བདུན་པ་སྒྲུབ་པ་རང་གི་ངོ་བོ་བཤད་པ།
བདུན་པ་སྒྲུབ་པ་རང་གི་ངོ་བོ་བཤད་པ་ལ།
སྒྲུབ་པའི་ངོ་བོ་བཤད་པ་དང༌། སྒྲུབ་པའི་དབྱེ་བ་བཤད་པ་གཉིས། དང་པོ་སྒྲུབ་པའི་ངོ་བོ་བཤད་པ་ལ། ཐེག་ཆེན་སྒྲུབ་པའི་མཚན་ཉིད་ནི། སེམས་བསྐྱེད་ཀྱིས་ཟིན་པའི་རང་གཞན་གྱི་དོན་རྩོམ་པའི་བྱང་ཆེན་འབྱུང་བའི་རིགས་སུ་གནས་པའི་བྱང་སེམས་ཀྱི་སྤྱོད་པ་ཉམས་ལེན་གྱི་མངོན་རྟོགས་དེ་ཡིན་ཏེ། ཉ་ཊཱིཀ་ལས། སྤྱིར་ཐེག་ཆེན་སྒྲུབ་པའི་མཚན་ཉིད། སེམས་བསྐྱེད་ལ་གནས་ནས་རང་གཞན་གྱི་དོན་རྩོམ་པ་བྱང་ཆུབ་ཆེན་པོའི་རྒྱུར་གྱུར་པའི་བྱང་སེའི་སྤྱོད་པའམ་ཉམས་ལེན་ཏེ། གནས་རྩོམ་འབྲས་བུ་འབྱུང་བ་ཆེ་བདག་ཉིད། །རྒྱལ་སྲས་རྣམས་ཀྱི་སྒྲུབ་པ་ཡིན་པར་འདོད། །ཅེས་དང༌། སྒྲུབ་པ་ནི་སྤྱོད་པའོ། །ཞེས་ཤཱནྟི་རད་ཀིར་རོ། །གསེར་ནི་སྒྲུབ་པ་ནི་ཉམས་སུ་ལེན་པ་སྟེ། ཞེས་སོ། །འདིར་སྨོས་བྱང་སེའི་སྒྲུབ་པའི་མཚན་ཉིད། གདམས་ངག་ཐོབ་པ་རིགས་ལ་བརྟེན་ནས་དམིགས་པ་རིམ་གྱིས་རྟོགས་ཏེ་ཆེན་པོ་གསུམ་གྱི་ཆེད་དུ་བརྩོན་པའི་བྱ་བ་སྟེ། ཞེས་དང༌། མདོ་ལུགས་མ་ལས། དེ་ལ་གནས་ཆེན་པོ་ནི། སེམས་བསྐྱེད་ལ་གནས་པའི་ཕྱིར་དེ་ནི་རྟག་ཏུ་སེམས་ཅན་ཐམས་ཅད་ཉེ་བར་ལེན་པའི་ཕྱིར། རྩོམ་པ་ཆེན་པོ་ནི་རང་གཞན་གྱི་དོན་རྩོམ་པའི་ཕྱིར་དེ་ནི་སྡུག་བསྔལ་ཐམས་ཅད་དང་དུ་ལེན་པས་བཟོད་པ་ཆེ་བའི་ཕྱིར་རོ། ། འབྲས་བུ་འབྱུང་བ་ཆེ་བ་ནི། བྱང་ཆུབ་ཆེན་པོ་འཐོབ་པའི་ཕྱིར་དེ་ནི་སེམས་ཅན་མང་པོའི་དོན་ཆེ་ཡང་དག་བསྒྲུབ་པའི་བྱ་བ་བྱེད་པའི་ཕྱིར་རོ། །ཞེས་གསུངས་སོ། །
གཉིས་པ་དབྱེ་བ་ལ།
གོ་སྒྲུབ། འཇུག་སྒྲུབ། ཚོགས་སྒྲུབ། ངེས་འབྱུང་སྒྲུབ་པ་བཤད་པ་དང་བཞི། དང་པོ་གོ་སྒྲུབ་བཤད་པ་ལ་གཉིས་ཏེ། གོ་བགོས་ཡུལ་ཕྱིན་དྲུག་གཏན་ལ་དབབ། གོ་བགོས་པའི་སྒྲུབ་པའི་ངོ་བོ་བཤད་པའོ། །དང་པོ་ལ་སྤྱི་དོན་དང༌།མཐའ་རགས་ཙམ་དཔྱད་པ་དང་གཉིས། དང་པོ་ལ། མདོ་སྡེ་རྒྱན་དང་ཐེག་བསྡུས་གཉིས་ཀ་ལས། གྲངས་དང་དེ་ཡི་མཚན་ཉིད་གོ་རིམ་དང༌། །ངེས་པའི་ཚིག་དང་གོམས་བྱ་ཡོན་ཏན་དང༌། །དེ་དག་རབ་དབྱེ་བསྡུ་དང་མི་མཐུན་ནོ། །ཡོན་ཏན་ཕན་ཚུན་རྣམ་ངེས་ཡིན་ཞེས་བྱ། ། ཞེས་དོན་བཅུའི་སྒོ་ནས་བཤད་མོད་འདིར་ཚིག་མང་དུ་དོགས་པས་རྒྱས་པར་མ་སྤྲོས་པས་མདོ་སྡེ་རྒྱན་ས་འགྲེལ་སོགས་ལས་ཤེས་པར་བྱའོ། ། འདིར་ཉ་ཊཱིཀ་ལྟར་བཤད་ན་དང་པོ་མཚན་ཉིད། ངེས་ཚིག མཚན་གཞིའི་རབ་དབྱེ། གྲངས་ངེས། གོ་རིམ། འབྲས་བུ། བྱེད་ལས། ཕན་ཚུན་བསྡུ་བ་བཤད་པ་དང་བརྒྱད། དང་པོ་མཚན་ཉིད་ལ། མདོ་སྡེ་རྒྱན་ལྟར་ན་ཕར་ཕྱིན་གྱི་མཚན་ཉིད། ཆོས་བཞི་ལྡན་གྱི་ཐེག་ཆེན་གྱི་མངོན་རྟོགས། །ཡང་ན་ཐེག་བསྡུས་ལྟར་ན་དམ་པ་དྲུག་ལྡན་གྱི་ལམ་དེ་ཡིན་ཏེ། ཉ་ཊཱིཀ་ལས། ཐེག་བསྡུས་ལྟར་ན། སྤྱིའི་མཚན་ཉིད་དམ་པ་དྲུག་ལྡན་གྱི་ཤེས་པའོ། །དྲུག་ནི་བྱང་ཆུབ་ཀྱི་སེམས་ལ་བརྟེན་པས་གནས་དམ་པ། ཕྱི་ནང་གི་དངོས་པོ་མཐའ་དག་གཏོང་བས་དངོས་པོ་དམ་པ། སེམས་ཅན་ཐམས་ཅད་ལ་ཕན་བདེའི་ཆེད་དུ་སྤྱོད་པས་ཆེད་དུ་བྱ་བ་དམ་པ། འཁོར་གསུམ་མི་རྟོག་པའི་ཡེ་ཤེས་ཀྱིས་ཟིན་པས་ཐབས་ལ་མཁས་པ་དམ་པ། རྫོགས་བྱང་དུ་བསྔོས་པས་ཡོངས་སུ་བསྔོ་བ་དམ་པ། སྒྲིབ་གཉིས་དག་པར་འགྲུབ་པས་རྣམ་པར་དག་པ་དམ་པའོ། ། ཞེས་དང༌། སྤྱོད་འཇུག་ས་འགྲེལ་ལས། སྤྱིའི་མཚན་ཉིད་ནི། དམ་པ་དྲུག་དང་ལྡན་པ་སྟེ། བྱང་ཆུབ་ཀྱི་སེམས་ལ་རྟེན་པའི་རྟེན་དམ་པ་དང༌། གཞིའམ་དངོས་པོ་མཐའ་དག་ལ་འཇུག་པས་དངོས་པོ་དམ་པ་དང༌། ཞེས་སོགས་གསུངས་པའི་ཕྱིར་རོ། །འཇུག་པ་ལྟར་ན་ཉ་ཊཱིཀ་ལས། ཕར་ཕྱིན་སྤྱིའི་མཚན་ཉིད། སྲིད་ཞིའི་ཕ་རོལ་ཏུ་ཕྱིན་པའམ་ཕྱིན་བྱེད་གང་ཞིག འཁོར་གསུམ་དུ་མི་རྟོག་པའི་བློ་ཞེས་པ་དབུ་མ་འཇུག་པ་ལྟར་རོ། །ཞེས་སོ། ། སྦྱིན་པའི་ཕར་ཕྱིན་སོགས་སོ་སོའི་མཚན་ཉིད་ནི། རྒྱན་གྱི་ས་འགྲེལ་ལས། སྦྱིན་པའི་མཚན་ཉིད་ནི། སྦྱིན་པ་མཚན་ཉིད་བཞི་དང་ལྡན་པ་སྟེ་སྤང་བྱ་མི་མཐུན་ཕྱོགས་སེར་སྣ་མཐའ་དག་སྤངས་ཤིང་ཉམས་པ་དང༌། གཉེན་པོ་ཆོས་ཐམས་ཅད་བདག་མེད་པར་རྟོགས་པས་འཁོར་གསུམ་དུ་རྣམ་པར་མི་རྟོག་པའི་ཡེ་ཤེས་དང་ལྡན་པ་དང༌། བྱེད་ལས་གནས་སྐབས་སུ་གང་ལ་ཅི་འདོད་པ་དེ་ཐམས་ཅད་བྱིན་ནས་ཕ་རོལ་པོའི་འདོད་པ་ཐམས་ཅད་ཡོངས་སུ་རྫོགས་པར་བྱེད་པ་དང༌། མཐར་ཐུག་སྦྱིན་པས་མགུ་བར་བྱས་ཏེ་བསྡུས་པའི་སེམས་ཅན་རྣམས་རང་རང་གི་མོས་པ་དང་སྐལ་པ་ཇི་ལྟ་བ་བཞིན་དུ་ཐེག་པ་གསུམ་ལ་སྦྱར་ཏེ་རྣམ་པར་སྨིན་པར་བྱེད་ཅིང༌། བྱང་ཆུབ་རྣམ་པ་གསུམ་ལ་འགོད་པའི་མཚན་ཉིད་ཅན་ནོ། །ཞེས་སོགས་དང༌། ཉ་ཊཱིཀ་ཡིད་ཀྱི་མུན་སེལ་ལས། བྱེ་བྲག་གི་ནི། སྦྱིན་པ་མི་མཐུན་ཕྱོགས་ཉམས་དང༌། །རྣམ་པར་མི་རྟོག་ཡེ་ཤེས་ལྡན། ། འདོད་པ་ཐམས་ཅད་ཡོངས་རྫོགས་བྱེད། །སེམས་ཅན་རྣམ་སྨིན་བྱེད་རྣམ་གསུམ། །ཞེས་དང༌། དོན་རྣམས་གཏོང་བར་བྱེད་པ་དང༌། ཞེས་པས་སྦྱིན་བྱ་ཅི་རིགས་པ་ཡོངས་སུ་གཏོང་བའི་ཆོས་བཞི་ལྡན་ཏེ། འགལ་ཟླ་སེར་སྣ་ཉམས་པ། བདག་མེད་གཉིས་རྟོགས་པའི་མི་རྟོག་ཡེ་ཤེས་ཀྱིས་ཟིན་པ། གང་ཅི་འདོད་པ་དེ་ལ་སྦྱིན་པས་འདོད་པ་རྫོགས་པར་བྱེད་པ། སྦྱིན་པས་བསྡུས་ནས་སྐལ་བ་བཞིན་ཐེག་པ་གསུམ་གྱིས་སེམས་ཅན་སྨིན་པར་བྱེད་པ་བཞིའོ། །དེ་བཞིན་དུ་གཞན་ལ་གནོད་པ་གཞི་དང་བཅས་པ་སྤོང་བའི་བློ་ཆོས་བཞི་ལྡན། བཞིའི་དང་པོ་གཉིས་སླ་སྟེ་འོག་མ་རྣམས་སུ་ཡང་ངོ༌། །གསུམ་པ་ནི་སེམས་ཅན་རྣམས་འདི་སྙམ་དུ་བྱང་སེ་འདིས་བདག་དང་ལོངས་སྤྱོད་ཆུང་མ་སོགས་ལ་གནོད་པ་མ་བྱས་ན་ཅི་མ་རུང་སྙམ་པ་ལས་དེ་ཁོ་ན་བཞིན་གནོད་པ་མི་བྱེད་པར་སྒོ་གསུམ་སྡོམ་པས་འདོད་པ་རྫོགས་པར་བྱེད་པའོ། །བཞི་བ་ཚུལ་ཁྲིམས་ཀྱིས་བསྡུས་ནས་ཞེས་སོགས་སྔར་ལྟར་ཏེ་འོག་མ་ལ་ཡང་ངོ༌། །མི་འཁྲུགས་པའི་བློ་ཆོས་བཞི་ལྡན། ཆོས་གསུམ་པ་ནི་བྱང་སེ་ལ་གཞན་གྱིས་གནོད་པ་བྱས་ཀྱང་དེ་རྗེས་སུ་འདིས་ལན་དུ་གནོད་པ་མ་བྱས་ན་ཅི་མ་རུང་སྙམ་པ་ལས་དེ་བཞིན་མི་བྱེད་པར་གནོད་པ་ལ་བཟོད་པས་སོ། །དགེ་བ་ལ་སྤྲོ་བའི་བློ་ཆོས་བཞི་ལྡན། །གསུམ་པ་ནི། སེམས་ཅན་གྱི་ལས་སུ་བྱ་བ་གང་དང་གང་ཡོད་པའི་གྲོགས་བྱེད་པས་སོ། །སེམས་རྩེ་གཅིག་པ་ཆོས་བཞི་ལྡན། གསུམ་པ་ནི། བསམ་གཏན་གྱི་མཐུས་རྫུ་འཕྲུལ་སྣ་ཚོགས་བསྟན་ནས་སོ། །ཆོས་རབ་ཏུ་རྣམ་འབྱེད་ཀྱི་བློ་ཆོས་བཞི་ལྡན། གསུམ་པ་ནི་ཤེས་རབ་ཀྱིས་ཆོས་ཀྱི་རང་སྤྱིའི་མཚན་ཉིད་ཤེས་པར་བྱས་ནས་སེམས་ཅན་གྱི་ཐེ་ཚོམ་གཅོད་པས་སོ། །བཞིའི་མཚན་ཉིད་ནི། ཐབས། སྨོན་ལམ། སྟོབས། ཡེ་ཤེས་ཀྱི་རིམ་བཞིན། ཕྱིན་དྲུག་གི་དགེ་བ་རྫོགས་བྱང་དུ་བསྔོས་པས་མི་ཟད་པར་བྱེད་པའི་ཕར་ཕྱིན། ཚེ་རབས་དུ་མར་སངས་རྒྱས་མཉེས་པར་བྱེད་ཅིང་ཕྱིན་དྲུག་ལ་སྤྱོད་པར་སྐྱེ་བའི་སེམས་ཀྱི་སྨོན་པའི་ཕར་ཕྱིན། སོ་སོར་རྟོག་པ་དང་བསྒོམ་པའི་སྟོབས་གཉིས་ཀྱིས་ཕྱིན་དྲུག་གི་མི་མཐུན་ཕྱོགས་ཀྱིས་ཟིལ་གྱིས་མི་ནོན་པར་རྒྱུན་མི་འཆད་པར་སྦྱིན་སོགས་ལ་འཇུག་པའི་ཕར་ཕྱིན། ཐེག་ཆེན་གྱི་ཆོས་ལ་སྒྲ་ཇི་བཞིན་དུ་རྟོག་པའི་རྨོངས་པ་དང་བྲལ་བས་ཕྱིན་དྲུག་སོགས་ཐེག་ཆེན་གྱི་ཆོས་ལ་ལོངས་སྤྱོད་ཅིང་དེས་སེམས་ཅན་སྨིན་པར་བྱེད་པའི་ཕར་ཕྱིན། ཞེས་དབུས་མཐའི་འགྲེལ་བ་འགྲེལ་བཤད་ལྟར་རོ། །ཞེས་གསུངས་སོ། །ཡང་ན་ཐེག་བསྡུས་ལྟར་ཉ་ཊཱིཀ་ལས། སོ་སོར་བཀོད་ན། ཡོངས་སུ་གཏོང་བ་དམ་པ་དྲུག་ལྡན་ཞེས་སོགས་དགོད་དོ། །ཞེས་སོ། །གཉིས་པ་ངེས་ཚིག་བསྟན་པ་ནི། རྒྱན་ལས། དབུལ་བ་འདོར་བར་བྱེད་པ་དང༌། །བསིལ་བ་ཐོབ་དང་ཁྲོ་བཟོད་དང༌། །མཆོག་སྦྱོར་བ་དང་ཡིད་འཛིན་དང༌། །དོན་དམ་ཤེས་པའི་ཕྱིར་བཤད་དོ། །ཞེས་དཱ་ན་སྦྱིན་པ་དང༌། ཤཱི་ལ་ཚུལ་ཁྲིམས་དང༌། ཀྵཱནྟིཿབཟོད་པ་དང༌།བིརྻ་བརྩོན་འགྲུས་དང༌། དྷྱཱ་ན་བསམ་གཏན་དང༌། པྲཛྙཱ་ཤེས་རབ་ཀྱི་མིང་རྣམས་ལ་ཡི་གེ་ཕྲལ་བ་དང༌། བསྣན་པ་དང་བསྒྱུར་བ་ལ་སོགས་པ་ཇི་ལྟར་མཐུན་མཐུན་དུ་སྦྱར་བའི་ངེས་ཚིག་གིས་བཤད་ན། དཱ་རི་དྱ་དབུལ་བ་ཨ་པ་ན་ཡ་འདོར་བ་སྟེ། སྦྱིན་པ་ལ་བརྟེན་ནས་རང་དང་གཞན་གྱིས་ལོངས་སྤྱོད་ཕུན་སུམ་ཚོགས་པ་ཐོབ་པས་དབུལ་ཞིང་ཕོངས་པ་འདོར་བར་བྱེད་པས་ན་སྦྱིན་པ་ཞེས་བྱ་བ་དང༌། ཤཱི་ལ་བསིལ་བ་ལཾ་བྷ་ན་ཐོབ་པ་སྟེ། ཚུལ་ཁྲིམས་བསྲུང་བ་རྣམས་ཉོན་མོངས་པ་དང་འཁོར་བ་ངན་སོང་གི་གདུང་བ་མེད་ཅིང་མྱ་ངན་ལས་འདས་པ་བསིལ་བའི་བདེ་བ་ཐོབ་པར་བྱེད་པས་ན་ཚུལ་ཁྲིམས་ཞེས་བྱ་བ་དང༌། ཀྵཱ་མ་ཁྲོ་བ། ཤཱནྟི་ཞི་བ་ཡང་ན་ཀྵ་ཡཿཟད་པ་སྟེ་བཟོད་པ་ལ་གནས་ན་རང་གི་རྒྱུད་ལ་ཁོང་ཁྲོ་ཞེ་སྡང་ཟད་པ་ལས་གཞན་གྱིས་གནོད་པའི་ལན་མི་བྱེད་པ་ལ་སོགས་པ་འབྱུང་བས་བཟོད་པ་ཞེས་བྱ་བ་དང༌།ཝ་ར་མཆོག ཡོ་ག་སྦྱོར་བ་སྟེ་བརྩོན་འགྲུས་ཀྱིས་དགེ་བའི་རྩ་བ་མཆོག་ཏུ་གྱུར་པ་རྣམས་ལ་སྤྲོ་བའི་སྒོ་ནས་སྦྱོར་བར་བྱེད་པས་ན་བརྩོན་འགྲུས་ཞེས་བྱ་བ་དང༌། མ་ན་ཡིད། དྷ་ར་འཛིན་པ་སྟེ་མཉམ་པར་བཞག་པ་ལས་ཡིད་ཕྱི་རོལ་ཏུ་མི་གཡེང་བར་ནང་དུ་འཛིན་པར་བྱེད་པས་བསམ་གཏན་ཞེས་བྱ་བ་དང༌། པ་ར་མ་ཨརྠ་དམ་པའི་དོན། ཛྙཱ་ཤེས་པ་སྟེ་རྣམ་པར་དཔྱད་པ་ལ་བརྟེན་ནས་དོན་དམ་པའི་གནས་ལུགས་ཕྱིན་ཅི་མ་ལོག་པར་ཤེས་པའི་ཕྱིར་ན་ཤེས་རབ་ཅེས་བྱ་བར་བཤད་དོ། །ཐུན་མོང་གི་ངེས་ཚིག་ནི། སྲིད་པ་འཇིག་རྟེན་པ་དང་ཞི་བ་ཉན་རང་གི་སྦྱིན་སོགས་དགེ་བ་ཐམས་ཅད་ལས་རབ་བམ་མཆོག་གམ་ཕུལ་དུ་བྱུང་བར་སོང་བས་ན་ཕ་རོལ་ཏུ་ཕྱིན་པ་ཞེས་བྱ་ལ། དེ་ནི་རྒྱན་གྱི་ས་འགྲེལ་ལྟར་བཤད་པའོ། །ཐབས་མཁས་སོགས་བཞིའི་ངེས་ཚིག་ནི། ཆོས་གང་འགྲུབ་པར་བྱ་བ་དང་རྣམ་པར་འཕེལ་བ་དང༌། འཐོབ་པར་བྱ་བ་དང༌། སྤང་བར་བྱ་བའི་ཕྱིར་རིགས་པ་གང་ཡིན་པ་དེ་ནི་དེའི་ཐབས་ཡིན་ནོ། །དེ་ལ་མཁས་པ་ནི་ཐོག་ཏུ་ཕེབས་པ་སྟེ་ཐབས་ལ་མཁས་པའོ། །སྤྱིར་རྣམ་པ་དུ་མར་སྨོན་པ་ཡིན་མོད་ཀྱི་འདིར་དགེ་བ་དང་མཐུན་པའི་སྐྱེ་བ་ལ་སྨོན་པས་སྨོན་ལམ། །ཤེས་རབ་དང་དགེ་ཆོས་གོམས་པར་བྱེད་པས་མི་མཐུན་ཕྱོགས་ཀྱིས་ཟིལ་གྱིས་མི་ནོན་པས་སྟོབས། །ཐེག་ཆེན་གྱི་ཆོས་ལ་སྒྲ་ཇི་བཞིན་གྱི་རྨོངས་པ་དང་བྲལ་ནས་ཇི་བཞིན་ཤེས་པས་ཡེ་ཤེས་ཏེ།བློ་བརྟན་གྱི་དགོངས་པའོ། །ཞེས་ཉ་ཊཱིཀ་ལས་སོ། །གསུམ་པ་མཚན་གཞིའི་རབ་དབྱེ་ནི། རྣམ་པ་གསུམ་གསུམ་སྟེ་དང་པོ་སྦྱིན་པའི་དབྱེ་བ་ལ། རྒྱན་ལས། ཆོས་དང་ཟང་ཟིང་མི་འཇིགས་གཏོང༌། །ཞེས་རྙེད་པ་དང་བཀུར་སྟི་ལ་མི་བལྟ་བར་ལེགས་བཤད་སྟོན་པ་ནི་ཆོས་ཀྱི་སྦྱིན་པ་དང༌། གང་ལ་ཅི་འདོད་པའི་ཡོ་བྱད་གཏོང་བ་ཟང་ཟིང་གི་སྦྱིན་པ་དང༌། འཁོར་བ་དང་ངན་སོང་གི་གནོད་པ་ལས་སྐྱོབ་པ་མི་འཇིགས་པའི་སྦྱིན་པའི་རྣམ་པ་གསུམ་མོ། །ཚུལ་ཁྲིམས་ཀྱི་དབྱེ་བ་ལ། རྒྱན་ལས། བརྡར་བཏགས་ཆོས་ཉིད་ཐོབ་པ་སྟེ། །ཞེས་གཞན་ལ་གནོད་པ་གཞི་དང་བཅས་པ་སྤོང་བའི་སེམས་པ་ཡང་དག་པར་བླངས་ཤིང༌། བརྡར་བཏགས་པ་ལས་ཐོབ་པ་སོ་སོ་ཐར་པའི་སྡོམ་པ་དང་ཆོས་ཉིད་ཀྱིས་ཐོབ་པ་བསམ་གཏན་ས་དྲུག་ཏིང་ངེ་འཛིན་ཟག་བཅས་དང་ལྷན་ཅིག་པའི་སྤོང་བའི་སེམས་པ་བསམ་གཏན་པའི་སྡོམ་པ་དང༌། ཏིང་ངེ་འཛིན་ཟག་མེད་དང་ལྷན་ཅིག་འབྱུང་བ་སྤོང་བའི་སེམས་པ་ཟག་པ་མེད་པའི་སྡོམ་པ་དང་གསུམ་མོ། །ཡང་ན་ཐེག་བསྡུས་ལྟར་སྡོམ་པའི་ཚུལ་ཁྲིམས། དགེ་བ་ཆོས་སྡུད་ཀྱི་ཚུལ་ཁྲིམས། སེམས་ཅན་དོན་བྱེད་ཀྱི་ཚུལ་ཁྲིམས་དང་གསུམ་ཡིན་ནོ། །བཟོད་པའི་དབྱེ་བ་ལ། རྒྱན་ལས། མི་མཇེད་ཅི་མི་སྙམ་ཤེས་དང༌། །ཞེས་གནོད་པ་ལ་ལན་མི་བྱེད་པ་དང༌། སྡུག་བསྔལ་ལ་ཅི་མི་སྙམ་པ་དང༌། ཆོས་ཀྱི་དེ་ཁོ་ན་ཉིད་ངེས་པར་རྟོགས་ཤིང་ཤེས་པའི་བཟོད་པ་དང་གསུམ་མོ། །བརྩོན་འགྲུས་ཀྱི་དབྱེ་བ་ལ། རྒྱན་ལས། དེ་དག་ལ་ནི་དེ་རྣམ་བདུན། །ཞེས་འགྲེལ་པར་ལྷག་པའི་ཚུལ་ཁྲིམས་ལ་སོགས་པའི་བསླབ་པ་གསུམ་ལ་ལུས་དང་སེམས་ཀྱི་བརྩོན་འགྲུས་རྟག་ཏུ་བྱེད་པ་དང་གུས་པར་བྱེད་པ་གང་ཡིན་པའོ་ཞེས་གསུངས་པ་ལ། འགྲེལ་བཤད་དག་ལས་ཚུལ་ཁྲིམས་ཀྱི་བསླབ་པས་བསྡུས་པ་ནི་སྒོ་ལྔའི་རྣམ་ཤེས་ཡུལ་ལ་འཇུག་པ་ན་མི་དགེ་བ་སྡོམ་པ་ལུས་ཀྱི་བརྩོན་འགྲུས་ལྔ་དང༌། སེམས་དང་ཤེས་རབ་ཀྱི་བསླབ་པས་བསྡུས་པ་སེམས་ཀྱི་བརྩོན་འགྲུས་གཉིས་ཏེ་དེ་དག་ཀྱང་རྟག་ཏུ་བྱེད་པ་དང་གུས་པར་བྱེད་པ་བཤད་པ་ལྟར་རོ། །ཐེག་བསྡུས་ལྟར་ན་གོ་ཆའི་བརྩོན་འགྲུས། སྦྱོར་བའི་བརྩོན་འགྲུས། མི་ཞུམ་ཞིང་མི་འཁྲུགས་ལ་ཆོག་པར་མི་འཛིན་པའི་བརྩོན་འགྲུས་དང་གསུམ་མོ། །བསམ་གཏན་གྱི་དབྱེ་བ་ལ། རྒྱན་ལས། དེ་དག་ལ་ཡོད་དེ་རྣམ་གསུམ། །ཞེས་བསམ་གཏན་དང་ལྡན་པ་དེ་དག་ལ་ཡོད་པ་ནི་རྟེན་གྱི་འཇུག་པ་དང༌། དེ་ཡང་རྟོག་པ་དང་དཔྱོད་པ་དང་བཅས་པ་དང་རྟོག་པ་མེད་ལ་དཔྱོད་པ་ཙམ་དང༌། རྟོག་པ་ཡང་མེད་དཔྱོད་པ་ཡང་མེད་པ་གསུམ་མམ། ཡང་བསམ་གཏན་དང་པོ་གཉིས་དགའ་བ་དང་ལྡན་པ་དང༌། གསུམ་པ་སིམ་པ་དང་ལྡན་པ་དང༌། བཞི་པ་ཡན་ཆད་བཏང་སྙོམས་དང་ལྡན་པ་ཞེས་རྣམ་པ་གསུམ་མོ། །ཤེས་རབ་ཀྱི་དབྱེ་བ་ལ། རྒྱན་ལས།དེ་དག་ལ་ཡོད་དེ་རྣམ་གསུམ། །ཞེས་དེ་ཡང་འཇིག་རྟེན་པ་དང་འཇིག་རྟེན་ལས་འདས་པ་དམན་པ་ཉན་རང་གིའོ། །འཇིག་རྟེན་ལས་འདས་པ་ཆེན་པོའི་ཤེས་རབ་རྣམ་པ་གསུམ་མོ། །ཡང་ན་ཐོས་བསམ་སྒོམ་པའི་ཤེས་རབ་གསུམ་མོ། །ཡང་ན་རྣམ་པར་མི་རྟོག་པར་སྦྱོར་བའི།རྣམ་པར་མི་རྟོག་པའི། རྣམ་པར་མི་རྟོག་པའི་རྗེས་ལ་ཐོབ་པའི་ཤེས་རབ་པོ། །དགོངས་འགྲེལ་དུ། ཀུན་རྫོབ་ཤེས་པ། དོན་དམ་ཤེས་པ། སེམས་ཅན་གྱི་དོན་ལ་དམིགས་པ་གསུམ་དུ་བཤད་དོ། །