གཉིས་པ་ནི་རྗེས་བཅས་གཞི་གང་ལ་གནས་པའི་གཞི་ངོས་གཟུང་བ་ལ་གཉིས།

གཉིས་པ་ནི་རྗེས་བཅས་གཞི་གང་ལ་གནས་པའི་གཞི་ངོས་གཟུང་བ་ལ་གཉིས་ཏེ།

དགག་པ་བཅས་པའི་རྗེས་སུ་དགག་པ་རྗེས་བཅས་གཞི་གང་ལ་གནས་པ་དང༌། རྗེས་བཅས་གཞན་མུ་བརྒྱད་པོ་གཞི་གང་ལ་གནས་པའོ། །དང་པོ་ནི། རང་བཞིན་དང་བཅས་པའི་ཁ་ན་མ་ཐོ་བ་གཉིས་ཀའི་གཞི་ཆོས་ཅན། དགག་པ་བཅས་པའི་རྗེས་སུ་དགག་པའི་རྗེས་བཅས་རྟེན་ཙམ་དུ་ཡོད་དེ། རང་གི་སྔར་བཅས་ལ་ལྟོས་ནས་དགག་བཅས་ཙམ་དུ་རིགས་མཐུན་ཕྱི་མའི་བཅས་པ་རྣམ་འཇོག་གི་དགག་བྱ་རྟེན་ཙམ་དུ་ཡོད་པའི་ཕྱིར་རོ། །གཉིས་ཀའི་གཞི་དེ་དག་ལ་རྗེས་བཅས་དེ་ཁྱབ་བྱེད་དུ་ཡོད་པ་ནི་མ་ཡིན་ཏེ། རྗེས་བཅས་མེད་པའི་བཅས་རྐྱང་མང་དུ་ཡོད་པའི་ཕྱིར་རོ། །གཉིས་པ་ནི་རྗེས་བཅས་གཞན་མུ་བརྒྱད་པོ་དེ་དག་ནི་སྤྱིར་བཏང་ལ་བཅས་པའི་ཁ་ན་མ་ཐོ་བའི་གཞི་ལ་གནས་པ་ཡིན་ཏེ། ཁ་ན་མ་ཐོ་བའི་གཞི་ལ་གནས་པར་གཞི་གྲུབ་ཅིང་རང་བཞིན་གྱི་ཁ་ན་མ་ཐོ་བའི་གཞི་ལ་གནས་པར་མི་སྲིད་པའི་ཕྱིར་རོ། །བཅས་པའི་ཁ་ན་མ་ཐོ་བའི་གཞི་ཡང༌། དམིགས་བསལ་དགེ་སློང་གིས་ཆང་དྲི་རོ་མངོན་པ་འཐུང་བ་ལ་ནི་རྗེས་བཅས་གཞན་མུ་བརྒྱད་པོ་དེ་དག་མི་སྲིད་དོ། །དེ་ལྟར་ཆང་འཐུང་བ་ལ་མི་སྲིད་ན། ནད་པས་ནི་ཞུན་མར་ཆང་དང་འབྲུ་མར་དང་འདྲེས་པ་བཏུང་བར་བྱ་བ་ཉིད་དོ་ཞེས་གསུངས་པ་དང་འགལ་ཞེ་ན། དེ་ནི་ཆང་གི་དྲི་རོ་མི་མངོན་ནའོ། །དེ་ལྟར་ན་དགེ་སློང་གིས་ཀྱང་ཆང་དྲི་རོ་མངོན་པ་འཐུང་བ་དང་སྲོག་གཅོད་པ་ལ་སོགས་པ་རང་བཞིན་གྱི་ཁ་ན་མ་ཐོ་བའི་གཞི་ལ་ཆོས་ཅན། རྗེས་བཅས་གཞན་མུ་བརྒྱད་པོ་དེ་མི་སྲིད་དེ། གནང་བ་ཡང་མི་སྲིད་ལ་སྒྲུབ་པ་ཡང་མི་སྲིད་པའི་ཕྱིར་རོ། །གནང་བ་མི་སྲིད་པའི་ཕྱིར་ན་སྔར་གནང་བ་ལ་བརྟེན་པའི་རྗེས་བཅས་གསུམ་དང་དགག་པ་བཅས་པའི་རྗེས་སུ་གནང་བ་རྗེས་བཅས་མི་སྲིད་དོ། ། སྒྲུབ་པ་མི་སྲིད་པའི་ཕྱིར་ན་སྔར་སྒྲུབ་པ་ལ་བརྟེན་པའི་རྗེས་བཅས་གསུམ་དང་དགག་པ་བཅས་པའི་རྗེས་སུ་སྒྲུབ་པ་རྗེས་བཅས་མི་སྲིད་དོ། །འོ་ན་དེ་ལ་རང་བཞིན་གྱི་ཁ་ན་མ་ཐོ་བ་གནང་བ་མེད་ན། རྫུན་སྨྲ་བའི་ཕམ་པའི་སྐབས་ཀྱི་ལུང་རྣམ་འབྱེད་ལས། སྔ་མ་ནི་བཅས་པ་ཡིན་ལ་འདི་ནི་རྗེས་སུ་གནང་བ་ཡིན་ཏེ། མངོན་པའི་ང་རྒྱལ་མ་གཏོགས་ཏེ། ཞེས་དང༌། ལྷག་མ་དང་པོའི་སྐབས་ཀྱི་ལུང་རྣམ་འབྱེད་ལས། སྔ་མ་ནི་བཅས་པ་ཡིན་ལ། འདི་ནི་རྗེས་སུ་གནང་བ་ཡིན་ཏེ། བསམ་བཞིན་དུ་ཁུ་བ་ཕྱུང་ན་རྨི་ལམ་གྱི་མ་གཏོགས་ཏེ། ཞེས་གསུངས་པ་དང་མི་འགལ་ལམ་སྙམ་ན། མངོན་པའི་ང་རྒྱལ་གྱིས་སྨྲས་པ་དེ་ནི་འདུ་ཤེས་བསྒྱུར་བ་མེད་པས་རྫུན་ཉིད་མ་ཡིན་པའི་ཕྱིར་ན་རྫུན་གནང་བ་མ་ཡིན་ནོ། །གཞན་ཡང་རྨི་ལམ་དུ་ཁུ་བ་ཕྱུང་བའི་ལྟུང་བ་མེད་པ་ཙམ་ལ་རྗེས་སུ་གནང་བ་ཞེས་བཏགས་པ་ཡིན་ཏེ། གནང་བའི་བཅས་པ་མ་ཡིན་ནོ། །དེ་ཡང་རྨི་ལམ་དུ་བྱས་པ་དེ་ནི་སྤྱིར་ན་བཅས་པ་མཚན་ཉིད་འཆའ་བའི་གཞི་གཏན་ནས་མ་ཡིན་པའི་ཕྱིར་ཏེ། ལུང་ལས། རྨི་ལམ་ནི་ཐ་སྙད་དུ་བྱར་རུང་བ་མ་ཡིན་ཞེས་པས་གྲུབ་བོ། །

གསུམ་པ་རྗེས་བཅས་ཀྱི་མཚན་ཉིད་ལ་གཉིས་ཏེ། མཚན་ཉིད་དངོས་དང༌། ཞར་ལ་བྱུང་བའོ། །

དང་པོ་རྗེས་བཅས་ཀྱི་མཚན་ཉིད་ནི། རང་གི་སྔར་བཅས་ལ་ལྟོས་ནས་འདུལ་བའི་བསླབ་པའི་གཞི་རྣམ་པར་བཞག་པ་ཕྱི་མའོ། །གཉིས་པ་ཞར་ལ་བྱུང་བ་ལ་གསུམ་ལས། དང་པོ་བཅས་པ་མཚན་ཉིད་པ་ཡིན་མིན་སྤྱིར་གཏན་ལ་དབབ་པ་ནི། ལྡོག་འཇུག་མ་བྱས་ན་ལྟུང་བའི་ཆད་པར་བཅས་ན་དགག་སྒྲུབ་ཀྱི་བཅས་པ་མཚན་ཉིད་པ་ཡིན་ལ། གཞན་དུ་ན་དགག་སྒྲུབ་ཀྱི་བཅས་པ་མཚན་ཉིད་པ་མ་ཡིན་ནོ། །དེ་ཡང་བཅོམ་ལྡན་འདས་སངས་རྒྱས་ནས་རིང་པོར་མ་ལོན་པ་ན། སྡིག་པ་ཅི་ཡང་མི་བྱ་སྟེ་གསུངས་ཀྱང༌། དགག་བཅས་མཚན་ཉིད་པ་མ་ཡིན་ཏེ། དེ་ལས་འདས་ཀྱང་ལྟུང་བའི་ཆད་པར་མ་བཅས་པའི་ཕྱིར་ཏེ་བཟང་སྦྱིན་གྱིས་ལོག་གཡེམ་དང་ནོར་ཅན་གྱིས་མ་བྱིན་ལེན་བྱས་ཀྱང༌། ལུང་རྣམ་འབྱེད་ལས། ལས་དང་པོ་པ་ལ་ལྟུང་བ་མེད་དེ། ཞེས་དང༌། འོད་ལྡན་ལས། འཕགས་པ་ཉེར་སྦས་ཀྱི་ཞལ་ནས་དགག་པའི་བཅས་པ་རང་མཚན་པ་དེ་ཆད་པ་བཅའ་བ་ལ་དགོངས་ནས་གསུངས་པའི་ཕྱིར་རོ། །ཞེས་གསུངས་སོ། །འོན་ཀྱང་གནང་བའི་བཅས་པ་ནི་ལྟུང་བའི་ཆད་པར་བཅས་པ་ལ་མི་ལྟོས་སོ། །འདིར་ཁ་ཅིག་ན་རེ་གནང་བའི་བཅས་པ་ནི་བཅས་པ་མཚན་ཉིད་པ་མ་ཡིན་ཏེ། ལྡོག་འཇུག་མ་བྱས་ཀྱང་ལྟུང་བའི་ཆད་པར་མ་བཅས་པའི་ཕྱིར་ཞེས་ཟེར་བ་ནི་ཁྱབ་པ་མ་ངེས་ལ། དམ་བཅའ་མི་འཐད་དེ། གནང་བ་བཅས་པའི་རྗེས་སུ་དགག་པ་རྗེས་བཅས་ཆོས་ཅན། རྗེས་བཅས་མ་ཡིན་པར་ཐལ། ལྟོས་པ་སྔར་བཅས་རང་མཚན་པ་མེད་པའི་ཕྱིར་རོ། །རྟགས་ཁས་བླངས་སོ། །ཁྱབ་པ་མ་གྲུབ་ན། ལྟོས་པ་སྔར་བཅས་མེད་པར་དེའི་རྗེས་བཅས་ཡོད་པར་འགལ་ལོ། །གོང་དུ་འདོད་ན། ཊཱི་ཀ་ལས། རྗེས་སུ་བཅས་པ་ཞེས་བྱ་བ་ནི་སྔར་གནང་བའི་གཞི་ལས་བཀག་པ་དང༌། ཞེས་སོ། །དེས་ན་གནང་བའི་བཅས་པ་ལ་ལྡོག་འཇུག་མ་བྱས་ཀྱང་ལྟུང་བའི་ཆད་པ་མེད་པར་བཅས་པ་ཉིད་ཀྱིས་བཅས་པ་མཚན་ཉིད་པ་ཡིན་པར་རིགས་སོ། །གནང་བའི་བཅས་པ་ལ་གོང་དུ་བཀོད་པའི་མཚོ་ཊཱིཀ་ལས་བཤད་པའི་བཅས་པའི་དོན་ཚང་ཚུལ་དཔྱད་པར་བྱའོ། །