིར་མི་ལྡོག་པའི་རྟགས་བཤད་སྐབས་དབང་པོའི་སྒོ་ནས་ཁྱད་ཡོད་པར་མ་གསུངས་པའི་ཕྱིར་རོ། །ཡང་ཉ་ཊཱིཀ་ལས། ས་བཅུ་བར། བྱང་སེ་ས་བརྒྱད་པ་བ་སངས་རྒྱས་ཀྱིས་མ་བསྐུལ་ན་མྱང་འདས་སུ་ལྟུང་བར་བཤད་པ་ནི། ཐེག་དམན་དུ་ལྟུང་བ་དངོས་མིན་གྱི་དགོངས་པ་ཅན་གྱི་མྱང་འདས་ཏེ་དགོངས་གཞི་དུས་རེ་ཞིག་སེམས་ཅན་གྱི་དོན་རྒྱུན་ཆད་པ་ཙམ་མོ། ཞེས་དེའི་དགོངས་གཞི་ས་བརྒྱད་པའི་རྒྱུད་ལ་འཇོག་པ་ཡིན་མིན་དཔྱད། ཡང་དབུ་མའི་མན་ངག་ལས། རང་བཞིན་རིགས་ལ་སད་དང་མ་སད་མེད། །དེ་ཡོད་རྒྱུ་མཚན་རྒྱས་འགྱུར་སྐྱེ་བ་ལ། །དེ་ཡང་སད་ཅེས་རྣམ་བཞག་བྱས་པ་ཙམ། །འདི་འཕེལ་དེ་ཡང་འཕེལ་བའི་ཐ་སྙད་བཏགས། །ཞེས་གསུངས་པ་མི་འཐད་པར་ཐལ། ཉ་ཊཱིཀ་ལས། རང་བཞིན་རིགས་སད་པ་རྒྱས་རིགས་ཡོད་པའི་རྟགས་སོ། །ཞེས་གསུངས་པའི་ཕྱིར་ཞེ་ན་མ་ཁྱབ་སྟེ། རང་བཞིན་གྱི་རིགས་སད་པའི་རྣམ་བཞག་བྱས་པ་རྒྱས་རིགས་སད་པའི་རྒྱུ་མཚན་གྱིས་ཡིན་པར་སྣང་ངོ༌། །ཡང་ཉ་ཊཱིཀ་ལས། རྒྱས་པའི་རིགས་གཏན་ཆད་པ་ནི་སྲིད་ལ། ཞེས་དང༌། ཐེག་པ་གསུམ་གྱི་མྱང་འདས་ཀྱི་རྒྱུ་རྒྱས་པའི་རིགས་མེད་པ་ནི་རྒྱུ་རིགས་མེད་པ་ཞེས་པ་སྟེ་གཏན་ཡོངས་སུ་མྱ་ངན་ལས་མི་འདའ་བའོ། །ཞེས་དང༌། ཞང་སྟོན་རྒྱུད་བླའི་འགྲེལ་བ་ལས། རིགས་ཆད་བཤད་པ་འདི་ཡང་དབུ་སེམས་ཐུན་མོང་བ་ཡིན་ནོ། །ཞེས་རྒྱས་འགྱུར་གྱི་རིགས་ཆད་པ་མི་འཐད་པར་ཐལ། རང་ལུགས་འཁོར་བ་མཐའ་ཡོད་དུ་འདོད་པའི་ལུགས་ཡིན་པའི་ཕྱིར་ཟེར་ན་ཉ་ཊཱིཀ་གི་ཚིག་ཟིན་ལྟར་ན་རྟགས་མ་གྲུབ་བོ། །ཁྱབ་སྟེ། རྒྱན་གྱི་ས་འགྲེལ་ལས། འཁོར་བ་མཐའ་མེད་དུ་འདོད་པའི་ལུགས་ལ་རྒྱས་འགྱུར་གྱི་རིགས་ཆད་ཡོད་ལ། མཐའ་ཅན་དུ་འདོད་པའི་ལུགས་ལ་རྒྱས་འགྱུར་གྱི་རིགས་ཆད་ཀྱང་མེད་པར་ཤེས་པར་བྱའོ། །ཞེས་གསུངས་སོ། །འཁོར་བ་མཐའ་ཡོད་མེད་སྐབས་གཉིས་པར་སླར་དཔྱད་པར་བྱའོ། །ཡང་མངོན་པ་ཀུན་བཏུས་ལས། གང་ཞིག་གང་ལས་སྤོང་ཞེ་ན། འདས་པ་ནི་འགག་པའི་ཕྱིར་མ་ཡིན། མ་འོངས་པ་ནི་མ་སྐྱེས་པའི་ཕྱིར་མ་ཡིན། ད་ལྟར་བྱུང་བ་ནི་ལམ་དང་མཉམ་དུ་མི་འཇུག་པའི་ཕྱིར་མ་ཡིན། འོན་ཀྱང་ཉོན་མོངས་པའི་གནས་ངན་ལེན་གང་ལ་ཡོད་པ་དེ་ལས་སྤང་ངོ་གནས་ངན་ལེན་གྱི་རྣམ་པ་གང་གི་གཉེན་པོ་གང་རུང་བ་གཉེན་པོའི་རྣམ་པ་དེ་བྱུང་བ་དང་གནས་ངན་ལེན་གྱི་རྣམ་པ་དེ་འགོག་པ་ནི་མཉམ་པས་མཉམ་སྟེ། དཔེར་ན་སྣང་བ་དང་མུན་པ་འབྱུང་བ་དང་འགག་པ་བཞིན་ནོ། །ཞེས་དང༌། ཀུན་བཏུས་ས་འགྲེལ་ལས། མངོན་གྱུར་སྤོང་བ་མིན་ཚུལ་ནི། ཉོན་མོངས་མངོན་གྱུར་འདས་པ་ནི་འགགས་ནས་སྤང་རྒྱུ་མེད་པའི་ཕྱིར་སྤོང་བ་མ་ཡིན་ནོ། །མ་འོངས་པ་ནི་མ་བྱུང་ཞིང་མ་སྐྱེས་པ་ལ་ངོ་བོ་མེད་པའི་ཕྱིར་སྤོང་བ་མ་ཡིན་ནོ། །ད་ལྟར་འབྱུང་བ་ནི་གཉེན་པོ་ལམ་དང་དུས་མཉམ་དུ་ཤེས་རྒྱུད་གཅིག་ལ་མི་འཇུག་པའི་ཕྱིར་སྤོང་བ་མ་ཡིན་ནོ། །ས་བོན་ཇི་ལྟར་སྤོང་ཚུལ་ནི། མངོན་གྱུར་ལས་མི་སྤོང་བ་འོན་ཀྱང་ཉོན་མོངས་པའི་གནས་ངན་ལེན་ས་བོན་གང་ཡིན་པ་དེ་ལས་སྤོང་ངོ༌། །དེའང་མཐོང་སྤང་དང་སྒོམ་སྤང་གི་ས་བོན་ནམ་གནས་ངན་ལེན་གྱི་རྣམ་པ་གང་གི་གཉེན་པོ་མཐོང་ལམ་དང་སྒོམ་ལམ་གང་བྱུང་ན། གཉེན་པོའི་རྣམ་པ་མཐོང་ལམ་སྐད་ཅིག་དང་པོ་ལྟ་བུ་དང་སྒོམ་ལམ་ཆུང་ངུའི་ཆུང་ངུ་ལ་སོགས་པ་དེ་འབྱུང་བ་དང༌། སྤང་བྱ་གནས་ངན་ལེན་གྱི་རྣམ་པར་རང་གི་ངོ་སྐལ་དེ་དག་འགོག་པ་ནི་དུས་མཉམ་པས་སྐྱེ་འགག་མགོ་མཉམ་སྟེ་དཔེར་ན་སྣང་བ་དང་མུན་པ་དག་རིམ་པ་ལྟར་འབྱུང་བ་དང་འགགས་པ་དུས་མཉམ་པ་ཇི་ལྟ་བ་བཞིན་ནོ། །ཞེས་ཉོན་མོངས་མངོན་གྱུར་བ་འདས་པ་དང་མ་འོངས་པ་དང་ད་ལྟ་བ་འཇོག་ཚུལ་དང༌། དེ་དག་སྤང་ཚུལ་ལ་བརྟག་པར་བྱའོ། །ཡང་ཉ་ཊཱིཀ་ལས། ཉན་ཐོས་ཕྱི་རོལ་ལ་ཞེན་པ་བསྟན་པ་ལ་གཞུག་པའི་ཕྱིར་དུ་གཟུགས་སོགས་ཕྱིའི་དོན་ཡོད་པར་བསྟན་པ་ལྟ་བུ་གཞུག་པ་ལ་ལྡེམ་དགོངས་ཏེ། ཉི་ཤུ་པར། གཟུགས་སོགས་སྐྱེ་མཆེད་ཡོད་པར་ནི། །དེས་འདུལ་བ་ཡི་སྐྱེ་བོ་ལ། །དགོངས་པའི་དབང་གིས་གསུངས་པ་སྟེ། །རྫུས་ཏེ་སྐྱེ་བའི་སེམས་ཅན་བཞིན། །ཞེས་གསུངས་པ་ལ། གཞན་སྟོང་དབུ་མའི་རྒྱན་ལས། འཁོར་ལོ་དང་པོར་ཀུན་རྫོབ་གསུངས་པ་ཡང༌། །ཇི་ལྟར་སྣང་བ་དེ་ལ་དེ་ལྟར་གསུངས། །གནས་ལུགས་དཔྱད་པའི་དོན་ལ་བདེན་གྲུབ་ཏུ། །བསྟན་པ་མེད་པས་དེ་ལ་རྫུན་ཚིག་མེད། །ཅེས་གསུངས་པའི་སྒོ་ནས་ཅུང་ཟད་དཔྱད་རྒྱུར་སྣང་ངོ༌། །ཡང་དགོངས་ལྡེམ་དགོངས་ཀྱི་ཁྱད་པར་ལ་ཉ་ཊཱིཀ་ལས། འོ་ན་དགོངས་ལྡེམ་དགོངས་ཀྱི་ཁྱད་པར་ཅི་ཞེ་ན། སྤྱིར་ངོ་བོ་གཅིག་སྟེ་དགོངས་པ་བཞི་གཉེན་པོ་ལ་ལྡེམ་དགོངས་ཀྱི་ནང་ན་སྣང་ཞིང་ལྡོག་ཆའི་ཁྱད་ཡོད་དེ། དགོངས་གཞི་གཙོ་བོར་བྱས་ནས་བསྟན་པའི་ངག་དགོངས་པ་ཅན། སྐབས་ཀྱི་ཚིག་གི་དགོངས་པ་གཙོ་བོར་བྱས་ནས་བསྟན་པའི་ངག་ལྡེམ་དགོངས་ཏེ། ཤེར་ཕྱིན་མན་ངག་ཏུ། དེ་ལ་བརྗོད་པར་འདོད་པའི་དོན་བཤད་པ་ནི་དགོངས་པའོ། །བསྟན་པའི་སྒྲའི་དགོངས་པ་བཤད་པ་ནི་ལྡེམ་པོར་དགོངས་པའོ། །ཞེས་དང༌། མདོ་སྡེ་རྒྱན་ས་འགྲེལ་ལས། དགོངས་པ་དང་ལྡེམ་དགོངས་ཀྱི་ཁྱད་པར་ནི་བཤད་སྦྱར་ལས། དགོངས་པ་ནི་ཡིད་ལ་བཞག་པ་ཙམ་ཡིན་གྱི། ཕ་རོལ་གཟུད་པ་ལ་ལྟོས་པར་ཁས་མི་ལེན་ཏོ། །ལྡེམ་དགོངས་ནི། དེ་ཉིད་ཕ་རོལ་གཟུད་པ་ལ་ལྟོས་པའོ། །ཞེས་འབྱུང་པ་ལྟར་དགོངས་གཞི་ཙམ་ཐུགས་ལ་བཞག་པའི་ཆ་ནས་དགོངས་པ་དང༌། དགོངས་གཞི་དང་དགོངས་པ་གཉིས་ཀ་ཐུགས་ལ་བཞག་པའི་ཆ་ནས་ལྡེམ་དགོངས་སུ་འཇོག་ཅིང༌། ཞེས་པའི་སྐབས་ནས་བསྟན་པའི་དགོངས་ལྡེམ་དགོངས་ཀྱི་ཁྱད་པར་དང༌། དགོངས་གཞི་དང་དགོངས་པ་གཉིས་ཀྱི་ཁྱད་པར་སོགས་ཞིབ་ཏུ་བརྟག་པར་བྱའོ། །ཡང་ཀུན་བཏུས་ས་འགྲེལ་ལས། ལྡེམ་པོར་དགོངས་པ་རྣམ་པར་ངེས་པ་གང་ཞེ་ན། མཚན་ཉིད་ནི། རྗོད་བྱེད་མིང་གི་ཚོགས་དང་ཚིག་གི་ཚོགས་དང་ཡི་གེའི་ཚོགས་རྣམས་ཀྱིས་བརྗོད་བྱའི་དངོས་ཀྱི་དོན་གཞན་དུ་བརྗོད་ལ་དགོངས་པའི་དོན་གཞན་དུ་ཡོངས་སུ་བསྒྱུར་ནས་བཤད་དགོས་པ་སྟེ། ཞེས་ལྡེམ་དགོངས་ལ་ཚིག་གཞན་དུ་བསྒྱུར་དགོས་པ་མི་འཐད་པར་ཐལ། ཉ་ཊཱིཀ་ལས། དྲང་ངེས་གཉིས་ཀ་ཡོད་དེ། ངེས་དོན་ནི། གཉེན་པོའི་ལྡེམ་དགོངས་གཉིས་པ་དང་བརྒྱད་པ་ལྟ་བུའོ་གསུངས་སོ། །འདི་ལེགས་ཏེ་ཐེག་བསྡུས་སུ། དགོངས་པ་བཞི་དང་ལྡེམ་པོར་དགོངས་པ་བཞིས་སངས་རྒྱས་ཀྱི་གསུང་ཐམས་ཅད་ཁོང་དུ་ཆུད་པར་བྱའོ། །ཞེས་དང༌། མཚན་ཉིད་ལ་ལྡེམ་པོར་དགོངས་པ་ནི། གང་དུ་ཆོས་ཀྱི་མཚན་ཉིད་བསྟན་པས་ངོ་བོ་ཉིད་གསུམ་པོ་དག་སྟོན་པའོ། །གཉེན་པོ་ལ་ལྡེམ་པོར་དགོངས་པ་ནི། གང་དུ་སྤྱོད་པ་བརྒྱད་ཁྲི་བཞི་སྟོང་གི་གཉེན་པོ་བསྟན་པའོ། །ཞེས་པས་དེ་ཁོ་ན་ལྟར་ཡིན་ནོ། །ཞེས་གསུངས་པའི་ཕྱིར་ཟེར་ན་དཔྱད་དོ། །ཡང་སྒྲས་ཟིན་སྒྲ་ཇི་བཞིན་མ་ཡིན་ཀྱང་ངེས་དོན་གྱི་མདོ་ཞིག་ཡོད་པར་ཐལ།ཀུན་བཏུས་ས་འགྲེལ་ལས། དེ་དག་ལ་འགའ་ཞིག་དགོངས་པ་དང་ལྡེམ་དགོངས་ཀྱིས་གསུངས་པ་ཐམས་ཅད་དྲང་དོན་ཡིན་ཞིང་དེའང་དོན་ལ་མི་གནས་པའི་བརྫུན་པ་འབའ་ཞིག་གོ་སྙམ་དུ་སེམས་ན། དེ་ལྟར་ཡང་མི་བསམ་སྟེ། གནས་སྐབས་སུ་དགོས་པའི་དབང་གིས་སྒྲའི་དངོས་ཀྱི་བརྗོད་བྱ་དྲང་དོན་ཡིན་ཡང་མཐར་ཐུག་དགོངས་གཞི་དོན་ལ་གནས་པའི་ཆ་ནི་ངེས་དོན་ཡིན་པའི་ཕྱིར་རོ། །དཔེར་ན་ང་ཉིད་དེའི་ཚེ་སངས་རྒྱས་རྣམ་པར་གཟིགས་སུ་གྱུར་ཏོ་ཞེས་པའི་སྒྲས་དངོས་སུ་དྲང་དོན་སྟོན་ཡང༌། དགོངས་གཞི་ཆོས་ཀྱི་སྐུ་མཉམ་པ་ཉིད་དུ་དོན་ལ་གནས་པ་ནི་ངེས་དོན་ཡིན་པ་ལྟ་བུའོ། །ཞེས་གསུངས་པའི་ཕྱིར་ཞེ་ན་དཔྱད་པར་བྱའོ། །རྟོག་པའི་ཆོས་དྲུག་ལ་སྦྱོར་ལམ་བཞི་དང༌། མཐོང་སྒོམ་གཉིས་དང་དྲུག་བཞག་དགོས་ཏེ། ཉ་ཊཱིཀ་ལས། མཐོང་ལམ་གྱི་རྟོགས་པའི་སྟེ། དེ་པའི་གཟུགས་ལ་གནས་མེད་ཅེས་སོགས་སྒོམ་ལམ་གྱི་རྟོགས་པའི་སྟེ། ཞེས་གསུངས་པའི་ཕྱིར་ཞེ་ན་མ་ཁྱབ་སྟེ། དེ་ལྟར་བཤད་པ་དེ་ཉི་ཁྲི་དག་ལྡན་གྱི་ལུགས་ཡིན་པར་སྣང་སྟེ། དེའི་མཇུག་ཏུ་ཉ་ཊཱིཀ་ལས། དེ་དྲུག་དོན་དམ་པ་རྟོགས་པས་རྟོགས་པ་སྟེ་ཞེས་དག་ལྡན་ནོ། །ཞེས་གསུངས་སོ། །ཡང་རྩ་བར། ཆོས་ཀྱི་དབྱིངས་ལ་དབྱེར་མེད་ཕྱིར། །ཞེས་སོགས་ཀྱིས་ཆོས་དབྱིངས་རིགས་ཡིན་ན་ཐེག་པ་གསུམ་གྱི་རིགས་ཐ་དད་མི་རུང་བར་རྩོད་པ་ཡིན་པར་ཐལ། ཉ་ཊཱིཀ་ལས། སྐབས་འདིར་ཆོས་ཅན། འདི་ནི་ཉན་ཐོས་ཀྱི། འདི་རང་སངས་རྒྱས་ཀྱི། འདི་སངས་རྒྱས་ཀྱི་རིགས་སོ་ཞེས་རིགས་ནི་ཐ་དད་དུ་རུང་བ་མ་ཡིན་པར་ཐལ། ཆོས་དབྱིངས་ཁོ་ན་རང་བཞིན་རིགས་ཡིན་པས་སོ། །ཁྱབ་སྟེ། ཆོས་ཀྱི་དབྱིངས་ལ་ཆར་དབྱེར་མེད་པའི་ཕྱིར་ཞེ་ན། ཞེས་གསུངས་པའི་ཕྱིར་ཞེ་ན། དེ་མི་འཐད་པར་ཐལ། ཆོས་དབྱིངས་རིགས་ཡིན་ན་རིགས་བཅུ་གསུམ་མི་འཐད་པར་རྩོད་པ་ཡིན་པའི་ཕྱིར་ན་མ་ཁྱབ་སྙམ། རྟགས་གྲུབ་སྟེ། ལན་གྱི་སྐབས་མདོ་ལུགས་མ་ལས། བྱེ་བྲག་རྟོགས་པའི་ཆོས་དྲུག་འཇུག་པའི་རྟེན། གཉེན་པོ་འཇུག་པའི་རྟེན།སྤོང་བ་འཇུག་པའི་རྟེན་ཞེས་པའི་ཚུལ་དག་གིས་རྟེན་ཆོས་ཉིད་དེའི་དབྱེ་བ་ཡོངས་སུ་བརྗོད་པ་ནི་འགལ་བ་མེད་དོ། །ཞེས་གསུངས་པའི་ཕྱིར། གཉིས་ཀ་གང་བཀོད་ན་འགལ་བ་མེད་པར་སྣང་ངོ༌། །ཡང་ཉ་ཊཱིཀ་ལས། གནས་སྐབས་ཁྱབ་པ་མེད་དེ། དཔེར་ན། ཉེར་ལེན་འཇིམ་པ་གཅིག་ལས་མངོན་པར་གྲུབ་ཅིང་རྐྱེན་མེ་ལྕེ་གཅིག་གིས་སོ་བཏང་བའི་རྟེན་རྫ་བུམ་དང་ལྷུང་བཟེད་ལ་སོགས་པ་གཅིག་ཡང་བརྟེན་པ་ནང་གི་བཅུད་སྦྲང་རྩི་དང་ལི་ཁར་ར་སྟེ་བུ་རམ་དང་མར་དང་ཏིལ་མར་ལ་སོགས་པའི་སྣོད་ཉིད་ཀྱིས་རྟེན་བུམ་པ་ཐ་དད་པར་བཞག་པ་དེ་བཞིན་དུ། བརྟེན་པའི་ཆོས་ཐེག་པ་གསུམ་གྱིས་བསྡུས་པ་རྟོགས་པར་བྱ་བ་ཐ་དད་པའི་བྱེ་བྲག་ཉིད་ཀྱིས་རྟེན་རང་བཞིན་རིགས་ཐ་དད་དམ་དེའི་དབྱེ་བ་ཡོངས་སུ་བརྗོད་ཅིང་བསྟན་ཏོ། །ཞེས་པའི་དཔེ་དོན་སྦྱར་ཚུལ་དཔྱད། ཡང་མདོ་ལུགས་མ་ལས། དེས་ན་ཆོས་དབྱིངས་ཉིད་སྔོན་རྒྱུའི་གནས་སྐབས་ན་རིགས་རྣམ་པ་གཉིས་དང༌། ཕྱིས་འབྲས་བུའི་གནས་སྐབས་ན་སྐུ་རྣམ་པ་གསུམ་དུ་གསུངས་པའི་ཕྱིར་རང་བཞིན་དང་རྒྱས་པའི་རིགས་ཀྱི་དོན་ནི་དེ་ཡིན་ནོ། །སྔོན་རྒྱུའི་ཞེས་པ་ལམ་གྱི་གནས་སྐབས་སོ། །ཞེས་ཆོས་དབྱིངས་སྔོན་རྒྱུའི་གནས་སྐབས་ན་རིགས་གཉིས་ཀ་ཡིན་ཚུལ་ལ་དཔྱད། ཡང་མདོ་ལུགས་མ་ལས། གལ་ཏེ་རང་བཞིན་གྱི་རིགས་ཆོས་ཀྱི་དབྱིངས་ཡིན་པའི་ཕྱིར་བྱང་ཆུབ་སེམས་དཔའ་འབའ་ཞིག་གི་རིགས་ཡིན་པར་མི་འཐད་དོ། །ཞེ་ན། སྐྱོན་མེད་དེ་འདིར་ནི་ཚེ་རབས་གཅིག་ནས་གཅིག་ཏུ་བརྒྱུད་ནས་འོངས་པའི་ཆོས་ཉིད་ངང་གིས་ཐོབ་པ་དེ་ཉིད་བྱང་ཆུབ་སེམས་དཔའ་རྣམས་ཀྱི་སྐྱེ་མཆེད་དྲུག་གི་ཁྱད་པར་ཡིན་ལ། དེ་ཉིད་རང་བཞིན་དུ་གནས་པའི་རིགས་སུ་གསུངས་ཀྱི། ཆོས་ཀྱི་དབྱིངས་ཡོད་པ་ཙམ་ནི་སྐྱེ་མཆེད་དྲུག་གི་ཁྱད་པར་དུ་ཡང་མ་གསུངས་ཤིང་རིགས་མཆོག་ཉིད་དུ་ཡང་མ་གསུངས་པའི་ཕྱིར་དང༌། ཆོས་ཉིད་ཐོབ་པ་ཡང་མ་ཡིན་པའི་ཕྱིར་རོ། །སེམས་ཅན་ཐམས་ཅད་དེ་བཞིན་གཤེགས་པའི་སྙིང་པོ་ཅན་དུ་གསུངས་ཀྱི། སེམས་ཅན་ཐམས་ཅད་རང་བཞིན་གྱི་རིགས་ལ་གནས་པར་མ་གསུངས་པའི་ཕྱིར་དང༌། རང་བཞིན་དུ་གནས་པ་རིགས་ཏེ། སེམས་ཅན་རྣམས་སྐྱེ་མཆེད་དྲུག་གི་ཁྱད་པར་དུ་ཡང་མ་གསུངས་པའི་ཕྱིར་རོ། ། དེས་ན་ཆོས་ཀྱི་དབྱིངས་གཅིག་ཉིད་ལ་ཁྱད་པར་མེད་ཀྱང་བྱང་ཆུབ་སེམས་དཔའ་རྣམས་ལ་རང་བཞིན་གྱི་རིགས་སུ་འགྱུར་བ་དང༌། སེམས་ཅན་གཞན་རྣམས་ལ་མི་འགྱུར་བའི་ཁྱད་པར་ནི་དེ་ཡིན་ནོ། །ཞེས་ཆོས་དབྱིངས་ཡོད་ཙམ་གྱི་སྐྱེ་མཆེད་ཀྱི་ཁྱད་པར་དུ་མ་གསུངས་ཞེས་པ་དང༌། ཆོས་ཉིད་ཐོབ་པ་ཡང་མ་ཡིན། ཞེས་པ་དང༌། ཆོས་དབྱིངས་སེམས་ཅན་གཞན་གྱི་རིགས་སུ་མི་འགྱུར་གསུངས་པ་རྣམས་ཀྱི་དགོངས་པ་ལུང་རིགས་གཉིས་ཀྱི་ལེགས་པར་ཚོལ་དགོས་སོ། །ཡང་ཀུན་མཁྱེན་ཆོས་རྗེའི་ཕར་ཕྱིན་མདོ་ལུགས་མ་ལས། གལ་ཏེ་སེམས་བསྐྱེད་ལ་སོགས་པ་བྱང་ཆུབ་སེམས་དཔའི་ཡོན་ཏན་ཐམས་ཅད་ཀྱི་རྟེན་ཆོས་ཀྱི་དབྱིངས་ཡིན་ན་ཐོག་མར་ཐར་པའི་ས་བོན་དང་དེ་ནས་རིམ་གྱིས་རྣམ་བྱང་གི་བག་ཆགས་ཐམས་ཅད་ཀུན་གཞི་རྣམ་པར་ཤེས་པ་ལ་འཇོག་ཅིང་དེ་ལ་རྟེན་དགོས་པ་མ་ཡིན་ནམ་ཞེ་ན། མ་ཡིན་ཏེ་སྣང་བ་དང་མུན་པའི་རྟེན་གཅིག་ཏུ་མི་རུང་བ་བཞིན་དུ་སྤང་བྱ་དང༌། གཉེན་པོའི་ཆོས་དག་འཇུག་པའི་རྟེན་ཀུན་གཞི་གཉིས་ཡོད་པའི་ཕྱིར་རོ། །ཞེས་དང༌། འགལ་བ་དག་ནི་རྟེན་གཅིག་པར་མི་འཐད་པའི་ཕྱིར་ཏེ། གྲང་བ་དང་དྲོ་བའི་རེག་པ་རྟེན་གཅིག་པར་མི་འཐད་པ་བཞིན་ནོ། །ཞེས་སོགས་གསུངས་པའི་དགོངས་པ་གང་ཡིན་ཞེ་ན། རང་བློ་དང་འཚམས་པར་དེ་དག་གི་དགོངས་པ་འགལ་མེད་དུ་བཤད་ན་འདི་ལྟར་ཡིན་པར་སྣང་སྟེ། ཀུན་མཁྱེན་ཉིད་ཀྱིས་རང་ལུགས་ལ་ཀུན་གཞི་རྣམ་ཤེས་རྣམ་བྱང་གི་བག་ཆགས་བགོ་གཞིར་མི་རུང་བ་ལྟ་བུར་གསུངས་པ་ནི། ཀུན་གཞི་རྣམ་སྨིན་དེ་རྣམ་བྱང་གི་བག་ཆགས་ཀྱི་རྟེན་ཙམ་ཡིན་ཡང་དེ་ཁོ་ན་མ་ཡིན་པར་ཀུན་གཞི་ཡེ་ཤེས་འཇོག་དགོས་པ་དང༌། ཀུན་གཞི་རྣམ་སྨིན་སྤང་བྱ་ཡིན་པས་གཉེན་པོ་རྣམ་བྱང་གོང་ནས་གོང་དུ་འཕེལ་ཞིང་བསྐྱེད་པའི་རྟེན་མི་བྱེད་པ་དང༌། ལྷག་མེད་དགྲ་བཅོམ་པ་སོགས་ཀྱི་རྒྱུད་ལ་ཀུན་གཞི་མཚན་ཉིད་པའམ་རྣམ་སྨིན་གྱི་ཆ་འགག་ཟིན་པས་དེའི་རྒྱུད་ཀྱི་རྣམ་བྱང་གི་བག་ཆགས་བགོ་གཞི་ཀུན་གཞི་རྣམ་སྨིན་གྱི་ཆ་མ་ཡིན་པར་གསུངས་པ་ཡིན་པའི་གནས་སུ་སྣང་སྟེ། ཕར་ཕྱིན་མདོ་ལུགས་མ་ལས། དེས་ན་འཁོར་འདས་གཉིས་ཀའི་བག་ཆགས་ཀུན་གཞི་རྣམ་ཤེས་འབའ་ཞིག་ལ་འཇོག་ན། འཁོར་འདས་གཉིས་ཀའི་ས་བོན་ཡིན་པའི་ཕྱིར་སྤང་བྱའི་ས་བོན་སྤངས་པའི་གནས་གྱུར་མེད་པས་སྤངས་པ་སླར་ལྡོག་པ་དང༌། སངས་རྒྱས་མི་སྲིད་པ་དང༌། སྤང་གཉེན་གྱི་ས་བོན་སོ་སོར་ངེས་པ་མེད་པ་ལ་སོགས་པར་ཧ་ཅང་ཐལ་བས་གནོད་དོ། །ཞེས་གསུངས་པའི་ཕྱིར་རོ། །གཞན་ཡང་མདོ་ལུགས་མར་ཀུན་གཞི་རྣམ་ཤེས་རྣམ་བྱང་གི་བག་ཆགས་བགོ་གཞི་མ་ཡིན་པ་ལྟ་བུར་གསུངས་པའི་དགོངས་པ་ནི། ཀུན་གཞི་རྣམ་ཤེས་ནི་རྣམ་བྱང་ཐོས་སོགས་ཀྱི་བག་ཆགས་ཀྱི་ངོ་བོ་ཉིད་ཀྱི་རྟེན་ནམ་མེ་དང་ཚ་བ་བཞིན་ངོ་བོ་དབྱེར་མེད་པའི་རྟེན་བརྟེན་པ་མ་ཡིན་པར་གསུངས་པ་ཡིན་པར་སྣང་སྟེ། ཕར་ཕྱིན་མདོ་ལུགས་མར་ཐེག་བསྡུས་ཀྱི་ལུང་དྲངས་བ་འདི་ལྟ་སྟེ། ཇི་སྐད་དུ། ཐོས་པའི་བག་ཆགས་གང་ཡིན་པ་དེ་ཡང་ནི། ཀུན་གཞི་རྣམ་པར་ཤེས་པའི་ངོ་བོ་ཉིད་ཡིན་ནམ། འོན་ཏེ་མ་ཡིན།གལ་ཏེ་ཀུན་གཞི་རྣམ་པར་ཤེས་པའི་ངོ་བོ་ཉིད་ཡིན་ན་ནི། ཇི་ལྟར་དེའི་གཉེན་པོའི་ས་བོན་དུ་རུང༌། ཅི་སྟེ་དེའི་ངོ་བོ་ཉིད་མ་ཡིན་ན་ནི། དེས་ན་ཐོས་པའི་བག་ཆགས་ཀྱི་གནས་ཅི་ཞིག་ཡིན་པར་བལྟ་ཞེ་ན། སངས་རྒྱས་རྣམས་ཀྱི་བྱང་ཆུབ་ལ་བརྟེན་ནས་ཐོས་པའི་བག་ཆགས་སུ་གྱུར་པ་གང་ཡིན་པ་གནས་གང་ལ་འཇུག་པ་དེ། ལྷན་ཅིག་འདུག་པའི་ཚུལ་གྱིས་རྣམ་པར་སྨིན་པའི་རྣམ་པར་ཤེས་པ་ལ་འཇུག་སྟེ། འོ་མ་དང་ཆུ་བཞིན་ནོ། །དེ་ནི་ཀུན་གཞི་རྣམ་པར་ཤེས་པ་ལ་མ་ཡིན་ཏེ། དེའི་གཉེན་པོའི་ས་བོན་ཉིད་ཡིན་པའི་ཕྱིར་རོ། །ཞེས་དང༌། ཀུན་གཞི་རྣམ་པར་ཤེས་པའི་གཉེན་པོ་ཡིན་པས་ཀུན་གཞི་རྣམ་པར་ཤེས་པའི་ངོ་བོ་ཉིད་མ་ཡིན་པ་དང༌། ཞེས་དང༌། ཇི་ལྟར་ཀུན་གཞི་རྣམ་པར་ཤེས་པ་དང་ཀུན་གཞི་རྣམ་པར་ཤེས་པ་མ་ཡིན་པ་ཆུ་དང་འོ་མ་བཞིན་དུ་ལྷན་གཅིག་གནས་པ་རྣམ་པ་ཐམས་ཅད་དུ་འགྲིབ་པར་ཇི་ལྟར་འགྱུར་ཞེ་ན། ངང་བས་ཆུ་ལས་འོ་མ་འཐུངས་བ་དང༌། འཇིག་རྟེན་པའི་འདོད་ཆགས་དང་བྲལ་བ་ནས་མཉམ་པར་བཞག་པ་མ་ཡིན་པའི་བག་ཆགས་འགྲིབ་སྟེ། མཉམ་པར་བཞག་པའི་བག་ཆགས་འཕེལ་ནས་གནས་འགྱུར་བ་བཞིན་ནོ། །ཞེས་གསལ་བར་གསུངས་པས་དེ་ལྟར་ཤེས་པར་བྱའོ། །དེ་ལྟར་མ་ཡིན་ན་ཀུན་གཞི་རྣམ་ཤེས་དང་ཡེ་ཤེས་རེ་རེ་ནས་འཁོར་འདས་གཉིས་ཀའི་གཞི་མ་ཡིན་དགོས་ཀྱང་དེ་མི་རིགས་ཏེ། ཆོས་མངོན་པའི་མདོ་ལས། ཐོག་མ་མེད་པའི་དུས་ཀྱི་དབྱིངས། ། ཆོས་རྣམས་ཀུན་གྱི་གནས་ཡིན་ཏེ། །དེ་ཡོད་པས་ན་འགྲོ་ཀུན་དང༌། །མྱ་ངན་འདས་པ་ཐོབ་པར་འགྱུར། །ཞེས་དང༌། ཆོས་ཀྱི་ཤན་འབྱེད་ལས།ཆོས་ཉིད་ལ་སོགས་པའི་རྣམ་གྲངས་མང་པོ་ཅན་གྱི་བདེ་གཤེགས་སྙིང་པོ་དེ་བཞིན་ཉིད་གང་ཡིན་པ་དེ་ཉིད་ཆོས་ཐམས་ཅད་ཀྱི་གཞི་ཡིན་པའི་ཕྱིར། ཞེས་དང༌། ཀུན་བཏུས་ས་འགྲེལ་ལས། དེ་ཡང་ཀུན་གཞིའི་རྣམ་པར་ཤེས་པ་ནི་ཉོན་མོངས་པའི་བག་ཆགས་ཀྱི་རྟེན་ཡིན་པས་འཁོར་བའི་གཞི་བྱེད་ཅིང༌། ཐོས་སོགས་དགེ་བའི་བག་ཆགས་ཀྱི་རྟེན་ཡིན་པས་མྱ་ངན་ལས་འདས་པའི་གཞིའང་བྱེད་པའི་ཕྱིར་དང༌། ཀུན་གཞི་དེ་བཞིན་གཤེགས་པའི་སྙིང་པོ་ནི་གློ་བུར་གྱི་དྲི་མའི་རྟེན་ཡིན་པས་འཁོར་བའི་གཞིར་ཡང་གསུངས་ཤིང༌། དེ་ཉིད་དྲི་མ་དང་བྲལ་ཙམ་གྱིས་རྣམ་པར་གྲོལ་བ་ཐོབ་པས་ན་མྱ་ངན་ལས་འདས་པའི་གཞི་མཐར་ཐུག་པ་ཉིད་ཡིན་པའི་ཕྱིར་རོ། །ཞེས་དང༌། ཐེག་མཆོག་དབུ་མ་ལས། འཁོར་དང་ལམ་གྱི་གཞིར་གྱུར་ཀུན་གཞི་སྟེ། །ཞེས་དང༌། དེའི་ཐད་ཀྱི་ཟིན་བྲིས་ལས། འཁོར་འདས་གཉིས་གྱི་གཞིར་གྱུར་པ་ཡིན་ལ། ཞེས་དང༌། འདི་ལ་འགའ་ཞིག་ཏུ་ཀུན་ནས་ཉོན་མོངས་པ་དང༌། རྣམ་པར་བྱང་བ་ཟག་པ་དང་བཅས་པ་རྣམས་ཀྱི་གནས་ཞེས་ཟག་པ་མེད་པའི་ཆོས་ཀྱི་གནས་མ་ཡིན་པར་བཤད་མོད་ཀྱང་རང་ལུགས་ལ་ཟག་མེད་ལམ་གྱི་བདེན་པ་རྣམས་ཀྱི་གནས་ཡིན་པས་ན། འདུས་བྱས་ཀྱི་ཆོས་ཐམས་ཅད་ཀྱི་གནས་ཡིན་ལ། དེ་ལྟ་མ་ཡིན་ན་མྱ་ངན་འདས་པ་ཐོབ་པར་འགྱུར། ཞེས་གསུངས་པ་འབྲེལ་མེད་དུ་འགྱུར་རོ། ། ཞེས་དང༌། ཟག་པ་མེད་པའི་ས་བོན་ནི། ཀུན་གཞི་རྣམ་ཤེས་ཀྱི་སྟེང་དུ་བཞག་པ་ཡིན་ལ། ཞེས་གསུངས་པའི་ཕྱིར་རོ། །སྐབས་འདིར་ཀུན་བཏུས་ས་འགྲེལ་ལས། ཐེག་བསྡུས་སུ་ཟག་མེད་ཀྱི་ས་བོན་ཐོས་པའི་བག་ཆགས་ཀུན་གཞི་མ་ཡིན་པར་ཆུ་དང་འོ་མ་དཔེར་བྱས་ནས་གསུངས་པ་ནི་ཀུན་གཞིའི་ལྡོག་པ་མ་ཡིན་པ་ལ་དགོངས་པའོ། །ཞེས་པའི་དོན་ལ་བརྟག་དགོསསོ། ། ཆོས་དབྱིངས་དེ་རིགས་དང་གཞི་དང་རྒྱུ་ཡིན་པར་རྣལ་འབྱོར་ཅན་གྱི་བློ་ལ་འཆར་ཚུལ་ཡིན་པར་གསུངས་ཏེ། ཐེག་མཆོག་དབུ་མ་ལས། རྣལ་འབྱོར་ཅན་གྱི་བློ་དང་གོ་བསྟུན་ནས། །དེ་ནི་རིགས་ཡིན་དེ་ནི་ཁམས་ཀྱང་ཡིན། །ཐོག་མེད་དུས་ནས་བརྒྱུད་དེ་འོངས་པ་དང༌། །ཆོས་ཉིད་ཀྱིས་ཐོབ་སྐྱེ་མཆེད་དྲུག་གི་ཆོས། །དེ་འདྲ་བ་ཞེས་ཁྱད་ཆོས་གསུམ་ལྡན་པར། །གསུངས་དང༌། ཞེས་དང༌། དེའི་ཟིན་བྲིས་ལས། ངེས་པར་ན་དོན་དམ་དབྱིངས་དེ་འཁོར་འདས་གཉིས་ཀྱི་རྟེན་ལ་སོགས་པ་ཡིན་རྒྱུ་མེད་ཀྱང་རྣལ་འབྱོར་ཅན་གྱི་བློ་ངོར་དང་བསྟུན་ནས་རྟེན་དང་གཞི་དང་རྒྱུ་དང་རིགས་ཞེས་རྣམ་པར་བཞག་པའི་རྣལ་འབྱོར་ཅན་གྱི་བློ་ལ་སྣང་ཚུལ་ཙམ་ཡིན་ནོ། །ཞེས་གསུངས་སོ། །འོ་ན་ཁྱད་པར་གསུམ་ལྡན་གྱི་རང་བཞིན་གནས་རིགས་ཆོས་ཅན། ཆོས་ཉིད་མ་ཡིན་པར་ཐལ། སྣང་ཚུལ་གྱི་དབང་དུ་བྱས་པ་ཡིན་པའི་ཕྱིར། རྟགས་ཁས་ཟེར་ན་རྣམ་དཔྱོད་དང་ལྡན་པ་རྣམས་ཀྱིས་སླར་དཔྱད་པར་བྱའོ། །

སྨྲས་པ། འཁོར་འདས་ཀུན་གྱི་གཞི་དབྱིངས་རང་བཞིན་རིགས། །ཐོས་སོགས་ཡང་དག་བླངས་པའི་རྒྱས་བྱུང་རིགས། །དེར་བརྟེན་བླ་ན་མེད་པའི་བྱང་ཆུབ་ལ། །འབད་པར་རིགས་སོ་རྣམ་གྲོལ་དོན་གཉེར་ཚོགས། །ཞེས་བར་སྐབས་ཀྱི་ཚིགས་སུ་བཅད་པའོ། །དེ་ཡན་གྱིས་རིགས་བཤད་ཟིན་ཏོ།། །།