གཉིས་པ་གནས་པ་དང་གནས་ཀྱི་ཁྱད་པར་བཤད་པ།

གཉིས་པ་གནས་པ་དང་གནས་ཀྱི་ཁྱད་པར་བཤད་པ་ལ།

གནས་པའི་ཁྱད་པར་གྱི་ཡན་ལག་བསྟན་པ་དང་གནས་ཀྱི་ཁྱད་པར་གྱི་ཡོན་ཏན་བསྟན་པ་དང་གཉིས་ལས། དང་པོ་ལ། རྩ་བར། བསྙེན་པར་རྫོགས་ནས་ལོ་བཅུ་མ་ལོན་པར་མཁན་པོ་ཉིད་དང་གནས་ཉིད་དང་མི་གནས་པར་འདུག་པར་མི་བྱའོ། །འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་མི་ལྡན་པས་ནི་མ་ཡིན་ནོ། །ཞེས་སོ། །འདིའི་དོན་བཤད་པ་ལ། གནས་པ་སློབ་མའི་རང་བཞིན་ངེས་པར་བྱ་བ་དང༌། ལོ་བཅུ་ལོན་པའི་རང་བཞིན་ངེས་པར་བྱ་བ་དང་གཉིས། དང་པོ་གསུམ་ལས། འདུལ་བའི་སྐབས་འདི་ནས་བཤད་པའི་གནས་པའི་མཚན་ཉིད་ནི། ཆོས་འདི་པའི་རབ་ཏུ་བྱུང་བ་གང་ཞིག་རང་གི་གནས་ཀྱི་བླ་མ་ལ་གུས་པར་བྱེད་པ་པོར་འོས་པའོ། ། གཉིས་པ་གནས་པར་འོས་པའི་མཚན་ཉིད་ནི། བསྙེན་རྫོགས་ཀྱི་སྡོམ་པ་བརྟན་པའི་ཡན་ལག་གི་ལོ་གྲངས་ལོན་པ་དང་འདུལ་བ་ཤེས་པ་གཉིས་ཚོགས་མ་ཡིན་པ་གང་ཞིག་རང་སངས་རྒྱས་ལས་དམན་ཞིང་ད་ལྟར་གྱི་ཆོ་ག་བཅས་ནས་ཆོས་འདི་པའི་རབ་བྱུང་ཡིན་པའོ། །ཞེས་པས་སྔོན་ཆོག་གི་དགེ་སློང་ཁ་ཅིག་དང་མུ་སྟེགས་ཀྱི་རབ་ཏུ་བྱུང་བ་དང་ཁྱིམ་པ་རྣམས་སེལ་ལོ། །ཞེས་མཚོ་ཊཱིཀ་ལས་གསུངས་སོ། །བསྙེན་རྫོགས་ཀྱི་སྡོམ་པ་བརྟན་པའི་ཡན་ལག་གི་ལོ་གྲངས་ནི། དགེ་སློང་བསྙེན་པར་རྫོགས་ནས་ལོ་བཅུ་ལོན་པ་དང༌། དགེ་སློང་མ་བསྙེན་པར་རྫོགས་ནས་ལོ་བཅུ་གཉིས་ལོན་པའོ། །

གསུམ་པ་གནས་པ་སློབ་མའི་ཁྱད་པར་གྱི་ཡོན་ཏན་ནི།

བླ་མ་ལ་གུས་ཚུལ་ཁྲིམས་ཡོངས་དག་དང༌། །བསམ་གཏན་དང་ནི་འདོན་ལ་རྟག་བརྩོན་དང༌། །གྲིམས་ཤིང་དུལ་ལ་བཟོད་དང་ལྡན་པ་ནི། །སྡོམ་བརྩོན་གནས་པའི་ཆོས་ལྡན་ཤེས་པར་བྱ། །ཞེས་སོ། ། གཉིས་པ་ལོ་བཅུ་ལོན་པའི་རང་བཞིན་ངེས་པར་བྱ་བ་ལ་གསུམ་ལས། དང་པོ་ལོ་བཅུ་ལོན་པའི་ཕན་ཡོན་ནི་བཙུན་ཞིང་མཁས་པའི་ཡན་ལག་གཞན་ཚང་གི་དབང་དུ་བྱས་ནས། བསྙེན་པར་རྫོགས་ནས་བར་མ་ཆད་པར་ལོ་བཅུ་ལོན་པ་ཡིན་ན་ཕན་ཡོན་གསུམ་འབྱུང་བ་ཡིན་ཏེ། མཁན་པོ་བྱར་རུང༌། གནས་ཀྱི་སློབ་དཔོན་བྱར་རུང༌། རང་གནས་མེད་དུ་འདུག་ཏུ་རུང་བའོ། །

གཉིས་པ་ལོ་བཅུ་མ་ལོན་པའི་ཉེས་དམིགས་ནི།

བསྙེན་པར་རྫོགས་ནས་ལོ་བཅུ་ལོན་པ་མ་ཡིན་ན་ཕན་ཡོན་གསུམ་པོ་དེ་དག་མི་འབྱུང་སྟེ་ལྡོག་པར་ངེས་པའོ། །འདིར་རྒྱུ་མཚན་སྦྱར་བ་ནི། དགེ་སློང་བསྙེན་པར་རྫོགས་ནས་བར་མ་ཆད་པར་ལོ་བཅུ་ལོན་པ་ཆོས་ཅན། ཕན་ཡོན་གསུམ་འབྱུང་བའི་ཡན་ལག་ཡིན་ཏེ། བསྙེན་རྫོགས་ཀྱི་སྡོམ་པ་བརྟན་པའི་ཡན་ལག་ཏུ་གྱུར་པའི་ལོ་གྲངས་ཚང་བ་ཡིན་པའི་ཕྱིར། དཔེར་ན་དགེ་སློང་མ་བསྙེན་པར་རྫོགས་ནས་བར་མ་ཆད་པར་ལོ་བཅུ་གཉིས་ལོན་པ་བཞིན་ནོ། །དགེ་སློང་བསྙེན་པར་རྫོགས་ནས་ལོ་བཅུ་མ་ལོན་པ་ཆོས་ཅན། ཕན་ཡོན་གསུམ་འབྱུང་བའི་ཡན་ལག་མ་ཚང་བ་ཡིན་ཏེ། བསྙེན་རྫོགས་ཀྱི་སྡོམ་པ་བརྟན་པའི་ཡན་ལག་ཏུ་གྱུར་པའི་ལོ་གྲངས་མ་ཚང་བའི་ཕྱིར། དཔེར་ན་དགེ་སློང་མ་བསྙེན་པར་རྫོགས་ནས་ལོ་བཅུ་གཉིས་བར་མ་ཆད་དུ་མ་ལོན་པ་བཞིན་ནོ། །དེ་བཞིན་དུ་འདུལ་བའི་བཅས་པ་གཞན་རྣམས་ལ་ཡང་རྒྱུ་མཚན་ཅི་རིགས་སུ་རིགས་པས་སྦྱར་རོ། །སྐབས་འདིར་མཚོ་ཊཱིཀ་༡༡༠ལས། འདིར་སྔ་རབས་པ་ཁ་ཅིག་འདུལ་བ་ལ་རྒྱུ་མཚན་སྦྱོར་བ་མི་འཐད་ཅེས་འཆད་ཀྱང༌། འདུལ་བ་ལ་རྒྱུ་མཚན་སྦྱར་དུ་རུང་སྟེ། རྒྱུ་མཚན་ལུང་དང་བསྟན་བཅོས་ལས་བཤད་པས་གྲུབ་བོ། །དེ་ཡང་ལུང་རྣམ་འབྱེད་ལས། བསླབ་པ་བཅས་པའི་ཕན་ཡོན་བཅུ་ཡང་དག་པར་གཟིགས་པས་ཞེས་དགོས་པའི་རྒྱུ་མཚན་གསུངས་ཤིང༌། གཞན་དག་སྨོད་པར་བྱེད། འཕྱར་ཀ་གཏོང་བར་བྱེད། ཁ་ཟེར་བར་བྱེད་ཅེས་ལུང་རྣམ་འབྱེད་ལས། དགག་བྱའི་རྒྱུ་མཚན་གསུངས་པ་དང༌། འདི་ཉིད་ལས། ཉའི་ཞག་ལ་སོགས་པ་ལྔ་སྨོས་ནས། དེ་དག་ནི་ནད་པ་ལ་ཕལ་ཆེར་སྦྱོར་བར་བྱེད་དོ། །ཞེས་པ་དང༌། འོད་ལྡན་ལས། ཅིའི་ཕྱིར་མི་བསད་ན་མཐར་འགྱུར་མི་མ་ཡིན་པ་བསད་ན་སྦོམ་པོར་འགྱུར། དུད་འགྲོ་བསད་ན་ལྟུང་བྱེད་དུ་འགྱུར་ཞེ་ན། མི་རྣམས་ནི་གཙོ་བོ་ཡིན། མི་མ་ཡིན་ནི་འབྲིང་ཡིན། དུད་འགྲོ་རྣམས་ནི་ཐ་ཆད་ཡིན་པས་ལྟུང་བ་ཐ་དད་པར་ཁོང་དུ་ཆུད་པར་བྱའོ། །ཞེས་དང༌། ཊཱི་ཀ་ལས། ཡང་ཡང་ཟ་བའི་ལྟུང་བྱེད་ཀྱང་དགེ་སློང་མ་རྣམས་ལ་རྣམ་པར་མི་བཞག་སྟེ། དགེ་སློང་མ་རྣམས་ནི་ཤས་ཆེར་མཆོད་པར་བྱ་བ་ཉིད་མ་ཡིན་པའི་ཕྱིར་དེ་དག་ལ་དེ་འབྱུང་དཀའ་བའི་ཕྱིར་རོ། །ཞེས་གསུངས་སོ། །འདུལ་བ་ལ་རྒྱུ་མཚན་མི་སྦྱོར་ན་འདུལ་བ་མདོར་བསྡུས་གསུངས་པ་དང་འགལ་ཏེ། འདུལ་བ་མདོར་བསྡུས་ནི་དངོས་སུ་གསུངས་པའི་རྒྱུ་མཚན་རྗེས་སུ་མཐུན་པ་ལ་སྦྱར་བ་སྟེ། གང་ཞིག་གནང་མེད་དེ་བཞིན་བཀག་མེད་པ། །དེ་ནི་གསུངས་པའི་རྗེས་མཐུན་བརྟགས་ཏེ་སྦྱར། །ཞེས་གསུངས་པས་སོ། །ཞེས་འདུལ་བ་ལ་རྒྱུ་མཚན་སྦྱར་དུ་ཡོད་པར་མཚོ་ཊཱིཀ་ལས་གསུངས་སོ། །