ལྔ་བ་ཐེག་ཆེན་སྒྲུབ་པའི་དམིགས་པ་བཤད་པ་ལ།

ལྔ་བ་ཐེག་ཆེན་སྒྲུབ་པའི་དམིགས་པ་བཤད་པ་ལ།

དང་པོ་ལ། རྩ་བར། དམིགས་པ་ཆོས་རྣམས་ཐམས་ཅད་དེ། །དེ་ཡང་དགེ་ལ་སོགས་པ་ཡིན། །འཇིག་རྟེན་པ་ཡི་རྟོགས་པ་དང༌། གང་དག་འཇིག་རྟེན་འདས་འདོད་དང༌། ། ཟག་བཅས་ཟག་པ་མེད་ཆོས་དང༌། །གང་དག་འདུས་བྱས་འདུས་མ་བྱས། །སློབ་མ་ཐུན་མོང་ཆོས་རྣམས་དང༌། །གང་དག་ཐུབ་པའི་ཐུན་མོང་མིན། །ཞེས་སོ། །དེའི་དོན་ལ་སྤྱི་དོན་དང་མཐའ་རགས་ཙམ་དཔྱད་པ་གཉིས། དང་པོ་ལ། མཚན་ཉིད་དབྱེ་བ་གཉིས། དང་པོ་མཚན་ཉིད་ནི། ཐེག་ཆེན་སྒྲུབ་པའི་ཤེས་པར་བྱ་བ་དེ་ཡིན་ཏེ། མདོ་ལུགས་མ་ལས། དམིགས་པ་སྟེ། བྱང་ཆུབ་སེམས་དཔའ་རྣམས་ཀྱི་ཤེས་པར་བྱ་བ་གང་ཡིན་པ་དེ་སྟོན་པ་འདི་ལྟ་སྟེ། ཞེས་དང༌། ཉ་ཊཱིཀ་ལས།སྒྲུབ་པའི་དམིགས་པའི་མཚན་ཉིད། རང་བཞིན་དང་ཡ་མ་བྲལ་བའི་རྣམ་འགྱུར་སྒྲུབ་པ་པོའི་ཤེས་བྱར་གྱུར་པ་སྟེ། ཞེས་གསུངས་སོ། །མཚན་གཞི་ནི། དོན་དམ་བདེན་པ་དང༌།ཀུན་རྫོབ་བདེན་པ་ལྟ་བུའོ། །གཞི་གྲུབ་ན་ཐེག་ཆེན་སྒྲུབ་པའི་དམིགས་པ་ཡིན་པས་ཁྱབ་སྟེ།རྩ་བར། དམིགས་པ་ཆོས་རྣམས་ཐམས་ཅད་དེ། །ཞེས་དང༌། མདོ་ལུགས་མ་ལས། བྱང་ཆུབ་སེམས་དཔའ་ཆེན་པོ་ཆོས་སྲིད་དོ་ཅོག་དེ་དག་ཤེས་པར་བྱ་བ་དང༌། ཞེས་གསུངས་སོ། །གཉིས་པ་དབྱེ་ན། དགེ་བ་སོགས་བཅུ་གཅིག་ཡོད་དེ། ཁྲི་བརྒྱད་སྟོང་པ་ལས། རབ་འབྱོར་ཆོས་ཐམས་ཅད་ཅེས་བྱ་བ་ནི་དགེ་བ་དང༌། མི་དགེ་བ་དང༌། ལུང་དུ་མ་བསྟན་པ་དང༌། འཇིག་རྟེན་པ་དང༌། འཇིག་རྟེན་ལས་འདས་པ་དང༌། ཟག་པ་དང་བཅས་པ་དང༌། ཟག་པ་མེད་པ་དང༌། འདུས་བྱས་དང༌། འདུས་མ་བྱས་དང༌། ཐུན་མོང་དང༌། ཐུན་མོང་མ་ཡིན་པ་དག་གོ །རབ་འབྱོར་དེ་དག་ནི་ཆོས་ཐམས་ཅད་ཅེས་བྱ་སྟེ། བྱང་ཆུབ་སེམས་དཔའ་ཆེན་པོ་དེ་དག་གི་མེད་པ་ཉིད་ལ་བསླབ་པར་བྱའོ། །བྱང་ཆུབ་སེམས་དཔའ་ཆེན་པོ་ཆོས་ཐམས་ཅད་ཁོང་དུ་ཆུད་པར་བྱ་བ་ཡང་དེ་དག་ཡིན་ནོ། །ཞེས་གསུངས་སོ། །དེ་དག་གི་དོན་ནི་གོ་རིམ་བཞིན་བཤད་པ་ལ། དང་པོ་དགེ་བའི་མཚན་ཉིད། རང་འབྲས་ཡིད་འོང་སྐྱེད་བྱེད་ཀྱི་རིགས་གནས་ཀྱི་རྣམ་པར་དཀར་བའི་ཆོས་དེ་ཡིན་ཏེ། ཉ་ཊཱིཀ་ལས། མི་དགེ་བའི་འགལ་བའི་མི་མཐུན་ཕྱོགས་གང་ཞིག དམ་པས་བསྔགས་པར་བྱ་བ། དགེ་བའི་ལས་སུ་མཚོན། སྤང་བྱ་མི་དགེ་བའི་གཉེན་པོར་གྱུར་པའི་ལས་སོ། །ཞེས་དང༌། གཏན་ཚིགས་དོན་བསྡུས་ལས། ལུང་དུ་བསྟན་པའི་ཆོས་གང་ཞིག དམ་པ་རྣམས་ཀྱིས་བསྔགས་པར་འོས་པ། ཞེས་གསུངས་སོ། །མཚན་གཞི་ནི། ལམ་དང་སྲོག་གཅོད་པ་སྤོང་བའི་ཚུལ་ཁྲིམས་སོགས་སོ། །གཉིས་པ་མི་དགེ་བའི་མཚན་ཉིད། རང་འབྲས་ཡིད་མི་འོང་སྐྱེད་བྱེད་ཀྱི་རིགས་སུ་གནས་པའི་རྣམ་པར་ནག་པའི་ཆོས་དེ་ཡིན་ཏེ། ཉ་ཊཱིཀ་ལས། མི་དགེ་བར་མཚོན། དགེ་བའི་འགལ་བའི་མི་མཐུན་ཕྱོགས་གང་ཞིག དམ་པས་སྨད་པར་འོས་པ། དེའི་ལས་སུ་མཚོན། དགེ་བའི་ལས་ཀྱི་གནོད་བྱར་གྱུར་པའི་ལས། ཞེས་གསུངས་སོ། །མཚན་གཞི་ནི་སྲོག་གཅོད་པ་སོགས་སོ། །གསུམ་པ་ལུང་མ་བསྟན་གྱི་མཚན་ཉིད། དགེ་མི་དགེ་གང་ཡང་མ་ཡིན་པའི་ཆོས་དེ་ཡིན་ཏེ། ཉ་ཊཱིཀ་ལས། ལུང་དུ་མ་བསྟན་པར་མཚོན། དགེ་མི་དགེ་གང་དུ་ཡང་མི་རུང་བའི་ཆོས་སོ། །དེའི་ལས་སུ་མཚོན། ཕན་གནོད་དམ། དགེ་མི་དགེའི་སེམས་གང་གིས་ཀྱང་མ་བསླངས་བའི་ལས་སོ། །ཞེས་གསུངས་སོ། །མཚན་གཞི་ནི། ལུང་དུ་མ་བསྟན་པའི་ལུས་ངག་ཡིད་ཀྱི་ལས་དང༌།བཟོ་སྤྲུལ་སྤྱོད་ལམ་རྣམ་སྨིན་སོགས་སོ། །བཞི་བ་འཇིག་རྟེན་པ་ནི། འཕགས་པའི་ཟླས་དྲངས་པའི་བྱིས་པ་སོ་སོའི་སྐྱེ་བོ་ཐམས་ཅད་ཀྱིས་བསྡུས་པའི་ཕུང་བོ་ལྔ་དང་ཁམས་སྐྱེ་མཆེད་སོགས་འཇིག་རྟེན་པའོ། །ལྔ་བ་འཇིག་རྟེན་ལས་འདས་པ་ནི། འཕགས་པའི་སྐྱེ་བོ་ཐམས་ཅད་ཀྱིས་བསྡུས་པའི་བསམ་གཏན་བཞི་དང་གཟུགས་མེད་མ་འདྲེས་སོགས་འཇིག་རྟེན་ལས་འདས་པའོ། །དྲུག་པ་ཟག་བཅས་ནི། གང་ཟག་གི་བདག་ཏུ་ལྟ་བའི་གཉེན་པོ་མ་ཡིན་པ་ཉིད་ཀྱིས་ཉེ་བར་ལེན་པའི་ཕུང་བོ་ལྔ་དང་ཁམས་སྐྱེ་མཆེད་བསམ་གཏན་བཞི་ཚད་མེད་བཞི་གཟུགས་མེད་མངོན་ཤེས་ལྔ་ནི་ཟག་བཅས་སོ། །ཉེར་ལེན་ནི། མ་འོངས་པའི་ཕུང་བོ་ལ་འདུན་པ་དང་ད་ལྟ་བ་ལ་འདོད་ཆགས་ལ་ཀུན་བཏུས་སུ་བཤད། མཛོད་དུ་ཉོན་མོངས་པ་ཐམས་ཅད་ལ་བཤད་དོ། །བདག་དེར་ལྟ་བའི་གཉེན་པོ་ཆགས་སོགས་ཉོན་མོངས་དང་མ་འབྲེལ་བའི་དྲན་པ་ཉེར་བཞག་བཞི་སོགས་སོ་བདུན་དང་ནས་མ་འདྲེས་པའི་བར་ནི་ཟག་མེད་དོ། ། ཀུན་བཏུས་སུ། ཟག་པ་དེའི་བདག་ཉིད་དང༌། ཟག་པ་དང་འབྲེལ་བ་དང༌། ཟག་པས་བཅིངས་པ་དང༌། ཟག་པའི་རྗེས་སུ་འབྲེལ་བ་དང༌། ཟག་པའི་རྗེས་སུ་མཐུན་པ་དང༌།ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཞེས་པའི་དོན་ནི། ཀུན་བཏུས་ས་འགྲེལ་ལས། ཇི་ལྟར་དུ་ཞིག་ཅིའི་ཕྱིར་སྤང་བྱ་ཟག་པ་དང་བཅས་པར་བརྟག་ཅེ་ན།མཛོད་ལས། ལམ་མ་གཏོགས་པའི་འདུས་བྱས་རྣམས། །ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། །ཞེས་གང་ལ་དམིགས་ནས་ཟག་པ་རྒྱས་པར་འགྱུར་བས་ཟག་བཅས་སུ་འཇོག་མོད། འདིར་ནི་ཟག་པ་དང་སྒོ་དྲུག་གིས་འབྲེལ་བས་ཟག་བཅས་ཏེ། དེའང་ཉོན་མོངས་པ་དང་ཉེ་བའི་ཉོན་མོངས་པ་རྣམས་ནི་ཟག་པ་དེའི་བདག་ཉིད་དམ། རང་བཞིན་ཡིན་པས་ཟག་པ་དང་བཅས་པར་བལྟའོ། །ཞེས་པ་དང༌། དེ་བཞིན་དུ་སྦྱར་ཏེ།ཉོན་མོངས་པ་དང་མཚུངས་པར་ལྡན་པའི་སེམས་སེམས་བྱུང་དང༌། དེ་དག་གི་གནས་མིག་ལ་སོགས་པ་ནི་ཟག་པ་དང་འབྲེལ་བ་དང༌། དགེ་བ་ཟག་བཅས་དེ་རྣམས་ཀྱང་ཡང་སྲིད་འགྲུབ་བྱེད་དུ་གྱུར་པའི་ཆ་ནས་ཟག་པས་བཅིངས་པ་དང༌། ས་གཞན་གྱི་ཀུན་གཞི་ལའང་ས་གཞན་གྱི་ཉོན་མོངས་པའི་གནས་ངན་ལེན་ལྡན་པ་ཟག་པའི་རྗེས་སུ་འབྲེལ་བ་དང༌།ངེས་འབྱེད་ཆ་མཐུན་ནི་ཉོན་མོངས་པའི་ས་བོན་དང་ལྡན་ཡང༌། སྲིད་པ་ལ་རྒྱབ་ཀྱིས་ཕྱོགས་ཤིང་གཉེན་པོ་བྱེད་པས་ཟག་མེད་དུ་འཇོག་ལ། དེ་ལས་གཞན་པའི་ཉོན་མོངས་པའི་ས་བོན་ཐམས་ཅད་དམ། ཡང་ལམ་ལས་གཞན་པའི་འདུས་བྱས་ཐམས་ཅད་ཉོན་མོངས་པ་འཕེལ་བའི་རྐྱེན་བྱེད་པས་ཟག་པའི་རྗེས་སུ་མཐུན་པ་དང༌། སོ་སོའི་སྐྱེ་བོ་དང་འཕགས་པ་སློབ་པའི་ཕུང་པོ་ཟག་པའི་རྒྱུ་ལས་བྱུང་བར་མ་ཟད། དགྲ་བཅོམ་པའི་ཕུང་པོའང་སྔར་གྱི་ཉོན་མོངས་ཀྱིས་འཕངས་ཤིང་མཚམས་སྦྱོར་བའི་རྒྱུ་ཡིན་པས་ཟག་པའི་རྒྱུ་ལས་བྱུང་བའི་ཕྱིར་ཟག་པ་དང་བཅས་པར་བལྟའོ། །ཞེས་དང༌། མཛོད་དུ། །ལམ་མ་གཏོགས་པའི་འདུས་བྱས་རྣམས། །ཟག་བཅས་གང་ཕྱིར་དེ་དག་ལ། །ཟག་རྣམས་ཀུན་ཏུ་རྒྱས་པར་འགྱུར། །ཞེས་དམིགས་པའམ་མཚུངས་ལྡན་ཅི་རིགས་པའི་སྒོ་ནས་ཟག་པ་རྒྱས་སུ་རུང་བ་ལ་ཟག་བཅས་སུ་བཤད་དོ། །བདུན་པ་ཟག་མེད་ནི། ཀུན་བཏུས་ས་འགྲེལ་ལས། ཇི་ལྟར་དུ་ཞིག་ཅིའི་ཕྱིར་གཉེན་པོ་ཟག་པ་མེད་པར་བརྟག་ཅེ་ན། ཟག་མེད་ལམ་གྱི་བདེན་པ་དང༌། འདུས་མ་བྱས་རྣམ་གསུམ། ཞེས་པ་ལྟར། སྤང་བྱ་ཟག་པ་དང་བཅས་པ་ལས་ལྡོག་པ། ཟག་པའི་སྒོ་དྲུག་དང་མ་འབྲེལ་པ་ནི་ཟག་པ་མེད་པར་བལྟའོ། །ཞེས་གསུངས་སོ། །བརྒྱད་པ་འདུས་བྱས་ནི། འདུས་བྱས་ཀྱི་མཚན་ཉིད། རང་རྒྱུ་ལས་སྐྱེས་པ། འདོད་པའི་ཁམས་གཟུགས་གཟུགས་མེད་མ་འདྲེས་བཅོ་བརྒྱད་སོགས་ཆོས་ཅན། འདུས་བྱས་ཡིན་ཏེ། རྒྱུ་རྐྱེན་ལས་སྐྱེས་པའི་ཕྱིར་རོ། །དགུ་བ་འདུས་མ་བྱས་ནི། འདུས་མ་བྱས་ཀྱི་མཚན་ཉིད། རང་གི་རྒྱུ་རྐྱེན་ལས་མ་སྐྱེས་པ། མཚན་གཞི་ནི། རྒྱུ་རྐྱེན་ལ་མི་ལྟོས་པས་དེ་བཞིན་ཉིད་དང་འདོད་ཆགས་ཟད་པའི་འགོག་པ་སོགས་སོ། །བཅུ་བ་ཐུན་མོང་གི་ཆོས་ནི། ཐེག་པ་གསུམ་གྱི་འཕགས་པའི་སྐྱེ་བོ་མང་བོའི་རྒྱུད་ལ་འབྱུང་བའི་བསམ་གཏན་ཚད་མེད་གཟུགས་མེད་མངོན་ཤེས་ལྔ་ནི་ཐེག་དམན་གྱི་འཕགས་པ་དང་སངས་རྒྱས་གཉིས་ཀའི་ཐུན་མོང་གི་ཆོས་སོ། །བཅུ་གཅིག་པ་ཐུན་མོང་མ་ཡིན་པ་ནི། ཡང་དག་རྫོགས་པའི་སངས་རྒྱས་ཀྱི་རྒྱུད་ལ་འབྱུང་བའི་སྟོབས་སོགས་སོ། །དེ་ལྟར་ན་དགེ་སོགས་བཅུ་གཅིག་གིས་མཚོན་ནས་རང་སྤྱིའི་མཚན་ཉིད་མ་ལུས་པ་བཟུང་ངོ༌། །དེས་ན་སྒྲུབ་པའི་དམིགས་པ་ཆོས་ཐམས་ཅད་ཅེས་བསྟན་ཏེ། སྤྱོད་འཇུག་ལས། རྒྱལ་སྲས་རྣམས་ཀྱི་མི་བསླབ་པའི། །དངོས་དེ་གང་ནའང་ཡོད་མ་ཡིན། །ཞེས་བཤད་པ་ལྟར་རོ། །