གསུམ་པ་མདོ་ལམ་གྱི་ཐེག་ཆེན་པ།

གསུམ་པ་མདོ་ལམ་གྱི་ཐེག་ཆེན་པ་ནི།

བདག་གིས་སེམས་ཅན་མཐའ་དག་སྲིད་ཞིའི་འཇིགས་པ་མ་ལུས་པ་ལས་བསྒྲལ་ཏེ་སངས་རྒྱས་ཀྱི་སར་འགོད་པར་འདོད་པའི་མདོ་ལམ་ལ་གནས་པའི་བྱང་སེམས་ཀྱི་རིགས་ཅན་དག་ལ། ཀུན་རྫོབ་བྱང་ཆུབ་ཀྱི་སེམས་ཀྱི་གཞི་ལ་ཕར་ཕྱིན་དྲུག་དང་མཁྱེན་གསུམ་གྱི་རྣམ་པ་བརྒྱ་དོན་གསུམ་བསྒོམས་ནས་བསྐལ་ཆེན་གྲངས་མེད་གསུམ་དུ་ཚོགས་མཐའ་ཡས་པ་བསགས་པ་སོགས་ཀྱི་ལམ་དེ། མདོ་ལམ་གྱི་ཐེག་ཆེན་གྱི་ཐེག་པའམ་ལམ་ཡིན་ནོ། །འབའ་མདའ་བླ་མ་ཐུབ་བསྟན་དགེ་ལེགས་རྒྱ་མཚོའི་དུས་འཁོར་དབང་ཆེན་གྱི་ཆོ་ག་ལས། ས་བཅུ་པའི་རྒྱལ་ཚབ་ཆེན་པོ་ཐོབ་པའི་ལམ་མདོ་ལམ་པའི་བྱང་ཆུབ་སེམས་དཔའི་ཐེག་པ་ཡིན་ནོ། །ཞེས་ས་བཅུ་བའི་རྒྱལ་ཚབ་ཆེན་པོའི་ལམ་གྱི་བར་ལས་མ་བཞག་ལ། ལྷན་ཐབས་འོད་བརྒྱ་འབར་བ་ལས། ཕྱོགས་བཅུ་ན་བཞུགས་པའི་སངས་རྒྱས་ཐམས་ཅད་ཀྱང་ལམ་འདི་བསྒོམས་པས་སངས་རྒྱས་པ་ཁོ་ན་ཡིན་ཞེས་པ་སྟེ། དེའི་རྒྱུ་མཚན་ཡང་བྱང་ཆུབ་སེམས་དཔའ་ཐོག་མ་ནས་སྔགས་ཀྱི་སྒོར་ཞུགས་པ་རྣམས་ལ་སྨོས་མ་དགོས། རེ་ཞིག་མདོ་ལམ་ཁོ་ན་ལ་ཞུགས་པ་རྣམས་ཀྱང་མཐར་རྫོགས་པའི་སངས་རྒྱས་ཐོབ་ཀར་སྔགས་ལ་མི་འཇུག་པའི་ཐབས་གཏན་ནས་མེད། དེ་ལྟ་བུའི་སྔགས་ལམ་དེ་ཡང་རྒྱུད་སྡེ་འོག་མ་གསུམ་ཀྱི་ལམ་ཙམ་མམ། རྣལ་འབྱོར་བླ་མེད་ཀྱི་ལམ་བསྐྱེད་རིམ་དང༌། ལས་རབ་འབྱམས་སོགས་ཀྱིས་མ་ཡིན་ཏེ། རྫོགས་པའི་རིམ་པ་མཐར་ཐུག་ལ་བརྟེན་ནས། བླ་ན་མེད་པའི་བྱང་ཆུབ་སྒྲུབ་དགོས་པ་ལ། ཞེས་གསུངས་པ་ལ་གཞིག་ན་འཚང་རྒྱ་ཀར་སྔགས་བླ་མེད་ཀྱི་སྔགས་ཀྱིས་སྣོན་པ་བཏབ་ནས་འཚང་རྒྱ་དགོས་སོ། །དེ་ཡང་སྔགས་ལམ་ལ་ཞུགས་པ་ལ་རྒྱུ་འབྲས་མན་ངག་བདུན་ནམ་བདག་གཞན་མཉམ་བརྗེའི་སྒོ་ནས་བྱང་ཆུབ་མཆོག་ཏུ་སེམས་བསྐྱེད་དགོས་པ་ཡིན་ཏེ། བསྟན་བཅོས་མངོན་རྟོགས་རྒྱན་ལས། སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་གསུངས་པ་ལྟར་ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་བསམ་པ་བྱང་ཆུབ་ཀྱི་མཆོག་ཏུ་སེམས་བསྐྱེད་ནས། སྤྱོད་པ་ཕ་རོལ་ཏུ་ཕྱིན་པ་དྲུག་ལ་རྫོགས་པར་སློབ་པ་ཙམ་ཞིག་ནི། ཐེག་པ་ཆེན་པོ་པ་སྤྱིའི་ལམ་གྱི་གཞུང་ཤིང་ཡིན་ཏེ། རྡོ་རྗེ་ཐེག་པ་ལ་སློབ་པ་རྣམས་ཀྱིས་ཀྱང་དེ་ལ་འཇུག་དགོས་པས་རྒྱུད་སྡེ་རྣམས་ལས་ལན་མང་དུ་གསུངས་པའི་ཕྱིར་ཏེ། རྒྱུད་སྡེ་བཞི་པོ་གང་གི་སྒོ་ནས་འཇུག་ཀྱང༌། ལག་ན་རྡོ་རྗེ་དབང་ བསྐུར་བའི་རྒྱུད་ལས། བྱང་ཆུབ་ཀྱི་སེམས་སྒོམ་པ་རྫོགས་པར་གྱུར་པ་ན་དཀྱིལ་འཁོར་དུ་གཞུག་ཅིང་དབང་བསྐུར་བར་གསུངས་པ་ལྟར། ལམ་ཐུན་མོང་བས་རྒྱུད་སྦྱངས་པ་ཞིག་ངེས་པར་སྔོན་དུ་འགྲོ་དགོས་ཏེ། སྤྱོད་བསྡུས་ལེའུ་དང་པོ་ལས། སློབ་མས་ལམ་ལ་ཅིག་ཅར་སློབ་བམ་རིམ་གྱིས་བསླབ་དྲིས་པའི་ལན་དུ། རིམ་གྱིས་སློབ་པ་ཡིན་གྱི། ཅིག་ཅར་ནི་མ་ཡིན་ནོ། ། ཞེས་གསུངས་པའི་འོག་ཏུ། དེའི་རིམ་པ་ནི་འདི་ཡིན་ཏེ། ཐོག་མ་ཉིད་དུ་སངས་རྒྱས་ཀྱི་ཐེག་པའི་བསམ་པ་ལ་བསླབ་བོ། །གང་གི་ཚེ་སངས་རྒྱས་ཀྱི་ཐེག་པའི་བསམ་པ་ལ་ལོབས་པར་གྱུར་པ་དེའི་ཚེ། ཐེག་པ་གསར་པ་དྲན་པ་གཅིག་པའི་ཏིང་ངེ་འཛིན་ལ་སློབ་བོ། །ཞེས་གསུངས་ཤིང༌། བརྟག་གཉིས་ལས་ཀྱང༌། དང་པོར་གསོ་སྦྱོང་སྦྱིན་པར་བྱ། །དེ་ནས་བསླབ་པའི་གནས་བཅུ་སྦྱིན། །དེ་ལ་བྱེ་བྲག་སྨྲ་བ་བསྟན། །མདོ་སྡེ་པ་ཡང་དེ་བཞིན་ནོ། །རྣལ་འབྱོར་སྤྱོད་པ་དེ་ལས་ཕྱིས། །དེ་ཡི་རྗེས་སུ་དབུ་མ་བསྟན། ། སྔགས་ཀྱི་རིམ་པ་ཀུན་ཤེས་ནས། །དེ་རྗེས་ཀྱཻ་རྡོ་རྗེ་བསྟན། །ཞེས་གསུངས་པའི་ཕྱིར་རོ། །མདོ་ཕ་རོལ་ཏུ་ཕྱིན་པའི་ཐེག་པའི་ལམ་སྤྱིའི་ལུས་ནི་དེ་ཙམ་དུ་ཟད་ལ། དེ་ལ་ཡང་ལྟ་བའི་སྒོ་ནས་དབུ་སེམས་གཉིས་སུ་ཡོད་ཀྱང་དེའི་དབང་གིས་ཐེག་པ་སོ་སོར་འཇོག་པ་མ་ཡིན་ནོ། །ཕ་རོལ་ཏུ་ཕྱིན་པའི་ཐེག་པའི་ཆེད་དུ་བྱ་བའི་གདུལ་བྱའི་གཙོ་བོ་ནི་དབུ་མ་པའི་རིགས་ཅན་ཡིན་ནོ། །དེ་ལྟར་ཐེག་ཆེན་པ་ལ་ལྟ་བ་དབུ་སེམས་གཉིས་སུ་ཡོད་པ་ཡིན་གྱི། ལྟ་བ་དབུ་མ་འཛིན་ན་ཐེག་ཆེན་པ་ཡིན་པས་མ་ཁྱབ་སྟེ། ལམ་ཐེག་དམན་དུ་ཞུགས་ནས་གྲུབ་མཐའ་ཐེག་ཆེན་འཛིན་པ་ཡོད་དེ། གཞན་སྟོང་སྙིང་པོ་ལས། གྲུབ་མཐའ་ཐེག་ཆེན་འཛིན་ལ། ལམ་ཐེག་དམན་དུ་ཞུགས་པ་ཡང་ཡོད། གྲུབ་མཐའ་ཐེག་དམན་འཛིན་ལ་ལམ་ཐེག་ཆེན་དུ་ཞུགས་པ་ཡང་ཡོད། གཉིས་ཀ་ཐེག་ཆེན་པ་ཡང་ཡོད། གཉིས་ཀ་ཐེག་དམན་པ་ཡང་ཡོད། གྲུབ་མཐའ་འཛིན་ཅིང་ལམ་དུ་མ་ཞུགས་པ་ནི་ཤིན་ཏུ་ཡང་མང་ལ། ལམ་དུ་ཞུགས་པའི་གང་ཟག་ལ་གྲུབ་མཐའ་མེད་པ་ནི་ཡེ་མི་སྲིད་དོ། །ཞེས་གསུངས་པའི་ཕྱིར་རོ། །དེས་ན་གྲུབ་མཐའ་སྨྲ་བ་བཞིའི་ཡ་གྱལ་གྱི་ཉན་ཐོས་དང༌། ཉན་རང་གཉིས་སུ་ཕྱེ་བའི་ཉན་ཐོས་མིང་འདྲ་ཡང་དོན་གཏན་ནས་མི་འདྲ་སྟེ། སྡེ་པ་བཅོ་བརྒྱད་པོ་རྣམས་ཀྱིས་ཐེག་པ་ཆེན་པོའི་མདོ་བཀར་མི་འདོད་ཅིང་ཉན་ཐོས་ཀྱི་ལམ་ལ་ཞུགས་ནས་ཉན་ཐོས་ཀྱི་བྱང་ཆུབ་ཐོབ་ཕྱིར་དུ་བརྩོན་པར་བྱེད་པ་ཡང་མ་ཡིན་མོད་ཀྱི། འོན་ཀྱང་ཉན་ཐོས་ཀྱི་སྡེ་སྣོད་ཙམ་ཞིག་བཀར་ཁས་བླངས་ནས་དེའི་རྗེས་སུ་འབྲངས་ཏེ། གྲུབ་མཐའ་སྨྲ་བར་བྱེད་པས། ཉན་ཐོས་ཞེས་བཏགས་པ་ཡིན་པའི་ཕྱིར། མཐར་ཐུག་ཐེག་པ་གཅིག་ཏུ་གྲུབ་སྟེ། སམྦྷུ་ཊ་ལས། གང་ཕྱིར་ཆོས་ནི་དུ་མས་ནི། །ཆུ་བོའི་རྒྱུན་གྱིས་རྒྱ་མཚོ་ལྟར། །ཐར་པ་ཉིད་ནི་གཅིག་པུ་སྟེ། །མང་པོ་དམིགས་པར་མི་འགྱུར་རོ། །ཞེས་དང༌། མཚན་ཡང་དག་པར་བརྗོད་པ་ལས། ཐེག་པ་གསུམ་གྱི་ངེས་འབྱུང་ལ། །ཐེག་པ་གཅིག་གི་འབྲས་བུར་གནས། །ཞེས་གསུངས་པའི་ཕྱིར་རོ།། །།