གཉིས་པ་ཐུན་མོང་མ་ཡིན་པ་གསང་སྔགས་ཀྱི་སྐུ་གཅིག་ནས་ལྔའི་བར་དུ་དབྱེ་བ།

གཉིས་པ་ཐུན་མོང་མ་ཡིན་པ་གསང་སྔགས་ཀྱི་སྐུ་གཅིག་ནས་ལྔའི་བར་དུ་དབྱེ་བ་ནི།

ཐུན་མོང་མ་ཡིན་པ་སྔགས་ཀྱི་ཚུལ་ལ་ནི་རྡོ་རྗེའི་སྐུའམ་སྔགས་ཀྱི་སྐུ། དེ་བཞིན་ཉིད་བདག་དག་པའི་བདག་གང་ཡིན་པ་རྡོ་རྗེ་འཆང་ངམ་རྡོ་རྗེ་སེམས་དཔའ་གཅིག་ཉིད་ཤེས་དང་ཤེས་བྱ་གཅིག་པའི་སྐུ་སྟེ་སྟོང་ཉིད་སྙིང་རྗེ་དང༌། ཐབས་དང་ཤེས་རབ་གཅིག་ཏུ་འདྲེས་པ་མ་ནིང་གི་གོ་འཕང་དེ་ཉིད་མཐར་ཐུག་གི་སྐུ་གཅིག་ཀྱང་ཡིན་ལ་དོན་དམ་གྱི་ཐབས་ཤེས་རབ་དང་སྟོང་ཉིད་སྙིང་རྗེ་ལ་སོགས་པས་ཕྱེ་ན་སྐུ་གཉིས་ཀྱང་ཡིན་ཞིང་ཐུགས་གསུང་སྐུ་དང་དཀོན་མཆོག་གསུམ་ལ་སོགས་པས་ཕྱེ་ན་སྐུ་གསུམ་ཡང་ཡིན་ལ། རྡོ་རྗེ་བཞི་དང་མཁྱེན་པ་བཞི་དང་མངོན་བྱང་བཞི་ལ་སོགས་པས་ཕྱེ་ན་དོན་དམ་གྱི་སྐུ་བཞི་ཡང་ཡིན་ཞིང་ཡེ་ཤེས་ཀྱི་སྐུ་དང་ལྔར་ཕྱེ་ན་སྐུ་ལྔར་ཡང་འགྱུར་ཏེ། སངས་རྒྱས་སྐུ་ལྔའི་བདག་ཉིད་ཅན། །ཁྱབ་བདག་ཡེ་ཤེས་ལྔ་ཡི་བདག །ཅེས་པའོ། །