བདུན་པ་དམིགས་ཀྱིས་བསལ་བའི་དོན་ལ་གསུམ།

བདུན་པ་དམིགས་ཀྱིས་བསལ་བའི་དོན་ལ་གསུམ་ལས།

དང་པོ་ཡུལ་གྱི་དམིགས་བསལ་ནི་བྱ་བ་ཞུ་བ་དེ་སྤྱིར་བཏང་ལ་གནས་ཀྱི་བླ་མ་ལ་ཞུ་དགོས་ཡང་དམིགས་བསལ་གནས་ཀྱི་བླ་མ་མ་ཡིན་པ་ལ་ཞུས་པས་གོ་ཆོད་པའོ། །དེ་ལ་བཞི་སྟེ་དབྱར་ཕྱི་མ་ཟླ་བ་གཉིས་ཀྱི་ཚེ་ན་གཞོན་ནུ་རྣམས་ཀྱི་ཆེས་རྒན་པ་ལ་ཞུ་བ་སྟེ་མེད་ན་གཞོན་ནུའི་ནང་ནས་ཆེས་རྒན་པ་ལ་ཞུ་ཞེས་པ་དང༌། གནས་ཀྱི་བླ་མ་ས་གཞན་ན་གནས་པའི་ཚེ་གཞན་ལ་ཞུ་བ་དང༌། གནས་པར་བྱ་བའི་ཡུལ་ཉེ་བར་མི་གནས་ན་གཞན་ལ་ཞུ་བ་དང༌། དེ་དག་དང་རྒྱུ་མཚན་མཚུངས་པའི་མདོར་བསྡུས་གཅིག་དང་བཞིའོ། །རྒྱུ་མཚན་ནི་གནས་སྐབས་དེ་ན་བྱ་བ་ཞུ་བའི་ཡུལ་དུ་འོས་པའི་གནས་ཀྱི་བླ་མ་ནི་མེད་ལ། དགེ་སྦྱོང་བླ་མའི་གནས་ལྟ་བུ་ནི་མཚམས་ནང་དེ་ན་ཡོད་པའི་ཕྱིར་རོ། ། གཉིས་པ་རྟེན་གྱི་དམིགས་བསལ་ནི། གནས་པར་འོས་པ་དེས་སྤྱིར་བཏང་ལ་བྱ་བ་རྣམས་ཞུ་དགོས་ཀྱང་གནས་སྐབས་ཀྱི་སྟོབས་ཀྱིས་བྱ་བ་ཞུ་མི་དགོས་པའོ། །དེ་ལ་བརྒྱད་དེ། ལོ་ལྔ་ལོན་ཅིང་ལྷན་ཅིག་སྦྱར་བ་ཐ་མ་དང་ལྡན་པ་ལྗོངས་རྒྱུ་བའི་དུས་དང༌། དབྱར་ཕྱི་མ་ཁས་བླངས་ནས་ཟླ་བ་དང་པོ་གཉིས་ཀྱི་དུས་ན་གནས་ཀྱི་བླ་མ་མེད་ན་གཞོན་ནུའི་ནང་ན་ཆེས་རྒན་པ་དང༌། གནས་ཡོངས་སུ་འཚོལ་བ་ལ་ཞུགས་པ་མ་རྙེད་པ་ཞག་ལྔའི་དུས་དང༌། གློ་བུར་དུ་འོངས་པ་ཉི་མ་དང་པོའམ་གཉིས་པ་ལ་ངལ་གསོ་བའི་དུས་དང༌། ཞག་གཅིག་གནས་གཞན་དུ་ཕྱིན་པ་དང༌། དགེ་འདུན་གྱིས་གནས་ནས་ཕྱུང་བ་དང༌། བླ་མས་གནས་བཀག་པ་དང༌། དེ་དག་དང་རྒྱུ་མཚན་མཚུངས་པའི་མདོར་བསྡུས་གཅིག་དང་བརྒྱད་དོ། །དེ་དག་གི་གཉིས་པས་བྱ་བ་ཞུ་མི་དགོས་པ་ནི། ཊཱི་ཀ་ལས། དངོས་སུ་ན་ཆེས་རྒན་པས་ནི་མ་ཞུས་པར་ཡང་བྱའོ་ཞེས་རྗེས་སུ་གནང་བ་ཡིན་ནོ་ཞེས་གསུངས་ལ།

གསུམ་པས་བྱ་བ་ཞུ་མི་དགོས་པ་ནི།

འགྲེལ་ཆུང་ལས། གནས་བརྟན་འཚོལ་གྱི་བར་དུ་མ་དྲིས་ཀྱང་ཉེས་པ་མེད་དེ། ཞེས་སོ། །དེ་ལྟར་འགྲེལ་བ་ཆེ་ཆུང་གཉིས་ལས། བྱ་བ་ཞུ་མི་དགོས་པར་གསུངས་པ་དེ་གཉིས་དང་རྒྱུ་མཚན་མཚུངས་པའི་ཕྱིར་ན། དང་པོ་དང་བཞི་པ་དང་ལྔ་པ་ལ་ཡང་གནད་ཀྱིས་སྦྱར་རོ། །དྲུག་པས་བྱ་བ་ཞུ་མི་དགོས་པ་ནི། བྱ་བ་ཞུ་བའི་ཡུལ་བྱས་ན་སྤངས་པ་རྗེས་ཕྱོགས་ཀྱི་ལྟུང་བར་འགྱུར་བས་དེ་ལ་བྱ་བ་ཞུ་ཡུལ་མེད་པའི་ཕྱིར་རོ། །བདུན་པས་བྱ་བ་མ་ཞུས་པའི་ཉེས་པ་མི་འབྱུང་སྟེ། བླ་མས་ནི་བྱ་བ་ཞུ་བའི་ཡུལ་མི་བྱེད་ཅིང༌། གཞན་གྱིས་ལེན་པར་བྱེད་ན། ཉེས་པ་སྦོམ་པོར་འགྱུར་པས་དེ་ལ་བྱ་བ་ཞུ་བའི་ཡུལ་མེད་པའི་ཕྱིར་རོ། །མཚོ་ཊཱིཀ་༡༠༦ལས། བདུན་པོ་དེ་དག་ཐམས་ཅད་འདུལ་བ་མདོར་བསྡུས་ཡིན་ལ། དེ་དག་དང་རྒྱུ་མཚན་མཚུངས་པ་གཞན་ལའང་མདོར་བསྡུས་སྦྱར་རོ། །ཞེས་དང༌། དེའི་མཆན་༡༠༦ལས། བརྒྱད་པོ་དེ་དག་ཐམས་ཅད་མདོར་བསྡུས་ཡིན་གྱི་སངས་རྒྱས་ཀྱི་དངོས་སུ་གསུངས་པ་བདུན་དང་མདོར་བསྡུས་དང་བརྒྱད་ཡིན་པ་ཉམས་སུ་མི་སོལ། ཞེས་དེ་བརྒྱད་པོ་མདོར་བསྡུས་སུ་གསུངས་པ་མི་འཐད་པར་ཐལ། ལོ་ལྔ་ལོན་ཅིང་ལྷན་གཅིག་སྦྱར་བ་ཐ་མ་དང་ལྡན་པ་ལྗོངས་རྒྱུ་བའི་དུས་སུ་གནས་ལ་མ་རྟེན་པར་འདུག་རུང་བ་དངོས་བཅས་ཡིན་པའི་ཕྱིར་ཏེ། ལུང་གཞི་ལས། ཀུན་དགའ་བོ། དེ་བས་ན་ལོ་ལྔ་ལོན་ཅིང་ལྷན་གཅིག་སྦྱར་བ་ཐ་མ་དང་ལྡན་པས་གནས་མ་བཅས་པར་ལྗོངས་རྒྱུར་འགྲོ་བར་བྱའོ། །ཞེས་འདུལ་བ་མདོར་བསྡུས་ཀྱི་སྔར་དངོས་སུ་གསུངས་པའི་ཕྱིར་ཟེར་ན་ཞིབ་ཆ་དགོས་སོ། །

གསུམ་པ་བྱ་བའི་དམིགས་བསལ་ནི།

གནས་པར་འོས་པ་དེས་སྤྱིར་བཏང་ལ་བྱ་བ་རྣམས་ཞུ་དགོས་ཀྱང་བྱ་བའི་བྱེ་བྲག་ཞུ་མི་དགོས་པའོ། །དེ་ལ་དགུ་སྟེ་བཤང་བ་དང་གཅི་བ་སོ་ཤིང་འདོར་བ་དང༌། མཚམས་ཀྱི་ཁོངས་སུ་གཏོགས་པའི་མཆོད་རྟེན་ལ་ཞར་བྱུང་གི་ཕྱག་བྱ་བ་དང༌། གཙུག་ལག་ཁང་ནས་འཆག་པ་འབའ་ཞིག་གི་བསམ་པས་འདོམ་བཞི་བཅུ་རྩ་དགུ་ཚུན་ཆད་དུ་འགྲོ་བ་དང༌། བྱ་བ་ཞུས་ཏེ་ལས་སུ་བསྐོས་པ་གཞན་བྱུང་བ་དང་དྲུག་ལུང་དང་གཞུང་འདི་ཉིད་ནས་བཤད་དོ། །ཆུ་བཏུང་བ་ཞུ་མི་དགོས་པར་ལུང་དང་འོད་ལྡན་རྩ་འགྲེལ་ལས་བཤད་ཅིང༌། གོས་ཀྱི་རྡུལ་སྤྲུག་པ་ལྟ་བུ་བྱ་བ་ཕྲན་ཚེགས་ཞུ་མི་དགོས་པར་ཊཱི་ཀ་ལས་བཤད་དོ། ། མཆོད་རྟེན་ལ་ཆེད་དུ་དམིགས་ནས་ཕྱག་འཚལ་བ་དེ་ཆོས་ཅན། ཞུ་མི་དགོས་པ་མ་ཡིན་པར་ཐལ། བྱ་བ་ཆེན་པོ་ཡིན་པའི་ཕྱིར་རོ། །རྟགས་དང་ཁྱབ་པ་གཞུང་གིས་གྲུབ་སྟེ། ཊཱི་ཀ་ལས། བྱ་བ་གང་སྦྱོར་བ་ཆེན་པོས་བརྩམས་པ་ནི། ལྷུང་བཟེད་དང་ཆོས་གོས་ཀྱི་ལས་ལ་སོགས་པ་སྟེ། དེ་ནི་མ་ཞུས་པར་མི་བྱའོ། །ཞེས་གསུངས་སོ། །འདོམ་བཞི་བཅུ་རྩ་དགུ། ཞེས་པ་ནི་འགྲེལ་ཆུང་ལས། གཙུག་ལག་ཁང་ར་བས་བསྐོར་ན་ར་བའི་ཕྱི་སྒོ་ནས་གྲོང་དང་ནགས་ལ་སོགས་པ་སབ་སུབ་མེད་ན་འདོམ་བཞི་བཅུ་རྩ་དགུ་ཚུན་ཆད་དུ་འཆག་པར་སོང་ན་ཉེས་མེད་ཅེས་ནགས་ལ་སོགས་པ་སབ་སུབ་ཡོད་ན་མི་གནང་བར་འཆད་དོ། །དེ་ལྟར་ན་སྒོས་ཀྱི་དགག་བྱས་བཅས་པ་བཞག་པར་འགྱུར་བས་ཧ་ཅང་ཐལ་ཆེས་པའཽ། །ནད་གཡོག་ཅེས་པ་ནི་ལུང་གཞི་ན་མཁན་པོ་དང༌། སློབ་དཔོན་དག་ན་བར་གྱུར་ན་ཨེ་མའོ་བདག་གིས་ནད་གཡོག་བྱའོ་ཞེའམ་བྱེད་དུ་གཞུག་གོ་ཞེས་བརྩོན་པ་ཤས་ཆེན་པོས་བསྒྲུབ་པར་བྱ་བའཽ། །འགྱོད་པ་བསལ་བ་དང་སྡིག་ལྟ་སྤོང་བའི་སྐབས་སུ། འདུལ་བའི་སྡེ་སྣོད་མི་ཤེས་ན་ནི་གནས་ཀྱི་བླ་མ་བྱར་མི་རུང་བས། གནས་ཀྱི་བླ་མ་སྡེ་སྣོད་འཛིན་པ་ཡིན་པར་ངེས་པ་དེ་ལ། སློབ་མ་སྡེ་སྣོད་འཛིན་པ་ཡིན་པར་མ་ངེས་པ་དེས། ལྟུང་བ་ལས་འགྱོད་པ་བསལ་བ་དང་སྡིག་ལྟ་སྤོང་བ་འགལ་ཞེ་ན། འགྲེལ་ཆུང་ལས། མཁན་པོས་སྔོན་སྡེ་སྣོད་ཤེས་ཤིང་མཁས་པ་ལས་རླུང་ནད་ལ་སོགས་པས་དབང་པོ་ཉམས་ཤིང་མི་དྲན་པར་གྱུར་པ་དེ་ལྟ་བུ་ལ་བྱའོ། །ཞེས་སོ། །ཁྱད་པར་དུ་ཡང་སྡིག་ལྟ་སྤོང་བ་ལ་ནི་མངོན་པའི་སྡེ་སྣོད་གནས་ཀྱི་བླ་མས་མི་མཁྱེན་ཡང་སློབ་མས་ཤེས་པ་ཡང་སྲིད་པས་འགལ་བ་མེད་དོ། །ནན་ཏུར་གྱི་ལས་འདི་ལྟ་བུ་མི་བྱའོ། །ཞེས་གསུངས་ཀྱང་ནན་ཏུར་བྱེད་པ་དེ་ཉེས་པ་ལས་བཟློག་པའི་ཐབས་ཡིན་པས། དེ་དགག་པར་མི་རིགས་སོ་ཞེ་ན། ནན་ཏུར་མ་བྱས་ཀྱང་ཉེས་པ་ལས་བཟློག་པར་འགྱུར་བའི་ཚེ་ན། བླ་མ་ལ་ནན་ཏུར་བྱེད་ན། ནན་ཏུར་བྱེད་པ་དེ་དགག་པར་བསྟན་པའོ། །འོ་ན་གནས་ཀྱི་བླ་མ་སྡེ་སྣོད་འཛིན་པར་ངེས་པ་དེ་ལ་ནན་ཏུར་བྱེད་པར་བཤད་པ་འདི་དང༌། ཕྱིར་བཅོས་ཀྱི་གཞི་ལས་སྡེ་སྣོད་འཛིན་པ་ལ་ནན་ཏུར་བྱེད་ན་སྦོམ་པོར་བཤད་པ་དང་འགལ་ལོ་ཞེ་ན། དེ་ནི་སྡེ་སྣོད་འཛིན་པ་ཕྱོགས་དང་འཁོར་མང་པོ་དེ་ལ་ནན་ཏུར་བྱས་ན་དགེ་འདུན་བྱེ་བར་འགྱུར་བའི་དགག་བྱ་ཡོད་པ་ལ་དགོངས་སོ། །དེ་ལྟ་བུའི་དགག་བྱ་མེད་ན་ནི་སྡེ་སྣོད་འཛིན་པ་ལ་ཡང་ཆད་པའི་རྒྱུ་དང་ལྡན་ན་ནན་ཏུར་བྱ་སྟེ། འོད་ལྡན་རྩ་བ་ལས།ཀ་བར་གྱུར་པ་མདོ་སྡེ་འཛིན་གང་དང༌། །དེ་བཞིན་གཞན་ཡང་ཆོ་ག་བཞིན་སྤྱད་བསྐྲད། ། ཅེས་གསུངས་སོ། །བྱས་ན་བཟོད་པར་བྱའོ་ཞེས་པ་ནི་སྐབས་འདི་ཉིད་ཀྱི་ལུང་གཞི་ལས་མཁན་པོ་དང་སློབ་དཔོན་དག་ལ་དགེ་འདུན་གྱིས་ནན་ཏུར་གྱི་ལས་དག་བྱས་པར་གྱུར་ན་དེ་ལ་དགེ་སློང་ལྷན་ཅིག་གནས་པ་དང་ཉེ་གནས་རྣམས་ཀྱིས་ཨེ་མའོ་དགེ་འདུན་གྱིས་འདི་ལ་བཟོད་པར་བྱའོ་ཞེས་བརྩོན་པ་ཤས་ཆེན་པོས་བསྒྲུབ་པར་བྱ་བའོ། །རང་གི་རྣམ་བཤད་ལས་ཀྱང༌། བྱས་ན་བཟོད་པར་བྱའོ་ཞེས་བྱ་བ་ནི་ནན་ཏུར་གྱི་ལས་བྱས་པ་ལ་ཨེ་མའོ་དགེ་འདུན་གྱིས་འདི་ལ་བཟོད་པར་བྱ་ཞེས་བྱའོ། །ཞེས་གསུངས་སོ། །སྤོ་བ་དང་ཞེས་པ་ནས་དབྱུང་བར་བྱའོ་ཞེས་གནས་ཀྱི་བླ་མ་སྡེ་སྣོད་འཛིན་པ་ལ་ལྷག་མའི་ལྟུང་བ་བྱུང་ན་སྤོ་མགུ་དབྱུང་བ་བྱ་བར་བཤད་པ་འདི་དང༌། ཕྱིར་བཅོས་ཀྱི་གཞི་ལས་མདོ་སྡེ་འཛིན་པས་ནི་གཅིག་གི་མདུན་དུ་བཤགས་པས་ལྷག་མ་འདག་གོ །ཞེས་བཤད་པ་དང་འགལ་ཞེ་ན། སྡེ་སྣོད་འཛིན་པ་ཡིན་ཡང་སྤོ་མགུ་སྤྱད་པ་མ་བྱས་ན་ཕྱིན་ཆད་རྒྱུན་སྡོམ་པ་ལ་སོགས་པ་ཕྱིར་བཅོས་ཀྱི་བསམ་པ་མཚན་ཉིད་པ་མི་སྐྱེ་ན་སྤོ་མགུ་དབྱུང་བ་དགོས་ལ། བསམ་པ་དེ་སྐྱེ་ན་སྡེ་སྣོད་འཛིན་པས་སྤོ་མགུ་དབྱུང་བ་མི་དགོས་པ་སྟེ། བསམ་པས་ལྟུང་བ་ལས་ལྡང་གི་ཆད་པའི་ལས་ཀྱིས་མ་ཡིན་ནོ། །ཞེས་གསུངས་སོ། ། སློབ་མས་བླ་མའི་བྱ་བ་བསྒྲུབ་པར་གསུངས་པ་ནི། བླ་མས་བྱ་བ་དེ་འགྲུབ་པར་ནུས་ཀྱང་སློབ་མས་བསྒྲུབ་པར་བྱ་བ་ཡིན་ལ། བླ་མས་སློབ་མའི་བྱ་བ་བསྒྲུབ་པར་གསུངས་པ་ནི་སློབ་མས་བྱ་བ་དེ་འགྲུབ་པར་མི་ནུས་ན་བླ་མས་བསྒྲུབ་པར་བྱ་བ་ཡིན་པས་སོ། །