གསུམ་པ་ཕན་ཚུན་ཁྱད་པར་གྱི་དོན་ལ་གསུམ།

གསུམ་པ་ཕན་ཚུན་ཁྱད་པར་གྱི་དོན་ལ་གསུམ་ལས།

དང་པོ་གང་ལ་ནོད་པ་ཡུལ་གྱི་ཁྱད་པར་རོ། །དེ་ལ་གསུམ་ལས། ༡མཁན་པོའི་ཁྱད་པར་ནི་མཁན་པོ་ཕམ་པ་བཞིས་མ་གོས་ཤིང་བསྙེན་པར་རྫོགས་ནས་ལོ་བཅུ་ལོན་པ་དགོས་པ་ལ། མཁན་མོ་ཕམ་པ་བརྒྱད་ཀྱིས་མ་གོས་ཤིང་བསྙེན་པར་རྫོགས་ནས་ལོ་བཅུ་གཉིས་ལོན་པ་དགོས་ཏེ། དོན་ལ་ནི་མཁན་པོ་ཡང་ཕམ་པ་བརྒྱད་ཀྱིས་མ་གོས་པ་ཉིད་ཡིན་ནོ། །ཐུན་མོང་མ་ཡིན་པའི་ཕམ་པ་བྱུང་ནས་མཚན་གྱུར་པའི་དགེ་སློང་ཕ་ནི་ཕམ་པ་ལས་གྲོལ་བ་ཡིན་པ་གཏམ་གྱི་གཞི་ལས་སོ། །༢སློབ་དཔོན་གྱི་ཁྱད་པར་ནི། དགེ་སློང་དང་དགེ་སློང་མའི་སྡོམ་པ་ནོད་པའི་སྐབས་སུ་རིམ་བཞིན་དགེ་སློང་བྱེད་པ་ལ་ལས་བྱེད་པའི་དགེ་སློང་གཅིག་དགོས་པ་དང་དགེ་སློང་མ་བྱེད་པ་ལ་ལས་བྱེད་པའི་དགེ་སློང་ཕ་མ་གཉིས་དགོས་པའོ། །ཚངས་སྤྱོད་ཉེར་གནས་ཀྱི་ལས་བྱེད་པའི་དགེ་སློང་མ་དང༌། དངོས་གཞི་གསོལ་བཞིའི་ལས་བྱེད་པའི་དགེ་སློང་ཕ་དགོས་སོ། སྐབས་འདིར་མདོ་རྩ་བ་ལས། དགེ་སློང་གི་གནས་སུ་དགེ་སློང་མའོ། །རབ་ཏུ་བྱུང་བ་ཐམས་ཅད་ཀྱིའོ། །ཞེས་པའི་འཐད་ཀྱི་ཟླ་ཟེར་ལས། སྔར་དགེ་སློང་གི་ཆོ་གའི་སྐབས་སུ་དགེ་སློང་ཞེས་སྨོས་པ་དག་གི་གནས་སུ་འདིར་ནི་དགེ་སློང་མ་ཞེས་བརྗོད་པར་བྱའོ། །ཞེས་དང༌། དགེ་སློང་ཕ་ཡི་གནས་སུ་དགེ་སློང་མ་ཞེས་སྨོས་པ་དེ་སྐབས་སུ་གང་དུ་བྱ་ཞེ་ན་རབ་ཏུ་བྱུང་བ་ཡུལ་མཁན་པོ་ལ་སོགས་པ་དགེ་སློང་ཐམས་ཅད་ཀྱི་སྐབས་སུ་དགེ་སློང་མ་ཞེས་བརྗོད་པའོ། །ཞེས་གསུངས་སོ། །དེས་ན་རབ་བྱུང་མ་དང་དགེ་ཚུལ་མ་ཡང་མ་ཡི་མཁན་མོ་དང་སློབ་དཔོན་མས་སྒྲུབ་དགོས་པ་ཡིན་མིན་དཔྱད་དགོས་སོ། །༣དགེ་འདུན་གྱི་ཁྱད་པར་ནི། དགེ་སློང་གི་སྐབས་སུ་ཡུལ་དབུས་སུ་དགེ་སློང་བཅུ་དང་མཐའ་འཁོབ་ཏུ་ལྔའི་གྲངས་ཚང་བ་དང༌། དགེ་སློང་མའི་སྐབས་སུ་ཡུལ་དབུས་སུ་ཉི་ཤུ་རྩ་གཉིས་དང༌། མཐའ་འཁོབ་ཏུ་བཅུ་གཅིག་གི་གྲངས་ཚང་བའོ། །དགེ་སློང་བཅུ་དགེ་སློང་མ་བཅུ་གཉིས་ཏེ་ཉི་ཤུ་རྩ་གཉིས་དང་དགེ་སློང་ལྔ་དང་དགེ་སློང་མ་དྲུག་སྟེ་བཅུ་གཅིག་གོ །

གཉིས་པ་གང་གིས་ནོད་པ་རྟེན་གྱི་ཁྱད་པར་ལ་གསུམ་ལས་༡ན་ཚོད་ཀྱི་ཁྱད་པར་ནི་སྐྱེས་པ་དགེ་སློང་བྱེད་པ་ལ་ལོ་ཉི་ཤུ་ལོན་དགོས་ལ།

བུད་མེད་ཁྱིམ་སོ་བཟུང་ན་ལོ་བཅུ་གཉིས་ལོན་པ་དགེ་སློང་མར་བྱར་རུང་བའོ། །༢ཆ་ལུགས་ཀྱི་ཁྱད་པར་ནི། ཆོས་གོས་གྲངས་མང་ཉུང་ནི། དགེ་སློང་ཕ་ལ་ཆོས་གོས་གསུམ་དང་དགེ་སློང་མ་ལ་ཆོས་གོས་ལྔ། ལྷུང་བཟེད་ཚད་ཆེ་ཆུང་ཡོད་དེ། ལྷུང་བཟེད་ཀྱི་ཚད་ནི། རྩ་བར། དགེ་སློང་མས་དགེ་སློང་གི་ཆུང་ངུ་ལས་ལྷག་པ་མི་བཅང་ངོ། །ཞེས་པས་སོ། །ཁ་སྤུ་འདྲེག་དགོས་མི་དགོས་ཀྱི་ཁྱད་པར་ཡང་ཡོད་དོ། །ཁ་སྤུ་ཅན་མཚན་གྱུར་པའི་བུད་མེད་རབ་ཏུ་འབྱིན་པ་དང་སྐྱེས་པ་གཞོན་ནུ་རབ་ཏུ་འབྱིན་པ་ན་དམིགས་ཀྱིས་བསལ་བའོ། །༣ཚིགས་སྔ་མ་སྔོན་དུ་སོང་བའི་ཁྱད་པར་ནི། དགེ་སློབ་མའི་ཚིགས་སྔོན་དུ་འགྲོ་དགོས་པ་དང་མི་དགོས་པའོ། །གསུམ་པ་ཇི་ལྟར་ནོད་པ་ཆོ་གའི་ཁྱད་པར་ལ་གསུམ་ལས། དང་པོ་སྦྱོར་བའི་ཆོ་གའི་ཁྱད་པར་ལ་གསུམ་སྟེ། བར་ཆད་འདྲི་བ་སྒྲིབ་དགོས་མི་དགོས་ཀྱི་ཁྱད་པར་དང༌། ཚངས་སྤྱོད་ཉེར་གནས་དགོས་མི་དགོས་ཀྱི་ཁྱད་པར་དང༌། གཉིས་ཀའི་དགེ་འདུན་ལ་གསོལ་བ་འདེབས་དགོས་མི་དགོས་ཀྱི་ཁྱད་པར་རོ། །གསང་སྟེ་སྟོན་མས་ལྐོག་ཏུ་བར་ཆད་འདྲི་བ་སྒྲིབ་མི་དགོས་ཀྱང༌། དགེ་འདུན་མའི་དབུས་སུ་བ༷ར་ཆ༷ད་འདྲི༷་བ༷་དང་གཉིས་ཀའི་དགེ་འདུན་གྱི་དབུས་སུ་བར་ཆད་དྲི་བ་དགེ༷་སློ༷ང་མ༷ས་སྒྲི༷བ་པ༷་ལ༷་བྱ༷འོ༷། །འགྲེལ་ཆུང་ལས། ངོ་མི་ཚ་བར་བྱ་བའི་ཕྱིར་རོ། །ཞེས་གསུངས་ཏེ། བུད་མེད་ཕལ་ཆེར་ངོ་ཞན་པ་དང་སྤོབས་པ་ཞན་པས་མ་བསྒྲིབས་ན་འཚོགས་པའི་དབུས་སུ་ལན་འདེབས་མི་ནུས་པའི་དགག་བྱ་ཡོད་པའི་ཕྱིར་རོ། །འདིར་འདྲི་བའི་ཚུལ་ནི་ཀརྨ་ཤ་ཏཾ་དང༌། ཊཱི་ཀ་ལས། དགེ་སློང་མ་གཞན་ཞིག་མདུན་དུ་བཞག་པས་ལན་གདབ་ཅིང་དེའི་ཚིག་གི་རྗེས་སུ་དེ་ཉིད་ཟློས་སུ་གཞུག་གོ། །ཞེས་སོ། །ཕྲན་ཚེགས་འགྲེལ་བ་དང་འགྲེལ་ཆུང་ལས་གཅིག་ལ་གཅིག་ཚིག་བརྒྱུད་དེ་འདྲིའོ་ཞེས་བཤད་ཀྱང༌། གཞུང་སྔ་མ་དེ་གཉིས་དང་འགལ་ལོ། །དགེ་སློང་ཕའི་སྡོམ་པ་ལེན་པ་ན་གཉིས་ཀའི་དགེ་འདུན་ལ་གསོལ་བ་འདེབས་མི་དགོས་ཏེ། དགེ་སློང་ཕའི་དགེ་འདུན་ལ་གསོལ་བ་འདེབས་པའོ། །གཉིས་པ་དངོས་གཞིའི་ཆོ་གའི་ཁྱད་པར་ནི། མིང་འཇུག་ལ་སོགས་པ་ལ་བརྗོད་པ་མི་འདྲ་བ་ཅུང་ཟད་ཡོད་དེ། རབ་ཏུ་དབྱུང་བ་དང་བསྙེན་རྫོགས་བྱེད་པའི་སྐབས་སུ། སྔར་དགེ༷་སློ༷ང་ཞེས་པའི་སྒྲ་སྨོས་པ་དག་གི༷་གན༷ས་སུ༷་འདིར་དགེ༷་སློ༷ང་མ༷་ཞེས་བརྗོད་པར་བྱའོ༷། །དེ་ཡང་དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ། །ཞེས་པ་དེར། དགེ་སློང་མ་འགའ་ཞིག་ལ་མཁན་མོ་ཉིད་དུ་གནས་པའོ་ཞེས་སྦྱར་ཏེ། འདིར་ཡུལ་གྱི་སྐབས་གཞན་དག་ལའང་དེ་བཞིན་དུ་ཤེས་པར་བྱའོ། །འོ་ན་དགེ་སློང་ཕའི་གནས་སུ་དགེ་སློང་མ་ཞེས་པ་དེ་སྐབས་གང་དུ་ཞེ་ན། རྩ་བར། རབ་ཏུ་བྱུང་བ་ཐམས་ཅད་ཀྱིའོ་ཞེས་ཏེ་དགེ་ཚུལ་མའི་ཆོ་གའི་སྐབས་ཐམས་ཅད་དུ་དགེ་སློང་ཕའི་གནས་སུ་དགེ་སློང་མ་ཞེས་སྨོས་པའོ། །འོ་ན་བསྙེན་རྫོགས་ཀྱི་སྐབས་སུ་ཇི་ལྟར་ཞེ་ན། བསྙེན་པར་རྫོགས་པ་ལ་ནི། བསྙེན་པར་རྫོགས་པ་དེ་གསོལ་བ་འདེབས་པ་དང་ལ་སོགས་པ་ཞེས་པས་དགེ་འདུན་གྱི་ནང་དུ་བར་ཆད་འདྲི་བའི་ཕྱིར་གསོལ་བ་འབའ་ཞིག་པའི་ལས་བྱེད་པ་དང༌། དངོས་གཞིའི་གསོལ་བཞིའི་ལས་བྱེད་པ་བསྡུས་ཏེ་གསུམ་པོ་དེ་ལས་གཞན་པའི་སྐབས་སུ་དགེ་སློང་དག་གི་གནས་སུ་དགེ་སློང་མའོ་ཞེས་གོང་དུ་སྦྱར་རོ། །སྐབས་གསུམ་པོ་དེར་ནི་ཆོ་ག་བརྗོད་པ་ན་དགེ་སློང་མ་ཞེས་མི་བརྗོད་པར། གཉིས་ཀའི་དགེ་འདུན་ཞེས་བརྗོད་དགོས་སོ། །ཚངས་སྤྱོད་ཉེར་གནས་བྱིན་ཟིན་ནས་དགེ་སློང་མའི་དགེ་འདུན་འཚོགས་ཡོད་པའི་སྟེང་དུ། འདི༷ར་དགེ་སློང་ཕའི་དགེ༷་འདུ༷ན་གྱི༷ས་ཁ་སྐོང་བའི་ཡན་ལག་ཏུ་བསྣ༷ན་པ༷ར་བྱ༷འོ༷། །ལས་གཞིའི་ཊཱི་ཀ་ལས། དགེ་སློང་མ་བསྙེན་པར་རྫོགས་པར་བྱ་བ་ལ་ནི་དགེ་སློང་གི་དགེ་འདུན་གཙོ་བོ་ཡིན་པས་དགེ་སློང་མའི་དགེ་འདུན་ལ་སོགས་པ་ནི་ཚུལ་དང་མཐུན་པ་ཙམ་དུ་བྱ་བར་ཟད་པར། ཞེས་གསུངས་སོ། །འདིར་དགེ་སློང་གི་དགེ་འདུན་གཙོ་བོ་ཡིན་པའི་སྒྲུབ་བྱེད་ནི་ལུང་ཕྲན་ཚེགས་ལས། དགེ་སློང་རྣམས་ལས་དགེ་སློང་མས་བསྙེན་པར་རྫོགས་པ་དགེ་སློང་མའི་དངོས་པོ་སྩལ་བར་བྱའོ། །ཞེས་གསུངས་པའོ། །འདིར་ཞེས་པ་ནི་བསྙེན་པར་རྫོགས་པར་གསོལ་བ་འདེབས་པ་ནས་བསྙེན་པར་རྫོགས་ཟིན་པ་ཡན་ཆད་ཀྱི་སྐབས་འདིར་རོ། །གསུམ་པ་མཇུག་གི་ཆོ་གའི་ཁྱད་པར་ལ་གསུམ་སྟེ། གནས་རྣམ་པ་བཞིར་བརྗོད་པའི་ཁྱད་པར་དང༌། གསུམ་བརྗོད་པའི་ཁྱད་པར་དང༌། ཕམ་པ་བཞི་བརྗོད་པ་དང༌། བརྒྱད་བརྗོད་པ་དང༌། ལྕི་བའི་ཆོས་བརྒྱད་བརྗོད་མི་དགོས་པ་དང་དགོས་པའི་ཁྱད་པར་དང༌། དེ་ལྟར་ན་སྦྱོར་བའི་ཁྱད་པར་གསུམ་དང་དངོས་གཞིའི་ཁྱད་པར་གཅིག་དང་མཇུག་གི་ཁྱད་པར་གསུམ་སྟེ་ཆོ་གའི་ཁྱད་པར་བདུན་ཡོད་དོ། །བཞི་བ། དགེ་སློང་མའི་ཆོས་གོས་དག་ནི་ལྔ་སྟེ། སྣམ་སྦྱར་བླ་གོས་མཐང་གོས་དང་གསུམ། ཤིང་ང་དཔུང་ཆད་རྔུལ་གཟན་ཏེ་ལྔ་ཉིད་དོ། །ཆོས་གོས་དེ་གཉིས་དགོས་པའི་རྒྱུ་མཚན་ནི། དགེ་སློང་མ་རྣམས་ཀྱི་བྲང་གི་མདུན་ཕྱོགས་མི་མཛེས་པ་སྦ་བར་འོས་པའི་ཕྱིར་རོ། །གོས་དེ་གཉིས་གྱོན་ལུགས་ནི་མཆན་འོག་ལ་དཀྲིས་ཏེ་རྒྱབ་ནས་དཔུང་པ་གཉིས་ཀྱི་གོང་ནས་དྲངས་ནས་དར་དཔྱངས་ཀྱི་ཚུལ་དུ་གྱོན་པའོ། །གོས་དེ་གཉིས་ཀྱི་ཚད་ནི་བླ་གོས་དང་ཚད་མཉམ་པ་སྟེ་མའི་རྣམ་འབྱེད་ལས། ཟླ་འཇོག་གི་སྐབས་ནས་བཤད་དོ། །དགེ་སློང་མ་ལ་གནས་རྣམ་པ་གསུམ་བརྗོད་དེ། གནས་བཞི་པོ་རྣམས་ལས་ཤིང་དྲུང་ཉིད་མ་གཏོགས་ཏེ། བསླབ་པ་བསྲུང་བ་རང་དབང་ཅན་མ་ཡིན་པས་དགེ་སློང་མ་ཤིང་དྲུང་དུ་སྡོད་པ་བཀག་པའི་ཕྱིར་རོ། །ལྟུང་བྱེད་དང་ཉེས་བྱས་ཡིན་ཡང་མགུ་བ་ཟླ་བ་ཕྱེད་སྤྱོད་དགོས་པས་ཆད་པ་ལྕི་བ་སྟེ་མཚན་ཉིད་འཛིན་པའི་ཆོས་བརྒྱད་པོ་རྣམས་བརྗོད་པར་བྱའོ། །དེ་ཡང་དགེ་སློང་གང་ཟག་ལ་བརྟེན་པ་གསུམ་ནི། ༡ དགེ་སློང་མས་དགེ་སློང་ལ་ཉེས་པ་གླེང་དྲན་མི་བྱ་བ་དང་༢དགེ་སློང་མས་དགེ་སློང་ལ་སྤྱོ་བར་མི་བྱ་བ་དང༌།༣དགེ་སློང་མས་དགེ་སློང་གསར་བུ་ལ་ཡང་ཕྱག་བྱ་དགོས་པ་ལས་མ་བྱས་པའོ། །དགེ་སློང་གི་དགེ་འདུན་ལ་བརྟེན་པ་གསུམ་ནི། ༤དགེ་སློང་ཕའི་དགེ་འདུན་མེད་པར་བསྙེན་པར་རྫོགས་པར་བྱེད་པ་དང༌། ༥ཟླ་བ་ཕྱེད་ཕྱེད་ཅིང་དགེ་སློང་རྣམས་ལས་གདམས་ངག་མི་ནོད་པ་དང༌། ༦མཚམས་པོ་ཆེ་བཅད་ན་དཔག་ཚད་ཕྱེད་དང་གསུམ་གྱི་ནང་ཁོངས་དང་མཚམས་མ་བཅད་ན་དཔག་ཚད་གཅིག་གི་ནང་ཁོངས་ན་དགེ་འདུན་དུ་ལོངས་པའི་དགེ་སློང་མེད་པའི་གནས་སུ་དབྱར་གནས་པར་ཁས་ལེན་པའོ། །