གཉིས་པ་མཐའ་རགས་ཙམ་དཔྱད་པ།

གཉིས་པ་མཐའ་རགས་ཙམ་དཔྱད་པ་ལ།

རྒྱན་གྱི་ས་འགྲེལ་ལས།སྦྱིན་པ་མཚན་ཉིད་བཞི་དང་ལྡན་པ་སྟེ། ཞེས་དང༌། ཉ་ཊཱིཀ་ལས། སྦྱིན་བྱ་ཅི་རིགས་པ་ཡོངས་སུ་གཏོང་བའི་ཆོས་བཞི་ལྡན་ཏེ། ཞེས་དང༌། སེམས་རྩེ་གཅིག་པ་ཆོས་བཞི་ལྡན། ཞེས་དང༌། ཚུལ་ཕར་ནི་སྦྱིན་ཕར་ཡིན་ལ། སྦྱིན་ཕར་ཡིན་ལ་ཚུལ་ཕར་མིན་པ་ཡོད་དེ། ཚུལ་ཕར་གྱིས་མ་ཟིན་པའི་སྦྱིན་ཕར་རོ། །ཞེས་དང༌། ཐེག་བསྡུས་སུ། སྦྱིན་པ་ཡང་ཡིན་ལ་ཕ་རོལ་ཕྱིན་པ་མིན་པའང་ཡོད་ཅེས་མུ་བཞིའོ། །ཞེས་སོགས་དང༌། སྤྱོད་འཇུག་ས་འགྲེལ་ལས། ཕར་ཕྱིན་ཡིན་ལ་སྦྱིན་པ་མ་ཡིན་པ་དམ་པ་དྲུག་དང་ལྡན་པའི་ཚུལ་ཁྲིམས་ལྟ་བུ་དང༌། ཞེས་སོགས་ཀྱི་ལུང་དེ་དག་གི་དགོངས་དོན་དཔྱད་རྒྱུ་ཆེས་མང་བར་སྣང་ངོ༌། །ཆོས་བཞི་ལྡན་གྱི་ནང་ནས་རྣམ་པར་མི་རྟོག་པ་ལ་གང་ཟག་གི་བདག་མེད་དང་ཆོས་ཀྱི་བདག་མེད་རྟོགས་པའི་བློ་གཉིས་ཡོད་མེད་ནི། ཉ་ཊཱིཀ་ལས་བདག་མེད་གཉིས་རྟོགས་པའི་མི་རྟོག་ཡེ་ཤེས་ཀྱིས་ཟིན་པ། ཞེས་སོགས་ཀྱིས་དཔྱད། ཡང་ཉ་ཊཱིཀ་ལས། མི་མཐུན་ཕྱོགས་ཀྱིས་མི་ཚུགས་པའི་གོ་ཆའི་སྒྲུབ་པའི་མཚན་ཉིད་བྱང་སེའི་སྒྲུབ་པ་གང་ཞིག བསམ་པའི་བྱ་བ་སྟེ། གནོད་འཇོམས་སུ། གོ་ཆ་ཆེན་པོ་བགོས་པ་ཞེས་བྱ་བ་ནི་སེམས་དང་པོ་ནས་བཟུང་སྟེ་བསམ་པ་རྒྱ་ཆེ་བར་བསྟན་པའོ་ཞེས་སོ། །ས་བཅུ་བའི་འགྲེལ་བར། དེ་ལ་གོ་ཆ་ནི་སྨོན་པའོ། །ཞེས་དབྱིག་གཉེན་གྱིས་སོ། །དབྱེ་ན་དྲུག་གམ་སོ་དྲུག་གོ །འདིར་སྨོས་གོ་སྒྲུབ་ཀྱི་མཚན་ཉིད། གང་ཞིག ཕྱིན་དྲུག་རེ་རེར་དྲུག་དྲུག་ཚང་བར་ཉམས་སུ་ལེན་པར་གོ་བགོས་པའོ། །ཞེས་གསུངས་སོ། །ཡང་ཉ་ཊཱིཀ་ལས། ཐེག་བསྡུས་སུ། ཤེས་རབ་ཀྱི་ཕ་རོལ་ཏུ་ཕྱིན་པ་དང་རྣམ་པར་མི་རྟོག་པའི་ཡེ་ཤེས་ནི་ཁྱད་པར་མེད་དེ། ཞེས་གསུངས་པ་ལ། མི་རྟོག་པ་རྟོགས་པའི་ཆོས་རབ་ཏུ་རྣམ་འབྱེད་ཀྱི་ཆོས་བཞི་ལྡན་གྱི་བློ་ཆོས་ཅན། རྣམ་པར་མི་རྟོག་པའི་ཡེ་ཤེས་ཡིན་པར་ཐལ། ཤེར་རབ་ཀྱི་ཕར་ཕྱིན་ཡིན་པའི་ཕྱིར་ཏེ། ཆོས་ཅན་དེའི་ཕྱིར། ཁྱབ་སྟེ། ཉ་ཊཱིཀ་ལས། ཆོས་རབ་ཏུ་རྣམ་འབྱེད་ཀྱི་བློ་ཆོས་བཞི་ལྡན། ཞེས་གསུངས་སོ་ཞེ་ན་ཅུང་ཟད་དཔྱད་རྒྱུ་སྣང་ངོ༌། །ཐེག་བསྡུས་སུ། སྦྱིན་པ་ཡང་ཡིན་ལ་ཕ་རོལ་ཕྱིན་པ་མིན་པའང་ཡོད་ཅེས་མུ་བཞིའོ། །ཞེས་གསུངས་པ་དང༌། རྒྱན་ལས། སྔ་མ་ལ་བརྟེན་ཕྱི་མ་སྐྱེ། །དམན་དང་མཆོག་ཏུ་གནས་ཕྱིར་དང༌། །རགས་པ་དང་ནི་ཕྲ་བའི་ཕྱིར། །དེ་དག་རིམ་པར་བསྟན་པ་ཡིན། །ཞེས་གསུངས་པ་གཉིས་འགལ་མེད་དུ་སྒྲུབ་ཚུལ་ཇི་ལྟར་ཡིན་གཞུང་ལུགས་རབ་འབྱམས་སྨྲ་བའི་དབང་བོ་རྣམས་ཀྱི་བགོ་སྐལ་དུ་བཞག་པའོ། །ཡང་ཐེག་ཆེན་གྱི་ལམ་ཡིན་ན་ཕར་ཕྱིན་དྲུག་པོ་གང་རུང་ཡིན་པས་ཁྱབ་པར་ཐལ། རྒྱན་ལས། ཐེག་ཆེན་མཐའ་དག་འདིར་ཟད་དོ། །ཞེས་དང༌། དེའི་ས་འགྲེལ་ལས། ཐེག་པ་ཆེན་པོའི་དོན་མཐའ་དག་ནི་འདི་ཙམ་དུ་ཟད་ཅིང་འདུས་པའི་དབང་དུ་བྱས་ནས་ཕ་རོལ་ཏུ་ཕྱིན་པ་དྲུག་ཏུ་བཞག་པ་ཉིད་དོ། །ཞེས་དང༌། ཐབས་སམ་ལམ་གྱི་རྣམ་པ་ཐམས་ཅད་ཀྱི་དབང་དུ་བྱས་ནས་ཕ་རོལ་ཏུ་ཕྱིན་པ་དྲུག་ཏུ་རྣམ་པར་བཞག་པའོ། །ཞེས་དང༌། སྤྱོད་འཇུག་ས་འགྲེལ་ལས། དགེ་བའི་ཆོས་ཐམས་ཅད་ཕ་རོལ་ཏུ་ཕྱིན་པ་དྲུག་ཏུ་འདུས་པ་སྟེ། ཞེས་གསུངས་པའི་ཕྱིར་ཟེར་ན་སྐབས་དུ་མར་དངོས་བརྒྱུད་ཉམས་ལེན་རྒྱུ་འབྲས་ཅི་རིགས་ཀྱིས་བསྡུ་ཚུལ་ཞིག་ཡོད་པར་སྣང་ངོ༌། །