[༦] སྐུ་སྲས་དམ་པ་གནུབས་ཡེ་ཤེས་རྒྱ་མཚོ་ནི།
ཡབ་གནུབས་ཡོན་ཏན་རྒྱ་མཚོ་དང་། ཡུམ་གླན་རྡོ་རྗེ་འབར་གྱི་སྲིང་མོ་སོ་མ་ལེགས་གཉིས་ཀྱི་སྲས་སུ་སྐུ་འཁྲུངས། སྐུ་ཚེ་སྔ་མ་ལ་ཚོགས་བསགས་ཤིང་བཟོད་པ་གོམས་པས་སྐུ་བྱད་མཛེས་ཤིང་ཐུགས་ཀྱང་དུལ་བས་ཀུན་ཀྱི་ཡིད་དུ་འོང་། ཤེས་རབ་དང་དད་བརྩོན་གྱི་སྤྱོད་པ་ཕུལ་དུ་གྱུར་པས་བླ་མ་ལ་མཆོག་ཏུ་གུས་ཤིང་སྒོ་གསུམ་ཞབས་ཏོག་གིས་ཅི་མཉེས་མཛད། ཐུགས་ཀྱི་དགོངས་པ་ལོན་ཏེ་རྒྱུད་ལུང་མན་ངག་ཐམས་ཅད་བསྩལ་ནས་བསྟན་པའི་བདག་པོར་མངའ་དབང་བསྐུར། ཡབ་ལ་མངའ་བའི་དབང་ཆོས་ཀྱི་མཛོད་ཐམས་ཅད་བུམ་པ་གང་བྱོའི་ཚུལ་དུ་གསན་ཞིང་། ཁྱད་པར་ཁུ་ལུང་མཁར་ལུང་དུ་ཆུ་བོ་བཞིའི་དབང་བསྐུར་ནས་གསང་མཚན་རྡོ་རྗེ་དབང་གྲུབ་རྩལ་དུ་བཏགས། བསྙེན་སྒྲུབ་མཐར་ཕྱིན་པས་མཆོག་གི་དངོས་གྲུབ་བརྙེས་ཤིང་གནས་ལུགས་ཀྱི་དོན་རྟོགས། ཡི་དམ་གྱི་ལྷ་དུ་མའི་ཞལ་གཟིགས་པ་དང་། སྐུ་ལུས་ལྷའི་དཀྱིལ་འཁོར་དུ་གཞན་ལ་ཡང་སྟོན་པར་ནུས། དམ་ཅན་རྣམས་བྲན་དུ་འཁོལ་ཞིང་མི་མ་ཡིན་ཐམས་ཅད་ཀྱིས་སྲོག་སྙིང་ཕུལ། མངོན་སྤྱོད་ཀྱི་ལས་གང་ལའང་འཕྲལ་དུ་རྟགས་འབྱིན་པ་སོགས་གྲུབ་པའི་རིག་འཛིན་ཆེན་པོའི་སར་བཞུགས་པའོ། །