གཉིས་ཀའི་དགེ་འདུན་ལ་བརྟེན་པ་གཉིས།
གཉིས་ཀའི་དགེ་འདུན་ལ་བརྟེན་པ་གཉིས་ནི།
༧གཉིས་ཀའི་དགེ་འདུན་ལ་མགུ་བ་སྤྱད་པར་བྱ་བ་དང༌། ༨གཉིས་ཀའི་དགེ་འདུན་ལ་དགག་དབྱེ་བྱ་བ་སྟེ། དེ་རྣམས་ལས་འདས་ན། གདམས་ངག་མི་མནོས་པ་དང༌། དབྱར་གནས་ཁས་ལེན་པ་དང༌། དགག་དབྱེ་མི་བྱེད་པ་དང་གསུམ་ལ་ལྟུང་བྱེད་བསྐྱེད་ཅིང་གཞན་ལྔ་ལ་ནི་ཉེས་བྱས་སོ། །དགེ་སློང་མའི་ཆོ་ག་བཤད་ཟིན་ཏོ། །
གཉིས་པ་ཐོབ་པ་མི་ཉམས་པར་བསྲུང་བའི་ཐབས་ནི།
ཕྱི་རོལ་གྱི་རྐྱེན་གང་ཟག་གཞན་ལ་བརྟེན་ཏེ་བསྲུང་བ་དང༌། སྤང་བྱ་མི་མཐུན་པའི་ཕྱོགས་ངོ་ཤེས་པའི་སྒོ་ནས་བསྲུང་བ་དང་གཉིས། དང་པོ། ཕྱི་རོལ་གྱི་རྐྱེན་གང་ཟག་གཞན་ལ་བརྟེན་ཏེ་བསྲུང་བ་ལ་གསུམ། བྱ་བ་ཞུ་བའི་ཚུལ་གྱིས་བསྲུང་བ་དང༌། གནས་པ་ལ་གནས་པའི་ཚུལ་གྱིས་བསྲུང་བ་དང༌། ཆད་པ་བཅད་པའི་ཚུལ་གྱིས་བསྲུང་བ་དང་གསུམ། དང་པོ་བྱ་བ་ཞུ་བའི་ཚུལ་གྱིས་བསྲུང་བ་ལ། བྱ་བ་ཞུ་ཚུལ་དང༌། གནས་པ་དང་གནས་ཀྱི་ཁྱད་པར་བཤད་པ་དང་གཉིས། དང་པོ་ནི། བསྟན་པ་ཡང་ལུང་ལས་དང་པོར་གསུངས་ཤིང་སྡོམ་པ་ཐོབ་པའི་སྐད་ཅིག་གཉིས་པ་ནས་བྱ་བ་གང་བྱེད་ཀྱང་བླ་མ་ལ་ཞུ་དགོས་པའི་ཕྱིར་རོ། །དེ་ཡང་རྩ་བར། གནས་པས་གནས་ལ་མ་ཞུས་པར་བྱ་བ་མི་བྱའོ། །ཞེས་སོགས་ཀྱིས་བསྟན་ཏོ། །འདིའི་དོན་ལ་བདུན་ལས། དང་པོ་དགོས་པའི་དོན་ལ་གཉིས་ལས། བྱ་བ་ཞུས་པའི་དངོས་ཀྱི་དགོས་པ་ནི། མ་ཞུས་པའི་ཉེས་པ་ཁེགས་པའོ། །བརྒྱུད་པའི་དགོས་པ་ནི་གསུམ་སྟེ། ཁྲེལ་ཡོད་ཀྱི་བསམ་པ་བསྐྱེད་པ་དང༌། བྱ་བ་རུང་མི་རུང་ཤེས་པར་འགྱུར་བ་དང༌། བཀའ་བཞིན་དུ་བསྒྲུབས་པས་གནས་ལ་གུས་པར་འགྱུར་བའོ། །
གཉིས་པ་ཡུལ་གང་ལ་ཞུ་བ་ནི།
རང་གི་གནས་སུ་གྲུབ་ཅིང་མ་ཉམས་པ་ལ་ཞུ་སྟེ། རྩ་བར། གནས་ལ་མ་ཞུས་པར་བྱ་བ་མི་བྱའོ། །ཞེས་སོ། ། གསུམ་པ་རྟེན་གང་གིས་ཞུ་བ་ནི། གནས་པར་འོས་པས་ཞུ་སྟེ། རྩ་བར། གནས་པས་གནས་ལ་མ་ཞུ་བར་བྱ་བ་མི་བྱའོ། །ཞེས་སོ། །བཞི་པ་དངོས་པོ་གང་ཞུ་བ་ནི། བྱེད་པ་པོ་གང་ཟག་གཅིག་གི་དབང་དུ་བྱས་ན་བྱ་བ་ནི་རུང་བ་དང་མི་རུང་བ་གཉིས་སུ་ཁ་ཚོན་ཆོད་ཀྱང༌། བློ་ལ་ལྟོས་ནས་གསུམ་དུ་ཡོད་དེ། རུང་བར་ཤེས་པ་དང་མི་རུང་བར་ཤེས་པ་དང༌། རུང་མི་རུང་ཐེ་ཚོམ་ཟ་བའོ། །དེ་ཡང་མི་རུང་བར་ཤེས་པ་དེ་བླ་མ་ལ་མི་ཞུ་སྟེ། ཞུས་ན་དགག་བྱ་དང་ལྡན་པའི་ཕྱིར་རོ། །རུང་བར་ཤེས་ཀྱང་བཤང་གཅི་བྱ་བ་ལ་སོགས་པ་དམིགས་བསལ་རྣམས་བླ་མ་ལ་ཞུ་མི་དགོས་པའོ། །དམིགས་བསལ་མ་གཏོགས་པ་རུང་བར་ཤེས་པ་རྣམས་དང༌། ཐེ་ཚོམ་ཟ་བ་རྣམས་བླ་མ་ལ་ཞུ་བར་བྱ་སྟེ། འོད་ལྡན་ནས་བྱ་བ་ཞུ་བའི་སྐབས་ལས། ཀུན་ཏུ་སྤྱད་པར་རུང་བ་དག་བགྱིའོ། །ཞེས་དང༌། ཐེ་ཚོམ་ཟ་བ་རྣམས་ཞུས་ན་ཐེ་ཚོམ་ཆོད་པའི་དགོས་པ་ཡོད་པའི་ཕྱིར་རོ། །