[༡༡] གླན་ཤཱཀྱ་བཟང་པོ་ནི།
ལྷ་རྗེ་ཟུར་ཆུང་པ་ཤེས་རབ་གྲགས་པའི་ཐུགས་སྲས་ཀ་ཆེན་བཞིར་གྲགས་པའི་ཡ་གྱལ་ཏེ། ཆུ་བར་དུ་སྐུ་འཁྲུངས་ཤིང་སྒྱུ་འཕྲུལ་གསང་བ་སྙིང་པོའི་བཤད་པ་ལ་མཁས་པའི་ཚད་དུ་འཛིན་ཏེ། ཐོག་མར་དགེ་བཤེས་ཁྱུང་པོ་གྲགས་པ་བྱ་བའི་སློབ་མར་གྱུར་ཅིང་མཚན་ཉིད་ལ་ཤིན་ཏུ་མཁས། སྐབས་ཤིག་དགེ་བཤེས་སྟོན་འཁོར་རྣམས་ཡོན་བདག་ཅིག་གིས་ཉང་རོང་དུ་སྤྱན་དྲངས་པས་དེར་ཟུར་ཆུང་པའང་བྱོན་པ་དང་འཕྲད། དགེ་བཤེས་ཀྱིས་ཁོང་བཞི་ལ་ཟུར་ཆུང་བར་གྲགས་པའི་ཆོས་ལོག་མཁན་འདི་སུན་ཕྱུང་ལ་ཤོག་གསུངས་ནས་བཏང་། དེར་ཁོང་བཞི་པོ་ལྷ་རྗེའི་དྲུང་དུ་ཕྱིན་ཏེ། ཐོག་མར་སྐྱོ་སྟོན་ཤཱཀ་ཡེ་པས་དྲིས་པ། ལྷ་རྗེ་ཆེན་པོ་ལགས། ཁྱེད་རྫོགས་པ་ཆེན་པོའི་ལུགས་ཀྱི་སྒོམ་ཁོ་ན་གཙོ་བོར་བྱེད་པ་ལགས་སམ་ཞུས་པས། ང་དམིགས་པ་གང་ལ་གཏད་འདུག་གསུངས། འོ་ན་མི་སྒོམ་པ་ལགས་སམ་ཞུས་པས། ང་གང་ལ་ཡེངས་འདུག་གསུངས་པས་སྤོབས་པ་བཅོམ། དེའི་རྗེས་སུ་གླན་ཤཱཀྱ་བཟང་པོས་དྲིས་པ། ཁྱེད་གསང་བ་སྒྱུ་འཕྲུལ་པའི་ལུགས་ཀྱིས་སྣང་བ་ཐམས་ཅད་ལྷ་དང་ལྷ་མོའི་དཀྱིལ་འཁོར་དུ་འདོད་པ་ལགས་སམ་ཞུས་པས། ཡུལ་བེམ་པོ་རང་རྒྱུད་དུ་སྣང་བ་མངོན་སུམ་གྱི་ཚད་མ་སུས་ཁེགས་གསུངས། འོ་ན་མི་འདོད་དམ་བྱས་པས། སེམས་ཅན་རྣམས་ཀྱི་མ་དག་པའི་འཁྲུལ་སྣང་རང་རྒྱུད་པ་སྦྱོང་བར་བྱ་བའི་ཆེད་དུ་བཀའ་མདོ་རྒྱུད་དུ་མ་ལས་བྱུང་བ་སུས་འགལ་བར་ནུས་གསུངས་པས། ལན་མེད་པར་གྱུར་ཏོ། །དེ་ལྟར་ཁོང་བཞིས་རིམ་པར་དྲིས་པས་ཐམས་ཅད་ལན་མེད་དུ་གྱུར་ཏེ། དེ་དག་ན་རེ། ཐེག་པ་ཆེན་པོའི་ཆོས་ཕྱིན་ཅི་མ་ལོག་པར་རྟོགས་པ་རིགས་པ་དང་གྲོལ་བའི་སྤོབས་པ་དང་ལྡན་པ་འདི་འདྲ་བའི་བཤེས་གཉེན་གང་ནས་ཀྱང་མི་རྙེད་པས། ཐབས་ཀྱིས་སྔ་མའི་སློབ་དཔོན་དང་བྲལ་ཏེ་ཟུར་ཆུང་པ་བླ་མར་བཏུད་པར་བྱའོ་ཞེས་དམ་བཅས་ནས་རྗེས་སུ་འཛིན་པར་ཞུས་པས་ཕྱིས་སུ་ཐུགས་སྲས་ཀ་ཆེན་བཞིར་གྲགས་པར་གྱུར། གླན་ཤཱཀྱ་བཟང་པོས་ཟུར་ཆུང་པ་ལས་བསྐྱེད་རྫོགས་རྫོགས་ཆེན་སྒྲུབ་སྡེ་དང་བཅས་པའི་དབང་རྒྱུད་མན་ངག་དང་བཅས་པ་གསན་ཞིང་། ཁྱད་པར་གཡས་རུ་མཁའ་འགྲོའི་ལྷ་ཁང་དུ་འདུས་མདོའི་ཆུ་བོ་བཞི་རྫོགས་ཀྱི་དབང་གསན་སྐབས་རྡོ་རྗེ་མྱུ་གུ་རྩལ་ཞེས་གསང་མཚན་བསྩལ། བསྐྱེད་རིམ་གྱིས་ཐ་མལ་གྱི་སྣང་བ་འགོག་ནུས་པ་དང་རྫོགས་རིམ་གྱིས་ཡེ་ཤེས་ལ་དབང་འབྱོར་བ་སོགས་གྲུབ་བརྙེས་ཀྱི་གོ་འཕང་མཐོན་པོར་གཤེགས། ཟུར་ཤཱཀྱ་སེང་གེའམ་གསང་བདག་སྒྲོ་ཕུག་པ་ལ་ཡབ་ཆོས་ཀྱི་རྒྱུན་མཐའ་དག་སྤེལ་བ་སོགས་འགྲོ་དོན་མཐའ་རྒྱས་བྱུང་བའི་ངང་སྐུ་གཤེགས་སོ། །