གཉིས་པ་རྒྱུད་སྡེ་བཞི་སོ་སོར་བཤད་པ།
གཉིས་པ་རྒྱུད་སྡེ་བཞི་སོ་སོར་བཤད་པ་ལ།
བྱ་རྒྱུད་དང༌། སྤྱོད་རྒྱུད་དང༌། རྣལ་འབྱོར་གྱི་རྒྱུད་དང༌། བླ་མེད་ཀྱི་རྒྱུད་བཤད་པ་དང་བཞི་ལས། དང་པོ་བྱ་རྒྱུད་ལ། སྒྲ་བཤད། བྱ་རྒྱུད་ཀྱི་དབྱེ་བ། ཉམས་ལེན་ལམ་གྱི་རིམ་པ་དང་གསུམ་ལས། དང་པོ་ནི། ལུས་ངག་གི་བྱ་བ་གཙོ་བོར་སྟོན་པའི་རྒྱུད་ཡིན་པས་བྱ་རྒྱུད་ཅེས་བརྗོད་དོ། །གཉིས་པ་དབྱེ་བ་ལ། རིགས་ཀྱི་དབྱེ་བ་དང༌། རྗོད་བྱེད་ཚིག་གི་དབྱེ་བ་དང་གཉིས། དང་པོ་ནི། དེ་བཞིན་གཤེགས་པའི་རིགས། པདྨའི་རིགས། རྡོ་རྗེ་རིགས་ཏེ་འཇིག་རྟེན་འདས་པའི་རིགས་གསུམ་དང༌། ནོར་བུའི་རིགས་དང༌། ལྔ་རྩེན་གྱི་རིགས། འཇིག་རྟེན་ཕལ་པའི་རིགས་ནི་འཇིག་རྟེན་པ་གསུམ་སྟེ། དེ་ལྟར་རིགས་དྲུག་གོ། །དེ་བཞིན་གཤེགས་པའི་རིགས་ལ་དམ་ཚིག་གསུམ་བཀོད། ཚེ་དཔག་མེད། མི་འཁྲུགས་པ། སྨན་བླ་སོགས་སངས་རྒྱས་དངོས་རྣམས་གཙོ་བོའི་རིགས་ཡིན་ལ།འཇམ་དཔལ་གྱི་རིགས་རྣམས་རིགས་ཀྱི་བདག་པོ་དང༌། གཙུག་གཏོར་རྣམ་རྒྱལ་གདུགས་དཀར་དྲི་མེད་སོགས་རིགས་ཀྱི་གཙུག་གཏོར་དང༌། སྤྱན་རས་གཟིགས་དང༌། ཕྱག་རྡོར་འཁོར་བཅས་མ་གཏོགས། བྱང་སེམས་རྣམས་རིགས་ཀྱི་སེམས་དཔའ་དང༌། སངས་རྒྱས་སྤྱན་མ། གཟུངས་གྲྭ་ལྔ་ལ་སོགས་པ་རིགས་ཀྱི་ཡུམ་དང༌། གཤིན་རྗེ་གཤེད་ནི་རིགས་ཀྱི་ཁྲོ་བོ་དང་རིགས་ཀྱི་བདག་པོ་དང༌། མི་གཡོ་བ་ལ་སོགས་པ་རིགས་ཀྱི་ཕོ་ཉ་དང༌། འཕགས་མ་འོད་ཟེར་ཅན་མ་དང༌། རི་ཁྲོད་མ་ལོ་མ་གྱོན་མ་སོགས་དང༌། རྒྱལ་མཚན་རྩེ་མོའི་དཔུང་རྒྱན་དང༌། གཞན་གྱིས་མི་ཐུབ་མ་དང༌། ཕྱིར་བཟློག་ཆེན་མོ་ལ་སོགས་པ་རིགས་ཀྱི་ཕོ་ཉ་མོ་ཡིན་ནོ། །པདྨའི་རིགས་ལ། རིགས་ཀྱི་གཙོ་བོ་འཕགས་པ་སྤྱན་རས་གཟིགས་ཡིན་ལ། བཅོམ་ལྡན་མ་གོས་དཀར་མོ་སོགས་རིགས་ཀྱི་ཡུམ་དང༌། སྒྲོལ་མ་སོགས་རིགས་ཀྱི་ལྷ་མོ་དང་དོན་ཡོད་ཞགས་པ་དང༌། ཧ་ལ་ཧ་ལ་སོགས་རིགས་ཀྱི་སེམས་དཔའ་དང༌། རིགས་ཀྱི་བདག་པོ་ཞེས་བྱ་བ་རིགས་ཀྱི་ཁྲོ་བོ་ནི་རྟ་མགྲིན་ནོ། །རལ་གཅིག་མ་ལ་སོགས་པ་རིགས་ཀྱི་ཁྲོ་མོ་དང། སྲིན་མོ་རལ་གཅིག་མ་དང༌། དཔལ་ཆེན་མོ་ལ་སོགས་པ་ནི་རིགས་ཀྱི་ཕོ་ཉ་མོའོ། །རྡོ་རྗེའི་རིགས་ལ། རིགས་ཀྱི་གཙོ་བོ་ཕྱག་ན་རྡོ་རྗེ། རིགས་ཀྱི་ཡུམ་ལྷ་མོ་མཱ་མ་ཀཱི་དང་མེ་ལྟར་རབ་ཏུ་རྨོངས་བྱེད། རྡོ་རྗེ་མི་ཕམ་མོ་ལ་སོགས་པའོ། །རིགས་ཀྱི་སེམས་དཔའ་ནི་ཁྲོ་གཉེར་རིམ་པར་ལྡན་ལ་སོགས་པ་ཡིན་ཡང་ཁྲོ་བོའི་ཁོངས་སུ་འདུས། རིགས་ཀྱི་ཁྲོ་བོ་བདུད་རྩི་འཁྱིལ་པ། རིགས་ཀྱི་ཕོ་ཉ་སྟོབས་པོ་ཆེ་ལ་སོགས་པ། རིགས་ཀྱི་ཕོ་ཉ་མོ་རྡོ་རྗེ་ལྕགས་སྒྲོགས་མ་ལ་སོགས་པ་དྲུག་ཅུ་རྩ་བཞི་ཡོད་པར་གསུངས། ནོར་བུའི་རིགས་ཀྱི་རྒྱུད་ནི། གནོད་སྦྱིན་ནོར་བུ་བཟང་པོའི་བཤད་པ་སྟེ། ཛམྦྷ་ལ་དང་ནོར་རྒྱུན་མ་ལ་སོགས་པའི་རྒྱུད་དོ། །ལྔ་རྩེན་གྱི་རིགས་ནི། གནོད་སྦྱིན་ལྔ་རྩེན་ཉིད་དང༌། འཕྲོག་མ་དང༌། བུ་དགའ་བྱེད་ལ་སོགས་པའོ། །འཇིག་རྟེན་པའི་རིགས་ལ་ཚངས་པ། དབང་ཕྱུག ཁྱབ་འཇུག ཟླ་བ། ཉི་མ། མཁའ་ལྡིང་རྣམས་གཙོ་བོར་བཤད་ཅིང་སྤྱིར་ལྷ་ཀླུ་གནོན་སྦྱིན། དྲི་ཟ་མིའམ་ཅི། ལྷ་མ་ཡིན། མཁའ་ལྡིང༌། འབྱུང་པོ་སྟེ་སྡེ་བརྒྱད་ཀྱི་རིགས་མཐའ་ཡས་པ་རྣམས་སོ། །དེ་ལྟར་བྱ་བའི་རྒྱུད་ཀྱི་རིགས་ཀྱི་དབྱེ་བ་རྣམས་སོ། །