གཉིས་པ་རྗེས་བཅས་མཚན་ཉིད་པ་ཡིན་མིན་བྱེ་བྲག་ཏུ་གཏན་ལ་དབབ་པ།

གཉིས་པ་རྗེས་བཅས་མཚན་ཉིད་པ་ཡིན་མིན་བྱེ་བྲག་ཏུ་གཏན་ལ་དབབ་པ་ནི།

སྡིག་ཅན་དགོན་པ་བས་སྤྲ་མོ་ལ་ལོག་པར་ཞུགས་པ་ལ་བརྟེན་ནས་འདི་ནི་རྗེས་སུ་བཅས་པའོ་ཞེས་གསུངས་པ་ལྟ་བུ་དགག་པ་བཅས་པའི་རྗེས་སུ་དགག་པའི་རྗེས་བཅས་ཀྱི་སྒྲས་བརྗོད་པ་དེ་ཆོས་ཅན།དགག་པ་དེ་རྗེས་སུ་བཅས་པ་མཚན་ཉིད་པ་ཉིད་མ་ཡིན་ཏེ། སྔར་ནས་དགག་པར་བཅས་ཟིན་པའི་ཕྱིར་རོ། །དེ་ཡང་དགོན་པ་བས་སྤྲ་མོ་ལ་ལོག་པར་ཞུགས་པ་ལ་བརྟེན་ནས། ལུང་རྣམ་འབྱེད་ལས། འདི་ནི་རྗེས་སུ་བཅས་པའོ་ཞེས་གསུངས་པ་ཆོས་ཅན། དེའི་སྔ་རོལ་ཏུ་དུད་འགྲོ་ལ་ལོག་པར་སྤྱོད་པ་བཀག་ཟིན་པ་ཡིན་ཏེ། དེའི་སྔ་རོལ་ཏུ་དགོན་པ་པ་ལ་དུད་འགྲོ་ལ་ལོག་པར་སྤྱོད་པའི་ཕམ་པ་བྱུང་བའི་ཕྱིར་ཏེ། དེའང་ལུང་རྣམ་འབྱེད་ལས། གཏི་མུག་ཅན་དེ་ནི་ཕམ་པར་གྱུར་ཏོ། །ཞེས་གསུངས་པས་གྲུབ་བོ། །རྣམ་གྲངས་གཞན་ཡང་ཆོས་ཅན་དང་བསྒྲུབ་བྱའི་ཆོས་སྔར་བཞིན་བརྗོད་ནས། དེའི་སྔ་རོལ་ཏུ་བཟང་སྦྱིན་ལ་བརྟེན་ནས་མི་ཚངས་པར་སྤྱོད་པ་སྤྱིར་བཀག་ཟིན་པའི་ཕྱིར་ཏེ། དེ་ལྟར་དུད་འགྲོ་ལ་ལོག་པར་སྤྱོད་པ་སྔར་ནས་དགག་པར་བཅས་ཟིན་ཀྱང་ལུང་རྣམ་འབྱེད་ལས། འདི་ནི་རྗེས་སུ་བཅས་པའོ། །ཞེས་གསུངས་པ་ནི། མི་ལ་བཀག་ཀྱང་དུད་འགྲོ་ལ་མ་བཀག་སྙམ་པའི་ལོག་རྟོག་བཟློག་པ་ཙམ་ཡིན་ཏེ། རྣམ་འབྱེད་འགྲེལ་བ་ལས། འདི་ནི་རྗེས་སུ་བཅས་པའོ་ཞེས་བྱ་བ་ནི། དེའི་རྗེས་སུ་སོང་བའི་བསམ་པ་བཟློག་པའི་ཕྱིར་རོ། །ཞེས་པས་སོ། །དེ་ལྟར་སྔར་ནས་དགག་པར་བཅས་ཟིན་པ་དེ་བཞིན་དུ། སྔར་ནས་སྒྲུབ་པར་བཅས་ཟིན་པ་ཡང་རྒྱུ་མཚན་མཚུངས་པས་ན། སྒྲུབ་པ་བཅས་པའི་རྗེས་སུ་སྒྲུབ་པ་རྗེས་བཅས་ཀྱང་རྗེས་བཅས་ཀྱི་སྒྲས་བརྗོད་པ་དེ་ཆོས་ཅན། སྒྲུབ་པ་དེ་རྗེས་སུ་བཅས་པ་མཚན་ཉིད་པ་མ་ཡིན་ཏེ། སྔར་ནས་སྒྲུབ་པ་བཅས་ཟིན་པའི་ཕྱིར་རོ་ཞེས་མཚོ་ཊཱིཀ་ལས་སྒྲུབ་པའི་རྗེས་སུ་སྒྲུབ་པ་བཅས་པ་དང་དགག་པའི་རྗེས་སུ་དགག་པ་བཅས་པ་རྗེས་བཅས་མཚན་ཉིད་པ་མ་ཡིན་པར་གསུངས་པ་ལ། འོན་ཀྱང་དབྱར་སྔ་མ་བཅས་པའི་རྗེས་སུ་དབྱར་ཕྱི་མ་བཅས་པ་སྒྲུབ་པའི་རྗེས་སུ་སྒྲུབ་པ་ཡིན་ཡང་རྗེས་བཅས་མཚན་ཉིད་པ་ཡིན་ཏེ། ཀུན་མཁྱེན་འཇམ་བཞད་ཀྱིས། སྒྲུབ་པའི་རྗེས་སུ་སྒྲུབ་པ་ལ་ཡང་དབྱར་ཕྱི་མ་ལྟ་བུ་དབྱར་གནས་ཙམ་དུ་འདྲ་ཡང་དབྱར་གཉིས་པ་ཁས་བླངས་ཚུལ་མ་ཤེས་ནས་ཞུས་པས་དབྱར་ཟླ་ཐ་ཆུང་ལ་ཕྱི་མ་གནས་པར་ཁས་བླངས་བར་བྱའོ། །ཞེས་པ་ལྟ་བུ་རྗེས་བཅས་མཚན་ཉིད་པ་ཡིན་པའི་ཕྱིར། ཞེས་པ་ནས། རྗེས་བཅས་མཚན་ཉིད་པ་ཡིན་པའི་ཕྱིར་སོགས་དུ་མ་ལུང་དང་གླེང་འབུམ་ལས་བཏོན་ཏེ་སྤྲོ་སླ། ཞེས་གསུངས་པ་དང༌།སྤྱི་སྒྲུབ་པས་བྱེ་བྲག་སྒྲུབ་མི་ནུས་པའི་ཕྱིར་ཟེར་ན་དཔྱད། སྲོག་ཆགས་དང་བཅས་པའི་བྱེ་མ་སྐོ་བ་བཀག་པའི་བཅས་པ་དགག་པའི་རྗེས་སུ་དགག་པ་ཡིན་ཀྱང་རྗེས་བཅས་མཚན་ཉིད་པ་ཡིན་ཏེ། འདུལ་བ་མདོར་བསྡུས་ཡིན་པའི་ཕྱིར། ཁྱབ་སྟེ། མཚོ་ཊཱིཀ་༤༢ལས། རང་ལུགས་བཞག་པ་ནི། འདུལ་བ་མདོར་བསྡུས་ཐམས་ཅད་རྗེས་བཅས་ཡིན་ཏེ། ཞེས་གསུངས་པའི་ཕྱིར་ཟེར་ན་དཔྱད་པར་བྱའོ། །སྐབས་འདིར་ཀུན་མཁྱེན་འཇམ་དབྱངས་བཞད་པའི་འདུལ་གཞུང་ལས། ཀླུ་སོགས་ལ་སྤྱད་པའི་ངོ་ཚའི་དབང་གིས་ཕམ་པའི་ཆར་གཏོགས་ཀྱི་སྦོམ་པོ་སྔར་བཤད་པ་དང༌། དགེ་སློང་མི་ཕམ་པ་ཞེས་པས་རྐུ་སེམས་ཀྱིས་རང་གི་གོས་ཀྱང་བརྐུས་ན་སྦོམ་པོར་བཅས་པ་ལྟ་བུ་དགག་པའི་རྗེས་སུ་དགག་པ་ཡིན་ཀྱང་མཚན་ཉིད་མི་འདོར་བ་དང་བསམ་ངོ་བ་མ་ཡིན་པའི་ཕྱིར། ཞེས་གསུངས་ནས་དེའི་ཤེས་བྱེད་དུ། ལུང་ལས། དགེ་སློང་དག་མི་ཕམ་པ། མི་གཏི་མུག་ཅན་དེ་ནི་རང་གི་ཆོས་གོས་རྙིང་རྙིང་དག་གིས་སྦོམ་པོའི་ལྟུང་བ་བྱུང་ངོ༌། །ཞེས་སོགས་དྲངས་ནས་བཤད་མོད་འདི་རྗེས་བཅས་མཚན་ཉིད་པ་ཡིན་ན་དགེ་སློང་མི་ཕམ་པ་བཅས་པའི་ལས་དང་པོ་ཡིན་དགོས་པས་ཕམ་པའི་སྦོམ་པོ་མ་བྱུང་དགོས་ཀྱང་དེ་བྱུང་བར་ལུང་ལས་དངོས་སུ་གསུངས་པས་གནོད་དམ་ལྷ་མོའི་ཚུལ་ཁྲིམས་ཀྱི་གོང་སྡོམ་འགྲེལ་བར། ལྟུང་བ་དེའི་རིགས་གསར་དུ་བཅས་པའི་ལས་དང་པོ་པ་ཡིན་ན་གང་ཟག་དེར་ལྟུང་བ་མེད་པ་བདེན་ཡང༌། ལྟུང་བ་དེའི་རིགས་སྔར་ནས་བཅས་ཟིན་ཏེ་ཁྱད་པར་གསར་དུ་བཅས་པའི་རྟེན་ལ་ལྟུང་བ་དེའི་ལས་དང་པོ་ཡིན་ཡང་བཅས་འགལ་འབྱུང་བ་མི་འགལ་བར་གསུངས་ཀྱང་དཔྱད་པར་ཞུའོ། ། གནང་བ་བཅས་པའི་རྗེས་སུ་གནང་བ་རྗེས་བཅས་ནི་རྗེས་བཅས་མཚན་ཉིད་པ་ཡིན་གྱི། སྔར་ནས་གནང་བར་བཅས་ཟིན་པ་ནི་མ་ཡིན་ཏེ། གནང་བའི་བཅས་པ་འཕྲལ་བཅས་ཡིན་པའི་ཕྱིར་རོ། །དེ་ཡང་ཊཱི་ཀ་ལས། ད་དུང་བཅོམ་ལྡན་འདས་ཀྱིས་རྗེས་སུ་གནང་བར་མ་གྱུར་པའི་ཕྱིར་ཞེས་དགག་པ་བཅས་པའི་རྗེས་སུ་གནང་བ་རྗེས་བཅས་འཕྲལ་བཅས་སུ་བཤད་པས། གནང་བའི་བཅས་པ་གཞན་ཐམས་ཅད་ཀྱང་འཕྲལ་བཅས་ཡིན་པར་དེ་དང་རྒྱུ་མཚན་མཚུངས་པའི་ཕྱིར་རོ། །དེས་ན་བདུན་ནི་རྗེས་བཅས་མཚན་ཉིད་པ་ཡིན་ཞེས་མཚོ་ཊཱིཀ་ལས་གསུངས་སོ། །གསུམ་པ་གནང་བའི་ཚུལ་ལུགས་བྱེ་བྲག་ཏུ་གཏན་ལ་དབབ་པ་ནི། སྐབས་འདིར་འདི་སྐད་དུ་གནང་བ་རྣམས་འཕྲལ་ལ་གསར་དུ་གནང་བ་ཡིན་ནམ། སྔར་ནས་གནང་ཟིན་པ་ཞིག་གནང་བ་ཡིན། དང་པོ་ལྟར་ན། ས་ག་མའི་རིན་པོ་ཆེའི་རྒྱན་བརྗེད་དེ་ལུས་པ་ན་ཀུན་དགའ་བོས་མཐོང་ནས་དེས་བསམས་པ་འདི་ཉིད་རྐྱེན་དུ་མཛད་དེ་གནང་བར་འགྱུར་བའི་གནས་དེ་ཡོད་དོ་སྙམ་ནས་རིན་པོ་ཆེའི་རྒྱན་དེ་སྦེད་དུ་བཅུག་པའི་སྐབས་སུ་ལུང་རྣམ་འབྱེད་ལས། ངས་མ་གནང་ཡང་གནང་བར་འགྱུར་བ་དེ་ཁྱོད་ཀྱིས་ཤེས་པ་ལེགས་སོ་ལེགས་སོ་ཞེས་སྔར་ནས་ཉེས་པ་མེད་པར་གསུངས་པ་དང་འགལ་ལོ། །གཞན་ཡང་དགེ་སློང་གིས་བཙུན་མོའི་འཁོར་དུ་ནུབ་མོ་འགྲོ་བ་བཀག་པའི་རྗེས་སུ། ཤཱ་རིའི་བུས་བཙུན་མོ་དཔལ་ལྡན་ལ་ཉི་མ་ནུབ་པའི་རྗེས་སུ་ཆོས་བསྟན་ན་བཙུན་མོར་རྒྱུན་ཞུགས་ཐོབ་པར་འགྱུར་པར་ཤེས་ནས་མཚན་མོ་ཆོས་བསྟན་པར་བྱེད་པའི་སྐབས་སུ་ལུང་རྣམ་འབྱེད་ལས། ཤཱ་རིའི་བུས་བསམས་པ། འདི་ལྟར་བཅོམ་ལྡན་འདས་ཀྱིས་མ་གནང་མོད་ཀྱི། འདི་ཉིད་རྐྱེན་དུ་མཛད་ནས་གནང་བར་འགྱུར་བའི་གནས་དེ་ཡོད་དོ་སྙམ་ནས། དེ་གདུལ་བྱ་ལ་ལྟོས་པས་དེ་ཉིད་དུ་འདུག་སྟེ་ཆོས་བསྟན་པའི་སྐབས་དེ་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་བ། ཤཱ་རིའི་བུ་ལེགས་སོ་ལེགས་སོ་ཞེས་གསུངས་པ་དང་ཡང་འགལ་ལོ། །གཉིས་པ་ལྟར་ན་འདུག་གནས་སུ་ཟ་བའི་སྐབས་ཀྱི་ཊཱི་ཀ་ལས། ད་དུང་བཅོམ་ལྡན་འདས་ཀྱིས་རྗེས་སུ་གནང་པར་མ་གྱུར་པའི་ཕྱིར་ཏེ་གླེང་གཞི་དེ་ཁོ་ནའི་དབང་གིས་དེའི་མོད་ལ་བཅོམ་ལྡན་འདས་ཀྱིས་རྗེས་སུ་གནང་བར་མཛད་དོ་ཞེས་བཤད་པ་དང་འགལ་ལོ། །གལ་ཏེ་སྔར་ནས་གནང་ཟིན་ན་ནི། དགག་པ་བཅས་པའི་རྗེས་སུ་གནང་བ་རྗེས་བཅས་ཆོས་ཅན། གནང་བ་དེ་རྗེས་སུ་བཅས་པ་མ་ཡིན་པར་ཐལ། སྔར་ནས་གནང་ཟིན་པ་ཡིན་པའི་ཕྱིར་རོ་ཞེས་ཟེར་ན། དེ་དག་གི་ལན་འདི་ལྟར་གདབ་སྟེ། གནང་བ་ནི་སྔར་ནས་གནང་བ་ཡིན་ལ་གནང་བའི་བཅས་པ་ནི་འཕྲལ་ལ་གསར་དུ་འཆའ་བ་ཡིན་པས་གཞུང་དེ་དག་འགལ་བ་མེད་དོ། །འོ་ན་གནང་བ་དང་གནང་བའི་བཅས་པའི་ཁྱད་པར་གང་ཞེ་ན། གནང་བ་ནི་དང་པོ་ཉིད་ནས་ཐུགས་དགོངས་ཀྱིས་གནང་ཞིང་ངོ་བོ་ཉིད་ཀྱིས་ཉེས་མེད་དུ་གནས་པ་ཡིན་ལ། གནང་བའི་བཅས་པ་ནི་གསུང་གི་མཚམས་རྣམ་པར་བཞག་པ་ཁྱད་པར་ཅན་གྱིས་འཕྲལ་དུ་གནང་བའི་བཅས་པ་མཛད་པའོ། །ཞེས་མཚོ་ཊཱིཀ་ལས་གསུངས་སོ། །