ལྷའི་རྣལ་འབྱོར་བཞིའི་ཁྱད་པར་གྱི་དབྱེ་བའི་རྒྱུད་སྡེ་བཞི།

ལྷའི་རྣལ་འབྱོར་བཞིའི་ཁྱད་པར་གྱི་དབྱེ་བའི་རྒྱུད་སྡེ་བཞི་ནི།

རྒྱུད་སྡེ་སྤྱིའི་རྣམ་བཞག་ཟིན་བྲིས་ལས། བྱ་བའི་རྒྱུད། མདུན་དུ་ལྷ་སྤྱན་དྲངས་ནས་བཟླས་བརྗོད་བྱེད་པ་ཙམ་ལས། བདག་ཉིད་ལྷར་བསྐྱེད་པ་མེད་པ་རྗེ་དཔོན་ལྟ་བུའི་ཚུལ་གྱིས་དངོས་གྲུབ་ལེན་པ་དང༌། སྤྱོད་རྒྱུད་དུ་བདག་མདུན་གྲོགས་པོ་ལྟ་བུའི་ཚུལ་གྱིས་དངོས་གྲུབ་ལེན་པ་དང༌། རྣལ་འབྱོར་རྒྱུད་དུ། ཕྱི་རོལ་གྱི་ལྷ་དམིགས་པའི་རྟེན་ཙམ་དུ་བཞག་ལ། གཙོ་བོར་ནང་གི་ལྷའི་རྣལ་འབྱོར་ལ་སྤྱོད་པ་དང༌། དེ་གསུམ་ཆར་གྱི་ལྷའི་རྣལ་འབྱོར་ལ་བསྐྱེད་རིམ་གྱི་ཐ་སྙད་དོན་མཐུན་དུ་མི་འཇུག་པ་དང༌། སྦྱང་གཞིའི་རྣམ་པ་ལམ་དུ་བྱེད་པའི་ཚུལ་གྱིས་སྒོམ་པ་ཡང་མེད་དོ། །རྣལ་འབྱོར་བླ་ན་མེད་པར་ན་དེ་དག་ཀྱང་ཡོད་པ་དང༌། སྣང་བ་ཐམས་ཅད་ལྷར་སྒོམ་པ་དང༌། བདག་བསྐྱེད་ཀྱི་ལྷ་གནས་གཞན་དུ་གཤེགས་གསོལ་མི་མངའ་བ་སོགས་ཁྱད་པར་དུ་མས་འཕགས་པ་ཡིན་ནོ། །དེས་ན་ཕྱིའི་བྱ་བ་གཙོ་བོར་སྟོན་པས་ན་བྱ་བའི་རྒྱུད་དང༌། ཕྱི་ནང་གི་བྱ་བ་གཉིས་ཆ་མཉམ་དུ་སྤྱོད་པས་ན། གཉིས་ཀའི་རྒྱུད་དམ། སྤྱོད་པའི་རྒྱུད་དང༌། ཕྱིའི་བྱ་བ་སྙིང་པོ་མེད་པར་ཤེས་པས། ནང་གི་རྣལ་འབྱོར་ལ་གཙོ་བོར་སྤྱོད་པས། རྣལ་འབྱོར་གྱི་རྒྱུད་དང༌། ཕྱི་ནང་མཉམ་པ་ཉིད་དུ་ཤེས་ཏེ། ནང་གི་རྣལ་འབྱོར་ཁོ་ན་ལ་སྤྱོད་པ་རྣལ་འབྱོར་བླ་ན་མེད་པའི་རྒྱུད་དེ། དགྱེས་རྡོར་དོན་བསྡུས་ཀྱི་འགྲེལ་པ་ལས། དེ་ཁོ་ན་ཉིད་སྒོམ་པའི་ནུས་པ་ཆུང་བ་མཚན་མ་ཅན་གྱི་སྤྱོད་པ་ལ་མངོན་པར་དགའ་བ་རྣམས་ཕྱིའི་སྤྱོད་པ་དེ་དག་ཤས་ཆེར་སྟོན་པ་བྱ་བའི་རྒྱུད་རྡོ་རྗེ་གཙུག་ཏོར་གྱི་ཞེས་པ་དང༌། ཡང་དེ་ཉིད་ལས། གང་ཞིག་བྱ་བའི་ཁྱད་པར་ལ་ཡང་མོས་ཤིང༌། ཐབས་དང་ཤེས་རབ་ཀྱི་སྤྱོད་པ་རྒྱ་ཆེན་པོ་ལ་ཡང་སྦྱོར་བའི་ནང་གི་བདག་ཉིད་ཅན་གྱི་ཚུལ་ཡང་མི་འདོར་བར་སྤྲོ་བ་དེ་དག་ནི་བྱ་བ་དང་རྣལ་འབྱོར་གྱི་ཆ་གཉིས་ལ་མཐུན་པ་གཉིས་ཀའི་རྒྱུད། ཕྱག་ན་རྡོ་རྗེ་ལ་དབང་བསྐུར་བ་ཞེས་བྱ་བ་དང༌། ཞེས་དང༌། དེ་ཉིད་སྣང་བ་ལས། རྒྱུད་འདི་ནི་སྒོམ་པ་གཙོ་བོར་གྱུར་པ་ཡིན་པས་ཞེས་པ་དང༌། འཇིག་རྟེན་གསུམ་རྒྱལ་གྱི་རྟོག་པའི་འགྲེལ་པ་ལས། དེ་ལ་རྣལ་འབྱོར་ཞེས་བྱ་བ་ནི་སེམས་མཉམ་པར་བཞག་པའོ། །དེའི་མཐུས་སྔགས་ཀྱི་སྒོ་ནས་བྱང་ཆུབ་སེམས་དཔའི་དགོས་པ་བསྒྲུབ་པའི་ཕྱིར། སྔགས་དང༌། ཕྱག་རྒྱ་དང༌། དཀྱིལ་འཁོར་དང༌། དབང་སྦྱིན་པ་ལ་སོགས་པ་སྣ་ཚོགས་སྦྲེལ་ཞིང༌། བརྒྱུད་པས་རྣལ་འབྱོར་གྱི་རྒྱུད་ཅེས་བྱའོ། །ཞེས་དང༌། རྣམ་སྣང་མངོན་བྱང་གི་ཚིག་འགྲེལ་ལས། འཕགས་པ་དེ་ཁོ་ན་ཉིད་བསྡུས་པ་ལ་སོགས་པ་ནང་གི་སྦྱོར་བ་གཙོ་བོར་གྱུར་པ་ཡིན་མོད་ཀྱི། ཕྱིའི་སྤྱོད་པ་རྣམས་ཀྱང་མེད་པ་མ་ཡིན་ནོ། །ཞེས་དང༌། གསང་འདུས་རྒྱུད་ཕྱི་མ་ལས། ཨེ་མ་ཧོ་ཤིན་ཏུ་རྙེད་དཀའ་བ། །བྱང་ཆུབ་སྒྲུབ་པའི་ཐབས་འདི་ཡིན། །རྒྱུད་ཀྱི་མཆོག་གི་མཆོག་གྱུར་པ། །གསང་བ་འདུས་པ་ཞེས་པའི་རྒྱུད། །ཅེས་དང༌། རྡོ་རྗེ་སྙིང་པོ་རྒྱན་གྱི་རྒྱུད་ལས། བཅོམ་ལྡན་དེ་བཞིན་གཤེགས་ཀུན་གྱི། །ཡེ་ཤེས་ཞེས་པ་དྲི་མེད་པ། །བྱང་ཆུབ་སེམས་ནི་རིན་པོ་ཆེ། །བླ་ན་མེད་པ་བཤད་དུ་གསོལ། །ཞེས་དང༌། གུར་ལས་ཀྱང༌། ཨེ་མ་མཁའ་འགྲོ་མ་ཡི་རྒྱུད། །རྒྱུད་རྣམས་ཀུན་གྱི་བླ་མ་སྟེ། །རྟོགས་སླའང་རྟོགས་པར་དཀའ་བ་དང༌། །རིག་དང་མི་རིག་པ་ཉིད་དོ། །ཞེས་པའི་འགྲེལ་པར། རྒྱུད་རྣམས་ཀུན་གྱི་བླ་མ་སྟེ། །ཞེས་བྱ་བ་ནི་རྣལ་འབྱོར་གྱི་རྒྱུད་བླ་ན་མེད་པ་སྟེ། བྱ་བ་དང་སྤྱོད་པ་ལ་སོགས་པའི་བླ་མར་གྱུར་པའི་ཕྱིར་རོ། །ཞེས་སོ། །ཞེས་དང༌། ཐུབ་བསྟན་དགེ་ལེགས་རྒྱ་མཚོའི་དུས་འཁོར་དབང་ཆེན་ཆོ་ག་ལས། སྔགས་ཀྱི་ཐེག་པ་ལའང་གདུལ་བྱ་དབང་རྟུལ་རྣམས་ལས་ཐེག་ཆེན་མདོ་ལམ་རྣམས་ཀྱི་སྟེང་དུ། ཆུ་དང་ཅོད་པན་གྱིས་རྒྱུད་སྨིན་པར་བྱས་ཏེ་བདག་བསྐྱེད་མེད་པར་མདུན་བསྐྱེད་ཀྱི་ལྷ་སྤྱན་དྲངས་ཏེ་མཆོད་པ་འབུལ། རྒྱས་གདབ་བྱས་ནས་སྔགས་བཟླས་པས་ཐུགས་རྒྱུད་བསྐུལ་ཏེ། ལས་སྣ་ཚོགས་པ་དང༌། ཐུན་མོང་གི་དངོས་གྲུབ་སྒྲུབ་པ་དང༌། མཚན་མེད་ཀྱི་རྣལ་འབྱོར་སྒོམ་པ་ཟུང་འབྲེལ་དུ་བྱས་པས་སྐལ་ཆེན་བརྒྱད་ན་ས་བཅུ་པའི་མཐར་སླེབ་པའི་ལམ་བསྟན་པ་བྱ་རྒྱུད་ཀྱི་ཐེག་པ་དང༌། སྔགས་ཀྱི་གདུལ་བྱ་དབང་འབྲིང་ལ་བྱང་ཆུབ་ཏུ་སེམས་བསྐྱེད་ནས་ཆུ་དང་ཅོད་པན་གྱི་སྟེང་དུ་ཕྱག་མཚན་གྱི་དབང་དང་མིང་དབང་རྣམས་ཀྱིས་རྒྱུད་སྨིན་པར་བྱས་ཏེ། རང་ཉིད་ལྷ་སྐུར་བསྐྱེད་ནས་ཐུན་མཐར་བདག་བསྐྱེད་ཀྱི་ལྷ་གཤེགས་པ་སོགས་ཀྱི་ཡིད་དམ་གྱི་ཐུགས་རྒྱུད་བསྐུལ་ནས་ལས་དང་དངོས་གྲུབ་ཐུན་མོང་བ་བསྒྲུབ་པ་དང༌། མཚན་མེད་ཀྱི་རྣལ་འབྱོར་ཟུང་འབྲེལ་དུ་བསྒོམ་པས་བསྐལ་ཆེན་གསུམ་མམ་གཅིག་གིས་ས་བཅུ་པ་ཐོབ་བྱེད་ཀྱི་ལམ་བསྟན་པ་སྤྱོད་རྒྱུད་ཀྱི་ཐེག་པ་དང༌། སྔགས་ཀྱི་གདུལ་བྱ་དབང་རྣོན་རྣམས་ལ། བྱང་ཆུབ་ཀྱི་སེམས་ཀྱིས་གཞི་བཟུང་སྟེ། ཆུ་དང༌། ཅོད་པན། རྡོ་རྗེ་དང་དྲིལ་བུ། མིང་དབང་སྟེ་རྡོ་རྗེ་སློབ་མའི་དབང་དང༌། སློབ་དཔོན་གྱི་དབང་མཐའ་རྟེན་དང་བཅས་པས་སྨིན་པར་བྱས་ཏེ། འབྲས་བུ་སངས་རྒྱས་ཀྱི་སྐུ་གསུང་ཐུགས་མཛད་པ་རྣམས་ལམ་དུ་བྱེད་པའི་སྒོ་ནས་བདག་བསྐྱེད་ཀྱི་དཀྱིལ་འཁོར་ཕྱག་རྒྱ་བཞིའི་རྒྱས་བཏབ་ནས་སྒོམ་སྟེ། མཐར་ཕྱག་རྒྱ་བཀྲོལ་ནས་བདག་བསྐྱེད་ཀྱི་ལྷ་གཤེགས་པ་དང༌། མདོ་དང་ཐུན་མོངས་མ་ཡིན་པའི་ཕྱག་རྒྱ་ཆེན་པོ་སྒྲུབ་བྱེད་ཀྱི་ཏིང་ངེ་འཛིན་གྱི་ཁྱད་པར་དུ་མ་དག་བསྒོམ་པས་ཚེ་ལོ་བརྒྱ་པའི་ཚེ་བཅུ་དྲུག་ཙམ་གྱིས་ཕྱག་རྒྱ་ཆེན་པོ་དང༌།དེ་ནས་ཚེ་སོ་གཉིས་ཙམ་གྱིས་ས་བཅུ་པའི་མཇུག་ཏུ་ཉེ་བའི་བར་ཐོབ་པའི་བསྟན་པ་རྣལ་འབྱོར་རྒྱུད་ཀྱི་ཐེག་པ་དང༌། སྔགས་ཀྱི་གདུལ་བྱ་དབང་བོ་ཆེས་རྣོན་པོ་དག་ལ། ཀུན་རྫོབ་སེམས་བསྐྱེད་དང་གཞན་དོན་མཐའ་དག་སྒྲུབ་པ་ལ་སེམས་དཔའ་བའི་སྙིང་སྟོབས་དང་ལྡན་པས་གཞི་བཅས་ཏེ། བུམ་གསང་ཤེར་དབང་དང་དབང་བཞི་པས་རྒྱུད་སྨིན་པར་བྱས་ནས་ལམ་བསྐྱེད་པའི་རིམ་པ་དང༌། རྫོགས་པའི་རིམ་པ་གཉིས་སྒོམ་པས་སྐྱེ་བ་སྔ་མར་ལམ་ལ་སྦྱངས་བ་མེད་པ་དག་ཀྱང་སྙིགས་དུས་ཀྱི་ཚེ་ཐུང་གཅིག་ལའང་སངས་རྒྱས་རྡོ་རྗེ་འཆང་གི་གོ་འཕང་ཐོབ་བྱེད་ཀྱི་ཐེག་པ་བསྟན་པ་རྣལ་འབྱོར་བླ་མེད་ཀྱི་ལམ་གྱི་ཐེག་པ་དང་བཞི་ཡོད་པ་ལས་ཕྱི་མ་ནི་ཐེག་པ་མཐའ་དག་གི་ཡང་རྩེ་ཡིན། ད་ལན་གྱི་སྐབས་སུ་བབ་པ་ཡང་སྔགས་བླ་མེད་ཀྱི་ཐེག་པ་ཡིན་ཏེ། འདི་ལའང་ལྷ་ཡབ་ཀྱི་དཀྱིལ་འཁོར་ལ་སོགས་པ་གཙོར་བོར་སྟོན་པ་དག་ཕ་རྒྱུད་དང༌། ལྷ་ཡུམ་གྱི་དཀྱིལ་འཁོར་སོགས་གཙོ་བོར་སྟོན་པ་དང༌། ཡབ་ཡུམ་གཉིས་ཀ་སོགས་གཙོ་བོར་སྟོན་པ་མ་རྒྱུད་དང་གཉིས། ཕ་རྒྱུད་ལ་གསང་འདུས་ལྟ་བུ་ཆགས་ཅན་རྗེས་སུ་འཛིན་པ་དང༌། འཇིག་བྱེད་རྟོགས་བདུན་ལྟ་བུ་ཞེ་སྡང་ཅན་ཚར་གཅོད་པ་དང༌། འཇམ་དཔལ་སྒྱུ་འཕྲུལ་དྲ་བ་ལྟ་བུ་གཏི་མུག་ཅན་རྗེས་སུ་འཛིན་པའི་རྒྱུད་དང་གསུམ། མ་རྒྱུད་ལ་ལའང་བདེ་མཆོག དགྱེས་རྡོར། མ་ཧཱ་མ་ཡ་ལ་སོགས་པ་ཧེ་རུ་ཀའི་རིགས་དང༌། གདན་བཞི་ལྟ་བུ་རྣམ་སྣང་གི་རིགས་དང༌། རིགས་ཀྱི་འཇིག་རྟེན་མགོན་པོ་ལྟ་བུ་པདྨའི་རིགས་དང༌། རྡོ་རྗེ་བདུད་རྩི་ལྟ་བུ་རྣམ་སྣང་གི་རིགས་དང༌། སྒྲོལ་མ་རྣལ་འབྱོར་མ་ལྟ་བུ་རྟའི་རྒྱལ་པོའམ་དོན་ཡོད་གྲུབ་པའི་རིགས་དང༌། ཟླ་གསང་ཐིག་ལེ་ལྟ་བུ་རྡོ་རྗེ་སེམས་དཔའི་རིགས་དང་དྲུག་ཡོད་པ་ལས། སྐབས་འདིར་ནི་མ་རྒྱུད་དང༌། དེའི་ནང་གི་ཡང་རྡོ་རྗེ་སེམས་དཔའི་རིགས་ཉིད་ཡིན་ནོ། །སྤྱིར་མ་རྒྱུད་ཀྱི་ནང་ནས་ལྷ་ཡབ་ཡུམ་གཉིས་ཀ་དང་ཐབས་ཤེས་རབ་ཀྱི་ཆ་གཉིས་ཀ་གཙོ་བོར་སྟོན་པ་གཉིས་མེད་ཀྱི་རྒྱུད་ཅེས་སྔ་མ་གཉིས་ལས་ལོགས་སུ་བཞག་ནས་བླ་མེད་ལ་ཕ་རྒྱུད་མ་རྒྱུད་གཉིས་མེད་ཀྱི་རྒྱུད་གསུམ་དུ་ཕྱེས་པའི་ནང་གི་འདིར་ནི་གཉིས་མེད་ཀྱི་རྒྱུད་དང་པོའི་སངས་རྒྱས་བཅོམ་ལྡན་འདས་དུས་ཀྱི་འཁོར་ལོ། །ཞེས་གསུངས་པ་ལྟར་རོ། །འོན་ཀྱང་བྱ་རྒྱུད་ལ་བདག་བསྐྱེད་མེད་པར་བསྟན་པ་བྱ་རྒྱུད་ཀྱི་གདུལ་བྱ་འགའ་ཞིག་བདག་ཉིད་ལྷར་བསྐྱེད་པ་ལ་སྐྲག་པའི་གང་ཟག་གི་དབང་དུ་བྱས་པ་ལས་སྤྱིར་བྱ་རྒྱུད་ལ་བདག་བསྐྱེད་མེད་པར་གསུངས་པ་མ་ཡིན་པར་རྗེའི་སྔགས་རིམ་ཆེན་མོ་སོགས་ལས་བཤད་པ་ཡོད་ལ། ཀུན་དགའ་གྲོལ་མཆོག་གིས་མི་འཁྲུགས་པ་ལྷ་དགུའི་ཆོ་གར་བདག་བསྐྱེད་གསུངས་པ་ཡོད་དོ། །རྒྱུད་སྡེ་བཞིའི་མཚན་དོན་རྒྱུད་སྡེ་བཞི་ག་ལ་གྲགས་པའི་དབང་དུ་བྱས་ན་ཕྱིའི་བྱ་བ་དང་ནང་ལྷའི་རྣལ་འབྱོར་གཉིས་ཀྱི་ནང་ནས་ཕྱིའི་བྱ་བ་གཙོ་བོར་སྟོན་ཅིང༌། བསྒོམས་པའི་ལྷ་མོ་དང་ཕན་ཚུན་བལྟས་པ་ཙམ་ལས་བྱུང་བའི་བདེ་བ་ལམ་དུ་བྱེད་པ་ལ་མོས་པའི་གང་ཟག་དངོས་སམ། དེའི་རིགས་གནས་གང་རུང་གི་ཆེད་དུ་བྱ་བའི་གདུལ་བྱ་ལ་གཙོ་བོར་གསུངས་པའི་རྒྱུད་དངོས་སམ། དེའི་སྡེར་གཏོགས་གང་རུང་གི་རྒྱུད་དེ། བྱ་རྒྱུད་ཀྱི་མཚན་ཉིད་ཡིན་ཏེ། དོན་ཞགས་ཀྱི་ཆོ་ག་ཞིབ་མོ་ལས། བཅོམ་ལྡན་འདས་ཞལ་ཁྲོ་གཉེར་ཅན་ལ་བསྟོད་པར་བྱ། ཞེས་གསུངས་པའི་ཕྱིར་རོ། །ཕྱིའི་བྱ་བ་དང་ནང་ལྷའི་རྣལ་འབྱོར་ཆ་མཉམ་དུ་སྤྱོད་ཅིང་བསྒོམས་པའི་ལྷ་མོ་དང་ཕན་ཚུན་བལྟས་པར་མ་ཟད་རྒོད་པ་ཙམ་ལས་བྱུང་བའི་བདེ་བ་ལམ་དུ་བྱེད་པ་ལ་མོས་པའི་གང་ཟག་དངོས་སམ། དེའི་རིགས་གནས་གང་རུང་གི་ཆེད་དུ་བྱ་བའི་གདུལ་བྱ་ལ་གཙོ་བོར་གསུངས་པའི་རྒྱུད་དངོས་སམ། དེའི་སྡེར་གཏོགས་གང་རུང་གི་རྒྱུད་དེ། སྤྱོད་རྒྱུད་ཀྱི་མཚན་ཉིད་ཡིན་ཏེ། རྣམ་སྣང་མངོན་བྱང་ལས། དེའི་གཡས་སུ་ལྷ་མོ་ནི། །ཞེས་སོགས་གསུངས་སོ། ། ཕྱིའི་བྱ་བ་དང་ནང་ལྷའི་རྣལ་འབྱོར་གཉིས་ཀྱི་ནང་ནས་ནང་ལྷའི་རྣལ་འབྱོར་གཙོ་བོར་སྟོན་ཅིང༌། བསྒོམས་པའི་ལྷ་མོ་དང་བལྟས་པ་དང་རྒོད་པ་ལ་བརྟེན་ནས་བྱུང་བའི་བདེ་བ་ལམ་དུ་བྱེད་པ་ཡོད་པར་མ་ཟད། ཕན་ཚུན་འཁྱུད་པའམ་ལག་པ་བཅངས་པ་ལ་བརྟེན་ནས་བདེ་བ་ལམ་དུ་བྱེད་པ་ལ་གཙོ་བོར་མོས་པའི་ཆེད་དུ་བྱ་བའི་གདུལ་བྱ་དངོས་སམ། དེའི་རིགས་གནས་གང་རུང་གི་གདུལ་བྱ་ལ་གསུངས་པའི་རྒྱུད་དངོས་སམ། དེའི་སྡེར་གཏོགས་གང་རུང་གི་རྒྱུད་དེ། རྣལ་འབྱོར་རྒྱུད་ཀྱི་མཚན་ཉིད་དུ་འཇོག་པ་ཡིན་ཏེ། རྩེ་མོ་ལས། ལྷ་མོ་རྡོ་རྗེ་ཅ་ཅོ་སྒྲོགས། །ཞེས་སོགས་གསུངས་པའི་ཕྱིར་རོ། ། ཕྱིའི་བྱ་བ་དང་ནང་ལྷའི་རྣལ་འབྱོར་གཉིས་ཀྱི་ནང་ནས། ནང་ལྷའི་རྣལ་འབྱོར་ཁོ་ན་གཙོ་བོར་སྟོན་ཅིང་རྣལ་འབྱོར་འདི་ལས་མཆོག་ཏུ་གྱུར་པའི་བླ་མའམ་གོང་མར་གྱུར་པའི་རྒྱུད་གཞན་མེད་ལ། དབང་པོ་གཉིས་སྦྱོར་གྱི་འདོད་ཡོན་ལ་ཆགས་པ་ལམ་དུ་བྱེད་པ་ལ་གཙོ་བོར་མོས་པའི་གདུལ་བྱ་དངོས་སམ། དེའི་རིགས་གནས་གང་རུང་གི་ཆེད་དུ་བྱ་བའི་གདུལ་བྱ་ལ་གསུངས་པའི་རྒྱུད་དངོས་སམ། དེའི་སྡེར་གཏོགས་གང་རུང་གི་རྒྱུད། བླ་མེད་ཀྱི་རྒྱུད་ཀྱི་མཚན་ཉིད་ཡིན་ཏེ། འདུས་པ་རྩ་བའི་རྒྱུད་ལས། དེ་བཞིན་གཤེགས་པའི་བཙུན་མོ་མཆོག །ཅེས་སོགས་གསུངས་པའི་ཕྱིར་རོ། །སྔགས་ལམ་དུ་ཞུགས་པ་ལ་སྐྱབས་འགྲོ་དང་ངེས་འབྱུང་གི་བསམ་པ་དང་བྱང་ཆུབ་ཀྱི་སེམས་རྒྱུད་ལ་བསྐྱེད་པ་སྔོན་དུ་འགྲོ་བའི་སྟེང་ནས་དབང་ཐོབ་དགོས་ཏེ། རྡོ་རྗེ་སློབ་དཔོན་མཚན་ཉིད་དང་ལྡན་པ་བླ་མ་ལྔ་བཅུ་པ་ལས་བཤད་པ་ལྟར་ཚུལ་བཞིན་དུ་བསྟེན། རྒྱུད་སྣོད་དུ་རུང་བར་བྱེད་པ་དབང་བསྐུར་བ་མནོས། དབང་གི་དུས་སུ་ཁས་བླངས་པའི་དམ་ཚིག་དང༌། སྡོམ་པ་ཚུལ་བཞིན་དུ་བསྲུང་བ་ལམ་གྱི་གཞིར་མེད་མི་རུང་ཡིན་ཏེ། བླ་མ་ལྔ་བཅུ་པ་ལས། བསམ་པ་དག་པའི་སློབ་མ་ནི། །དཀོན་མཆོག་གསུམ་ལ་སྐྱབས་སོང་ལ། །བླ་མའི་རྗེས་སུ་འཇུག་པ་འདི། །ཁ་ཏོན་བྱ་བར་སྦྱིན་པར་བྱ། །དེ་ནས་སྔགས་སོགས་བྱིན་པ་ཡིས། །དམ་ཆོས་སྣོད་དུ་བྱས་ནས་སུ། །རྩ་བའི་ལྟུང་བ་བཅུ་བཞི་ནི། །ཀློག་དང་འཛིན་པ་ཉིད་དུ་བྱ། །ཞེས་པ་དང༌། ཕྱག་ཆེན་ཐིག་ལེ་ལས་ཀྱང༌། དབང་མེད་པ་ལ་དངོས་གྲུབ་མེད། །བྱེ་མ་བཙིར་ལ་མར་མེད་ལྟར། །གང་གི་རྒྱུད་ལུང་ང་རྒྱལ་གྱིས། །དབང་བསྐུར་མེད་པར་འཆད་བྱེད་པ། །སློབ་དཔོན་སློབ་མ་ཤི་མ་ཐག །དངོས་གྲུབ་ཐོབ་ཀྱང་དམྱལ་བར་འགྲོ། །ཞེས་གསུངས་ལ། སངས་རྒྱས་ཐོད་པའི་རྒྱུད་ལས་ཀྱང༌། དཔེར་ན་བུ་ཚ་མེད་པའི་ཁྱིམ། །ཤི་བ་ཙམ་གྱིས་སྟོང་པ་ཉིད། །དེ་བཞིན་དབང་དང་བྲལ་ན་ནི། །ཡེ་ཤེས་ཀུན་གྱིས་སྟོང་པ་ཉིད། །ཅེས་གསུངས་ཤིང༌། བདེ་མཆོག་རྩ་རྒྱུད་ལས་ཀྱང༌། ཤིན་ཏུ་མཉམ་བཞག་སྒྲུབ་པ་པོས། །དམ་ཚིག་རྟག་ཏུ་བསྐྱང་བར་བྱ། །དམ་ཚིག་ཉམས་པའི་དཀྱིལ་འཁོར་དུ། །དབང་བསྐུར་དངོས་གྲུབ་ཐོབ་མི་འགྱུར། ། ཞེས་གསུངས་པའི་ཕྱིར་རོ། ། རྒྱུད་སྡེ་བཞིའི་གཞུང་གི་གྲངས་ཚད་ནི། ཕྱོགས་རྒྱལ་བ་ཆེན་པོའི་དུས་འཁོར་རྒྱུད་འགྲེལ་བཤད་པ་ལ་འཇུག་པའི་ཡན་ལག་ལས། རྒྱུད་སྡེའི་གཞུང་གི་གྲངས་ཚད་བསྟན་པ་ནི་ཡེ་ཤེས་རྡོ་རྗེ་ཀུན་ལས་བཏུས་པའི་རྒྱུད། རྣལ་འབྱོར་ཆེན་པོའི་རྒྱུད་ཀྱི་མིང་སྟོང་ཕྲག་བཅུ་པ་ཞེས་བྱ་བ་སྟེ། རྒྱས་པར་བྱས་ན་གྲངས་མེད་དོ། །གཉིས་ཀའི་རྒྱུད་སྟོང་ཕྲག་དྲུག་གོ། །སྤྱོད་པའི་རྒྱུད་སྟོང་ཕྲག་བརྒྱད་དོ། །བྱ་བའི་རྒྱུད་སྟོང་ཕྲག་བཞིའོ་ཞེས་གསུངས་པ་ལ། དེར་རྣལ་འབྱོར་མ་རྒྱུད་ཀྱི་གྲངས་མ་གསུངས་ཤིང༌། སྡོམ་འབྱུང་ལས། རྣལ་འབྱོར་མ་རྒྱུད་རྣམས་ཀྱི་ཚད། །བྱེ་བ་ཕྲག་ནི་དྲུག་ཏུ་ངེས། །དེ་བཞིན་རྣལ་འབྱོར་མ་རྒྱུད་གྲངས། །བྱེ་བ་ཕྲག་ནི་བཅུ་དྲུག་གྲངས། །ཞེས་གསུངས་སོ། །རྣལ་འབྱོར་ཆེན་པོ་ཐབས་ཀྱི་རྒྱུད་ལའང། རྡོ་རྗེ་སྙིང་པོ་རྒྱན་གྱི་རྒྱུད་ལས། དེ་ལས་གཞན་ཡང་བཤད་བྱ་བ། །འདོད་ཆགས་ཐབས་ཆེན་པོའི་རྒྱུད། །གང་གིས་ལེགས་པར་ཤེས་ནས་ནི། །ཚེ་འདིར་དངོས་གྲུབ་སྦྱིན་པར་བཤད། །གསང་བ་འདུས་པ་སྟོང་ཕྲག་གཅིག །རྡོ་རྗེ་ཕྲེང་བ་འབུམ་ཕྲག་གཅིག །དགོངས་པ་ལུང་སྟོན་སྟོང་ཕྲག་བརྒྱ། །ལྷ་མོ་བཞིས་ཞུས་བརྒྱ་བདུན་ཅུ། །ཨུ་རད་ཏན་ཏྲ་གཉིས་བརྒྱ་བརྒྱད། །དེ་ཡིན་ཉེ་བར་བཤད་པ་ཡིན། །དམ་ཚིག་ཆེན་པོ་ལྔ་བཅུ་ལྔ། །རྡོ་རྗེ་ལྔ་འདུས་སྟོང་ཕྲག་གཅིག །ཀུན་ལས་བཏུས་པ་འབུམ་ཕྲག་གཅིག །མཉམ་ཉིད་རྣམ་རྒྱལ་ཉིས་བརྒྱ་བརྒྱད། །ཟླ་གསང་ཐིག་ལེ་སྟོང་བདུན་བརྒྱ། །རྡོ་རྗེ་ས་འོག་བརྒྱ་ཉི་ཤུ། །གཅོད་པན་རྡོ་རྗེ་བདུན་བརྒྱ་ལྔ། །ཁྲོ་ཟླ་ཐིག་ལེ་འབུམ་ཕྲག་ལྔ། །རྡོ་རྗེ་རྣམ་རྒྱལ་བརྒྱ་དགུ་བརྒྱ། །མཉམ་ཉིད་གསང་བ་སྟོང་ཕྲག་ལྔ། །རྡོ་རྗེ་གསང་བརྒྱན་སྟོང་ཕྲག་ལྔ། །རྡོ་རྗེ་གསང་མཛོད་སྟོང་ཕྲག་བདུན། །ནོར་བུ་གང་ཐིགས་འབུམ་ཕྲག་གཅིག །སྣང་མཛད་སྒྱུ་འཕྲུལ་སྟོང་དང་བརྒྱ། །རྡོ་རྗེ་གསང་བརྒྱན་སྟོང་ཕྲག་གཅིག །རྡོ་རྗེ་ཐོད་པ་གཉིས་བརྒྱ་བརྒྱད། །དེ་ཉིད་བརྒྱ་སྟོང་བརྒྱ་སྟོང་བདུན། །དམ་ཚིག་མངོན་རྒྱན་སྟོང་ཕྲག་འབུམ། །འཇམ་དཔལ་དཔའ་བོ་འབུམ་ཕྲག་བཞི། །གསང་ཆེན་བསྡུས་པ་བརྒྱ་ལྔ་བཅུ། །རིན་ཆེན་སྡོང་པོ་དགུ་བརྒྱ་བདུན། །དུས་ཀྱི་ཐིག་ལེ་བརྒྱ་བརྒྱད་ཅུ། །ལྷ་མོ་བསྟན་བཅོས་ལྔ་བརྒྱ་བདུན། །འདི་རྣམས་དགོངས་པའི་བྱེ་བྲག་གིས། །ང་ཡིས་ཡང་དག་བསྟན་པར་བྱ། །འདི་ནི་གཉིས་པོས་འཁྱུད་པ་ཡི། །རྒྱུད་ཀྱི་དབྱེ་བ་བསྟན་པའོ། །དེ་བཞིན་དུ་ནི་ལག་བཅངས་དང༌། །རྒོད་དང་ལྟ་བས་ཤེས་པར་བྱ། །ཞེས་སོ། ། དེ་རྣམས་ཀྱང་ཤོ་ལོ་ཀའི་གྲངས་ཚད་ནི་མ་ཡིན་གྱི། རྒྱུད་ཀྱི་མིང་གི་གྲངས་ཡིན་པར་ཤེས་པར་བྱའོ། །ཞེས་སོ། །ཞེས་གསུངས་པའི་ཕྱིར་རོ། །