དང་པོ་ཉན་ཐོས་ཀྱི་ཐེག་པ།
དང་པོ་ཉན་ཐོས་ཀྱི་ཐེག་པ་ནི།
ཉན་ཐོས་ཀྱི་ལམ་ལ་སློབ་པ་ལ། ཐོག་མར་སྐྱེས་བུ་ཆུང་ངུའི་ཆོས་ཀྱིས་བློ་སྦྱོང་དགོས། དེ་ཡང་བྱང་ཆུབ་ལམ་སྒྲོན་ལས། གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །དེ་ནི་སྐྱེས་བུ་ཐ་མར་ཤེས། །ཞེས་གསུངས་པ་ལྟར་ངན་སོང་གསུམ་གྱི་སྡུག་བསྔལ་སོགས་སྡུག་བསྔལ་གྱི་སྡུག་བསྔལ་ལེགས་པར་ཤེས་ནས་དེ་ལ་སྐྱོ་བ་སྐྱེས་ནས་མངོན་མཐོ་ལྷ་མིའི་གོ་འཕང་དོན་དུ་གཉེར་བའི་བློས་རྩིས་ཟིན་པའི་དགེ་བ་ནི་སྐྱེས་བུ་ཆུང་ངུའི་ལམ་ཡིན་ལ། ཐེག་པ་གསུམ་གྱི་ལམ་གང་དུ་ཞུགས་ན་སྐྱེས་བུ་ཆུང་ངུ་ལམ་དངོས་སུ་ཞུགས་མི་རུང་ཡང་སྡུག་བསྔལ་གྱི་སྡུག་བསྔལ་ལ་སྐྱོ་བ་སྐྱེས་ནས་མི་དགེ་བཅུ་སྤོང་གི་ཚུལ་ཁྲིམས་སོགས་སྐྱེས་བུ་ཆུང་ངུ་དང་ཐུན་མོང་གི་ལམ་ལ་སློབ་དགོས་སོ། །གཏམ་བྱ་རིན་ཆེན་ཕྲེང་བ་ལས། བརྡ་སྤྲོད་པ་དག་ཇི་ལྟ་བུར། །ཡི་གེའི་ཕྱི་མོའང་ཀློག་འཇུག་ལྟར། །དེ་བཞིན་སངས་རྒྱས་སེམས་ཅན་ལ། །ཇི་ཙམ་བཟོད་པའི་ཆོས་བསྟན་ཏོ། །ཁ་ཅིག་ལ་ནི་སྡིག་པ་ལས། །རྣམ་པར་བཟློག་ཕྱིར་ཆོས་བསྟན་ཏོ། །ཁ་ཅིག་བསོད་ནམས་བསྒྲུབ་བྱའི་ཕྱིར། །ཁ་ཅིག་ལ་ནི་གཉིས་བརྟེན་པ། །ཁ་ཅིག་ལ་ནི་གཉིས་མི་བརྟེན། །ཟབ་མོ་འཁུ་འཁྲིག་ཅན་འཇིགས་པ། །སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་པ་ལྟར། རེ་ཞིག་བྱང་ཆུབ་སྒྲུབ་པའི་སྐལ་བ་མེད་པ་རྣམས་ལ། ལས་འབྲས་ཀྱི་བླང་དོར་ཙམ་བསྟན་ནས་མཐོ་རིས་ལ་འཇོག་དགོས་ལ། རང་དོན་ཁོ་ན་ཡིད་ལ་བྱེད་ཅིང་ཚོགས་མང་དུ་གསོག་པར་ཡང་མི་འདོད་པའི་གདུལ་བྱ་ཉན་ཐོས་རིགས་ཅན་དག་ནི། གང་ཟག་གི་བདག་མེད་བསྒོམ་བྱའི་གཙོ་བོ་དང༌། རྣམ་པ་གཞན་རྣམས་དེའི་ཡན་ལག་ཏུ་བྱས་ཏེ་བདེན་བཞིའི་རྣམ་པ་བཅུ་དྲུག་ཙམ་བསྒོམས་པས་མྱུར་ན་སྲིད་པ་གསུམ་གྱིས་དགྲ་བཅོམ་ཐོབ་ནུས་པའི་ལམ་ནི་ཉན་ཐོས་ཐེག་པ་ཡིན་ཏེ། མཛོད་ལས། དྲི་མེད་བཅུ་དྲུག་གཞན་རྣམ་མེད། །ཅེས་དང༌། མྱུར་བ་སྲིད་པ་གསུམ་གྱིས་ཐར། །ཞེས་གསུངས་པའི་ཕྱིར་རོ། །ཐེག་པ་གསུམ་གྱི་ལམ་གང་དུ་ཞུགས་ཀྱང་ངེས་འབྱུང་གི་བསམ་པ་བསྐྱེད་དགོས་ཏེ། དབུ་མ་བཞི་བརྒྱ་བ་ལས། གང་ལ་འདི་སྐྱོ་ཡོད་མིན་པ། །དེ་ལ་ཞི་གུས་ག་ལ་ཡོད། །ཅེས་གསུངས་སོ། །དེས་ན་ངེས་འབྱུང་གི་བསམ་པ་ནི་ཐར་བ་ལ་འཇུག་པའི་སྒོ་ཡིན་པར་ཤེས་དགོས་སོ། །ཐེག་པ་དམན་པའི་ལམ་སྐྱེས་སུ་འབྲིང་གི་ལམ་ཡིན་པས་སྡུག་བསྔལ་ལ་སྐྱོ་བ་སྐྱེས་ནས་རང་ཁོ་ནའི་དོན་དུ་ཐར་བའམ་ཞི་བ་དོན་དུ་གཉེར་དགོས་ཏེ། ལམ་སྒྲོན་ལས། སྲིད་པའི་བདེ་ལ་རྒྱབ་ཕྱོགས་ཤིང༌། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་གསུངས་པའི་ཕྱིར་རོ། །རྒྱུད་སྡེ་སྤྱིའི་རྣམ་བཞག་ཟིན་བྲིས་ལས། བསམ་པ་ཁམས་གསུམ་གྱི་སྡུག་བསྔལ་ཐམས་ཅད་ལས་དང་ཉོན་མོངས་པ་ལས་བྱུང་བར་ཤེས་ནས། དེ་ལས་ཐར་འདོད་ཀྱི་སེམས་བདེན་ཞེན་དང་བཅས་པས། ལམ་གྱི་འཇུག་སྒོ་ཐུན་མོང་གི་སྐྱབས་འགྲོ་དང༌། ཉེས་སྤྱོད་སྡོམ་པ་ལ་བརྟེན་ནས་ལྟ་བ་གང་ཟག་གི་བདག་མེད་དང༌། སྤྱོད་པ་གཞན་གནོད་གཞི་བཅས་ལས་བཟློག་པ་དང༌། སྒོམ་པ་ཞི་གནས་དང༌། ལྷག་མཐོང་ཉམས་སུ་བླངས་པས། འབྲས་བུ་ཁམས་གསུམ་གྱི་ཉོན་མོངས་པ་ལས་གྲོལ་བའི་ཕུང་པོ་ལྷག་མེད་ཀྱི་མྱང་འདས་སྒྲུབ་པར་བྱེད་དོ། །དེ་ཡང་ཉན་ཐོས་རྣམས་ལ་ནི་ཡོན་ཏན་གྱི་ཁྱད་པར་མང་པོ་ཐོབ་པ་དང༌། སེམས་ཅན་གྱི་དོན་ཅི་རིགས་པར་སྤྱོད་པ་ཡོད་མོད་ཀྱི། །འོན་ཀྱང་ཉན་ཐོས་དགྲ་བཅོམ་པ་ལ་ཡོན་ཏན་གྱི་ཁྱད་པར་དེ་དག་ངེས་པར་དགོས་པ་ནི་མ་ཡིན་ཏེ། ཤེས་རབ་རྐྱང་གྲོལ་གྱི་དགྲ་བཅོམ་པ་ལ། མངོན་ཤེས་ལྔ་ལ་སོགས་པ་མེད་པ་དང༌། ཞེས་པ་ནས། ཉན་རང་དགྲ་བཅོམ་པ་གཉིས་ཆར་ཡང༌། ཁམས་གསུམ་གྱི་ཉོན་མོངས་པ་ས་བོན་དང་བཅས་པ་སྤངས་པ་ནི་ཡིན་མོད་ཀྱང༌། དེ་དག་གི་བག་ལ་ཉལ་དང་གནས་ངན་ལེན་སྤངས་པ་མ་ཡིན་ཞིང༌། ཤེས་བྱའི་སྒྲིབ་པ་ཡང་མ་སྤངས་པས་ན། སྤངས་པ་མཐའ་དག་མ་རྫོགས་པ་དང༌། ཇི་ལྟ་བ་དང་ཇི་སྙེད་པའི་ཆོས་ཀྱི་གནས་ཚུལ་མ་ལུས་པ་མངོན་སུམ་དུ་མ་རྟོགས་པས། རྟོགས་པའི་ཡོན་ཏན་མཐའ་དག་མ་རྫོགས་པ་དང༌། སེམས་ཅན་རྣམས་ལ་ཚད་མེད་པའི་སྙིང་རྗེ་ཙམ་འཇུག་པ་ཡོད་ཀྱང༌། དེ་དག་བདག་ཉིད་ཀྱིས་འཁོར་བ་ལས་སྒྲོལ་བར་བརྩོན་པའི་ལྷག་པའི་བསམ་པ་མེད་པ་དང༌། སེམས་ཅན་ཉི་ཚེ་བ་ཙམ་མ་གཏོགས། ཕྱོགས་དུས་ཚད་མེད་པའི་སེམས་ཅན་འཁོར་བ་ལས་སྒྲོལ་བར་ནུས་པ་མ་ཡིན་ནོ། །ཞེས་གསུངས་པ་ལྟར་ཤེས་པར་བྱའོ། །ཉན་རང་སློབ་པ་གཉིས་ཀྱིས་འཁོར་བའི་རྩ་བ་བདག་འཛིན་གྱི་གཉེན་པོ་གང་ཟག་གི་བདག་མེད་རྟོགས་ནས་བསྒོམ་པ་ལ་ཁྱད་པར་མེད་པར་བྱེ་བྲག་ཏུ་སྨྲ་བ། མདོ་སྡེ་པ། སེམས་ཙམ་པ། མདོ་སྡེ་སྤྱོད་པའི་དབུ་མ་པ་རྣམས་ཀྱིས་གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པ་གང་ཟག་གི་བདག་མེད་རྫོགས་པར་རྟོགས་པའི་དོན་དུ་འདོད་ལ། རང་སྡེ་སྔ་མ་གསུམ་གྱིས་ཉན་རང་གཉིས་ལ་དེ་ལས་ལྷག་པའི་བདག་མེད་བསྒོམ་རྒྱུ་མེད་པར་འདོད་ཅིང༌། ཉན་ཐོས་སྡེ་གཉིས་ཀྱིས་ཐེག་ཆེན་ལ་ཡང་བདག་མེད་དེ་ལས་ལྷག་པ་བསྒོམ་རྒྱུ་མེད་པར་འདོད་དོ། །རྣལ་འབྱོར་སྤྱོད་པའི་དབུ་མ་རང་རྒྱུད་པ་དང༌། ཇོ་ནང་རང་ལུགས་ལ་ཉན་ཐོས་ཀྱིས་གང་ཟག་བདག་མེད་རྟོགས། རང་རྒྱལ་གྱིས་ཕྱི་དོན་བཀག་པའི་གཟུང་འཛིན་གཉིས་སྟོང་ངམ་ཕྱི་དོན་གྱིས་སྟོང་བའི་སྟོང་ཉིད་རྟོགས། ཐེག་ཆེན་རྣམས་ཀྱིས་ནི་ཆོས་ཐམས་ཅད་བདེན་པར་གྲུབ་པས་སྟོང་པའི་སྟོང་ཉིད་རྟོགས་པའི་ཚུལ་གསུམ་དུ་འདོད་དོ། །སློབ་དཔོན་སངས་རྒྱས་བསྐྱངས། ཟླ་བ་གྲགས་པ་རྣམས་ནི་ཆོས་ཐམས་ཅད་རང་བཞིན་གྱིས་གྲུབ་པས་སྟོང་པ་མ་རྟོགས་པ་དེ་སྲིད་དུ། གང་ཟག་གི་བདག་མེད་མཚན་ཉིད་ཚང་བ་རྟོགས་པ་འོང་ས་མེད་ལ། གང་ཟག་རང་རྐྱ་ཐུབ་པའི་རྫས་ཡོད་ཀྱིས་སྟོང་པར་རྟོགས་པ་དང༌། རྟག་གཅིག་རང་དབང་ཅན་གྱི་བདག་གིས་སྟོང་པར་རྟོགས་པ་དང༌། རྟོགས་ཟིན་ཇི་ལྟར་བསྒོམས་པས་འཁོར་བའི་རྩ་བ་བདག་འཛིན་གྱི་ས་བོན་ཅུང་ཟད་ཀྱང་སྤོང་མི་ནུས་པས། ཐེག་པ་གསུམ་གའི་འཕགས་པ་གསུམ་ག་ལ་ཆོས་ཀྱི་བདག་མེད་ཕྲ་མོ་མངོན་སུམ་དུ་རྟོགས་པས་ཁྱབ་པར་བཞེད་ལ། འདི་ལྟར་དགེ་ལྡན་པས་བཞེད་དོ། །འོན་ཀྱང་ཟླ་གྲགས་ཀྱིས་ཕྱིས་སུ་དེ་ལྟར་མི་འདོད་པ་འདྲའོ། །རང་ལུགས་ལ་གཞན་སྟོང་དབུ་མའི་རྒྱན་ལས། དེ་ཕྱིར་ཉན་རང་འཕགས་པའི་ཆོས་ཐམས་ཅད། །ཆོས་བདག་མེད་པར་རྟོགས་ཞེས་འདིར་མི་འཐད། །ཅེས་གསུངས་པ་ལྟར་ཉན་ཐོས་ཀྱི་ཐར་བ་ཐོབ་པ་ལ་ཆོས་ཀྱི་བདག་མེད་རྟོགས་དགོས་པར་མི་འདོད་ལ། དེའི་ཤེས་བྱེད་ནི། རྒྱན་སྟུག་པོ་བཀོད་པའི་མདོ་ལས། ཕུང་པོ་གང་ཟག་བདག་མེད་པར། །རབ་ཏུ་རྣམ་ཕྱེ་མཐོང་གྱུར་ཅིང༌། །ཆོས་ཀྱི་དངོས་ཡོད་མ་བཤིག་པར། །ཉན་ཐོས་དེ་དག་མངོན་རྟོགས་གྱུར། །བདག་མེད་གཉིས་ལ་མཁས་པ་ཡི། །རྒྱལ་བའི་སྲས་རྣམ་སྒོམ་པར་བྱེད། །ཅེས་དང༌། ལང་གཤེགས་ལས། གཞན་ཡང་བློ་གྲོས་ཆེན་པོ། ཉན་ཐོས་དང་རང་སངས་རྒྱས་ཐམས་ཅད་ནི། ཤེས་བྱའི་སྒྲིབ་པ་དང༌། ལས་ཀྱི་བག་ཆགས་མ་སྤངས་པའི་ཕྱིར། ཆོས་ལ་བདག་མེད་པ་མ་བསྒོམས་ཤིང༌། བསམ་གྱི་མི་ཁྱབ་པར་གྱུར་བའི་ཤི་འཕོ་བ་མ་ཐོབ་པས། ཉན་ཐོས་རྣམས་ལ་ཐེག་པ་གསུམ་དུ་བསྟན་ཏེ་ཐེག་པ་གཅིག་ཏུ་མ་ཡིན་ནོ། །ཞེས་གསུངས་པ་དེའོ། །