གཉིས་པ་རང་རྒྱལ་གྱི་ཐེག་པ།
གཉིས་པ་རང་རྒྱལ་གྱི་ཐེག་པ་ནི།
རང་དོན་ཁོ་ན་ཡིད་ལ་བྱེད་ཀྱང་བསྐལ་བ་བརྒྱ་སོགས་ཚོགས་མང་དུ་བསག་པར་འདོད་པའི་རང་རྒྱལ་གྱི་རིགས་ཅན་དག་ལ་ཚོགས་ལམ་དུ་བསྐལ་པ་བརྒྱ་སོགས་ཚོགས་བསགས་པའི་ཚོགས་ཀྱི་ཁྱད་པར་མཁས་བྱའི་གནས་བདུན་ལ་སོགས་པ་དང༌། ལམ་གྱི་གཞུང་ཤིང་གང་ཟག་གི་བདག་མེད་གཙོ་བོར་བྱས་པའི་བདེན་བཞིའི་རྣམ་པ་བཅུ་དྲུག་དང༌། བཟུང་བ་བདེན་པར་མེད་པ་གཙོ་བོར་བསྒོམས་པས་བསྐལ་ཆེན་བརྒྱ་སོགས་ཀྱིས་སྲིད་པ་ཐ་མའི་ཚེ་སློབ་དཔོན་གཞན་ལ་མི་བསྟེན་པར་རྟེན་འབྲེལ་ཡན་ལག་བཅུ་གཉིས་ལུགས་འབྱུང་ལྡོག་ཏུ་བསྒོམས་ནས་རང་རྒྱལ་གྱི་དགྲ་བཅོམ་ཐོབ་ལ། དེ་འདྲའི་ལམ་རང་རྒྱལ་གྱི་ཐེག་པ་ཡིན་ནོ། །མཛོད་ལས། བསེ་རུ་བསྐལ་བ་བརྒྱ་ཡི་རྒྱུས། །ཞེས་དང༌། མངོན་རྟོགས་རྒྱན་ལས། གཟུང་དོན་རྟོག་པ་སྤོང་ཕྱིར་དང༌། །འཛིན་པ་མི་སྤོང་ཕྱིར་དང་ནི། །རྟེན་གྱི་བསེ་རུ་ལྟ་བུའི་ལམ། །ཞེས་སོ། །ཉ་ཊཱིཀ་དང་གསེར་ཕྲེང་ལས་བསེ་རུ་ལྟ་བུ་དང་ཚོགས་སྤྱོད་ཆེ་ཆུང་གསུམ་གས་བསྐལ་བ་བརྒྱར་ཚོགས་བསག་དགོས་པར་གསུངས་ལ། ས་བཟང་མ་ཏི་པཎ་ཆེན་གྱི་ཀུན་བཏུས་འགྲེལ་བར་ཚོགས་སྤྱོད་ཆེ་ཆུང་གཉིས་ཀས་སྔ་མ་བསེ་རུ་རང་རྒྱལ་ལས་ཚོགས་ཉུང་བར་བསགས་པར་གསུངས། ཀུན་མཁྱེན་ཀློང་ཆེན་གྱི་གྲུབ་མཐའ་མཛོད་དུ་བསེ་རུ་རང་རྒྱལ་གྱིས་བསྐལ་བ་བརྒྱ་དང༌། ཚོགས་སྤྱོད་ཆེ་བས་མི་ཚེ་བརྒྱ་དང༌། ཚོགས་སྤྱོད་ཆུང་ངུས་མི་ཚེ་བཅུ་གསུམ་ཚོགས་བསགས་པར་གསུངས་སོ། །