གསུམ་པ་ཉོན་མོངས་ལམ་གསུམ།
གསུམ་པ་ཉོན་མོངས་ལམ་གསུམ་ནི།
མ་རིག་སྲེད་ལེན་གསུམ་ཉོན་མོངས་པའི་ལམ། འདུ་བྱེད་སྲིད་པ་གཉིས་ལས་ཀྱི་ལམ། ལྷག་མ་རྣམས་སྡུག་བསྔལ་གྱི་ལམ། རིམ་བཞིན་ཉོན་མོངས་པའི་ཉོན་མོངས། ལས་ཀྱི་ཉོན་མོངས། ཚེའི་ཉོན་མོངས་ཡིན་ཏེ། མཛོད་ལས། ཉོན་མོངས་གསུམ་མོ་ལས་གཉིས་སོ། །གཞི་བདུན་དེ་བཞིན་འབྲས་བུ་ཡིན། །ཞེས་དང༌། དབུ་མ་རྟེན་འབྲེལ་སྙིང་པོ་ལས། དང་པོ་བརྒྱད་པ་དགུ་ཉོན་མོངས། །གཉིས་པ་བཅུ་བ་ལས་ཡིན་ཏེ། །ལྷག་མ་བདུན་ནི་སྡུག་བསྔལ་ཡིན། །ཞེས་དང༌། རིན་ཆེན་ཕྲེང་བར། ལམ་གསུམ་ཐོག་མཐའ་དབུས་མེད་པ། །འཁོར་བའི་དཀྱིལ་འཁོར་མགལ་མེ་ཡི། །དཀྱིལ་འཁོར་ལྟ་བུར་ཕན་ཚུན་དུ། །རྒྱུ་རྐྱེན་དུ་ནི་འཁོར་བར་འགྱུར། །ཞེས་སོ། །