གཉིས་པ་རང་ལུགས་བཤད་པ།

གཉིས་པ་རང་ལུགས་བཤད་པ་ལ།

མཚན་ཉིད། དབྱེ་བ། སྒྲ་བཤད་འཇུག་དང་གསུམ། དང་པོ་ནི། དེ་སྒྲུབ་ཀྱི་བསྒྲུབ་བྱའི་ཆོས་ཀྱི་སྒྲུབ་ཚུལ་དང་མཐུན་པར་མི་སྟོང་བ་དེ། དེ་སྒྲུབ་ཀྱི་མཐུན་ཕྱོགས་ཀྱི་མཚན་ཉིད། སྒྲ་མི་རྟག་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་དེ། སྒྲ་མི་རྟག་པར་སྒྲུབ་པར་བྱེད་པའི་མཐུན་ཕྱོགས་ཀྱི་མཚན་ཉིད། དེ་དང་མི་རྟག་པ་གཉིས་དོན་གཅིག མཚན་གཞི་ནི་བུམ་པ་ལྟ་བུའོ། །དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་བསྒྲུབ་བྱའི་ཆོས་ཀྱི་འགོད་ཚུལ་དང་མཐུན་པར་མི་སྟོང་བ་དེ། དུ་ལྡན་གྱི་ལ་ལ་མེ་ཡོད་པར་སྒྲུབ་པར་བྱེད་པའི་མཐུན་ཕྱོགས་ཀྱི་མཚན་ཉིད། དེ་དང་མེ་ཡོད་པ་དོན་གཅིག མཚན་གཞི་ནི། ཚང་མང་སོགས་སོ། །དེ་ལྟར་འཐད་དེ། རིགས་སྒོ་ལས། བསྒྲུབ་པར་བྱ་བའི་ཆོས་ཀྱི་སྤྱིའི་དོན་མཚུངས་པ་ཉིད་མཐུན་པའི་ཕྱོགས་ཡིན་ཏེ། འདི་ལྟར་སྒྲ་མི་རྟག་པར་སྒྲུབ་པ་ལ་བུམ་པ་ལ་སོགས་པ་ཡང་མི་རྟག་པ་ཡིན་པས་མཐུན་པའི་ཕྱོགས་སོ། །ཞེས་ཕྱོགས་ཏེ་ཞེས་པ་ཡན་ཆད་ཀྱིས་མཐུན་ཕྱོགས་སྤྱི་བཤད་ནས། འདི་ལྟར་ཞེས་སོགས་ཀྱིས་དེ་སྒྲུབ་ཀྱི་མཐུན་ཕྱོགས་ཀྱི་མཚན་གཞི་བསྟན་ཅིང༌། བུམ་པ་ལ་སོགས་པས་གང་དང་མཐུན་པའི་དཔེ་བསྟན། ཡང་སྒྲས་མཐུན་དཔེ་སོགས་སྡུད་ཅིང༌། མི་རྟག་པ་ཡིན་པས་མཐུན་པའི་ཕྱོགས་སོ། །ཞེས་པས་མི་རྟག་པ་གང་ཡིན་པ་དེ་དག་མི་རྟག་པ་ཡིན་པའི་རྒྱུ་མཚན་གྱིས་མཐུན་ཕྱོགས་སུ་འཇོག་ཅེས་བསྟན་ཏོ། །

གཉིས་པ་དབྱེ་བ་ནི།

མཐུན་ཕྱོགས་དེ་ལ་ཡང་ཡིན་འགོད་ཀྱི་དབང་དུ་བྱས་པ་དང༌། ཡོད་འགོད་ཀྱི་དབང་དུ་བྱས་པ་གཉིས། དང་པོ་ནི། བསྒྲུབ་བྱའི་ཆོས་གང་ཡིན་རྒྱུ་དེ་དང་ཡིན་པར་དོན་མཐུན་པ་རྣམས་མཐུན་ཕྱོགས་དང༌། གཉིས་པ་ཡོད་འགོད་རྣམས་ལ་བསྒྲུབ་བྱའི་ཆོས་གང་ཡིན་རྒྱུ་དེ་དང་ཡོད་པར་དོན་མཐུན་པ་རྣམས་མཐུན་ཕྱོགས་ཞེས་བྱའོ། །དེས་ན་མཚོན་བྱ་མ་ཡིན་པ་བུམ་པ་མཚོན་བྱར་སྒྲུབ་པའི་མཐུན་ཕྱོགས་ཡིན་ལ། དེ་དང་རིགས་འདྲ་བ་གཞན་ལ་ཡང་ཤེས་པར་བྱའོ། །ཡང་ན་གཏན་ཚིགས་རིགས་པའི་དོན་བསྡུས་ལྟར་མཐུན་ཕྱོགས་ལ་དབྱེ་ན། འགལ་རྟགས་ཀྱི་མཐུན་ཕྱོགས་ལྟར་རྟགས་ལ་གཏན་ནས་མེད་པའི་མཐུན་ཕྱོགས་དང༌། འབྲས་རྟགས་ཕར་ཆེར་གྱི་མཐུན་ཕྱོགས་ལྟར་རྟགས་དེ་རྣམ་གཉིས་སུ་འཇུག་པའི་མཐུན་ཕྱོགས་དང༌། སྒྲ་མི་རྟག་སྒྲུབ་ལ་བྱས་པ་བཀོད་པའི་མཐུན་ཕྱོགས་ལྟར་རྟགས་ལ་ཁྱབ་བྱེད་དུ་ཡོད་པའི་མཐུན་ཕྱོགས་དང་གསུམ་ཡོད་ལ། མི་མཐུན་ཕྱོགས་ལ་དབྱེ་ན། སྒྲ་མི་རྟག་སྒྲུབ་ལ་མཚོན་ན་མེད་པ་མི་མཐུན་ཕྱོགས། གཞན་པ་མི་མཐུན་ཕྱོགས། འགལ་བ་མི་མཐུན་ཕྱོགས་དང་གསུམ། རི་བོང་རྭ་དང་པོ་དང༌། དོན་དམ་བདེན་པ་གཉིས་པ་དང༌། རྟག་པ་གསུམ་པ་ཡིན། དང་པོ་རི་བོང་རྭ་ཆོས་ཅན། སྒྲ་མི་རྟག་སྒྲུབ་ཀྱི་མེད་པ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མེད་པ་ཡིན་པའི་ཕྱིར། རྟགས་གཉིས་ཀ་གྲུབ་སྟེ། མེད་ངེས་ཡིན་པའི་ཕྱིར། གཉིས་པ་ནི། དོན་དམ་བདེན་པ་ཆོས་ཅན། སྒྲ་མི་རྟག་སྒྲུབ་ཀྱི་གཞན་པ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མི་རྟག་པ་ལས་གཞན་ཡིན་པའི་ཕྱིར། རྟགས་གཉིས་ཀ་གྲུབ་སྟེ། རྟག་པ་ཡིན་པའི་ཕྱིར། གསུམ་པ་ནི། རྟག་པ་ཆོས་ཅན། སྒྲ་མི་རྟག་སྒྲུབ་ཀྱི་འགལ་བ་མི་མཐུན་ཕྱོགས་ཡིན་པར་ཐལ། སྒྲ་མི་རྟག་སྒྲུབ་ཀྱི་མི་མཐུན་ཕྱོགས་གང་ཞིག མི་རྟག་པ་དང་འགལ་བ་ཡིན་པའི་ཕྱིར། རྟགས་རེ་རེ་ནས་གྲུབ་སྟེ། རྟག་པ་དང་གཅིག་ཡིན་པའི་ཕྱིར། དེ་དང་ཕལ་ཆེར་འདྲ་བར་གཏན་ཚིགས་རིགས་པའི་དོན་བསྡུས་ལས། དབྱེ་ན། མེས་གཞི་འགར་གྲང་རེག་འགོག་པ་ན་ཆུ་ཀླུང་ལྟ་བུ་མེད་པའི་མི་མཐུན་ཕྱོགས། རེག་བྱ་བཏང་སྙོམས་ལྟ་བུ་གཞན་པའི་མི་མཐུན་ཕྱོགས། གྲང་རེག་ལྟ་བུ་འགལ་བ་མི་མཐུན་ཕྱོགས་ཏེ་གསུམ་མོ། །ཞེས་གསུངས་སོ། །