[༤] སྔ་འགྱུར་བསྟན་པའི་བབ་སོ་གཉིས་པ་གནུབས་ཆེན་སངས་རྒྱས་ཡེ་ཤེས་ནི།
ཡབ་གནུབས་རིགས་གསལ་བའི་དབང་ཕྱུག་དང་། ཡུམ་མཆིམས་མོ་བཀྲ་ཤིས་མཚོའི་སྲས་སུ་དབུས་རི་སྒྲགས་ཀྱི་ཕུར་སྐུ་འཁྲུངས། གནུབས་ཆེན་འདི་འཁྲུངས་པའི་དུས་ཚིག་ལ་འགའ་ཞིག་རལ་བ་ཅན་གྱི་དུས་སུ་བྱུང་ནས་ཁྲི་བརྩེགས་ཀྱི་བར་དུ་བཞུགས་པར་འདོད་པ་དང་། ཁ་གཅིག་བཙན་པོ་ཁྲི་སྲོང་ལྡེའུ་བཙན་ནས་ཁྲི་བརྩེགས་ཀྱི་བར་བཞུགས་པར་འདོད་པ་སོགས་ཅི་རིགས་བྱུང་ཡང་། ལོ་ཆེན་དྷརྨ་ཤྲཱིས་སྤྱི་ལོ་༨༨༤པ་རབ་བྱུང་སྔོན་གྱི་ལོ་བརྒྱ་དང་གྱ་ལྔ་པ་ཤིང་ཕོ་བྱི་བའི་ལོ་དཔྱིད་ཟླ་ར་བར་འཁྲུངས་པར་བཞེད། སྐུ་མ་བལྟམས་པའི་གོང་ཕ་མེས་ཀྱི་དུར་ས་སྒྲགས་རི་བོ་ཆེར་ཙན་དན་གྱི་སྡོང་པོ་སྐྱེས་པ་ལ་རྒྱ་ནག་ཧྭ་ཤང་ཞིག་གིས་བརྟགས་ཏེ་སྤྲུལ་པའི་སྐུ་འཁྲུངས་པའི་ལྟས་ཡིན་པས་གསོ་བའི་ཆོ་ག་འདི་ལྟར་གྱིས་ཞེས་སྔོན་ནས་ལུང་བསྟན་པ་བཞིན་བསྒྲུབས། སྐྱ་མིང་རྡོ་རྗེ་ཁྲི་གཙུག་དང་། ཕྱིས་བསྟན་སྒོར་ཞུགས་པའི་ཆོས་མིང་སངས་རྒྱས་ཡེ་ཤེས་སུ་བཏགས། གསང་མཚན་རྡོ་རྗེ་ཡང་དབང་གཏེར་ཞེས་གྲགས། དགུང་ལོ་བདུན་ནས་འོ་བྲན་དཔལ་གྱི་གཞོན་ནུའི་ཕྱག་ཕྱིར་འབྲངས་ཏེ་རིག་པའི་གནས་ཐམས་ཅད་ལ་བྱང་བར་མཛད། མཁན་པོ་བྷོ་དྷི་ས་ཏྭ་ལས་རབ་ཏུ་བྱུང་། རིག་འཛིན་འདུས་པ་རྩ་བའི་རྒྱུད་དུ། རཏྣ་བྷུདྡྷ་ཛྙཱ་ན་ཡིས། །ཁྱད་པར་སྐུ་ཡི་གསང་བ་སྟོན། །ཞེས་ལུང་བསྟན་པ་ལྟར་གཞོན་ནུའི་དུས་སློབ་དཔོན་ཆེན་པོ་པདྨ་ལས་བཀའ་བརྒྱད་ཀྱི་དབང་གསན་པའི་ཚེ་མེ་ཏོག་འཇམ་དཔལ་སྐུའི་དཀྱིལ་འཁོར་ལ་ཕོག་ཅིང་བསྒྲུབས་པས་གྲུབ་རྟགས་མངོན་དུ་གྱུར། ཕྱིས་རྒྱ་བལ་གྱི་རུ་མཚམས་རྡོ་རྗེ་རྩེ་ལྔའི་ཕུག་ཏུའང་རྒྱུད་དང་མན་ངག་དུ་མ་གསན། གཞན་ཡང་ཤྲཱི་སེདྷ། བཱི་མ་ལ། ཀ་མ་ལ་ཤི་ལ། དྷ་ན་དྷ་ལ། ཁྲག་འཐུང་ནག་པོ། ཤཱནྟིཾ་གརྦྷ། དྷ་ན་སཾ་སྐྲི་ཏ། སོ་ཀྱ་དེ་བ། དྷ་ན་རཀྵི་ཏ། བྲམ་ཟེ་གསལ་བའི་རྒྱན། དྷརྨ་བོ་དྷི། དྷརྨ་རཱ་ཛ། གཙུག་ལག་དཔལ་དགེ། བ་སུ་དྷ་ར། ཆེ་བཙན་སྐྱེས་སོགས་རྒྱ་བལ་བྲུ་ཤའི་ལོ་པཎ་རྣམས་དང་། བོད་ཀྱི་མཁས་པ་གཉགས་ལོ་ཡེ་ཤེས་གཞོན་ནུ། དེའི་སློབ་མ་དཔལ་གྱི་བུ་བརྒྱད་ཐམས་ཅད་དང་། དེའི་ནང་ནས་ཀྱང་སོག་པོ་དཔལ་ཡེ་དང་། རྨ་གཉགས་ཐུན་མོང་གི་ཡང་སློབ་ཞང་རྒྱལ་བའི་ཡོན་ཏན་གཉིས་ལ་གཙོ་བོར་བསྟེན་ནས་མདོ་སྔགས་ཕྱི་ནང་གི་རྒྱུད་སྡེ་མན་ངག་དང་བཅས་པ་མཐའ་དག་ལ་སྦྱངས་ཏེ་མཁས་པར་མཛད། རྒྱ་བལ་གྱི་ཡུལ་དུ་ལན་བདུན་བྱོན་ནས་རྒྱུད་དང་མན་ངག་ཆོག་ཡིག་བསྟན་སྲུང་དང་བཅས་པ་མང་པོ་བསྒྱུར། ཁྱད་པར་དགུང་ལོ་ལྔ་བཅུ་རྩ་བཞི་པ་ཤིང་སྦྲུལ་གྱི་ལོར་བལ་ཡུལ་དུ་བྱོན་ནས་བ་སུ་དྷ་ར་ལས་དབང་དང་གདམས་པ་དཔག་མེད་ཞུས་ཤིང་ཆོས་ཕྱིར་གཏོང་བ་དང་དད་གུས་ཀྱིས་མཉེས་པར་མཛད་པས། སློབ་དཔོན་གྱི་ཞལ་ནས། རྒྱ་གར་ན་ངའི་སློབ་དཔོན་གསལ་བའི་རྒྱན་ཞེས་བྱ་བ་ལོ་སྟོང་དང་དྲུག་བརྒྱ་ལོན་པ་ཞིག་བཞུགས་པས་དེའི་དྲུང་དུ་སོང་ལ་ཆོས་ཞུས་ཤིག་གསུངས་པ་ལྟར་བྱོན་པས། ཝཱ་ར་ཎ་སིར་ཨ་ཙཪྱ་གསལ་བའི་རྒྱན་ཞལ་མཐོང་། ཆོས་མང་དུ་ཞུས་ཤིང་ཁྱད་པར་དུ་མདོ་ཡོངས་སུ་རྫོགས་པའི་དབང་དང་དགོངས་འདུས་ཀྱི་གདམས་ངག་ཀྱང་གསན། སློབ་དཔོན་འདི་ནི་བདེ་བ་གསལ་མཛད་དང་གཅིག་པར་རོག་བརྩོན་འགྲུས་སེང་གེ་བཞེད། དེ་ནས་དགོངས་འདུས་ཀྱི་གཞུང་བཤད་གསུང་བར་ཞུས་པས། བ་སུ་དྷ་རའི་ཞལ་ནས། དྷ་ན་རཀྵི་ཏ་དང་། དྷརྨ་བོ་དྷི་དང་། དྷརྨ་རཱ་ཛ་རྣམས་ཆེ་བཙན་སྐྱེས་ཀྱིས་སྤྱན་དྲངས་ནས་བྲུ་ཤའི་ཡུལ་དུ་བཞུགས་པས་དེར་ཞུས་ཤིག་གསུངས་པ་ལྟར། བྲུ་ཤའི་ཡུལ་དུ་བྱོན་ཏེ་ལོ་པཎ་བཞི་ལས་གཙོ་བོ་གཞུང་བཤད་དང་། གཞན་ཡང་དབང་བཀའ་ཕྱག་བཞེས་སོགས་གདམས་ངག་གི་གནད་ལ་ཞུན་ཐར་བཅད་དེ་ཐུགས་བཅུད་ལོངས་པར་མཛད་དོ། །དེ་ནས་གྲུབ་པ་ཇི་ལྟར་བརྙེས་པའི་ཚུལ་ནི། ཞུག་གི་རྡོ་རྗེ་སྒོམ་བུར་ཟླ་བ་དགུ་ལ་ཐུགས་དམ་ཉམས་བཞེས་མཛད་པས་གནས་ལུགས་གཏན་ལ་ཕབས། རྡོ་རྗེ་གདན་དང་གཡུང་དྲུང་རིན་ཆེན་གཏེར་གནས་སུ་གསང་བདག་གིས་ཞལ་དངོས་སུ་བསྟན་ཏེ་ཕྱག་མཚན་གྱི་རྡོ་རྗེ་ཕྱག་ཏུ་བབ་ཅིང་མིང་གི་དབང་བསྐུར། འོལ་མོ་ཚལ་དུ་དྲི་ཟའི་ཕྲུ་གུས་སངས་རྒྱས་ཀྱི་མཚན་གསོལ། གང་བཟང་དང་གླིང་དགུའི་མཚོ་འགྲམ་དུ་གནོད་སྦྱིན་དང་ཀླུ་ཕྲུག་སྤུན་གསུམ་གྱིས་མཆོད། དུར་ཁྲོད་ལྷས་སུ་ཡི་དྭགས་ཕྲུ་གུས་ཞབས་ལ་གཏུགས། འོད་མའི་ཚལ་དུ་ཡ་མཱནྟ་ཀས་ཞལ་བསྟན་ནས་དབང་དང་དངོས་གྲུབ་བསྩལ་ཅིང་གསང་སྔགས་ཀྱི་བདག་པོར་དབང་བསྐུར། མ་གཤིན་མཁའ་འགྲོའི་དབང་ཕྱུག་རྣམས་སྲུང་མར་གཏད། འཇམ་དཔལ་གྱིས་ལུང་བསྟན་པ་བཞིན་རྒྱ་གར་དུར་ཁྲོད་གསང་ལུང་ནག་པོར་ཨེ་ཀ་ཛཱ་ཊིས་དངོས་གྲུབ་ཀྱི་རྫས་བྱིན་པས་དབྱིངས་ལ་ཡེ་ཤེས་ཤར་ཏེ་ས་ཆེན་པོའི་རྟོགས་པ་མངོན་དུ་གྱུར། པདྨ་གར་དབང་དང་། གཤིན་རྗེ་གཤེད་ཀྱི་དཀྱིལ་འཁོར་ཡོངས་སུ་རྫོགས་པས་ཞལ་གཟིགས་ཤིང་དབང་དང་དངོས་གྲུབ་ཐོབ། གཞན་ཡང་ཐོགས་པ་མེད་པའི་མངོན་ཤེས་དང་ལྷའི་སྤྱན་སོགས་མངའ། ཆུ་ལ་མི་བྱིང་ཞིང་རི་བྲག་ལ་ཐ་ལེར་གཤེགས་པ་སོགས་ངོ་མཚར་བའི་རྣམ་ཐར་བསམ་གྱིས་མི་ཁྱབ། བོད་ཡུལ་དབུས་ཀྱི་གནས་སྒྲགས་ཀྱི་ཡང་རྫོང་དུ་སྒྲུབ་གནས་ཀྱི་མཐིལ་མཛད་ཅིང་དབེན་པ་འབའ་ཞིག་བརྟེན་དགོངས་པ་ལ། སྤྱིར་དུས་འདི་ཙམ་ན་རྒྱལ་ཁྲིམས་ཞིག་ཅིང་ཕྱོགས་རིས་ཀྱི་འཁྲུགས་པ་དར་བའི་སྐབས་སུ་གྱུར་པས་གནུབས་ཆེན་ཡབ་སྲས་ལ་འོ་བརྒྱལ་ཆེན་པོ་བྱུང་། ཁྱད་པར་སྐུ་ཚེ་སྔ་མ་རྒྱ་གར་དུ་ཤན་པ་མ་རུ་ཙེ་བྱ་བར་འཁྲུངས་ནས་སེམས་ཅན་གྱི་དོན་མཛད་པའི་གདུལ་ཞིང་གི་ལྷག་མ་ལུས་པ་རྣམས་རྫོགས་པར་མཛད་པ་དང་། བོད་འདིར་དབོན་སྲས་ཀྱིས་བསྟན་པ་ཉམས་པར་བྱེད་པས་མཚོན་སྔ་ཕྱིར་བསྟན་པ་ལ་གནོད་བྱེད་མང་དུ་བྱུང་བ་དེ་དག་དྲག་སྔགས་ཀྱིས་ཚར་བཅད་ནས་བསྟན་པ་སྲུང་བའི་ཕྱིར་རྒྱལ་བའི་ཕྲིན་ལས་ཀྱིས་བསྐུལ་བ་ལས། རྣམ་པའི་རྐྱེན་ཡུལ་པའི་ཁེངས་ལོག་སྔ་ཕྱི་བར་གསུམ་དུ་བྱུང་ནས་རིགས་ཀྱི་སྲས་གཉིས་ཀྱང་བཀྲོངས་པས། ཇི་སྐད་དུ། ཉོན་མོངས་བོད་ཡུལ་དབུས་སུ་ལངས། །འཚོ་བའི་ཟས་རྣམས་འབངས་ཀྱིས་ཕྲལ། །ཞེས་དང་། བདག་འདྲ་གནུབས་ཀྱི་བན་ཆུང་ཡང་། །སྙིང་ནས་ཆོས་བཞིན་བྱ་སེམས་སྐྱེས། །ཞེ་སྡང་དགྲ་བོས་བྱེད་མ་སྟེར། །སངས་རྒྱས་བསྟན་པ་བསྲུང་བའི་ཕྱིར། །ཞེ་སྡང་དེ་མ་ཐག་ཏུ་བསྐྱེད། །དཀར་པོའི་ཆེ་བ་འདོན་བསམས་ནས། །ངན་སྔགས་ཡིག་སྣ་སྣ་ཚོགས་བསླབས། །ཞེས་པ་ལྟར་རྒྱ་བལ་གྱི་ཡུལ་ནས་གཤེད་སྐོར་རྒྱ་མཚོའི་དྲག་སྔགས་རྣམས་སྤྱན་དྲངས་པ་སྟེ། ཞལ་ནས། བླ་མ་བཅུ་གཅིག་ཞབས་ནས་བཏེགས། །འོན་ཀྱང་མཁས་པ་བཞི་ལ་གཏུགས། །སློབ་དཔོན་དཔལ་གྱི་སེང་གེ་དང་། །རྒྱ་གར་ཁྲག་འཐུང་ནག་པོ་དང་། །ཕུང་བྱེད་ཤནྟིཾ་གརྦྷ་དང་། །བལ་པོ་བ་སུ་དྷ་ར་བཞི། །མཁས་པ་བཞི་ཡི་ཐུགས་བརྟོལ་ནས། །ཟབ་པའི་མན་ངག་ཐུགས་ལ་བཏགས། །ཞེས་དང་། དེ་དག་ཀྱང་གནད་དུ་བསྡུས་པ་བལ་པོའི་སློབ་དཔོན་ཉིད་ལས་བྱུང་བ་སྟེ། འདི་སྐད་དུ། སློབ་དཔོན་བལ་པོའི་རྒྱལ་པོ་ཡིས། །ཡང་ལེ་ཤོད་ཀྱི་བྲག་ཕུག་ཏུ། །གནུབས་ཀྱི་བན་ཆུང་འདིར་ཤོག་གསུངས། །བམ་ཆེན་རོ་ཡི་དབང་བསྐུར་ནས། །ལྷ་རུ་འཇམ་དཔལ་ཚེ་བདག་གཏད། །ཅེས་དང་། བདག་འདྲ་སངས་རྒྱས་ཡེ་ཤེས་ཀྱིས། །སྒྲུབ་ཁང་ཡ་མའི་མཁར་ལ་བྱས། །སྒྲགས་ལ་ནག་པོའི་རྩེ་མོ་རུ། །ཉེ་འབྱེད་རླུང་གི་འཁོར་ལོ་བསྐོར། །གྲོང་ཁྱེར་སུམ་ཅུ་རྩ་བདུན་བརླགས། །ཞེས་འབྱུང་བ་ལྟར། དྲུག་ཅུ་རེ་གཅིག་པར་སྒྲགས་སུ་ཁེངས་ལོག་བྱུང་བས་གཤིན་རྗེ་གཤེད་ཀྱི་དྲག་སྔགས་རྣོན་པོས་གྲོང་ཁྱེར་མང་པོ་བརླག་པར་མཛད་དེ་གནུབས་ཡུལ་རོང་དུ་བྲོས། དེར་ཡང་བཞུགས་སུ་མ་སྟེར་བས་སྙེ་མོ་བྱེ་མཁར་དུ་བྱོན། གནས་དེར་ཡང་དམག་གི་ཆོམ་པོས་བསྐོར་ཞིང་སྐུ་སྲོག་ལ་བསྡོ་བར་ཉེ་བ་ན། མཁར་གྱི་རྩེ་ནས་ལྷ་འདྲེ་གཉན་པོ་དཔང་དུ་གསོལ་ཏེ་ཚིགས་སུ་བཅད་པའི་བདེན་པ་བདར་ནས་ཆོས་གོས་བརྡབས་པས་དམ་ཅན་ཆོས་སྐྱོང་རྣམས་མངོན་སུམ་པར་བྱུང་སྟེ། བདག་ཅག་གི་མཐུ་རྩལ་གྱིས་རི་རབ་ཐལ་བར་བརླག ཉི་ཟླ་ཆ་ལང་རྡེབ། གནམ་ས་བླ་འོག་བསྒྱུར་ནུས་ཀྱང་། ཚེ་རབས་སྔ་མའི་ལན་ཆགས་བརྡོལ་བས་སྔོན་ཆད་གྲོགས་བྱེད་དུ་མ་སྟེར། ད་ནི་བཀའ་བཞིན་འཚལ་ལོ་ཟེར་བས། ཆོས་གོས་ཀྱི་ཆ་ག་ནས་སེང་ལྡེང་གི་ཕུར་བུ་བཏོན། དམ་ཅན་རྣམས་ཀྱི་སྲོག་སྙིང་དྲངས། དམག་མི་ཡོད་པའི་རི་ལོགས་ལ་ཕུར་བུ་དྲིལ་ཞིང་བསྡིགས་པས། རི་ལ་མེ་དཔུང་ཆེན་པོ་བྱུང་སྟེ་དམག་རྣམས་ཐམས་ཅད་བསྲེགས་ཤིང་བརླག་པར་བྱས། སྐུ་དགྲ་ཐུལ་རྗེས་ལོ་གསུམ་གྱི་བར་ལ་དབུལ་ཞིང་ཕོངས། མངའ་བདག་རལ་བ་ཅན་གྱི་བར་ཡན་ཆད་དུ་རྒྱ་གར་དང་བོད་ཀྱི་བར་དུ་འབྱོན་བཞུད་ཀྱི་ངང་དུ་ཡོད་པ་ལས། རྒྱལ་པོ་གླང་དར་མས་བསྟན་པ་བཤིགས་པའི་དུས་རྒྱལ་པོས་ཁྱོད་ལ་ནུས་པ་ཅི་ཡོད་ཟེར་བས། ངས་སྔགས་ཙམ་བཟླས་པའི་ནུས་པ་འདི་ལ་གཟིགས་གསུངས་ནས་སྡིགས་མཛུབ་གནམ་དུ་ཕྱར་བས་སྡིགས་མཛུབ་ཀྱི་སྟེང་ན་ལྕགས་ཀྱི་སྡིག་པ་ནག་པོ་གཡག་ཙམ་དགུ་བརྩེགས་སུ་འདུག་པ་མཐོང་བས་རྒྱལ་པོ་སྐྲག་སྟེ་དཀོན་མཆོག་སྔགས་པའི་སྐུ་ལ་མི་བདོའོ་ཆོས་མཛོད་ཅིག་ཟེར། ད་རུང་ནུས་པ་འདི་ལ་གཟིགས་ཤིག་ཟེར་ནས་སྡིགས་མཛུབ་ཀྱིས་ཐོག་ཕབ་སྟེ་ཕ་རིའི་བྲག་ལ་བསྣུན་པས་ཚལ་བར་སོང་། དེར་རྒྱལ་པོ་ཤིན་ཏུ་འཇིགས་ཤིང་སྐྲག་ནས་ཁྱེད་འཁོར་དང་བཅས་པ་ལ་གནོད་པ་མི་བྱེད་དོ་ཟེར་ནས་བཏང་། དུས་དེར་སྔགས་འཆང་གོས་དཀར་ལྕང་ལོ་ཅན་རྣམས་ལ་གནོད་པ་མ་བྱུང་བ་སློབ་དཔོན་འདིའི་བཀའ་དྲིན་ཡིན་པར་གྲགས། དར་མས་བསྟན་པ་བསྣུབས་པ་ཐུགས་ཀྱིས་མ་བཟོད་དེ་སླར་ཡང་དྲག་སྔགས་སྤུ་གྲི་རེག་ཆོད་མང་པོ་ཚགས་སུ་བཙུད་ནས་མངོན་སྤྱོད་ཀྱི་ཐུགས་རྗེས་མཚམས་སྦྱར་བར་དགོངས་པ་ན། སྡིག་སྤྱོད་རྒྱལ་པོ་ལྷ་ལུང་དཔལ་གྱི་རྡོ་རྗེས་བསྒྲལ་ཟིན་པས་དྲག་སྔགས་འཆོལ་གྱིས་དོགས་ནས་གཏེར་དུ་སྦས། མདོའི་འགྲེལ་ཆེན་མུན་པའི་གོ་ཆ་དང་། དཀའ་གཅོད་སྨྲ་བའི་མཚོན་ཆ། སྒྱུ་འཕྲུལ་བརྒྱད་ཅུ་པའི་མངོན་རྟོགས་འགྲེལ། རྫོགས་ཆེན་གྱི་མན་ངག་བསམ་གཏན་མིག་སྒྲོན་སོགས་བསྟན་བཅོས་མང་པོ་བརྩམས་པ་དང་། བཤད་སྒྲུབ་ཀྱི་ཕྲིན་ལས་ཀྱིས་བསྐྱེད་རྫོགས་རྫོགས་ཆེན་གསུམ་གྱི་བསྟན་པས་ས་སྟེང་ཁྱབ་པར་མཛད། འདི་ལ་སློབ་མ་མང་ཡང་ཁྱད་པར་དུ་འཕགས་པའི་སློབ་མ་ཐུགས་ཟིན་གྱི་སྲས་བཞི། སྲས་ཀྱི་དམ་པ་གཅིག་དང་ལྔ་བྱུང་སྟེ། སློབ་དཔོན་ཉིད་ཀྱི་མགུར་ལས། གནུབས་བན་ཡང་དབང་གཏེར། །ཤེས་རབ་ནགས་ཚལ་ལ། །ཡོན་ཏན་ལྗོན་ཤིང་འཁྲུངས། །སྣོད་ཀྱི་མཆོག་ལྔར་བླུག །གཅིག་གིས་རྩ་བ་ཁྱེར། །བློན་ཆེན་འཕགས་པ་ཡིན། །གཅིག་གིས་ལོ་མ་ཁྱེར། །ལེགས་པའི་སྒྲོན་མེ་ཡིན། །གཅིག་གིས་མེ་ཏོག་ཁྱེར། །དན་གྱི་ཡོན་ཏན་མཆོག །གཅིག་གིས་འབྲས་བུ་ཁྱེར། །ཡེ་ཤེས་དབང་ཕྱུག་ཡིན། །གཅིག་གིས་ཐམས་ཅད་ཁྱེར། །ཡོན་ཏན་རྒྱ་མཚོ་ཡིན། །ཞེས་གསུངས་པའི་སྲས་བཞི་ནི། རྩ་བ་རྒྱུད་ལ་མཁས་པ་སྤ་གོར་བློ་ཆེན་འཕགས་པ། ལོ་མ་བདུད་རྩི་ལ་མཁས་པ་སྲུའི་སྟོན་པ་ལེགས་པའི་སྒྲོན་མེ། མེ་ཏོག་བརྒལ་ལན་ལ་མཁས་པ་དན་ཡོན་ཏན་མཆོག འབྲས་བུ་ལྟ་དགོངས་ཀྱི་གནད་ལ་མཁས་པ་སོ་ཡེ་ཤེས་དབང་ཕྱུག་གོ །སྲས་ཀྱི་དམ་པ་གཅིག་ནི་དེ་བཞི་ཀ་ལ་མཁས་པ་ཁུ་ལུང་བ་ཡོན་ཏན་རྒྱ་མཚོའོ། །ཡང་མདོ་དབང་རང་གི་ལོ་རྒྱུས་རྣམས་སུ། ཁུ་ལུང་པ་ལ་དབང་རྒྱུད་གདམས་ངག་གི་བཀའ་བབ། སྲུ་ལ་དབང་བཞི་ཆུ་བོའི་བཀའ་བབ་ཞེས་ཀྱང་འབྱུང་ངོ་། །སློབ་དཔོན་འདི་ཆོས་རྒྱལ་ཁྲི་སྲོང་གི་དུས་ནས་བྱུང་ཞིང་ཚེའི་རིག་འཛིན་བརྙེས་པས་བསྟན་པ་ཕྱི་དར་བར་བཞུགས་པར་གྲགས། དེ་ལྟར་མདོ་སྒྱུ་སེམས་གསུམ་གྱི་བསྟན་པ་མི་ནུབ་པར་སྤེལ་ནས་མཐར་རང་བཞིན་རྫོགས་པ་ཆེན་པོའི་ལམ་ལས་ལྷུན་གྲུབ་འོད་ཀྱི་ཕུང་པོར་མྱ་ངན་ལས་འདས་སོ། །