གཉིས་པ་སྡེ་སྣོད་གསུམ་འཛིན་གྱི་ལྔ་བ།

གཉིས་པ་སྡེ་སྣོད་གསུམ་འཛིན་གྱི་ལྔ་བ་ནི།

རྩ་བར། སྡེ་སྣོད་མངོན་པར་ཤེས་པ་ཉིད་དོ། །ཞེས་གསུངས་ལ། དེའི་དོན་ནི། འཛིན་པ་ནི་ཚིག་དོན་གཉིས་ཀ་འཛིན་པ་སྟེ། འགྲེལ་ཆུང་ལས་སྡེ་སྣོད་གསུམ་འཛིན་པ་སྟེ་ཁ་ཏོན་དུ་ཤེས་པའོ། །ཞེས་སོ། །ཊཱི་ཀ་ལས། མདོ་སྡེ་ལ་སོགས་པ་གཟུང་བ་མི་བརྗེད་པ་ནི་འཛིན་པའོ། །ཞེས་སོ། །གསུམ་པ་སྡེ་སྣོད་གསུམ་མཁས་ཀྱི་ལྔ་བ་ནི། ཊཱི་ཀ་ལས། སྡེ་སྣོད་གསུམ་ཕན་ཚུན་འབྲེལ་བས་འདྲེས་པར་གནས་པ་ལ་སོ་སོར་༼འབྱེད་མཁས་ཏེ་མ་འདྲེས་པར།༽གནས་པར་ནུས་པ་ནི་མཁས་པའོ། །ཞེས་གསུངས་སོ། ། བཞི་བ་སྡེ་སྣོད་གསུམ་རིག་གི་ལྔ་བ་ནི། སྡེ་སྣོད་གསུམ་རིག་པ་གསུམ་དང་ཐུན་མོང་གི་མང་ཐོས་ཚུལ་ལྡན་གཉིས་དང་ལྔའོ། །དེ་གསུམ་ལ་ཚད་མ་གསུམ་གྱིས་སོ་སོར་ཤེས་པ་དེ། དེ་གསུམ་རིག་པའི་དོན་ཡིན་ཏེ། ཊཱི་ཀ་ལས། མངོན་སུམ་དང་རྗེས་སུ་དཔག་པའི་ཚད་མ་གཉིས་དང་ལུང་གིས་མདོ་སྡེ་ལ་སོགས་པ་སྦྱོར་བ་ནི་རིག་པའོ། །ཞེས་གསུངས་པས་སོ། །ལྔ་བ་སྡེ་སྣོད་གསུམ་གསལ་གྱི་ལྔ་བ་ཡོད་དེ། དེ་གསུམ་གྱི་ཚིག་དོན་མ་འདྲེས་པར་ལུང་རིགས་ཀྱི་གཞན་ལ་འཆད་ནུས་པ་དང༌།ཐུན་མོང་གི་མང་ཐོས་ཚུལ་ལྡན་གཉིས་དང་ལྔ་དེ་ཡིན་པའི་ཕྱིར་ཏེ། ཊཱི་ཀ་ལས། ལུང་དང་རིགས་པ་གཉིས་ཀྱིས་མདོ་སྡེ་ལ་སོགས་པ་སྦྱར་ཏེ་གཞན་ལ་གོ་བར་བྱེད་ནུས་པ་ནི་གསལ་བའོ། །ཞེས་གསུངས་པས་སོ། །མཚོ་ཊཱིཀ་ལས། གསལ་བ་ནི་འགྲེལ་ཆུང་ལས། སྡེ་སྣོད་གསུམ་གསལ་བ་སྟེ་བྱིད་༼མི་གསལ་བ༽པ་དང་ཆད་པ་ལྟ་བུ་ལ་མ་ནོར་བར་སྦྱོར་ནུས་པའོ་ཞེས་སོ། །དེ་ལྟར་ན་ཡང་རུང་སྟེ། ལྔ་པ་རང་དབང་ཅན་དུ་འགྱུར་རོ། ། ཞེས་གསུངས་སོ། །དེས་ན་རྩ་བར། སྡེ་སྣོད་མངོན་པར་ཤེས་པ་ཉིད་དོ། །ཞེས་པས་ལྔ་ཚན་བཞི་བསྟན་ཏེ། ལུང་ལས། མདོ་སྡེ་ལ་སོགས་པ་འཛིན་པ་དང་མཁས་པ་དང་རིག་པ་དང་གསལ་བ་དང༌། ཞེས་དང༌། ཊཱི་ཀ་ལས། མདོ་འདིས་ནི་ལྔ་བ་བཞི་བསྟན་ལ། ཞེས་གསུངས་པའི་ཕྱིར་རོ། །དྲུག་པ་སྡེ་སྣོད་གསུམ་འཛིན་དུ་འཇུག་ནུས་པའི་ལྔ་བ་ཡོད་དེ། སྡེ་སྣོད་གསུམ་པོ་དེ་དག་རང་གིས་ཤེས་ཤིང་དོན་གྱི་བདག་ཉིད་ཀྱིས་གཞན་འཛིན་དུ་འཇུག་ནུས་པ་གསུམ་དང་ཐུན་མོང་གི་མང་ཚུལ་གཉིས་དང་ལྔ་པོ་དེ་ཡིན་པའི་ཕྱིར་ཏེ། རྩ་བར། དེ་དག་འཛིན་དུ་འཇུག་ནུས་པ་ཉིད་དོ། །ཞེས་གསུངས་པའི་ཕྱིར་རོ། །བདུན་པ་ལྷག་པའི་བསླབ་པ་གསུམ་ལ་སློབ་པའི་ལྔ་བ་ཡོད་དེ། དེ་གསུམ་ལ་སློབ་པ་གསུམ་དང་ཐུན་མོང་གི་མང་ཐོས་ཚུལ་ལྡན་གཉིས་དང་ལྔ་དེ་ཡིན་པའི་ཕྱིར་ཏེ། རྩ་བར། ལྷག་པ་ཚུལ་ཁྲིམས་དང་སེམས་དང་ཤེས་རབ་ལ་སློབ་པ་ཉིད་དོ། །ཞེས་གསུངས་པའི་ཕྱིར་རོ། །བརྒྱད་པ་ལྷག་པའི་བསླབ་པ་གསུམ་ལ་སློབ་ཏུ་འཇུག་ནུས་པའི་ལྔ་བ་ཡོད་དེ། དེ་གསུམ་ལ་སློབ་ཏུ་འཇུག་ནུས་པ་གསུམ་དང་ཐུན་མོང་གི་མང་ཐོས་ཚུལ་ལྡན་གཉིས་དང་ལྔ་པོ་དེ་ཡིན་པའི་ཕྱིར་ཏེ། རྩ་བར། སློབ་ཏུ་འཇུག་ཀྱང་ནུས་པ་ཉིད་དོ། །ཞེས་གསུངས་པའི་ཕྱིར་རོ། །ལྷག་པའི་ཚུལ་ཁྲིམས་ལ་སོགས་པ་གསུམ་ལ། གཞི་འགྲེལ་ལས། ལྷག་པ་ཞེས་བྱ་བ་ནི་ལྷག་པའི་དོན་དང་དབང་དུ་བྱ་བའི་དོན་ཏེ། ཞེས་སོ། །དེའི་དོན་ནི། ཉན་ས་ལས། ལྷག་པའི་དོན་ཇི་ལྟ་བུ་ཡིན་ཞེ་ན། ལྷག་པའི་ཚུལ་ཁྲིམས་ཀྱི་བསླབ་པ་ལ་སོགས་པ་བསླབ་པ་གསུམ་པོ་དེ་དག་ནི་བསྟན་པ་འདི་ཁོ་ན་ལ་ཡོད་ཀྱི་འདི་ལས་ཕྱི་རོལ་པ་རྣམས་དང་ཐུན་མོང་བ་མ་ཡིན་ཏེ་དེ་ནི་ལྷག་པའི་དོན་ཡིན་ནོ། །ཞེས་སོགས་གསུངས་སོ། །ལྷག་པའི་ཚུལ་ཁྲིམས་འདུལ་བའི་བསླབ་པའི་གཞི་ཐམས་ཅད་དང༌། ལྷག་པའི་སེམས་བསམ་གཏན་བཞི་པོ་དང༌། ལྷག་པའི་ཤེས་རབ་ཟག་པ་མེད་པའི་ལམ་སྟེ། གསུམ་པོ་དེ་དག་གི་ཕྱིར་སློབ་པ་ཉིད་དོ། །ཊཱི་ཀ་ལས། ཚུལ་ཁྲིམས་དང་སེམས་དང་ཤེས་རབ་ཀྱི་ཕྱིར་རོ། །ཞེས་སོ། །ཚུལ་ཁྲིམས་ལ་སློབ་ཅེས་པ་འདིའི་འགྲེལ་ཆུང་ལས་ནི་བསླབ་པ་ཕྲ་མོ་ཁ་ན་མ་ཐོ་བ་ཙམ་ལ་ཡང་བག་བྱེད་ཅིང་བསྲུང་བ་ལ་བྱའོ་ཞེས་ཚུལ་ཁྲིམས་རྒྱུད་ལ་ལྡན་པ་ལ་བཤད་དོ། །དེ་ལྟར་ན་ལྔ་ཚན་གཅིག་གི་ནང་དུ་ཚུལ་ཁྲིམས་དང་ལྡན་པ་ལན་གཉིས་སྨོས་པས་ཟློས་པའི་སྐྱོན་དུ་འགྱུར་རོ། །བསླབ་པ་གསུམ་ལ་རང་གིས་བསླབ་པའི་ཡོན་ཏན་ཡོད་པའི་སྟེང་དུ་གཞན་སློབ་ཏུ་འཇུག་ཀྱང་ནུས་པ་ཉིད་དོ་ཞེས་སོ། །ཀྱང་ཞེས་པའི་སྒྲས་ནི་བསླབ་པ་གསུམ་ལ་རང་གིས་བསླབས་པ་བསྡུས་ཏེ་དོན་དེ་ལྟར་ཊཱི་ཀ་ལས་བཤད་དོ། །དགུ་བ་ལྷག་པའི་སྤྱོད་སོགས་གསུམ་ལ་སློབ་པའི་ལྔ་བ་ཡོད་དེ། ལྷག་པའི་སྤྱོད་པ་དང་འདུལ་བ་དང་སོ་ཐར་གསུམ་ལ་སློབ་པ་གསུམ་དང་མདོ་མངོན་ལ་མང་ཐོས་དང་ཚུལ་ལྡན་ལྔ་དེ་ཡིན་པའི་ཕྱིར་ཏེ། རྩ་བར། ལྷག་པའི་སྤྱོད་པ་དང་འདུལ་བ་དང་སོ་སོར་ཐར་པ་ལ་ཡང་དེ་བཞིན་ནོ། །ཞེས་གསུངས་པས་སོ། །ཕྱི་རོལ་པ་རྣམས་ལས་ལྷག་པའི་སྤྱོད་པ་ནི་འདུལ་བ་ལས་གསུངས་པའི་སྤྱོད་ལམ་བཞིའོ། །འདུལ་བ་ནི་སོ་སོ་ཐར་པའི་རྣམ་པར་བཤད་པར་གྱུར་པ་རྣམ་འབྱེད་ལ་སོགས་པ་ལུང་དུམ་བུ་བཞིའོ། །སོ་སོ་ཐར་པ་ནི་དགེ་སློང་ཕ་མའི་སོ་སོ་ཐར་པའི་མདོ་བམ་པོ་གཉིས་པ་རྣམ་གཉིས་ཏེ་དེ་ལྟར་སྐབས་འདི་ཉིད་ཀྱི་ཊཱི་ཀ་ལས་བཤད་དོ། །རྣམ་གྲངས་གཞན་ཡང་གནས་མལ་གྱི་གཞིའི་ཊཱི་ཀ་དང་སྐབས་འདིའི་འགྲེལ་ཆུང་ལས་འདུལ་བ་ནི་ལུང་གཞི་ཡིན་ལ་སོ་སོ་ཐར་པ་ནི་སོ་སོ་ཐར་པའི་མདོ་རྣམ་འབྱེད་དང་བཅས་པ་ཡིན་པར་ཡང་གསུངས་སོ། །བཅུ་བ་སྤྱོད་སོགས་གསུམ་ལ་འཇུག་ནུས་པའི་ལྔ་བ་ཡོད་དེ། དེ་གསུམ་ལ་འཇུག་ནུས་པ་གསུམ་དང་ཚུལ་ལྡན་དང་མདོ་མངོན་མང་ཐོས་ཡང་དེ་ཡིན་པའི་ཕྱིར་རོ། །མང་ཐོས་ཀྱི་ཁྱད་པར་ནི། གཞི་འགྲེལ་ལས། འདི་མན་ཆད་ལྔ་པ་གང་ལ་མདོ་སྡེ་དང་འདུལ་བ་དང་མ་མོའི་སྡེ་སྣོད་མངོན་པར་ཤེས་པ་ཉིད་ཡོད་པ་དེར་ནི་མང་དུ་ཐོས་པ་ཉིད་གཞན་གྱི་བསྟན་བཅོས་ཀྱི་ཡུལ་ཅན་ཡིན་ནོ། །གང་དུ་སྡེ་སྣོད་མངོན་པར་ཤེས་པ་མ་བསྡུས་པ་དེར་ནི་མང་དུ་ཐོས་པ་ཉིད་རང་གི་གྲུབ་པའི་མཐའི་ཡུལ་ཅན་ཡིན་པར་རིག་པར་བྱའོ། །ཞེས་གསུངས་སོ། །བཅུ་གཅིག་པ་ཕུན་ཚོགས་གོང་མའི་ལྔ་བ་ཡོད་དེ། དང་བའི་དད་པ་དང༌། འདོད་པའི་དད་པ་དང༌། ཡིད་ཆེས་པའི་དད་པ་གསུམ་སྟེ་དད་པ་ཕུན་སུམ་ཚོགས་པ་དང༌། རང་བཞིན་དང་བཅས་པའི་ཁ་ན་མ་ཐོ་བ་སྤོང་བའམ་མ་གོས་པའི་ཚུལ་ཁྲིམས་ཕུན་སུམ་ཚོགས་པ་དང༌། འདུལ་གཞུང་སོགས་མང་པོ་ཐོས་པ་དང༌། དགེ་བའི་བཤེས་གཉེན་མང་པོ་ལས་ཐོས་པ་དང༌། གྲོགས་མང་པོ་དང་ལྷན་ཅིག་ཏུ་ཐོས་པ་སྟེ་ཁྱད་ཆོས་གསུམ་ལྡན་གྱི་ཐོས་པ་ཕུན་སུམ་ཚོགས་པ་དང༌། གཏོང་བ་ཏེ། ཡུལ་ཡིད་དུ་མི་འོང་བ་ལ་གཏོང་བ་དང༌། དངོས་པོ་ཡིད་དུ་འོང་བ་གཏོང་བ་དང༌། ཁམ་གང་དང་ལུས་གང་ཙམ་ལས་ཕྲི་ནས་གཏོང་པ་སྟེ་ཁྱད་ཆོས་གསུམ་ལྡན་གྱི་གཏོང་བ་ཕུན་སུམ་ཚོགས་པ་དང༌། ཤེས་རབ་ཕུན་སུམ་ཚོགས་པ་དང་ལྔ་དེ་ཡིན་པའི་ཕྱིར་ཏེ། རྩ་བར། དད་པ་དང་ཚུལ་ཁྲིམས་དང་ཐོས་པ་དང་གཏོང་བ་དང་ཤེས་རབ་ཕུན་སུམ་ཚོགས་པ་ཉིད་དོ། །ཞེས་དང༌། ཊཱི་ཀ་ལས། དད་པ་ལ་སོགས་པ་ཕུན་སུམ་ཚོགས་པ་དང་ལྡན་པའོ། །ཞེས་གསུངས་པས་སོ། །བཅུ་གཉིས་པ་ཕུན་ཚོགས་འོག་མའི་ལྔ་བ་ཡོད་དེ། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཕུན་སུམ་ཚོགས་པ་དང༌། རྣམ་པར་གྲོལ་བ་དང༌། དེ་ཤེས་མཐོང་ཕུན་སུམ་ཚོགས་པ་ལྔ་དེ་ཡིན་པའི་ཕྱིར་ཏེ། རྩ་བར། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་དེ་ཤེས་པ་དང་མཐོང་བ་རྣམས་ཀྱིས་ཀྱང་ངོ། །ཞེས་དང༌། ཊཱི་ཀ་ལས། ཚུལ་ཁྲིམས་ཕུན་སུམ་ཚོགས་པ་ཞེས་སྨོས་པས་ནི་འདུལ་བ་མངོན་པར་ཤེས་པ་ཉིད་སྟོན་ཏོ། །ཞེས་དང༌། གཞི་འགྲེལ་ལས། ཏིང་ངེ་འཛིན་ནི་སེམས་རྩེ་གཅིག་པའི་མཚན་ཉིད་དེ། ཤེས་རབ་ནི་འདིར་ཡང་ཆོས་རབ་ཏུ་རྣམ་པར་འབྱེད་པའོ། །ཞེས་དང༌། ཊཱི་ཀ་ལས། རྣམ་པར་གྲོལ་བ་ནི་འདིར་མི་སློབ་པའི་རྣམ་པར་གྲོལ་བ་ལ་བྱའོ། །རྣམ་པར་གྲོལ་བ་དེ་ཤེས་པ་ནི་ཟད་པ་དང་མི་སྐྱེ་བ་ཤེས་པ་ཞེས་བྱའོ། །དེ་མཐོང་བ་ནི་མི་སློབ་པའི་ལྟ་བ་སྟེ། ཞེས་གསུངས་པས་སོ། །ཕུན་སུམ་ཚོགས་པ་འོག་མ་འདི་མི་སློབ་པ་དགྲ་བཅོམ་པའི་རྒྱུད་ལ་ལྡན་པ་ཡིན་ཡང་མི་སློབ་པ་ཉིད་དོ་ཞེས་པ་དང་ཟློས་པའི་སྐྱོན་དུ་མི་འགྱུར་ཏེ། ཕུན་སུམ་ཚོགས་པ་འོག་མའི་ལྔ་ཚན་འདི་ནི་དགྲ་བཅོམ་པའི་ཚུལ་ཁྲིམས་ཕུན་སུམ་ཚོགས་པ་ནས་རྣམ་པར་གྲོལ་བ་ལ་སོགས་པ་ཕུན་སུམ་ཚོགས་པ་ཡིན་པའི་ཕྱིར་དང༌། མི་སློབ་པའི་ལྔ་ཚན་ནི་དགྲ་བཅོམ་པའི་ཚུལ་ཁྲིམས་དང་ལྡན་ཙམ་ནས་རྣམ་པར་གྲོལ་བ་ལ་སོགས་པ་ལྡན་ཙམ་ཡིན་པའི་ཕྱིར་རོ། །དེ་ལྟར་ཡང་ཕུན་སུམ་ཚོགས་པའི་ལྔ་ཚན་གྱི་ལུང་ལས། ཚུལ་ཁྲིམས་ཕུན་སུམ་ཚོགས། ཞེས་པ་ནས། རྣམ་པར་གྲོལ་བ་ཕུན་སུམ་ཚོགས་པ་དང༌། རྣམ་པར་གྲོལ་བའི་ཡེ་ཤེས་མཐོང་བ་ཕུན་སུམ་ཚོགས་པ་ཞེས་གསུང་ཞིང་མི་སློབ་པའི་ལྔ་ཚན་གྱི་ལུང་ལས་མི་སློབ་པའི་ཚུལ་ཁྲིམས་ཀྱི་ཕུང་པོ་དང་ལྡན། ཞེས་པ་ནས། མི་སློབ་པའི་རྣམ་པར་གྲོལ་བའི་ཕུང་པོ་དང་ལྡན་མི་སློབ་པའི་རྣམ་པར་གྲོལ་བ་ཤེས་པ་དང་མཐོང་བའི་ཕུང་པོ་དང་ལྡན་ཞེས་གསུངས་པས་གྲུབ་བོ། །དགྲ་བཅོམ་པའི་ཚུལ་ཁྲིམས་ལ་སོགས་པ་ལྡན་ཙམ་ཡིན་ཡང་ཚུལ་ཁྲིམས་ཕུན་སུམ་ཚོགས་པ་མ་ཡིན་པ་ཡོད་དེ། དགྲ་བཅོམ་པ་བཅས་འགལ་གྱི་ལྟུང་བས་རྒྱུད་ལ་གོས་པའི་ཚུལ་ཁྲིམས་དང་ལྡན་པ་ནི་དགྲ་བཅོམ་པའི་ཚུལ་ཁྲིམས་དང་ལྡན་ཙམ་ཡིན་ཡང་ཚུལ་ཁྲིམས་ཕུན་སུམ་ཚོགས་པ་མ་ཡིན་ནོ། །དེ་བཞིན་དུ་དགྲ་བཅོམ་པ་རྒྱན་མེད་ཤེས་རབ་ཀྱི་ཆ་ལས་རྣམ་པར་གྲོལ་བ་ནི་ཉོན་མོངས་པའི་སྒྲིབ་པ་ལས་རྣམ་པར་གྲོལ་བས་རྣམ་པར་གྲོལ་བ་དང་ལྡན་ཙམ་ཡིན་ཡང༌། རྣམ་པར་གྲོལ་བ་ཕུན་སུམ་ཚོགས་པ་མ་ཡིན་ཏེ། སྙོམས་འཇུག་གི་སྒྲིབ་པ་ལས་མ་གྲོལ་བའི་ཕྱིར་རོ། །དགྲ་བཅོམ་པ་རྒྱན་ཅན་གཉིས་ཀའི་ཆ་ལས་རྣམ་པར་གྲོལ་བ་ནི་དགྲ་བཅོམ་པའི་རྣམ་པར་གྲོལ་བ་ཕུན་སུམ་ཚོགས་པ་ཡིན་ནོ། །