བཅུ་གསུམ་པ་དྲན་ལྡན་གྱི་ལྔ་བ།

བཅུ་གསུམ་པ་དྲན་ལྡན་གྱི་ལྔ་བ་ཡོད་དེ།

ཚུལ་ལྡན་དང་འདུལ་བ་མང་ཐོས་དང༌། ཡང་དག་སྤོང་བའི་བརྩོན་འགྲུས་བརྩམས་པ་དང༌། ཤེས་རབ་དང་དྲན་པ་ཉེར་བཞག་གི་དྲན་པ་ལྡན་པ་དང་ལྔ་དེ་ཡིན་པའི་ཕྱིར་ཏེ། རྩ་བར། དྲན་པ་དང་ལྡན་པ་ཉིད་དང༌། ཞེས་དང༌། གཞི་འགྲེལ་ལས། བརྩོན་འགྲུས་བརྩམས་པ་ནི་དགེ་བ་དང་མི་དགེ་བའི་ཆོས་བསྐྱེད་པ་དང་དགག་པ་ལ་སོགས་པའོ། །ཞེས་དང༌། མཚོ་ཊཱིཀ་ལས། ཤེས་རབ་དང་ལྡན་པ་ནི་ཆོས་རབ་ཏུ་རྣམ་པར་འབྱེད་པ་དང་ལྡན་པའོ། །ཞེས་དང༌། གཞི་འགྲེལ་ལས། དྲན་པ་དང་ལྡན་པ་ནི་དྲན་པ་ཉེ་བར་བཞག་པ་དང་ལྡན་པའོ། །ཞེས་གསུངས་པའི་ཕྱིར་རོ། ། བཅུ་བཞི་པ་ནང་དུ་འཇོག་པའི་ལྔ་བ་ཡོད་དེ། ཚུལ་ལྡན་དང་འདུལ་བ་མང་ཐོས་དང་སྔར་ལྟར་བརྩོན་ཤེས་གཉིས་དང་རབ་ཏུ་དབེན་པའི་ནང་དུ་ཡང་དག་པར་འཇོག་པ་དང་ལྔ་དེ་ཡིན་པའི་ཕྱིར་ཏེ། རྩ་བར། ནང་དུ་ཡང་དག་བཞག་པ་ཉིད་དང༌། ཞེས་དང༌། ཊཱི་ཀ་ལས། ནང་དུ་ཡང་དག་པར་བཞག་པ་ནི་རབ་ཏུ་དབེན་པར་གྱུར་པ་ཉིད་ཅེས་བྱ་བའི་ཐ་ཚིག་གོ། །ཞེས་དང༌། འགྲེལ་ཆུང་ལས། ལུས་དབེན་པ་ནི་དགོན་པ་ན་གནས། སེམས་དབེན་པ་ནི་མྱ་ངན་མེད་པའོ། །ཞེས་གསུངས་པས་སོ། །བཅོ་ལྔ་བ་མཉམ་པར་བཞག་པའི་ལྔ་བ་ཡོད་དེ། སྔར་གྱི་དང་པོ་བཞི་དང་དབང་པོ་མི་རྒོད་པའི་མཉམ་བཞག་ལྔ་དེ་ཡིན་པའི་ཕྱིར་ཏེ། རྩ་བར། མཉམ་པར་བཞག་པའི་ཉིད་དོ། །ཞེས་དང༌། ཊཱི་ཀ་ལས། མཉམ་པར་བཞག་པ་ནི་མི་རྒོད་པ་ཉིད་ཅེས་བྱ་བའི་ཐ་ཚིག་གོ། །ཞེས་དང༌། འགྲེལ་ཆུང་ལས། དགེ་བ་ལ་རྩེ་གཅིག་ཏུ་རྒྱུན་དུ་སེམས་པའོ། །ཞེས་གསུངས་པས་སོ། །ལྔ་བ་དེ་གསུམ་གྱི་ཁ་སྐོང་ལ་བརྩོན་ཤེས་གཉིས་དགོས་ཏེ། རྩ་བར། བརྩོན་འགྲུས་བརྩམས་པ་ཉིད་དང་ཤེས་རབ་དང་ལྡན་པ་ཉིད་དང་ཡང་སྦྱར་རོ། །ཞེས་གསུངས་པའི་ཕྱིར་རོ། །བཅུ་དྲུག་པ་སློབ་པའི་ལྔ་བ་ཡོད་དེ། འཕགས་པ་སློབ་པའི་རྒྱུད་ལ་ཡོད་པའི་ཟག་པ་མེད་པའི་ཚུལ་ཁྲིམས་ཏིང་ངེ་འཛིན་ཤེས་རབ་སྟེ་གསུམ་དང༌། སློབ་པའི་རྣམ་པར་གྲོལ་བ་ནི་སྤང་བྱ་ཉོན་མོངས་པ་ཅི་རིགས་པ་ལས་གྲོལ་བ་དེ་ཡིན་པ་དང༌། །རྣམ་པར་གྲོལ་བ་དེ་ཤེས་པ་དང་མཐོང་བ་དང་ལྔ་དེ་ཡིན་པའི་ཕྱིར་རོ། །མཚོ་ཊཱིཀ་ལས། ཊཱི་ཀ་ལས། ཤེས་པ་ནི་ཤེས་པ་བརྒྱད་དང༌། མཐོང་བ་ནི་བཟོད་པ་བརྒྱད་ཡིན་པར་བཤད་དོ། །འདི་དག་ནི་ཤེས་བཟོད་སྐད་ཅིག་བཅུ་དྲུག་སྟེ། ཞེས་སོགས་གསུངས་ལ། དེ་ལྟར་ན་མཐོང་ལམ་ལས་གཞན་ལ་སློབ་པའི་ལྔ་བ་མེད་པར་འགྱུར་རོ་ཟེར་ན་དཔྱད་པར་ཞུའོ། །རྩ་བར། སློབ་པ་ཉིད་དོ། །ཞེས་པའི་སློབ་པ་ཉིད་ནི་སློབ་པའི་གང་ཟག་བདུན་ཏེ། རྒྱུན་དུ་ཞུགས་པའི་འབྲས་ཞུགས་དང་འབྲས་གནས་གཉིས། ལན་ཅིག་ཕྱིར་འོང་ཞུགས་འབྲས་གཉིས། ཕྱིར་མི་འོང་ཞུགས་འབྲས་གཉིས། དགྲ་བཅོམ་པའི་འབྲས་བུ་ལ་ཞུགས་པའོ། །གང་ཟག་བདུན་པོ་དེ་དག་ཆོས་ཅན། སློབ་པ་ཉིད་ཡིན་ཏེ། ཊཱི་ཀ་ལས། ཟག་པ་མེད་པའི་ལམ་གྱིས་ཉོན་མོངས་པ་སྤང་བའི་ཕྱིར་སློབ་པའི་ངང་ཚུལ་ཅན་ཡིན་པའི་ཕྱིར། ཞེས་གསུངས་པས་སོ། །བཅུ་བདུན་པ་མི་སློབ་པའི་ལྔ་བ་ཡོད་དེ། མཚོ་ཊཱིཀ་ལས། མི་སློབ་པའི་ཆོས་ལྔ་ནི། དགྲ་བཅོམ་པའི་རྒྱུད་ལ་ཡོད་པའི་ཟག་པ་མེད་པའི་ཚུལ་ཁྲིམས་ཏིང་ངེ་འཛིན་ཤེས་རབ་སྟེ་གསུམ་དང༌། སྤངས་པའི་རྣམ་པར་གྲོལ་བ་དང༌། རྣམ་པར་གྲོལ་བ་དེ་ཤེས་པ་དང་མཐོང་བ་སྟེ་ལྔའོ། །དེ་ཤེས་པ་ནི་ཟད་པ་དང་མི་སྐྱེ་བ་ཤེས་པའོ། །མཐོང་བ་ནི་མི་སློབ་པའི་ལྟ་བའོ། །ཞེས་གསུངས་པའི་ཕྱིར་རོ། །རྩ་བར། མི་སློབ་པ་ཉིད་དོ། ཞེས་པའི་མི་སློབ་པ་ཉིད་ནི་དགྲ་བཅོམ་པ་སྟེ། དགྲ་བཅོམ་པའི་འབྲས་བུ་ལ་གནས་པ་ཆོས་ཅན། མི་སློབ་པ་ཡིན་ཏེ། རང་རྒྱུད་ལ་ཉོན་མོངས་པ་སྐྱེ་བའི་རྒྱུ་སྤང་བའི་དོན་དུ་མི་སློབ་པའི་ཕྱིར་ཏེ། དེ་སྤངས་ཟིན་པའི་ཕྱིར་རོ།།དེ་ལྟར་བཤད་པ་ལ་འོ་ན་སློབ་པ་དང་མི་སློབ་པའི་ལྔ་ཚན་གཉིས་པོ་འདི་ཆོས་ཅན། འདུལ་བ་ལས་བཟླ་བར་བྱ་བ་མ་ཡིན་པ་བཟླས་པར་ཐལ། མེད་མི་རུང་གི་ཡན་ལག་འདུལ་བ་ཤེས་པ་མ་བསྟན་པའི་ཕྱིར་རོ། །དེ་ཡང་གཞན་གྱི་མཁན་པོ་བྱེད་པས་ནི་སློབ་མ་ལ་བྱ་བ་དང་བྱ་བ་མ་ཡིན་པ་སྟོན་དགོས་ལ། དེ་སྟོན་པ་ལ་འདུལ་བ་ཤེས་དགོས་པ་ལས་ལྔ་ཚན་འདི་གཉིས་ཀྱིས་འདུལ་བ་ཤེས་པ་མ་བསྟན་པའི་ཕྱིར་རོ། །འདི་གཉིས་འཕགས་པ་ཡིན་པའི་ཕྱིར་འདུལ་བ་ཤེས་པར་ངེས་སོ་སྙམ་ན་ཁྱབ་པ་མེད་དེ། ཊཱི་ཀ་ལས། འདུལ་བ་ཡོངས་སུ་ཤེས་པ་མེད་པར་ཡང་སློབ་པ་དང་མི་སློབ་པ་ཉིད་ནི་སྲིད་པ་ཁོ་ན་ཡིན། ཞེས་གསུངས་སོ། །སློབ་པ་དང་མི་སློབ་པའི་ཚུལ་ཁྲིམས་དང་ལྡན་ཞེས་པས་འདུལ་བ་ཤེས་པ་བསྟན་ནོ་སྙམ་ན།འཕགས་པའི་ཚུལ་ཁྲིམས་དང་ལྡན་ཡང་འདུལ་བ་ཤེས་པས་ཁྱབ་པ་མེད་དེ། ཟག་མེད་ཀྱི་ཚུལ་ཁྲིམས་ཡིན་པའི་ཕྱིར་རོ། །དེས་ན་ལྔ་ཚན་འདི་གཉིས་ཀྱིས་འདུལ་བ་ཤེས་པ་མ་བསྟན་ཏོ་ཞེ་ན། ལོ་བཅུ་ལོན་ཞེས་པ་དེས་འདུལ་བ་ཤེས་པ་བསྟན་ཏེ། གཞི་འགྲེལ་ལས། དེ་ལྟ་བས་ན་ལོ་བཅུ་ལོན་པ་ཉིད་ཅེས་སྨོས་པས་འདུལ་བ་ལ་གནས་པའི་དོན་ཉིད་བསྟན་པ་ཡིན་ནོ། །ཞེས་དང༌། ཊཱི་ཀ་ལས། ལོ་བཅུ་པོ་དག་ལ་འདུལ་བ་གདོན་མི་ཟ་བར་འབད་པ་བྱས་པ་ཡིན་པའི་ཕྱིར་རོ། །ཞེས་དང༌། མཚོ་ཊཱིཀ་ལས། བཅོམ་ལྡན་འདས་ཀྱིས་ལོ་བཅུ་ལོན་པ་ཉིད་ཅེས་གསུངས་པས་ནི་རང་དབང་ཡོད་པར་བསྟན་པ་ཡིན་པས། འདུལ་བ་ཤེས་པ་མེད་ན་ཇི་ལྟར་རང་དབང་ཅན་དུ་འགྱུར་ཞེས་ཀྱང་ཊཱི་ཀ་ལས་བཤད་༼ལོ་བཅུ་འདུལ་བ་བསླབ་པ་ལ་འབད་པ་བྱས་པའི་དབང་དུ་བྱས་ཏེ་གསུངས་པའོ། །༽ཞེས་གསུངས་པས་སོ། །དེ་ལ་བསྙེན་པར་རྫོགས་ནས་ལོ་བཅུ་ལོན་པའི་འཕགས་ལམ་ཐོབ་མ་ཐག་པ་དེ་ལ་འདུལ་བ་ཤེས་པས་ཁྱབ་པ་མེད་ན་ཞིབ་ཆ་ཅུང་ཟད་དགོས་སོ། །བཅོ་བརྒྱད་པ་བྱུང་ཤེས་ཀྱི་ལྔ་བ་ཡོད་དེ། རྩ་བར། བྱུང་བ་དང༌། བཅས་པ་དང༌། རྗེས་སུ་བཅས་པ་དང༌། བཀག་པ་དང༌། གནང་བ་མངོན་པར་ཤེས་པ་ཉིད་དོ། །ཞེས་དང༌། གཞི་འགྲེལ་ལས། བྱུང་བ་ཤེས་པ་དང༌། བཅས་པ་ཤེས་པ་དང༌། རྗེས་སུ་བཅས་པ་ཤེས་པ་དང༌། བཀག་པ་ཤེས་པ་དང༌། གནང་བ་ཤེས་པ་ཞེས་བྱ་བ་ནི་ལྔ་བ་བཅོ་བརྒྱད་པའོ། །ཞེས་གསུངས་པའི་ཕྱིར་རོ། །བྱུང་བ་དང༌། ཞེས་པ་ནི་ཊཱི་ཀ་ལས། གླེང་གཞི་དང་རྒྱུ་མཚན་དང་བྱེད་རྒྱུ་གང་ཡིན་པ་སྟེ་དེ་ནི་བྱུང་བ་ཞེས་བྱ་བའི་སྒྲས་བརྗོད་དོ། །ཞེས་སོ། །དེ་དག་ནི་གཏམ་རྒྱུད་དང་དགག་དགོས་ཀྱི་རྒྱུ་མཚན་དང༌། སྔོན་བྱུང་བའི་གང་ཟག་གི་ཉོན་མོངས་པ་སྟེ་གོ་རིམ་བཞིན་ནོ། །དེ་ཤེས་པ་ནི་བྱུང་བ་ཤེས་པ་དང༌། ། གླེང་གཞི་ནི་ཡུལ་དང་གང་ཟག་དང༌། ཉོན་མོངས་པ་དང༌། ཉེས་པ་དང་བཞིས་བྱེ་བྲག་གིས་བཞི་དང༌། དགག་བྱ་ཉེས་དམིགས་ནི་དགག་བྱའི་བསླབ་པ་འཆའ་བའི་རྒྱུ་མཚན་དང༌། བྱེད་རྒྱུ་ནི་རྒྱུ་ཚོགས་ཏེ་གཞི་བསམ་པ་སྦྱོར་བ་མཐར་ཐུག་པ་ལྟ་བུ་ཡིན་ནོ། །མཚོ་ཊཱིཀ་༡༢༤ལས། བྱུང་བ་མངོན་པར་ཤེས་པ་འདི་ལ་གཉིས་ཏེ། བྱུང་ལ་མ་བཅས་པའི་བྱུང་བ་མངོན་པར་ཤེས་པ་དང༌། བྱུང་ལ་བཅས་པའི་བྱུང་བ་མངོན་པར་ཤེས་པའོ། །

དང་པོ་ནི་གླེང་གཞི་ལས་བྱུང་ཡང་བཅས་པ་མ་མཛད་པ་སྟེ་སྒྲ་གཅན་ཟིན་གྱིས་ཤེས་བཞིན་དུ་རྫུན་དུ་སྨྲས་པའི་བྱུང་བ་ལྟ་བུའོ། །གཉིས་པ་ལ་གཉིས་ཏེ།

བཅས་པའི་བྱུང་བ་ཤེས་པ་དང་རྗེས་སུ་བཅས་པའི་བྱུང་བ་ཤེས་པའོ། །དང་པོ་ནི་དགག་བཅས་དང༌། སྒྲུབ་བཅས་དང༌། གནང་བཅས་དང་གསུམ་པོ་རང་རང་གི་བྱུང་བ་ཤེས་པའོ། །གཉིས་པ་རྗེས་སུ་བཅས་པའི་བྱུང་བ་ཤེས་པ་ལ་གཉིས་ཏེ། མ་དོར་བ་མུ་གསུམ་གྱི་བྱུང་བ་ཤེས་པ་དང༌། དོར་བ་མུ་དྲུག་གི་བྱུང་བ་ཤེས་པའོ། །དང་པོ་ལ་གསུམ་སྟེ། དགག་པ་བཅས་པའི་རྗེས་སུ་དགག་པ་རྗེས་བཅས་ཀྱི་བྱུང་བ་ཤེས་པ་དང༌། སྒྲུབ་པ་བཅས་པའི་རྗེས་སུ་སྒྲུབ་པ་རྗེས་བཅས་ཀྱི་བྱུང་བ་ཤེས་པ་དང༌། གནང་བ་བཅས་པའི་རྗེས་སུ་གནང་བ་རྗེས་བཅས་ཀྱི་བྱུང་བ་ཤེས་པའོ། །དོར་བ་མུ་དྲུག་གི་བྱུང་བ་ཤེས་པ་ནི། དགག་པ་བཅས་པའི་རྗེས་སུ་སྒྲུབ་པ་རྗེས་བཅས་དང༌། དགག་པ་བཅས་པའི་རྗེས་སུ་གནང་བ་རྗེས་བཅས་ལ་སོགས་པ་རང་རང་གི་བྱུང་བ་ཤེས་པའོ། །བཅས་པ་ཞེས་པ་ནི་དགག་སྒྲུབ་གནང་གསུམ་གྱི་གསུང་གི་མཚམས་རྣམ་པར་བཞག་པ་ཁྱད་པར་ཅན་ཡིན་ཏེ། ཊཱི་ཀ་ལས། བཅས་པ་ཞེས་བྱ་བ་ནི། བསླབ་པའི་གཞི་རྣམ་པར་བཞག་པའོ། །ཞེས་པས་སོ། །རྩ་བར། རྗེས་སུ་བཅས་པ་དང༌། ཞེས་པ་འདིའི་སྤྱི་དོན་ལ་གཉིས་ལས། དང་པོ་རྗེས་བཅས་མཛད་པའི་དགོས་པའི་དོན་ནི། བསླབ་པ་བཅས་པའི་ཕན་ཡོན་བཅུ་ཅི་རིགས་པ་འཐོབ་པ་དང༌། མི་ལ་མི་ཚངས་པར་སྤྱོད་པ་བཀག་ཀྱང་དུད་འགྲོ་ལ་མ་བཀག་སྙམ་པ་ལྟ་བུའི་གང་ཟག་གི་ལོག་རྟོག་བསལ་བ་སྟེ། རྣམ་འབྱེད་འགྲེལ་བ་ལས། འདི་ནི་རྗེས་སུ་བཅས་པའོ་ཞེས་བྱ་བ་ནི་དེའི་རྗེས་སུ་སོང་བའི་བསམ་པ་བཟློག་པའི་ཕྱིར་རོ། །ཞེས་པས་སོ། །གཉིས་པ་བསྡུས་པའི་དོན་ལ་བཞི་ལས། དང་པོ་རྗེས་བཅས་ཀྱི་རབ་ཏུ་དབྱེ་བ་འཐད་པ་དང་བཅས་པ་ལ་གཉིས་ཏེ། དབྱེ་བ་དངོས་དང༌། དེ་དག་གི་འཐད་པའོ། །དང་པོ་ནི། རྗེས་བཅས་མུ་དགུ་སྟེ། གསུམ་ཚན་གསུམ་ལས། དང་པོ་དགག་པ་ལ་བརྟེན་པ་གསུམ་སྟེ་དགག་པ་བཅས་པའི་རྗེས་སུ་དགག་པ་རྗེས་བཅས་དང༌། དགག་པ་བཅས་པའི་རྗེས་སུ་སྒྲུབ་པ་རྗེས་བཅས་དང༌། དགག་པ་བཅས་པའི་རྗེས་སུ་གནང་པ་རྗེས་བཅས་སོ། །དང་པོ་ནི་སྔར་བཟང་བྱིན་ལ་བརྟེན་ནས་མི་ཚངས་སྤྱོད་སྤྱིར་བཀག་ནས། ཕྱིས་སྡིག་ཅན་དགོན་པ་བ་ལ་བརྟེན་ནས་དུད་འགྲོ་ལ་མི་ཚངས་པར་སྤྱོད་པ་བྱེ་བྲག་ཏུ་བཀག་པ་ལྟ་བུའོ། །

གཉིས་པ་ནི།

སྔར་ཉོ་ཚོང་བྱེད་པ་བཀག་ནས། བུ་ལོན་ཆགས་པ་ཐབས་གཞན་གྱིས་སྦྱང་བར་བྱ་མི་ནུས་ན། དགེ་སློང་མའི་རྣམ་འབྱེད་ལས། ཡུལ་གཞན་གྱི་སྦྱོར་བས་སྔ་མའི་རྒྱུད་སྦྱང་བར་བྱའོ་ཞེས་སྒྲུབ་དགོས་སུ་གསུངས་པ་ལྟ་བུའོ། །གསུམ་པ་ནི། ཊཱི་ཀ་ལས། དུས་མ་ཡིན་པའི་ཟས་སྔར་བཀག་པ་ལས་ནད་པ་ལ་གནང་བ་ལྟ་བུའོ། །ཞེས་སོ། །སྒྲུབ་པ་ལ་བརྟེན་པ་གསུམ་སྟེ། སྒྲུབ་པ་བཅས་པའི་རྗེས་སུ་སྒྲུབ་པ་རྗེས་བཅས་དང༌། སྒྲུབ་པ་བཅས་པའི་རྗེས་སུ་དགག་པ་རྗེས་བཅས་དང༌། སྒྲུབ་པ་བཅས་པའི་རྗེས་སུ་གནང་བ་རྗེས་བཅས་སོ། །དང་པོ་ནི། དབྱར་སྔ་མ་ཁས་བླང་བ་སྒྲུབ་པར་བཅས་ནས། དབྱར་ཕྱི་མ་ཁས་བླང་བ་སྒྲུབ་པར་བཅས་པ་ལྟ་བུའོ། །གཉིས་པ་ནི་གསོ་སྦྱོང་ལ་བསྡད་པ་དང་དབྱར་གནས་པར་ཁས་བླང་བ་སྒྲུབ་པར་བཅས་ནས། གནས་ལ་བརྟེན་པ་དང་འདོམ་པའི་ཚེ་ན་དེ་དག་བཀག་པ་ལྟ་བུའོ། །རྩ་བར། གང་ན་གནས་མེད་པ་དེར་གསོ་སྦྱོང་ལ་བསྡད་པ་དང་གནས་པར་ཁས་བླང་བར་མི་བྱའོ། །ཞེས་སོ། ། གསུམ་པ་ནི་སྔར་ཚེས་བརྒྱད་དང་བཅུ་བཞི་དང་བཅོ་ལྔའི་ནུབ་མོ་ཆོས་མཉན་པར་བྱའོ་ཞེས་སྒྲུབ་པར་གསུངས་ནས། ནད་པས་དེ་མ་བྱས་པ་ལ་ནི་ཉེས་པ་མེད་དོ་ཞེས་གནང་བ་ལྟ་བུའོ། །གནང་བ་ལ་བརྟེན་པ་གསུམ་སྟེ། གནང་བ་བཅས་པའི་རྗེས་སུ་གནང་བ་རྗེས་བཅས་དང༌། གནང་བ་བཅས་པའི་རྗེས་སུ་དགག་པ་རྗེས་བཅས་དང༌། གནང་བ་བཅས་པའི་རྗེས་སུ་སྒྲུབ་པ་རྗེས་བཅས་སོ། །དང་པོ་ནི། སྔར་ལྷམ་སྣའི་སྦུབས་ཅན་གནང་ནས། ཕྱིས་ལྷམ་རྟིང་སྦུབས་ཅན་གནང་བ་ལྟ་བུའོ། །གཉིས་པ་ནི། ཊཱི་ཀ་ལས། མཆིལ་ལྷམ་གཉིས་གནང་བ་མཛད་པ་ལས། དེ་གཉིས་ཀྱི་བྱེ་བྲག་དགག་པ་མཛད་དེ། སྒྲ་ཀྲོག་ཀྲོག་ཟེར་བ་དག་མི་བཅང་ངོ༌། །ཞེས་གསུངས་པ་ལྟ་བུའོ། །གསུམ་པ་ནི། སྔར་དབྱར་བྱིན་གྱིས་བརླབས་ཏེ་གནས་གཞན་དུ་འགྲོ་བ་གནང་བ་ལས། དགེ་འདུན་གྱི་དབྱེན་ཞི་བར་བྱ་བའི་ཕྱིར་ནི་དབྱར་བྱིན་གྱིས་བརླབས་ཏེ་གནས་གཞན་དུ་འགྲོ་བ་སྒྲུབ་པར་བཅས་ཏེ། དེ་ནི་ཞི་བར་བྱ་བའི་ཕྱིར་མཐུ་ཡོད་པ་ལྟ་ན་མི་འགྲོ་བར་མི་བྱའོ་ཞེས་གསུངས་པ་ལྟ་བུའོ། །དེ་ལྟར་གསུམ་ཚན་རང་རང་གི་དང་པོ་གསུམ་ནི། སྔ་མའི་རིགས་མ་དོར་བས་ན། མ་དོར་བ་མུ་གསུམ་ཞེས་བྱ་ཕྱི་མ་དྲུག་ནི། སྔ་མའི་རིགས་དོར་བས་ན། དོར་བ་མུ་དྲུག་ཅེས་བྱའོ། ། གཉིས་པ་དེ་དག་གི་འཐད་པ་ནི་མ་དོར་བ་མུ་གསུམ་པོ་དེ་དག་འཆའ་བར་འཐད་དེ། རང་རང་གི་སྔར་བཅས་ཀྱི་རྒྱུ་མཚན་གང་ཡིན་སོ་ན་ཡོད་ཅིང༌། གང་ཟག་གི་ལོག་རྟོག་བསལ་བའི་དགོས་པ་ཡོད་པའི་ཕྱིར་རོ། །དོར་བ་མུ་དྲུག་འཆའ་བར་འཐད་དེ། སྔར་བཅས་ཀྱི་རྒྱུ་མཚན་དོར་ནས་རྗེས་བཅས་ཀྱི་རྒྱུ་མཚན་ཞུགས་པའི་ཕྱིར་རོ། །དེ་ཡང་སྔར་གྱི་དགག་བྱའི་རྒྱུ་མཚན་དོར་ནས་སྒྲུབ་བཅས་རྣམ་པར་འཇོག་བྱེད་ཀྱི་དགོས་པའི་རྒྱུ་མཚན་ཞུགས་པའི་ཕྱིར་ཞེས་པ་ལ་སོགས་རེ་རེ་ནས་སྦྱར་རོ། །རྒྱུ་མཚན་དོར་ཞེས་པའང་གཏན་མེད་དུ་དོར་བ་དང་ཟིལ་གནོན་དུ་དོར་བ་གཉིས་ལས། གནང་བ་བཅས་པའི་རྗེས་སུ་དགག་པ་རྗེས་བཅས་ལ་ནི་སྔར་བཅས་ཀྱི་རྒྱུ་མཚན་དེ་གཏན་མེད་དུ་དོར་བ་ཡིན་ལ། ཕྱི་དྲོ་ཟས་སྔར་བཀག་ནས་ནད་པ་ལ་གནང་བ་ལྟ་བུ་ལ་ནི་ཟིལ་གནོན་དུ་དོར་བ་སྟེ། ཕྱི་དྲོ་ཁ་ཟས་ཀྱི་དགག་བྱ་ནི་ལུས་རྒྱགས་པར་འགྱུར་བ་ཡིན་ལ། ནད་པས་ཕྱི་དྲོ་ཁ་ཟས་ཟོས་པ་ལ་ཡང་ལུས་ཀྱི་སྟོབས་སྐྱེ་བ་ཙམ་ཞིག་ཡོད་ཀྱང་ན་བས་ཟིལ་གྱིས་མནན་པ་ལྟ་བུ་ཡིན་པའོ། །