གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

ཡང་ཁ་ཅིག་ཐེག་ཆེན་སྒྲུབ་པའི་དམིགས་པ་ཡིན་ན་ཀུན་རྫོབ་བདེན་པ་ཡིན་པས་ཁྱབ་བར་ཐལ། དེ་ལ་རང་བཞིན་དང་ཡ་མ་བྲལ་བའི་རྣམ་འགྱུར་དགོས་པའི་ཕྱིར། ཉ་ཊཱིཀ་ལས། སྒྲུབ་པའི་དམིགས་པའི་མཚན་ཉིད། རང་བཞིན་དང་ཡ་མ་བྲལ་བའི་རྣམ་འགྱུར་སྒྲུབ་པ་པོའི་ཤེས་བྱར་གྱུར་པ་སྟེ། ཞེས་དང༌། རིགས་དང་དམིགས་པའི་ཁྱད་ནི། རང་བཞིན་གཙོ་བོར་གྱུར་པ་ནི་རིགས་ཡིན་ལ། རྣམ་འགྱུར་གཙོ་བོར་གྱུར་པ་ནི་དམིགས་པ་ཡིན་ཞེས་པའོ། །ཞེས་གསུངས་པའི་ཕྱིར་ཟེར་ན་འདིའི་སྐབས་ཀྱི་རང་བཞིན་དང་རྣམ་འགྱུར་གྱི་ཁྱད་པར་ལ་དཔྱད་པར་བྱའོ། །དགེ་བ་ཡིན་ན་དམ་པས་བསྔགས་པར་བྱ་བ་ཡིན་པས་ཁྱབ་བར་ཐལ། ཉ་ཊཱིཀ་ལས། དགེ་བར་མཚོན། མི་དགེ་བའི་འགལ་བའི་མི་མཐུན་ཕྱོགས་གང་ཞིག དམ་པས་བསྔགས་པར་བྱ་བ། ཞེས་གསུངས་པའི་ཕྱིར། འདོད་ན། འཕེན་བྱེད་དགེ་བའི་ལས་ཆོས་ཅན། དེར་ཐལ། དེའི་ཕྱིར། འདོད་མི་ནུས་ཏེ། དེ་སྡུག་བདེན་དང་ཀུན་འབྱུང་བདེན་པ་ཡིན་པའི་ཕྱིར། ཁྱབ་སྟེ། དབུ་མ་བཞི་བརྒྱ་བ་ལས། ཡུལ་ནི་དགེ་བས་ཡིད་འོང་ན། །ཡུལ་དེའང་ངན་པར་བརྩི་བ་ཡིན། །གང་ཞིག་བཏང་བ་ཤེས་གྱུར་པ། །དེ་གྲུབ་པ་ཡིས་ཅི་ཞིག་དགོས། །ཞེས་གསུངས་སོ། །ཡང་དགེ་བའི་ལས་ཡིན་ན་མི་དགེ་བའི་གཉེན་པོ་ཡིན་པས་ཁྱབ་བར་ཐལ། ཉ་ཊཱིཀ་ལས། དགེ་བའི་ལས་སུ་མཚོན། སྤང་བྱ་མི་དགེ་བའི་གཉེན་པོར་གྱུར་པའི་ལས་སོ། །ཞེས་གསུངས་པའི་ཕྱིར། འདོད་ན། འཁོར་བ་འཕེན་བྱེད་ཀྱི་ཚུལ་ཁྲིམས་ཀྱི་ལས་ཆོས་ཅན། གཉེན་པོ་ཡིན་པར་ཐལ།མི་དགེ་བའི་གཉེན་པོ་ཡིན་པའི་ཕྱིར། འདོད་མི་ནུས་ཏེ། ཀུན་འབྱུང་བདེན་པ་ཡིན་པའི་ཕྱིར། ཁྱབ་སྟེ། མདོ་ལས། འདི་ནི་ཀུན་འབྱུང་འཕགས་པའི་བདེན་པ་སྟེ་སྤང་བར་བྱའོ། །ཞེས་དང༌། རྒྱུད་བླ་མ་ལས། ཤེས་བྱ་སྤང་བྱ། ཞེས་གསུངས་པའི་ཕྱིར་རོ། །ཟེར་ན་དཔྱད། ཡང་མདོ་ལུགས་མ་ལས། ཐུན་མོང་གི་ཆོས་ནི་བསམ་གཏན་བཞི་ཚད་མེད་བཞི་གཟུགས་མེད་བཞི་མངོན་ཤེས་ལྔ་རྣམས་སོ། །གང་དག་ཐུབ་པའི་ཐུན་མོང་མིན་ལ་མདོ་ལས། བྱང་ཆུབ་ཀྱི་ཕྱོགས་དང་མཐུན་པའི་ཆོས་སོ་བདུན་དང༌། སྟོབས་སོགས་ནས་མ་འདྲེས་བཅོ་བརྒྱད་ཀྱི་བར་དུ་བྱུང་ངོ༌། །ཞེས་བྱང་ཕྱོགས་སོ་བདུན་ཐུན་མོང་མ་ཡིན་པ་ཡིན་པའི་རྒྱུ་མཚན་དཔྱད། ཡང་དགེ་བ་ཡིན་ན་རང་འབྲས་ཡིད་འོང་འབྱིན་པར་ལུང་དུ་བསྟན་པས་ཁྱབ་ན། དོན་དམ་པའི་དགེ་བ་ཆོས་ཅན། དེར་ཐལ། དེའི་ཕྱིར། རྟགས་གྲུབ་སྟེ། ཉ་ཊཱིཀ་ལས། ཆོས་དབྱིངས་སོགས་འདུས་མ་བྱས་ཀྱི་དགེ་བ་མེད་ཅེས་གསུངས་པ་ནི་ནོར་བ་སྟེ། ངོ་བོ་ཉིད་སྐུ་དགེ་བ་མིན་པར་འགྱུར་བ་ལ་སོགས་ལུང་རིགས་དུ་མ་ཡོད་དོ། །ཞེས་དང༌། མཛོད་ལས། ཐར་བ་དམ་པའི་དོན་དུ་དགེ །ཞེས་གསུངས་སོ། །ཡང་ཐེག་བསྡུས་ཀྱི་འགྲེལ་བ་ལས། དགེ་མི་དགེ་གཉིས་ཀར་མི་གསལ་བ་ལུང་མ་བསྟན་པའོ། །ཞེས་དང༌། ཀུན་བཏུས་ས་འགྲེལ་ལས། རང་ལུགས་ནི། འཇོག་བྱེད་དགེ་མི་དགེ་ལུང་མ་བསྟན་གང་གིས་བཞག་ཀྱང་བག་ཆགས་ནི་ལུང་མ་བསྟན་ཉིད་ཡིན་ཏེ། ཀུན་གཞི་ལུང་མ་བསྟན་དང་རྫས་གཅིག་པའི་ཕྱིར་རོ། །ཞེས་དགེ་བའི་བག་ཆགས་ལུང་མ་བསྟན་བཤད་པ་མི་རིགས་ཏེ། ལམ་རིམ་བདུད་རྩིའི་ཉིང་ཁུ་ལས། དེའི་ཕྱིར་མི་དགེ་བ་བཅུ་སྤོང་བའི་སེམས་པ་ས་བོན་དང་བཅས་པ་ནི་དགེ་བ་བཅུའོ། །ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །ཡང་གཞི་གྲུབ་ན་ཐེག་ཆེན་སྒྲུབ་པའི་དམིགས་པ་དང་ཤེས་པར་བྱ་བ་ཡིན་པས་ཁྱབ་ཅེས་བཞེད་པ་ལ་ཅུང་ཟད་བརྟག་པར་བྱ་བ་ཡོད་དེ། རྣམ་འགྲེལ་ལས། འདི་ཡིས་སྲིན་བུའི་གྲངས་མཁྱེན་པ། །ངེད་ལ་འགར་ཡང་ཉེར་མཁོ་མེད། །བླང་དང་དོར་བྱའི་དེ་ཉིད་ནི། །ཐབས་དང་བཅས་པ་རིག་མཛད་པ། །ཞེས་དང༌། རྣམ་འགྲེལ་འགྲེལ་བཤད་རིན་ཆེན་ཕྲེང་བ་ལས། དེ་ལྟར་འདོད་ཀྱི་སྲིན་བུའི་གྲངས་སོགས་ཐམས་ཅད་རིག་པར་མཛད་པ་ཙམ་གྱིས་གྲོལ་བ་དོན་གཉེར་གྱི་བརྟེན་བྱའི་ཚད་མར་འདོད་པ་མ་ཡིན་ནོ། །ཞེས་སོ། །འཇུག་ཡུལ་གྱི་མཚན་ཉིད། གཏན་ཚིགས་བསྡུས་དོན་ལས། ཚད་མས་གཞལ་བ་ལས་བླང་དོར་བྱར་རུང་བའོ། །ཞེས་གསུངས་པས་སོ། །ཡང་ཟག་བཅས་ཟག་མེད་ཀྱི་སྐབས་སུ་ཀུན་བཏུས་ས་འགྲེལ་ལས། ངེས་འབྱེད་ཆ་མཐུན་ནི་ཉོན་མོངས་པའི་ས་བོན་དང་ལྡན་ཡང༌། སྲིད་པ་ལ་རྒྱབ་ཀྱིས་ཕྱོགས་ཤིང་གཉེན་པོ་བྱེད་པས་ཟག་མེད་དུ་འཇོག་ལ།ཞེས་དང༌། ལམ་བདེན་གྱི་མཚན་ཉིད། ཟག་མེད་འདུས་བྱས་གང་ཞིག འགོག་བདེན་གྱི་བྲལ་རྒྱུ་ཡིན་པའོ། །ཞེས་ངེས་འབྱེད་ཆ་མཐུན་ཟག་མེད་དུ་བཤད་པ་ལ་བརྟག་པར་བྱ་བ་འདི་ཡོད་དེ། ཀུན་བཏུས་ས་འགྲེལ་ལས། སྔར་ངེས་འབྱེད་ཆ་མཐུན་ཟག་མེད་དང་རྗེས་སུ་མཐུན་པས་ཟག་མེད་དུ་བཤད་ཀྱང་འདིར་ནི་ཟག་པའི་ས་བོན་རྗེས་སུ་འབྲེལ་བའི་ཆ་ནས་ཟག་བཅས་སུ་བསྡུའོ། །ཞེས་གསུངས་པའི་ཕྱིར་རོ། །